Shivapurana 2.5.20: viṃśo'dhyāyaḥ | jalandharavadhopākhyāne sāmānyagaṇāsurayuddhavarṇanam
Śivapurāṇa (complete text) 2.5.20
- Language
- Sanskrit
Contents
- 2.5.20.62 — 5 parts
viṃśo'dhyāyaḥ | jalandharavadhopākhyāne sāmānyagaṇāsurayuddhavarṇanam
2.5.20.1
vyāsa uvāca |
sanatkumāra sarvajña kathā te śrāvitādbhutā |
mahāprabhoḥ śaṅkarasya yatra līlā ca pāvanī ||
2.5.20.2
idānīṃ brūhi suprītyā kṛpāṃ kṛtvā mamopari |
rāhurmuktaḥ kutra gataḥ puruṣeṇa mahāmune ||
2.5.20.3
sūta uvāca |
ityākarṇya vacastasya vyāsasyāmitamedhasaḥ |
pratyuvāca prasannātmā brahmaputro mahāmuniḥ ||
2.5.20.4
sanatkumāra uvāca |
rāhurvimukto yastena so'pi tadvarvarasthale |
ataḥ sa varvaro bhūta iti bhūmau prathāṃ gataḥ ||
2.5.20.5
tataḥ sa manyamānaḥ svaṃ punarjanimathānataḥ |
gatagarvo jagāmātha jalandharapuraṃ śanaiḥ ||
2.5.20.6
jalandharāya so'bhyetya sarvamīśaviceṣṭitam |
kathayāmāsa tadvyāsādvyāsa daityeśvarāya vai ||
2.5.20.7
jalandharastu tacchrutvā kopākulitavigrahaḥ |
babhūva balavānsindhuputro daityendrasattamaḥ ||
2.5.20.8
tataḥ kopaparādhīnamānaso daityasattamaḥ |
udyogaṃ sarvasainyānāṃ daityānāmādideśa ha ||
2.5.20.9
jalandhara uvāca |
nirgacchantvakhilā daityāḥ kālanemimukhāḥ khalu |
tathā śumbhaniśumbhādyā vīrāḥ svabalasaṃyutāḥ ||
2.5.20.10
koṭirvīrakulotpannāḥ kambuvaṃśyāśca daurhṛdāḥ |
kālakāḥ kālakeyāśca mauryā dhaumrāstathaiva ca ||
2.5.20.11
ityājñāpyāsurapatiḥ sindhuputraḥ pratāpavān |
nirjagāmāśu daityānāṃ koṭibhiḥ parivāritaḥ ||
2.5.20.12
tatastasyāgrataḥ śukro rāhuśchinnaśiro'bhavat |
mukuṭaścāpatadbhūmau vegātpraskhalitastadā ||
2.5.20.13
vyarājata nabhaḥ pūrṇaṃ prāvṛṣīva yathā ghanaiḥ |
jātā aśakunā bhūri mahānidrāvisūcakāḥ ||
2.5.20.14
tasyodyogaṃ tathā dṛṣṭvā gīrvāṇāste savāsavāḥ |
alakṣitāstadā jagmuḥ kailāsaṃ śaṅkarālayam ||
2.5.20.15
tatra gatvā śivaṃ dṛṣṭvā supraṇamya savāsavāḥ |
devāḥ sarve nataskandhāḥ karau baddhvā ca tuṣṭuvuḥ ||
2.5.20.16
devā ūcuḥ |
devadeva mahādeva karuṇākara śaṅkara |
namaste'stu maheśā na pāhi naḥ śaraṇāgatān ||
2.5.20.17
vihvalāḥ vayamatyugraṃ jalandharakṛtātprabho |
upadravātsadevendrāḥ sthānabhraṣṭāḥ kṣitisthitāḥ ||
2.5.20.18
na jānāsi kathaṃ svāmindevāpattimimāṃ prabho |
tasmānno rakṣaṇārthāya jahi sāgaranandanam ||
2.5.20.19
asmākaṃ rakṣaṇārthāya yatpūrvaṃ garuḍadhvajaḥ |
niyojitastvayā nātha na kṣamaḥ so'dya rakṣitum ||
2.5.20.20
tadadhīno gṛhe tasya ramayā saha tiṣṭhati |
vayaṃ ca tatra tiṣṭhāmastadājñāvaśagāḥ surāḥ ||
2.5.20.21
alakṣitā vayaṃ cātrāgatāḥ śambho tvadantikam |
sa āyāti tvayā karttuṃ raṇaṃ sindhusuto balī ||
2.5.20.22
ataḥ svāmin raṇe tvaṃ tamavilambaṃ jalandharam |
hantumarhasi sarvajña pāhi naḥ śaraṇāgatān ||
2.5.20.23
sanatkumāra uvāca |
ityuktvā te surāḥ sarve prabhuṃ natvā savāsavāḥ |
pādau nirīkṣya santasthurmaheśasya vinamrakāḥ ||
2.5.20.24
iti devavacaḥ śrutvā prahasya vṛṣabhadhvajaḥ |
drutaṃ viṣṇuṃ samāhūya vacanaṃ cedamabravīt ||
2.5.20.25
īśvara uvāca |
hṛṣīkeśa mahāviṣṇo devāścātra samāgatāḥ |
jalandharakṛtāpīḍāḥ śaraṇaṃ me'tivihvalāḥ ||
2.5.20.26
jalandharaḥ kathaṃ viṣṇo saṅgare na hatastvayā |
tad gṛhaṃ cāpi yāto'si tyaktvā vaikuṇṭhamātmanaḥ ||
2.5.20.27
mayā niyojitastvaṃ hi sādhusaṃrakṣaṇāya ca |
nigrahāya khalānāṃ ca svatantreṇa vihāriṇā ||
2.5.20.28
sanatkumāra uvāca |
ityākarṇya maheśasya vacanaṃ garuḍadhvajaḥ |
pratyuvāca vinītātmā natakaḥ sāñjalirhariḥ ||
2.5.20.29
viṣṇuruvāca |
tavāṃśasambhavatvācca bhrātṛtvācca tathā śriyaḥ |
mayā na nihataḥ saṅkhye tvamenaṃ jahi dānavam ||
2.5.20.30
mahābalo mahāvīro'jeyassarvadivaukasām |
anyeṣāṃ cāpi deveśa satyametad bravīmyaham ||
2.5.20.31
mayā kṛto raṇastena ciraṃ devānvitena vai |
madupāyo na pravṛttastasmindānavapuṅgave ||
2.5.20.32
tatparākramatastuṣṭo varaṃ brūhītyahaṃ khalu |
iti madvacanaṃ śrutvā sa vavre varamuttamam ||
2.5.20.33
madbhaginyā mayā sārddhaṃ madgehe sasuro vasa |
madadhīno mahāviṣṇo ityahaṃ tadgṛhaṃ gataḥ ||
2.5.20.34
sanatkumāra uvāca |
iti viṣṇorvacaḥ śrutvā śakaraḥ sa maheśvaraḥ |
vihasyovāca suprītaḥ sadayo bhaktavatsalaḥ ||
2.5.20.35
maheśvara uvāca |
he viṣṇo suravarya tvaṃ śṛṇu madvākyamādarāt |
jalandharaṃ mahādaityaṃ haniṣyāmi na saṃśayaḥ ||
2.5.20.36
svasthānaṃ gaccha nirbhīto devā gacchantvapi dhruvam |
nirbhayā vītasandehā hataṃ matvā'surādhipam ||
2.5.20.37
sanatkumāra uvāca |
iti śrutvā maheśasya vacanaṃ sa ramāpatiḥ |
sanirjaro jagāmāśu svasthānaṃ gatasaṃśayaḥ ||
2.5.20.38
etasminnantare vyāsa sa daityendro'tivikramaḥ |
sannaddhairasuraissārddhaṃ śailaprāntaṃ yayau balī ||
2.5.20.39
kailāsamavarudhyātha mahatyā senayā yutaḥ |
santasthau kālasaṅkāśaḥ kurvansiṃharavaṃ mahān ||
2.5.20.40
atha kolāhalaṃ śrutvā daityanādasamudbhavam |
cukrodhātimaheśāno mahālīlaḥ khalāntakaḥ ||
2.5.20.41
samādideśa saṅkhyāya svagaṇānsa mahābalān |
nandyādikānmahādevo mahotiḥ kautukī haraḥ ||
2.5.20.42
nandībhamukhasenānīmukhāssarve śivājñayā |
gaṇāśca samanahyanta yuddhāyātitvarānvitāḥ ||
2.5.20.43
avaterurgaṇāḥ sarve kailāsātkrodhadurmadāḥ |
valganto raṇaśabdāṃśca mahāvīrā raṇāya hi ||
2.5.20.44
tataḥ samabhavadyuddhaṃ kailāsopatyakāsu vai |
pramathādhipadaityānāṃ ghoraṃ śastrāstrasaṅkulam ||
2.5.20.45
bherīmṛdaṅgaśaṅkhaughairniḥsvānairvīraharṣaṇaiḥ |
gajāśvarathaśabdaiśca nāditā bhūrvyakampata ||
2.5.20.46
śaktitomarabāṇaughairmusalaiḥ pāśapaṭṭiśaiḥ |
vyarājata nabhaḥ pūrṇaṃ muktābhiriva saṃvṛtam ||
2.5.20.47
nihatairiva nāgāśvaiḥ pattibhirbhūrvyarājata |
vajrāhataiḥ parvatendraiḥ pūrvamāsītsusaṃvṛtā ||
2.5.20.48
pramathāhatadaityaughairdaityāhatagaṇaistathā |
vasāsṛṅmāṃsapaṅkāḍhyā bhūragamyābhavattadā ||
2.5.20.49
pramathāhatadaityaughānbhārgavaḥ samajīvayat |
yuddhe punaḥ punaścaiva mṛtasañjīvanī balāt ||
2.5.20.50
dṛṣṭvā vyākulitāṃstāṃstu gaṇāḥ sarve bhayārditāḥ |
śaśaṃsurdevadevāya sarve śukraviceṣṭitam ||
2.5.20.51
tacchrutvā bhagavān rudraścakāra krodhamulbaṇam |
bhayaṅkaro'tiraudraśca babhūva prajvalandiśaḥ ||
2.5.20.52
atha rudramukhātkṛtyā babhūvātīva bhīṣaṇā |
tālajaṅghā darīvaktrā stanāpīḍitabhūruhā ||
2.5.20.53
sā yuddhabhūmiṃ tarasā sasāda munisattama |
vicacāra mahābhīmā bhakṣayantī mahāsurān ||
2.5.20.54
atha sā raṇamadhye hi jagāma gatabhīrdrutam |
yatrāste saṃvṛto daityavarendraissa hi bhārgavaḥ ||
2.5.20.55
svatejasā nabho vyāpya bhūmiṃ kṛtvā ca sā mune |
bhārgavaṃ svabhage dhṛtvā jagāmāntarhitā nabhaḥ ||
2.5.20.56
vidhṛtaṃ bhārgavaṃ dṛṣṭvā daityasainyagaṇāstathā |
pramlānavadanā yuddhānnirjagmuryuddhadurmadāḥ ||
2.5.20.57
atho'bhajyata daityānāṃ senā gaṇabhayārditā |
vāyuvegahatā yadvatprakīrṇā tṛṇasaṃhatiḥ ||
2.5.20.58
bhagnāṃ gaṇabhayāddaityasenāṃ dṛṣṭvātimarṣitāḥ |
niśumbhaśumbhau senānyau kālanemiśca cukrudhuḥ ||
2.5.20.59
trayaste vārayāmāsurgaṇasenāṃ mahābalāḥ |
muñcantaḥ śaravarṣāṇi prāvṛṣīva balāhakāḥ ||
2.5.20.60
tato daityaśaraughāste śalabhānāmiva vrajāḥ |
rurudhuḥ khaṃ diśaḥ sarvā gaṇasenāmakampayan ||
2.5.20.61
gaṇāḥ śaraśatairbhinnā rudhirāsāravarṣiṇaḥ |
vasantakiṃśukābhāsā na prājānanhi kiñcana ||
2.5.20.62
tataḥ prabhagnaṃ svabalaṃ vilokya nandyādilambodarakārttikeyāḥ |
tvarānvitā daityavarānprasahya nivārayāmāsuramarṣaṇāste ||
2.5.20.62.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne sāmānyagaṇāsurayuddhavarṇanaṃ nāma viṃśo'dhyāyaḥ ||
2.5.20.62.p2
śrīgaṇeśāya namaḥ ||
2.5.20.62.p3
śrīgaurīśaṅkarābhyāṃ namaḥ ||
2.5.20.62.p4
śrīśivamahāpurāṇam ||
2.5.20.62.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (3)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit
- Mahābhāgavatapurāṇa — Sanskrit