Shivapurana 2.5.31: ekatriṃśo'dhyāyaḥ | śaṅkhacūḍavadhe śivopadeśaḥ
Śivapurāṇa (complete text) 2.5.31
- Language
- Sanskrit
Contents
- 2.5.31.55 — 5 parts
ekatriṃśo'dhyāyaḥ | śaṅkhacūḍavadhe śivopadeśaḥ
2.5.31.1
sanatkumāra uvāca |
athākarṇya vacaḥ śambhurharividhyoḥ sudīnayoḥ |
uvāca vihasanvāṇyā meghanādagabhīrayā ||
2.5.31.2
śiva uvāca |
he hare vatsa he brahmaṃstyajataṃ sarvaśo bhayam |
śaṅkhacūḍodbhavaṃ bhadraṃ sambhaviṣyatyasaṃśayam ||
2.5.31.3
śaṅkhacūḍasya vṛttāntaṃ sarvaṃ jānāmi tattvataḥ |
kṛṣṇabhaktasya gopasya sudāmnaśca purā prabho ||
2.5.31.4
madājñayā hṛṣīkeśo kṛṣṇarūpaṃ vidhāya ca |
gośālāyāṃ sthito ramye goloke madadhiṣṭhite ||
2.5.31.5
svatantro'hamiti svaṃ sa mohaṃ matvā gataḥ purā |
krīḍāḥ samakarodbahvīḥ svairavartīva mohitaḥ ||
2.5.31.6
taṃ dṛṣṭvā mohayatyugraṃ tasyāhaṃ māyayā svayā |
teṣāṃ saṃhṛtya sadbuddhiṃ śāpaṃ dāpitavān kila ||
2.5.31.7
itthaṃ kṛtvā svalīlāṃ tāṃ māyāṃ saṃhṛtavānaham |
jñānayuktāstadā te tu muktamohāḥ subuddhayaḥ ||
2.5.31.8
samīpamāgatāste me dīnībhūya praṇamya mām |
akurvansunutiṃ bhaktyā karau badhvā vinamrakāḥ ||
2.5.31.9
vṛttāntamavadan sarvaṃ lajjākulitamānasāḥ |
ūcurmatpurato dīnā rakṣa rakṣeti vai giraḥ ||
2.5.31.10
tadā tvahaṃ bhavasteṣāṃ santuṣṭaḥ proktavān vacaḥ |
bhayaṃ tyajata he kṛṣṇa yūyaṃ sarve madājñayā ||
2.5.31.11
rakṣako'haṃ sadā prītyā subhadraṃ vo bhaviṣyati |
madicchayā'khilaṃ jātamidaṃ sarvaṃ na saṃśayaḥ ||
2.5.31.12
svasthānaṃ gaccha tvaṃ sārddhaṃ rādhayā pārṣadena ca |
dānavastu bhavetso'yaṃ bhārate'tra na saṃśayaḥ ||
2.5.31.13
śāpoddhāraṃ kariṣye'haṃ yuvayoḥ samaye khalu |
maduktamiti sandhārya śirasā rādhayā saha ||
2.5.31.14
śrīkṛṣṇo'modadatyantaṃ svasthānamagamatsudhīḥ |
nyaṣṭhātāṃ sabhayaṃ tatra madārādhanatatparau ||
2.5.31.15
matvākhilaṃ madadhīnamasvatantraṃ nijaṃ ca vai |
sa sudāmā'bhavadrādhāśāpato dānaveśvaraḥ ||
2.5.31.16
śaṅkhacūḍābhidho devadrohī dharmavicakṣaṇaḥ |
kliśnāti subalātkṛtsnaṃ sadā devagaṇaṃ kudhīḥ ||
2.5.31.17
manmāyāmohitaḥso'tiduṣṭamantrisahāyavān |
tadbhayaṃ tyajatāśveva mayi śāstari vai sati ||
2.5.31.18
sanatkumāra uvāca |
ityūcivān śivo yāvaddharibrahmapuraḥ kathām |
abhavattāvadanyacca caritaṃ tanmune śṛṇu ||
2.5.31.19
tasminnevāntare kṛṣṇo rādhayā pārṣadaiḥ saha |
sadgopairāyayau śambhumanukūlayituṃ prabhum ||
2.5.31.20
prabhuṃ praṇamya sadbhaktyā militvā harimādarāt |
sammato vidhinā prītyā santasthau śivaśāsanāt ||
2.5.31.21
tataḥ śambhuṃ punarnatvā tuṣṭāva vihitāñjaliḥ |
śrīkṛṣṇo mohanirmukto jñātvā tattvaṃ śivasya hi ||
2.5.31.22
śrīkṛṣṇa uvāca |
devadeva mahādeva parabrahma satāṅgate |
kṣamasva cāparādhaṃ me prasīda parameśvara ||
2.5.31.23
tvattaḥ śarva ca sarvaṃ ca tvayi sarvaṃ maheśvara |
sarvaṃ tvaṃ nikhilādhīśa prasīda parameśvara ||
2.5.31.24
tvaṃ jyotiḥ paramaṃ sākṣātsarvavyāpī sanātanaḥ |
tvayā nāthena gaurīśa sanāthāḥsakalā vayam ||
2.5.31.25
sarvopari nijaṃ matvā viharanmohamāśritaḥ |
tatphalaṃ prāptavānasmi śāpaṃ prāptaḥ savāmakaḥ ||
2.5.31.26
pārṣadapravaro yo me sudāmā nāma gopakaḥ |
sa rādhāśāpataḥ svāmindānavīṃ yonimāśritaḥ ||
2.5.31.27
asmānuddhara durgeśa prasīda parameśvara |
śāpoddhāraṃ kuruṣvādya pāhi naḥ śaraṇāgatān ||
2.5.31.28
ityuktvā virarāmaiva śrīkṛṣṇo rādhayā saha |
prasanno'bhūcchivastatra śaraṇāgatavatsalaḥ ||
2.5.31.29
śrīśiva uvāca |
he kṛṣṇa gopikānātha bhayaṃ tyaja sukhī bhava |
mayānugṛhṇatā tāta sarvamācaritaṃ tvidam ||
2.5.31.30
sambhaviṣyati te bhadraṃ gaccha svasthānamuttamam |
sthātavyaṃ svādhikāre ca sāvadhānatayā sadā ||
2.5.31.31
viharasva yathākāmaṃ māṃ vijñāya parātparam |
svakāryaṃ kuru nirvyagraṃ rādhayā pārṣadaiḥ khalu ||
2.5.31.32
vārāhe pravare kalpe taruṇyā rādhayā saha |
śāpaprabhāvaṃ bhuktvā vai punarāyāsyati svakam ||
2.5.31.33
sudāmā pārṣado yo hi tava kṛṣṇa priyapriyaḥ |
dānavīṃ yonimāśrityedānīṃ kliśnāti vai jagat ||
2.5.31.34
śāpaprabhāvādrādhāyā devaśatruśca dānavaḥ |
śaṅkhacūḍābhidhaḥ so'ti daityapakṣī suradruhaḥ ||
2.5.31.35
tena niḥsāritā devāḥ sendrā nityaṃ prapīḍitāḥ |
hṛtādhikārā vikṛtāḥ sarve yātā diśo daśa ||
2.5.31.36
brahmācyutau tadarthe hīhāgatau śaraṇaṃ mama |
teṣāṃ kleśavinirmokṣaṃ kariṣye nātra saṃśayaḥ ||
2.5.31.37
sanatkumāra uvāca |
ityuktvā śaṅkaraḥ kṛṣṇaṃ punaḥ provāca sādaram |
hariṃ vidhiṃ samābhāṣya vacanaṃ kleśanāśanam ||
2.5.31.38
śiva uvāca |
he hare he vidhe prītyā mamedaṃ vacanaṃ śṛṇu |
gacchataṃ tvaritaṃ tātau devānandāya nirbhayam ||
2.5.31.39
kailāsavāsinaṃ rudraṃ madrūpaṃ pūrṇamuttamam |
devakāryārthamudbhūtaṃ pṛthagākṛtidhāriṇam ||
2.5.31.40
etadarthe hi madrūpaḥ paripūrṇatamaḥ prabhuḥ |
kailāse bhaktavaśataḥ santiṣṭhati girau hare ||
2.5.31.41
mattastvatto na bhedo'sti yuvayoḥ sevya eva saḥ |
carācarāṇāṃ sarveṣāṃ surādīnāṃ ca sarvadā ||
2.5.31.42
āvayorbhedakartā yaḥ sa naro narakaṃ vrajet |
ihāpi prāpnuyātkaṣṭaṃ putrapautravivarjitaḥ ||
2.5.31.43
ityuktavantaṃ durgeśaṃ praṇamya ca muhurmuhuḥ |
rādhayā sahitaḥ kṛṣṇaḥ svasthānaṃ sagaṇo yayau ||
2.5.31.44
harirbrahmā ca tau vyāsa sānandau gatasādhvasau |
muhurmuhuḥ praṇamyeśaṃ vaikuṇṭhaṃ yayaturdrutam ||
2.5.31.45
tatrāgatyākhilaṃ vṛttaṃ devebhyo vinivedya tau |
tānādāya brahmaviṣṇū kailāsaṃ yayaturgirim ||
2.5.31.46
tatra dṛṣṭvā maheśānaṃ pārvatīvallabhaṃ prabhum |
dīnarakṣāttadehaṃ ca saguṇaṃ devanāyakam ||
2.5.31.47
tuṣṭuvuḥ pūrvavatsarve bhaktyā gadgadayā girā |
karau baddhvā nataskandhā vinayena samanvitāḥ ||
2.5.31.48
devā ūcuḥ |
devadeva mahādeva girijānātha śaṅkara |
vayaṃ tvāṃ śaraṇāpannā rakṣa devānbhayākulān ||
2.5.31.49
śaṅkhacūḍaṃ dānavendraṃ jahi devaniṣūdanam |
tena viklāvitā devāḥ saṅgrāme ca parājitāḥ ||
2.5.31.50
hṛtādhikārāḥ kutale vicaranti yathā narāḥ |
devaloko hi durdṛśyasteṣāmāsīcca tadbhayāt ||
2.5.31.51
dīnoddhāra kṛpāsindho devānuddhara saṅkaṭāt |
śakraṃ bhayānmaheśāna hatvā taṃ dānavādhipam ||
2.5.31.52
iti śrutvā vacaḥ śambhurdevānāṃ bhaktavatsalaḥ |
uvāca vihasan vāṇyā meghanādagabhīrayā ||
2.5.31.53
śrīśaṅkara uvāca |
he hare he vidhe devāḥ svasthānaṃ gacchata dhruvam |
śaṅkhacūḍaṃ vadhiṣyāmi sagaṇaṃ nātra saṃśayaḥ ||
2.5.31.54
sanatkumāra uvāca |
ityākarṇya maheśasya vacaḥ pīyūṣasannibham |
te sarve pramudā hyāsannaṣṭaṃ matvā ca dānavam ||
2.5.31.55
harirjagāma vaikuṇṭhaṃ satyaloke vidhistadā |
praṇipatya maheśaṃ ca surādyāḥ svapadaṃ yayuḥ ||
2.5.31.55.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe śivopadeśo nāmaikatriṃśo'dhyāyaḥ ||
2.5.31.55.p2
śrīgaṇeśāya namaḥ ||
2.5.31.55.p3
śrīgaurīśaṅkarābhyāṃ namaḥ ||
2.5.31.55.p4
śrīśivamahāpurāṇam ||
2.5.31.55.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit