Shivapurana 2.5.26: ṣaḍviṃśo'dhyāyaḥ | jalandharavadhānantaradevīstutiviṣṇumohavidhvaṃsavarṇanam
Śivapurāṇa (complete text) 2.5.26
- Language
- Sanskrit
Contents
- 2.5.26.61 — 5 parts
ṣaḍviṃśo'dhyāyaḥ | jalandharavadhānantaradevīstutiviṣṇumohavidhvaṃsavarṇanam
2.5.26.1
vyāsa uvāca |
brahmaputra namaste'stu dhanyastvaṃ śaivasattama |
yacchrāvitā mahādivyā katheyaṃ śāṅkarī śubhā ||
2.5.26.2
idānīṃ brūhi suprītyā caritaṃ vaiṣṇavaṃ mune |
sa vṛndāṃ mohayitvā tu kimakārṣītkuto gataḥ ||
2.5.26.3
sanatkumāra uvāca |
śṛṇu vyāsa mahāprājña śaivapravara sattama |
vaiṣṇavaṃ caritaṃ śambhucaritāḍhyaṃ sunirmalam ||
2.5.26.4
maunībhūteṣu deveṣu brahmādiṣu maheśvaraḥ |
suprasanno'vadacchambhuḥ śaraṇāgatavatsalaḥ ||
2.5.26.5
śambhuruvāca |
brahmandevavarāḥ sarve bhavadarthe mayā hataḥ |
jalandharo madaṃśo'pi satyaṃ satyaṃ vadāmyaham ||
2.5.26.6
sukhamāpurna vā tātāḥ satyaṃ brūtāmarāḥ khalu |
bhavatkṛte hi me līlā nirvikārasya sarvadā ||
2.5.26.7
sanatkumāra uvāca |
atha brahmādayo devā harṣādutphullalocanāḥ |
praṇamya śirasā rudraṃ śaśaṃsurviṣṇuceṣṭitam ||
2.5.26.8
devā ūcuḥ |
mahādeva tvayā deva rakṣitāḥ śatrujād bhayāt |
kiñcidanyatsamudbhūtaṃ tatra kiṃ karavāmahai ||
2.5.26.9
vṛndā vimohitā nātha viṣṇunā hi prayatnataḥ |
bhasmībhūtā drutaṃ vahnau paramāṃ gatimāgatā ||
2.5.26.10
vṛndālāvaṇyasambhrānto viṣṇustiṣṭhati mohitaḥ |
taccitābhasmasandhārī tava māyāvimohitaḥ ||
2.5.26.11
sa siddhamunisaṅghaiśca bodhito'smābhirādarāt |
na budhyate hariḥ so'tha tava māyāvimohitaḥ ||
2.5.26.12
kṛpāṃ kuru maheśāna viṣṇuṃ bodhaya bodhaya |
tvadadhīnamidaṃ sarvaṃ prākṛtaṃ sacarācaram ||
2.5.26.13
sanatkumāra uvāca |
ityākarṇya maheśo hi vacanaṃ tridivaukasām |
pratyuvāca mahālīlaḥ svacchandastānkṛtāñjalīn ||
2.5.26.14
maheśa uvāca |
he brahmanhe surāḥ sarve madvākyaṃ śṛṇutādarāt |
mohinī sarvalokānāṃ mama māyā duratyayā ||
2.5.26.15
tadadhīnaṃ jagatsarvaṃ yaddevāsuramānuṣam |
tayaiva mohito viṣṇuḥ kāmādhīno'bhavaddhariḥ ||
2.5.26.16
umākhyā sā mahādevī tridevajananī parā |
mūlaprakṛtirākhyātā surāmā girijātmikā ||
2.5.26.17
gacchadhvaṃ śaraṇaṃ devā viṣṇumohāpanuttaye |
śaraṇyāṃ mohinīṃ māyāṃ śivākhyāṃ sarvakāmadām ||
2.5.26.18
stutiṃ kuruta tasyāśca macchaktestoṣakāriṇīm |
suprasannā yadi ca sā sarvaṃ kāryaṃ kariṣyati ||
2.5.26.19
sanatkumāra uvāca |
ityuktvā tānsurān śambhuḥ pañcāsyo bhagavānharaḥ |
antardadhe drutaṃ vyāsa sarvaiśca svagaṇaiḥ saha ||
2.5.26.20
devāśca śāsanācchambhorbrahmādyā hi savāsavāḥ |
manasā tuṣṭuvurmūlaprakṛtiṃ bhaktavatsalām ||
2.5.26.21
devā ūcuḥ |
yadudbhavāḥ sattvarajastamoguṇāḥ sargasthitidhvaṃsavidhānakārakāḥ |
yadicchayā viśvamidaṃ bhavābhavau tanoti mūlaprakṛtiṃ natāḥ sma tām ||
2.5.26.22
pāhi trayoviṃśaguṇān suśabditān jagatyaśeṣe samadhiṣṭhitā parā |
yadrūpakarmāṇi jagattrayo'pi te vidurna mūlaprakṛtiṃ natāḥ sma tām ||
2.5.26.23
yadbhaktiyuktāḥ puruṣāstu nityaṃ dāridryamohātyayasambhavādīn |
na prāpnuvantyeva hi bhaktavatsalāṃ sadaiva mūlaprakṛtiṃ natāḥ sma tām ||
2.5.26.24
kuru kāryaṃ mahādevi devānāṃ naḥ pareśvari |
viṣṇumohaṃ hara śive durge devi namo'stu te ||
2.5.26.25
jalandharasya śambhośca raṇe kailāsavāsinaḥ |
pravṛtte tadvadhārthāya gaurīśāsanataḥ śive ||
2.5.26.26
vṛndā vimohitā devi viṣṇunā hi prayatnataḥ |
svavṛṣāttyājitā vahnau bhasmībhūtā gatiṃ gatā ||
2.5.26.27
jalandharo hato yuddhe tadbhayānmocitā vayam |
giriśena kṛpāṃ kṛtvā bhaktānugrahakāriṇā ||
2.5.26.28
tadājñayā vayaṃ sarve śaraṇaṃ te samāgatāḥ |
tvaṃ hi śambhuryuvāṃ devi bhaktoddhāraparāyaṇau ||
2.5.26.29
vṛndālāvaṇyasambhrānto viṣṇustiṣṭhati tatra vai |
taccitābhasmasandhārī jñānabhraṣṭo vimohitaḥ ||
2.5.26.30
saṃsiddhasurasaṅghaiśca bodhito'pi maheśvari |
na budhyate hariḥ so'tha tava māyāvimohitaḥ ||
2.5.26.31
kṛpāṃ kuru mahādevi hariṃ bodhaya bodhaya |
yathā svalokaṃ pāyātsa sucittaḥ surakāryakṛt ||
2.5.26.32
iti stuvantaste devāḥ tejomaṇḍalamāsthitam |
dadṛśurgagane tatra jvālāvyāptadigantaram ||
2.5.26.33
tanmadhyādbhāratīṃ sarve brahmādyāśca savāsavāḥ |
amarāḥ śuśruvurvyāsa kāmadāṃ vyomacāriṇīm ||
2.5.26.34
ākāśavāṇyuvāca |
ahameva tridhā bhinnā tiṣṭhāmi trividhairguṇaiḥ |
gaurī lakṣmīḥ surā jyotī rajaḥsattvatamoguṇaiḥ ||
2.5.26.35
tatra gacchata yūyaṃ vai tāsāmantika ādarāt |
madājñayā prasannāstā vidhāsyante tadīpsitam ||
2.5.26.36
sanatkumāra uvāca |
śṛṇvatāmiti tāṃ vācamantarddhānamagānmahaḥ |
devānāṃ vismayotphullanetrāṇāṃ tattadā mune ||
2.5.26.37
tataḥ sarve'pi te devāḥ śrutvā tadvākyamādarāt |
gaurīṃ lakṣmīṃ surāṃ caiva nemustadvākyacoditāḥ ||
2.5.26.38
tuṣṭuvuśca mahābhaktyā devīstāḥ sakalāḥsurāḥ |
nānāvidhābhirvāgbhiste brahmādyā natamastakāḥ ||
2.5.26.39
tato'raṃ vyāsa devyastā āvirbhūtāśca tatpuraḥ |
mahādbhutaiḥ svatejobhirbhāsayantyo digantaram ||
2.5.26.40
atha tā amarā dṛṣṭvā suprasannena cetasā |
praṇamya tuṣṭuvurbhaktyā svakāryaṃ ca nyavedayan ||
2.5.26.41
tataścaitāḥ surāndṛṣṭvā praṇatānbhaktavatsalāḥ |
bījāni pradadustebhyo vākyamūcuśca sādaram ||
2.5.26.42
devya ūcuḥ |
imāni tatra bījāni viṣṇuryatrāvatiṣṭhati |
nirvapadhvaṃ tataḥ kāryaṃ bhavatāṃ siddhimeṣyati ||
2.5.26.43
sanatkumāra uvāca |
ityuktvā tāstato devyo'ntarhitā abhavanmune |
rudraviṣṇuvidhīnāṃ hi śaktayastriguṇātmikāḥ ||
2.5.26.44
tatastuṣṭāḥ surāḥsarve brahmādyāśca savāsavāḥ |
tāni bījāni saṅgṛhya yayuryatra hariḥ sthitaḥ ||
2.5.26.45
vṛndācitābhūmitale cikṣipustāni te surāḥ |
smṛtvā tāḥ saṃsthitāstatra śivaśaktyaṃśakā mune ||
2.5.26.46
nikṣiptebhyaśca bījebhyo vanaspatyastrayo'bhavan |
dhātrī ca mālatī caiva tulasī ca munīśvara ||
2.5.26.47
dhātryudbhavā smṛtā dhātrī mābhavā mālatī smṛtā |
gaurībhavā ca tulasī tamaḥsattvarajoguṇāḥ ||
2.5.26.48
viṣṇurvanaspatīrdṛṣṭvā tadā strīrūpiṇīrmune |
udatiṣṭhattadā tāsu rāgātiśayavibhramaḥ ||
2.5.26.49
dṛṣṭvā sa yācate mohātkāmāsaktena cetasā |
taṃ cāpi tulasī dhātrī rāgeṇaivāvalokatām ||
2.5.26.50
yacca bījaṃ purā lakṣmyā māyayaiva samarpitam |
tasmāttadudbhavā nārī tasminnīrṣyāparābhavat ||
2.5.26.51
ataḥ sā barbarītyākhyāmavāpātīva garhitām |
dhātrītulasyau tadrāgāttasya prītiprade sadā ||
2.5.26.52
tato vismṛtaduḥkho'sau viṣṇustābhyāṃ sahaiva tu |
vaikuṇṭhamagamattuṣṭaḥ sarvadevairnamaskṛtaḥ ||
2.5.26.53
kārtike māsi viprendra dhātrī ca tulasī sadā |
sarvadevapriyā jñeyā viṣṇoścaiva viśeṣataḥ ||
2.5.26.54
tatrāpi tulasī dhanyātīva śreṣṭhā mahāmune |
tyaktvā gaṇeśaṃ sarveṣāṃ prītidā sarvakāmadā ||
2.5.26.55
vaikuṇṭhasthaṃ hariṃ dṛṣṭvā brahmendrādyāśca te'marāḥ |
natvā stutvā mahāviṣṇuṃ svasvadhāmāni vai yayuḥ ||
2.5.26.56
vaikuṇṭho'pi svalokastho bhraṣṭamohaḥ subodhavān |
sukhī cābhūnmuniśreṣṭha pūrvavatsaṃsmaran śivam ||
2.5.26.57
ityākhyānamaghaughaghnaṃ sarvakāmapradaṃ nṛṇām |
sarvakāmavikāraghnaṃ sarvavijñānavarddhanam ||
2.5.26.58
ya idaṃ hi paṭhennityaṃ pāṭhayedvāpi bhaktimān |
śṛṇuyācchrāvayedvāpi sa yāti paramāṃ gatim ||
2.5.26.59
paṭhitvā ya idaṃ dhīmānākhyānaṃ paramottamam |
saṅgrāmaṃ praviśedvīro vijayī syānna saṃśayaḥ ||
2.5.26.60
viprānāṃ brahmavidyādaṃ kṣatriyāṇāṃ jayapradam |
vaiśyānāṃ sarvadhanadaṃ śūdrāṇāṃ sukhadaṃ tvidam ||
2.5.26.61
śambhubhaktipradaṃ vyāsa sarveṣāṃ pāpanāśanam |
ihaloke paratrāpi sadā sadgatidāyakam ||
2.5.26.61.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhānantaradevīstutiviṣṇumohavidhvaṃsavarṇanaṃ nāma ṣaḍviṃśo'dhyāyaḥ ||
2.5.26.61.p2
śrīgaṇeśāya namaḥ ||
2.5.26.61.p3
śrīgaurīśaṅkarābhyāṃ namaḥ ||
2.5.26.61.p4
śrīśivamahāpurāṇam ||
2.5.26.61.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit