Shivapurana 2.5.28: aṣṭāviṃśo'dhyāyaḥ | śaṅkhacūḍatapaḥkaraṇavivāhavarṇanam
Śivapurāṇa (complete text) 2.5.28
- Language
- Sanskrit
Contents
aṣṭāviṃśo'dhyāyaḥ | śaṅkhacūḍatapaḥkaraṇavivāhavarṇanam
2.5.28.1
sanatkumāra uvāca |
tataśca śaṅkhacūḍo'sau jaigīṣavyopadeśataḥ |
tataścakāra suprītyā brahmaṇaḥ puṣkare ciram ||
2.5.28.2
gurudattāṃ brahmavidyāṃ jajāpa niyatendriyaḥ |
sa ekāgramanā bhūtvā karaṇāni nigṛhya ca ||
2.5.28.3
tapantaṃ puṣkare taṃ vai śaṅkhacūḍaṃ ca dānavam |
varaṃ dātuṃ jagāmāśu brahmā lokagururvibhuḥ ||
2.5.28.4
varaṃ brūhīti provāca dānavendraṃ vidhistadā |
sa dṛṣṭvā taṃ nanāmātinamrastuṣṭāva sadgirā ||
2.5.28.5
varaṃ yayāce brahmāṇamajeyatvaṃ divaukasām |
tathetyāha vidhistaṃ vai suprasannena cetasā ||
2.5.28.6
śrīkṛṣṇakavacaṃ divyaṃ jaganmaṅgalamaṅgalam |
dattavān śaṅkhacūḍāya sarvatra vijayapradam ||
2.5.28.7
badarīṃ samprayāhi tvaṃ tulasyā saha tatra vai |
vivāhaṃ kuru tatraiva sā tapasyati kāmataḥ ||
2.5.28.8
dharmadhvajasutā seti sandideśa ca taṃ vidhiḥ |
antardhānaṃ jagāmāśu paśyatastasya tatkṣaṇāt ||
2.5.28.9
tataḥsa śaṅkhacūḍo hi tapaḥsiddho'tipuṣkare |
gale babandha kavacaṃ jaganmaṅgalamaṅgalam ||
2.5.28.10
ājñayā brahmaṇaḥ so'pi tapaḥsiddhamanorathaḥ |
samāyayau prahṛṣṭāsyastūrṇaṃ badarikāśramam ||
2.5.28.11
yadṛcchayā''gatastatra śaṅkhacūḍaśca dānavaḥ |
tapaścarantī tulasī yatra dharmadhvajātmajā ||
2.5.28.12
surūpā susmitā tanvī śubhabhūṣaṇabhūṣitā |
sakaṭākṣaṃ dadarśāsau tameva puruṣaṃ param ||
2.5.28.13
dṛṣṭvā tāṃ lalitāṃ ramyāṃ suśīlāṃ sundarīṃ satīm |
uvāsa tatsamīpe tu madhuraṃ tāmuvāca saḥ ||
2.5.28.14
śaṅkhacūḍa uvāca |
kā tvaṃ kasya sutā tvaṃ hi kiṃ karoṣi sthitātra kim |
maunībhūtā kiṅkaraṃ māṃ sambhāvitumihārhasi ||
2.5.28.14.p1
sanatkumāra uvāca |
ityevaṃ vacanaṃ śrutvā sakāmaṃ tamuvāca sā | 15 ||
2.5.28.16
tulasyuvāca |
dharmadhvajasutāhaṃ ca tapasyāmi tapasvinī |
tapovane ca tiṣṭhāmi kastvaṃ gaccha yathāsukham ||
2.5.28.17
nārījātirmohinī ca brahmādīnāṃ viṣopamā |
nindyā doṣakarī māyā śṛṅkhalā hyanuśāyinām ||
2.5.28.18
sanatkumāra uvāca |
ityuktvā tulasī taṃ ca sarasaṃ virarāma ha |
dṛṣṭvā tāṃ sasmitāṃ so'pi pravaktumupacakrame ||
2.5.28.19
śaṅkhacūḍa uvāca |
tvayā yatkathitaṃ devi na ca sarvamalīkakam |
kiñcitsatyamalīkaṃ ca kiñcinmatto niśāmaya ||
2.5.28.20
pativratāḥ striyo yāśca tāsāṃ madhye tvamagraṇīḥ |
na cāhaṃ pāpadṛkkāmī tathā tvaṃ neti dhīrmama ||
2.5.28.21
āgacchāmi tvatsamīpamājñayā brahmaṇo'dhunā |
gāndharveṇa vivāhena tvāṃ grahīṣyāmi śobhane ||
2.5.28.22
śaṅkhacūḍo'hamevāsmi devavidrāvakārakaḥ |
māṃ na jānāsi kiṃ bhadre na śruto'haṃ kadācana ||
2.5.28.23
danuvaṃśyo viśeṣeṇa dambhaputraśca dānavaḥ |
sudāmā nāma gopo'haṃ pārṣadaśca hareḥ purā ||
2.5.28.24
adhunā dānavendro'haṃ rādhikāyāśca śāpataḥ |
jātismaro'haṃ jānāmi sarvaṃ kṛṣṇaprabhāvataḥ ||
2.5.28.25
sanatkumāra uvāca |
evamuktvā śaṅkhacūḍo virarāma ca tatpuraḥ |
dānavendreṇa setyuktā vacanaṃ satyamādarāt |
sasmitaṃ tulasī tuṣṭā pravaktumupacakrame ||
2.5.28.26
tulasyuvāca |
tvayāhamadhunā sattvavicāreṇa parājitā |
sa dhanyaḥ puruṣo loke na striyā yaḥ parājitaḥ ||
2.5.28.27
satkriyo'pyaśucirnityaṃ sa pumānyaḥ striyā jitaḥ |
nindanti pitaro devā mānavāḥsakalāśca tam ||
2.5.28.28
śudhyedvipro daśāhena jātake mṛtasūtake |
kṣatriyo dvādaśāhena vaiśyaḥ pañcadaśāhataḥ ||
2.5.28.29
śūdro māsena śudhyettu hīti vedānuśāsanam |
na śuciḥ strījitaḥ kvāpi citādāhaṃ vinā pumān ||
2.5.28.30
na gṛhṇantīcchayā tasmātpitaraḥ piṇḍatarpaṇam |
na gṛhṇanti surāstena dattaṃ puṣpaphalādikam ||
2.5.28.31
tasya kiṃ jñānasutapojapahomaprapūjanaiḥ |
vidyayā dānataḥ kiṃ vā strībhiryasya mano hṛtam ||
2.5.28.32
vidyāprabhāvajñānārthaṃ mayā tvaṃ ca parīkṣitaḥ |
kṛtvā kāntaparīkṣāṃ vai vṛṇuyātkāminī varam ||
2.5.28.33
sanatkumāra uvāca |
ityevaṃ pravadantyāṃ tu tulasyāṃ tatkṣaṇe vidhiḥ |
tatrājagāma saṃsraṣṭā provāca vacanaṃ tataḥ ||
2.5.28.34
brahmovāca |
kiṃ karoṣi śaṅkhacūḍa saṃvādamanayā saha |
gāndharveṇa vivāhena tvamasyā grahaṇaṃ kuru ||
2.5.28.35
tvaṃ vai puruṣaratnaṃ ca strīratnaṃ ca tviyaṃ satī |
vidagdhāyā vidagdhena saṅgamo guṇavān bhavet ||
2.5.28.36
nirvirodhaṃ sukhaṃ rājan ko vā tyajati durlabham |
yo'virodhasukhatyāgī sa paśurnātra saṃśayaḥ ||
2.5.28.37
kiṃ tvaṃ parīkṣase kāntamīdṛśaṃ guṇinaṃ sati |
devānāmasurāṇāṃ ca dānavānāṃ vimardakam ||
2.5.28.38
anena sārdhaṃ suciraṃ vihāraṃ kuru sarvadā |
sthāne sthāne yathecchaṃ ca sarvalokeṣu sundari ||
2.5.28.39
ante prāpsyati goloke śrīkṛṣṇaṃ punareva saḥ |
caturbhujaṃ ca vaikuṇṭhe mṛte tasmiṃstvamāpsyasi ||
2.5.28.40
sanatkumāra uvāca |
ityevamāśiṣaṃ dattvā svālayaṃ tu yayau vidhiḥ |
gāndharveṇa vivāhena jagṛhe tāṃ ca dānavaḥ ||
2.5.28.41
evaṃ vivāhya tulasīṃ pituḥ sthānaṃ jagāma ha |
sa reme ramayā sārdhaṃ vāsagehe manorame ||
2.5.28.41.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍatapaḥkaraṇavivāhavarṇanaṃ nāmāṣṭaviṃśo'dhyāyaḥ ||
2.5.28.41.p2
śrīgaṇeśāya namaḥ ||
2.5.28.41.p3
śrīgaurīśaṅkarābhyāṃ namaḥ ||
2.5.28.41.p4
śrīśivamahāpurāṇam ||
2.5.28.41.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit