Shivapurana 2.5.25: pañcaviṃśo'dhyāyaḥ | jalandharavadhopākhyāne devastutivarṇanam
Śivapurāṇa (complete text) 2.5.25
- Language
- Sanskrit
Contents
pañcaviṃśo'dhyāyaḥ | jalandharavadhopākhyāne devastutivarṇanam
2.5.25.1
sanatkumāra uvāca |
atha brahmādayo devā munayaścākhilāstathā |
tuṣṭuvurdevadeveśaṃ vāgbhiriṣṭābhirānatāḥ ||
2.5.25.2
devā ūcuḥ |
devadeva mahādeva śaraṇāgatavatsala |
sādhusaukhyapradastvaṃ hi sarvadā bhaktaduḥkhahā ||
2.5.25.3
tvaṃ mahādbhutasallīlo bhaktigamyo durāsadaḥ |
durārādhyo'satāṃ nātha prasannaḥ sarvadā bhava ||
2.5.25.4
vedo'pi mahimānaṃ te na jānāti hi tattvataḥ |
yathāmati mahātmānaḥ sarve gāyanti sadyaśaḥ ||
2.5.25.5
māhātmyamatigūḍhaṃ te sahasravadanādayaḥ |
sadā gāyanti suprītyā punanti svagiraṃ hi te ||
2.5.25.6
kṛpayā tava deveśa brahmajñānī bhavejjaḍaḥ |
bhaktigamyaḥ sadā tvaṃ vā iti vedā bruvanti hi ||
2.5.25.7
tvaṃ vai dīnadayāluśca sarvatra vyāpakaḥ sadā |
āvirbhavasi sadbhaktyā nirvikāraḥsatāṃ gatiḥ ||
2.5.25.8
bhaktyaiva te maheśāna bahavaḥ siddhimāgatāḥ |
iha sarvasukhaṃ bhuktvā duḥkhitā nirvikārataḥ ||
2.5.25.9
purā yadupatirbhakto dāśārhaḥ siddhimāgataḥ |
kalāvatī ca tatpatnī bhaktyaiva paramāṃ prabho ||
2.5.25.10
tathā mitrasaho rājā madayantī ca tatpriyā |
bhaktyaiva tava deveśa kaivalyaṃ paramaṃ yayau ||
2.5.25.11
sauminī nāma tanayā kaikeyāgrabhuvastathā |
tava bhaktyā sukhaṃ prāpa paraṃ sadyogidurlabham ||
2.5.25.12
vimarṣaṇo nṛpavaraḥ saptajanmāvadhi prabho |
bhuktvā bhogāṃśca vividhāṃstvadbhaktyā prāpa sadgatim ||
2.5.25.13
candraseno nṛpavaraḥ tvadbhaktyā sarvabhogabhuk |
duḥkhamuktaḥ sukhaṃ prāpa paramatra paratra ca ||
2.5.25.13.p1
gopīputraḥ śrīkaraste bhaktyā bhuktveha sadgatim |
paraṃ sukhaṃ mahāvīraśiṣyaḥ prāpa paratra vai | 14 ||
2.5.25.15
tvaṃ satyarathabhūjānerduḥkhahartā gatipradaḥ |
dharmaguptaṃ rājaputramatārṣīḥsukhinaṃ tviha ||
2.5.25.16
tathā śucivrataṃ vipramadaridraṃ mahāprabho |
tvadbhaktivartinaṃ mātrā jñāninaṃ kṛpayā'karoḥ ||
2.5.25.17
citravarmā nṛpavarastvadbhaktyā prāpa sadgatim |
iha loke sadā bhuktvā bhogānamaradurlabhān ||
2.5.25.18
candrāṅgado rājaputraḥ sīmantinyā striyā saha |
vihāya sakalaṃ duḥkhaṃ sukhī prāpa mahāgatim ||
2.5.25.19
dvijo mandaranāmāpi veśyāgāmī khalo'dhamaḥ |
tvadbhaktaḥ śiva sampūjya tayā saha gatiṃ gataḥ ||
2.5.25.20
bhadrāyuste nṛpasutaḥ sukhamāpa gatavyathaḥ |
tvadbhaktikṛpayā mātrā gatiṃ ca paramāṃ prabho ||
2.5.25.21
sarvastrībhoganirato durjanastava sevayā |
vimukto'bhūdapi sadā'bhakṣyabhojī maheśvara ||
2.5.25.22
śambaraḥ śaṅkare bhaktaścitābhasmadharaḥ sadā |
niyamādbhasmanaḥ śambho svastriyā te puraṃ gataḥ ||
2.5.25.23
bhadrasenasya tanayastathā mantrisutaḥ prabho |
sudharmaśubhakarmāṇo sadā rudrākṣadhāriṇau ||
2.5.25.24
tvatkṛpātaśca tau muktāvāstāṃ bhuktveha satsukham |
pūrvajanmani yau kīśakukkuṭau rudrabhūṣaṇau ||
2.5.25.25
piṅgalā ca mahānandā veśye dve tava bhaktitaḥ |
sadgatiṃ prāpaturnātha bhaktoddhāraparāyaṇa ||
2.5.25.26
śāradā vipratanayā bālavaidhavyamāgatā |
tava bhakteḥ prabhāvāttu putrasaubhāgyavatyabhūt ||
2.5.25.27
bindugo dvijamātro hi veśyābhogī ca tatpriyā |
vañcukā tvadyaśaḥ śrutvā paramāṃ gatimāyayau ||
2.5.25.28
ityādi bahavaḥ siddhiṃ gatā jīvāstava prabho |
bhaktibhāvānmaheśāna dīnabandho kṛpālaya ||
2.5.25.29
tvaṃ paraḥ prakṛterbrahma puruṣātparameśvara |
nirguṇastriguṇādhāro brahmaviṣṇuharātmakaḥ ||
2.5.25.30
nānākarmakaro nityaṃ nirvikāro'khileśvaraḥ |
vayaṃ brahmādayaḥ sarve tava dāsā maheśvara ||
2.5.25.31
prasanno bhava deveśa rakṣāsmānsarvadā śiva |
tvatprajāśca vayaṃ nātha sadā tvaccharaṇaṃ gatāḥ ||
2.5.25.32
sanatkumāra uvāca |
iti stutvā ca te devā brahmādyāḥ samunīśvarāḥ |
tūṣṇīṃ babhūvurhi tadā śivāṅghridvandvacetasaḥ ||
2.5.25.33
atha śambhurmaheśānaḥ śrutvā devastutiṃ śubhām |
dattvā varān varān sadyaḥ tatraivāntardadhe prabhuḥ ||
2.5.25.34
devāḥsarve'pi muditā brahmādyā hataśatravaḥ |
svaṃ svaṃ dhāma yayuḥ prītā gāyantaḥ śivasadyaśaḥ ||
2.5.25.35
idaṃ paramamākhyānaṃ jalandharavimardanam |
maheśacaritaṃ puṇyaṃ mahāghaughavināśanam ||
2.5.25.36
devastutiriyaṃ puṇyā sarvapāpapraṇāśinī |
sarvasaukhyapradā nityaṃ maheśānandadāyinī ||
2.5.25.37
yaḥ paṭhetpāṭhayedvāpi samākhyānamidaṃ dvayam |
sa bhuktveha paraṃ saukhyaṃ gāṇapatyamavāpnuyāt ||
2.5.25.37.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne devastutivarṇanaṃ nāma pañcaviṃśo'dhyāyaḥ ||
2.5.25.37.p2
śrīgaṇeśāya namaḥ ||
2.5.25.37.p3
śrīgaurīśaṅkarābhyāṃ namaḥ ||
2.5.25.37.p4
śrīśivamahāpurāṇam ||
2.5.25.37.p5
dvitīyāyāṃ rudrasaṃhitāyāṃ pañcamo yuddhakhaṇḍe