Shivapurana 2.5.30: triṃśo'dhyāyaḥ | śaṅkhacūḍavadhe devadevastutiḥ
Śivapurāṇa (complete text) 2.5.30
- Language
- Sanskrit
Contents
triṃśo'dhyāyaḥ | śaṅkhacūḍavadhe devadevastutiḥ
2.5.30.1
sanatkumāra uvāca |
gatvā tadaiva savidhistadā vyāsa rameśvaraḥ |
śivalokaṃ mahādivyaṃ nirādhāramabhautikam ||
2.5.30.2
sāhlādo'bhyantaraṃ viṣṇurjagāma muditānanaḥ |
nānāratnaparikṣiptaṃ vilasantaṃ mahojjvalam ||
2.5.30.3
samprāpya prathamaṃ dvāraṃ vicitraṃ gaṇasevitam |
śobhitaṃ parayā lakṣmyā mahoccamatisundaram ||
2.5.30.4
dadarśa dvārapālāṃśca ratnasiṃhāsanasthitān |
śobhitān śvetavastraiśca ratnabhūṣaṇabhūṣitān ||
2.5.30.5
pañcavaktratrinayanāngaurasundaravigrahān |
triśūlādidharānvīrān bhasmarudrākṣaśobhitān ||
2.5.30.6
sa brahmāpi rameśaśca tān praṇamya vinamrakaḥ |
kathayāmāsa vṛttāntaṃ prabhusandarśanārthakam ||
2.5.30.7
tadājñāṃ ca dadustasmai praviveśa tadājñayā |
paraṃ dvāraṃ mahāramyaṃ vicitraṃ paramaprabham ||
2.5.30.8
prabhūpakaṇṭhagatyarthaṃ vṛttāntaṃ saṃnyavedayat |
tad dvārapāya cājñaptastenānyaṃ praviveśa ha ||
2.5.30.9
evaṃ pañcadaśadvārānpraviśya kamalodbhavaḥ |
mahādvāraṃ gatastatra nandinaṃ pradadarśa ha ||
2.5.30.10
samyaṅnatvā ca taṃ stutvā pūrvavattena nandinā |
ājñaptaśca śanairviṣṇurviveśābhyantaraṃ mudā ||
2.5.30.11
dadarśa gatvā tatroccaiḥ sabhāṃ śambhoḥ samutprabhām |
tāṃ pārṣadaiḥ parivṛtāṃ lasaddehaiḥ subhūṣitām ||
2.5.30.12
māheśvarasya rūpaiśca digbhujaiḥ śubhakāntibhiḥ |
pañcavaktraistrinayanaiḥ śitikaṇṭhairmahojjvalaiḥ ||
2.5.30.13
sadratnayuktarudrākṣabhasmābharaṇabhūṣitaiḥ |
navendumaṇḍalākārāṃ caturasrāṃ manoharām ||
2.5.30.14
maṇīndrahāranirmāṇahīrasārasuśobhitām |
amūlyaratnaracitāṃ padmapatraiśca śobhitām ||
2.5.30.15
māṇikyajālamālābhirnānācitravicitritām |
padmarāgendraracitāmadbhutāṃ śaṅkarecchayā ||
2.5.30.16
sopānaśatakairyuktāṃ syamantakavinirmitaiḥ |
svarṇasūtragranthiyuktaiścārucandanapallavaiḥ ||
2.5.30.17
indranīlamaṇistambhairveṣṭitāṃ sumanoharām |
susaṃskṛtāṃ ca sarvatra vāsitāṃ gandhavāyunā ||
2.5.30.18
sahasrayojanāyāmāṃ supūrṇāṃ bahukiṅkaraiḥ |
dadarśa śaṅkaraṃ sāmbaṃ tatra viṣṇuḥ sureśvaraḥ ||
2.5.30.19
vasantaṃ madhyadeśe ca yethendutārakāvṛtam |
amūlyaratnanirmāṇacitrasiṃhāsanasthitam ||
2.5.30.20
kirīṭinaṃ kuṇḍalinaṃ ratnamālāvibhūṣitam |
bhasmoddhūlitasarvāṅgaṃ bibhrataṃ kelipaṅkajam ||
2.5.30.21
purato gītanṛtyañca paśyantaṃ sasmitaṃ mudā ||
2.5.30.22
śāntaṃ prasannamanasamumākāntaṃ mahollasam |
devyā pradattatāmbūlaṃ bhuktavantaṃ suvāsitam ||
2.5.30.23
gaṇaiśca parayā bhaktyā sevitaṃ śvetacāmaraiḥ |
stūyamānaṃ ca siddhaiśca bhaktinamrātmakandharaiḥ ||
2.5.30.24
guṇātītaṃ pareśānaṃ tridevajanakaṃ vibhum |
nirvikalpaṃ nirākāraṃ sākāraṃ svecchayā śivam ||
2.5.30.25
amāyamajamādyañca māyādhīśaṃ parātparam |
prakṛteḥ puruṣasyāpi paramaṃ svaprabhuṃ sadā ||
2.5.30.26
evaṃ viśiṣṭaṃ taṃ dṛṣṭvā paripūrṇatamaṃ samam |
viṣṇurbrahmā tuṣṭuvatuḥ praṇamya sukṛtāñjalī ||
2.5.30.26.p1
viṣṇuvidhī ūcatuḥ
devadeva mahādeva parabrahmākhileśvara ||
2.5.30.26.p2
triguṇātīta nirvyagra tridevajanaka prabho | 27 ||
2.5.30.28
vayaṃ te śaraṇāpannā rakṣāsmānduḥkhitānvibho |
śaṅkhacūḍārditānkliṣṭānsannāthānparameśvara ||
2.5.30.29
ayaṃ yo'dhiṣṭhito loko goloka iti sa smṛtaḥ |
adhiṣṭhātā tasya vibhuḥ kṛṣṇo'yaṃ tvadadhiṣṭhitaḥ ||
2.5.30.30
pārṣadapravarastasya sudāmā daivayantritaḥ |
rādhāśapto babhūvātha śaṅkhacūḍaśca dānavaḥ ||
2.5.30.31
tena niḥsāritāḥ śambho pīḍyamānāḥ samantataḥ |
hṛtādhikārāstridaśā vicaranti mahītale ||
2.5.30.32
tvāṃ vinā na sa vadhyaśca sarveṣāṃ tridivaukasām |
taṃ ghātaya maheśāna lokānāṃ sukhamāvaha ||
2.5.30.33
tvameva nirguṇaḥ satyo'nanto'nantaparākramaḥ |
saguṇaḥ sanniveśaśca prakṛteḥ puruṣātparaḥ ||
2.5.30.34
rajasā sṛṣṭisamaye tvaṃ brahmā sṛṣṭikṛtprabho |
sattvena pālane viṣṇustribhuvāvanakārakaḥ ||
2.5.30.35
tamasā pralaye rudro jagatsaṃhārakārakaḥ |
nistraiguṇye śivākhyātasturyyo jyotiḥsvarūpakaḥ ||
2.5.30.36
tvaṃ dīkṣayā ca goloke tvaṃ gavāṃ paripālakaḥ |
tvadgośālāmadhyagaśca kṛṣṇaḥ krīḍatyaharniśam ||
2.5.30.37
tvaṃ sarvakāraṇaṃ svāmī vidhirviṣṇvīśvaraḥ param |
nirvikārī sadāsākṣī paramātmā pareśvaraḥ ||
2.5.30.38
dīnānāthasahāyī ca dīnānāṃ pratipālakaḥ |
dīnabandhustrilokeśaḥ śaraṇāgatavatsalaḥ ||
2.5.30.39
asmānuddhara gaurīśa prasīda parameśvara |
tvadadhīnā vayaṃ nātha yadicchasi tathā kuru ||
2.5.30.40
sanatkumāra uvāca |
ityuktvā tau surau vyāsa harirbrahmā ca vai tadā |
virematuḥ śivaṃ natvā karau baddhvā vinītakau ||
2.5.30.40.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe devadevastutirnāma triṃśo'dhyāyaḥ ||
2.5.30.40.p2
śrīgaṇeśāya namaḥ ||
2.5.30.40.p3
śrīgaurīśaṅkarābhyāṃ namaḥ ||
2.5.30.40.p4
śrīśivamahāpurāṇam ||
2.5.30.40.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit