Shivapurana 2.5.27: saptaviṃśo'dhyāyaḥ | śaṅkhacūḍotpattivarṇanam
Śivapurāṇa (complete text) 2.5.27
- Language
- Sanskrit
Contents
- 2.5.27.36 — 5 parts
saptaviṃśo'dhyāyaḥ | śaṅkhacūḍotpattivarṇanam
2.5.27.1
sanatkumāra uvāca |
athānyacchambhucaritaṃ premataḥ śṛṇu vai mune |
yasya śravaṇamātreṇa śivabhaktirdṛḍhā bhavet ||
2.5.27.2
śaṅkhacūḍābhidho vīro dānavo devakaṇṭakaḥ |
yathā śivena nihato raṇamūrdhni triśūlataḥ ||
2.5.27.3
tacchambhucaritaṃ divyaṃ pavitraṃ pāpanāśanam |
śṛṇu vyāsa susamprītyā vacmi susnehatastava ||
2.5.27.4
marīcestanayo dhātuḥ putro yaḥ kaśyapo muniḥ |
sa dharmiṣṭhaḥsṛṣṭikarttā vidyājñaptaḥ prajāpatiḥ ||
2.5.27.5
dakṣaḥ prītyā dadau tasmai nijakanyāstrayodaśa |
tāsāṃ prasūtiḥ prasabhaṃ na kathyā bahuvistṛtāḥ ||
2.5.27.6
yatra devādinikhilaṃ carācaramabhūjjagat |
vistarāttatpravaktuṃ ca kaḥ kṣamo'sti trilokake ||
2.5.27.7
prastutaṃ śṛṇu vṛttāntaṃ śambhulīlānvitaṃ ca yat |
tadeva kathayāmyadya śṛṇu bhaktipravarddhanam ||
2.5.27.8
tāsu kaśyapapatnīṣu danustvekā varāṅganā |
mahārūpavatī sādhvī patisaubhāgyavarddhitā ||
2.5.27.9
āsaṃstasyā danoḥ putrā bahavo balavattarāḥ |
teṣāṃ nāmāni nocyante vistārabhayato mune ||
2.5.27.10
teṣveko vipracittistu mahābalaparākramaḥ |
tatputro dhārmiko dambho viṣṇubhakto jitendriyaḥ ||
2.5.27.11
nāsīttattanayo vīrastataścintāparo'bhavat |
śukrācāryaṃ guruṃ kṛtvā kṛṣṇamantramavāpya ca ||
2.5.27.12
tapaścakāra paramaṃ puṣkare lakṣavarṣakam |
kṛṣṇamantraṃ jajāpaiva dṛḍhaṃ baddhvāsanaṃ ciram ||
2.5.27.13
tapaḥ prakurvatastasya mūrdhno niḥsṛtya prajvalat |
visasāra ca sarvatra tattejo hi suduḥsaham ||
2.5.27.14
tena taptāḥ surāḥ sarve munayo manavastathā |
sunāsīraṃ puraskṛtya brahmāṇaṃ śaraṇaṃ yayuḥ ||
2.5.27.15
praṇamya ca vidhātāraṃ dātāraṃ sarvasampadām |
tuṣṭuvurvikalāḥ procuḥ svavṛttāntaṃ viśeṣataḥ ||
2.5.27.16
tadākarṇya vidhātāpi vaikuṇṭhaṃ tairyayau saha |
tadeva vijñāpayituṃ nikhilena hi viṣṇave ||
2.5.27.17
tatra gatvā trilokeśaṃ viṣṇuṃ rakṣākaraṃ param |
praṇamya tuṣṭuvuḥsarve karau baddhvā vinamrakāḥ ||
2.5.27.18
devā ūcuḥ |
devadeva na jānīmo jātaṃ kiṃ kāraṇaṃ tviha |
santaptāḥ sakalā jātāstejasā kena tadvada ||
2.5.27.19
taptātmanāṃ tvamavitā dīnabandho'nujīvinām |
rakṣa rakṣa ramānātha śaraṇyaḥ śaraṇāgatān ||
2.5.27.20
sanatkumāra uvāca |
iti śrutvā vaco viṣṇurbrahmādīnāṃ divaukasām |
uvāca vihasanpremṇā śaraṇāgatavatsalaḥ ||
2.5.27.21
viṣṇuruvāca |
susvasthā bhavatāvyagrā na bhayaṃ kurutāmarāḥ |
nopaplavā bhaviṣyante layakālo na vidyate ||
2.5.27.22
dānavo dambhanāmā hi madbhaktaḥ kurute tapaḥ |
putrārthī śamayiṣyāmi tamahaṃ varadānataḥ ||
2.5.27.23
sanatkumāra uvāca |
ityuktāste surāḥsarve dhairyamālambya vai mune |
yayurbrahmādayaḥ susthāḥ svasvadhāmāni sarvaśaḥ ||
2.5.27.24
acyuto'pi varaṃ dātuṃ puṣkaraṃ sañjagāma ha |
tapaścarati yatrāsau dambhanāmā hi dānavaḥ ||
2.5.27.25
tatra gatvā varaṃ brūhītyuvāca parisāntvayan |
girā sūnṛtayā bhaktaṃ japantaṃ svamanuṃ hariḥ ||
2.5.27.26
tacchrutvā vacanaṃ viṣṇordṛṣṭvā taṃ ca puraḥ sthitam |
praṇanāma mahābhaktyā tuṣṭāva ca punaḥ punaḥ ||
2.5.27.27
dambha uvāca |
devadeva namaste'stu puṇḍarīkavilocana |
ramānātha trilokeśa kṛpāṃ kuru mamopari ||
2.5.27.28
svabhaktaṃ tanayaṃ dehi mahābala parākramam |
trilokajayinaṃ vīramajeyaṃ ca divaukasām ||
2.5.27.29
sanatkumāra uvāca |
ityukto dānavendreṇa taṃ varaṃ pradadau hariḥ |
nivartya cogratapasaḥ tataḥ so'ntaradhānmune ||
2.5.27.30
gate harau dānavendraḥ kṛtvā tasyai diśe namaḥ |
jagāma svagṛhaṃ siddhatapāḥ pūrṇamanorathaḥ ||
2.5.27.31
kālenālpena tatpatnī sagarbhā bhāgyavatyabhūt |
rarāja tejasātyantaṃ rocayantī gṛhāntaram ||
2.5.27.32
sudāmā nāma gopo yo kṛṣṇasya pārṣadāgraṇīḥ |
tasyā garbhe viveśāsau rādhāśaptaśca yanmune ||
2.5.27.33
asūta samaye sādhvī suprabhaṃ tanayaṃ tataḥ |
jātakaṃ sucakārāsau pitā''hūya munīnbahūn ||
2.5.27.34
utsavaḥ sumahānāsīttasmiñjāte dvijottama |
nāma cakre pitā tasya śaṅkhacūḍeti saddine ||
2.5.27.35
piturgehe sa vavṛdhe śuklapakṣe yathā śaśī |
śaiśave'bhyastavidyastu sa babhūva sudīptimān ||
2.5.27.36
sa bālakrīḍayā nityaṃ pitrorharṣaṃ tatāna ha |
priyo babhūva sarveṣāṃ kulajānāṃ viśeṣataḥ ||
2.5.27.36.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍotpattivarṇanaṃ nāma saptaviṃśo'dhyāyaḥ ||
2.5.27.36.p2
śrīgaṇeśāya namaḥ ||
2.5.27.36.p3
śrīgaurīśaṅkarābhyāṃ namaḥ ||
2.5.27.36.p4
śrīśivamahāpurāṇam ||
2.5.27.36.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (1)
- Devībhāgavatapurāṇa — Sanskrit