Shivapurana 2.5.32: dvātriṃśo'dhyāyaḥ | śaṅkhacūḍavadhe dūtagamanam
Śivapurāṇa (complete text) 2.5.32
- Language
- Sanskrit
Contents
- 2.5.32.35 — 5 parts
dvātriṃśo'dhyāyaḥ | śaṅkhacūḍavadhe dūtagamanam
2.5.32.1
sanatkumāra uvāca |
atheśāno mahārudro duṣṭakālaḥsatāṃ gatiḥ |
śaṅkhacūḍavadhaṃ citte niścikāya surecchayā ||
2.5.32.2
dūtaṃ kṛtvā citrarathaṃ gandharveśvaramīpsitam |
śīghraṃ prasthāpayāmāsa śaṅkhacūḍāntike mudā ||
2.5.32.3
sarveśvarājñayā dūto yayau tannagaraṃ ca saḥ |
mahendranagarotkṛṣṭaṃ kuberabhavanādhikam ||
2.5.32.4
gatvā dadarśa tanmadhye śaṅkhacūḍālayaṃ varam |
rājitaṃ dvādaśairdvārairdvārapālasamanvitam ||
2.5.32.5
sa dṛṣṭvā puṣpadantastu varaṃ dvāraṃ dadarśa saḥ |
kathayāmāsa vṛttāntaṃ dvārapālāya nirbhayaḥ ||
2.5.32.6
atikramya ca tad dvāraṃ jagāmābhyantare mudā |
atīva sundaraṃ ramyaṃ vistīrṇaṃ samalaṅkṛtam ||
2.5.32.7
sa gatvā śaṅkhacūḍaṃ taṃ dadarśa danujādhipam |
vīramaṇḍalamadhyasthaṃ ratnasiṃhāsanasthitam ||
2.5.32.8
dānavendraiḥ parivṛtaṃ sevitaṃ ca trikoṭibhiḥ |
śatakoṭibhiranyaiśca bhramadbhiḥ śastrapāṇibhiḥ ||
2.5.32.9
evambhūtaṃ ca taṃ dṛṣṭvā puṣpadantaḥ savismayaḥ |
uvāca raṇavṛttāntaṃ yaduktaṃ śaṅkareṇa ca ||
2.5.32.10
puṣpadanta uvāca |
rājendra śivadūto'haṃ puṣpadantābhidhaḥ prabho |
yaduktaṃ śaṅkareṇaiva tacchṛṇu tvaṃ bravīmi te ||
2.5.32.11
śiva uvāca |
rājyaṃ dehi ca devānāmadhikāraṃ hi sāmpratam |
no cetkuru raṇaṃ sārddhaṃ pareṇa ca mayā satām ||
2.5.32.12
devā māṃ śaraṇāpannā deveśaṃ śaṅkaraṃ satām |
ahaṃ kruddho mahārudrastvāṃ vadhiṣyāmyasaṃśayam ||
2.5.32.13
haro'smi sarvadevebhyo hyabhayaṃ dattavānaham |
khaladaṇḍadharo'haṃ vai śaraṇāgatavatsalaḥ ||
2.5.32.14
rājyaṃ dāsyasi kiṃ vā tvaṃ kariṣyasi raṇaṃ ca kim |
tattvaṃ brūhi dvayorekaṃ dānavendra vicāryya vai ||
2.5.32.15
puṣpadanta uvāca |
ityuktaṃ yanmaheśena tubhyaṃ tanme niveditam |
vitathaṃ śambhuvākyaṃ na kadāpi danujādhipa ||
2.5.32.16
ahaṃ svasvāminaṃ gantumicchāmi tvaritaṃ haram |
gatvā vakṣyāmi kiṃ śambhuṃ tathā tvaṃ vada māmiha ||
2.5.32.17
sanatkumāra uvāca |
itthaṃ ca puṣpadantasya śivadūtasya satpateḥ |
ākarṇya vacanaṃ rājā hasitvā tamuvāca saḥ ||
2.5.32.18
śaṅkhacūḍa uvāca |
rājyaṃ dāsye na devebhyo vīrabhogyā vasundharā |
raṇaṃ dāsyāmi te rudra devānāṃ pakṣapātine ||
2.5.32.19
yasyopari prayāyī syātsa vīro bhuvena'dhamaḥ |
ataḥ pūrvamahaṃ rudra tvāṃ gamiṣyāmyasaṃśayam ||
2.5.32.20
prabhāta āgamiṣyāmi vīrayātrā vicārataḥ |
tvaṃ gacchācakṣva rudrāya hīdṛśaṃ vacanaṃ mama ||
2.5.32.21
iti śrutvā śaṅkhacūḍavacanaṃ suprahasya saḥ |
uvāca dānavendraṃ sa śambhudūtastu garvitam ||
2.5.32.22
puṣpadanta uvāca
anyeṣāmapi rājendra gaṇānāṃ śaṅkarasya ca |
na sthātuṃ sammukhe yogyaḥ kiṃ punastasya sammukham ||
2.5.32.23
sa tvaṃ dehi ca devānāmadhikārāṇi sarvaśaḥ |
tvamaraṃ gaccha pātālaṃ yadi jīvitumicchasi ||
2.5.32.24
sāmānyamamaraṃ taṃ no viddhi dānavasattama |
śaṅkaraḥ paramātmā hi sarveṣāmīśvareśvaraḥ ||
2.5.32.25
indrādyāḥ sakalā devā yasyājñāvartinaḥ sadā |
saprajāpatayaḥ siddhā munayaścāpyahīśvarāḥ ||
2.5.32.26
harervidheśca sa svāmī nirguṇaḥ saguṇaḥ sa hi |
yasya bhrūbhaṅgamātreṇa sarveṣāṃ pralayo bhavet ||
2.5.32.27
śivasya pūrṇarūpaśca lokasaṃhārakārakaḥ |
satāṃ gatirduṣṭahantā nirvikāraḥ parātparaḥ ||
2.5.32.28
brahmaṇo'dhipatiḥ so'pi harerapi maheśvaraḥ |
avamānyaṃ na vai tasya śāsanaṃ dānavarṣabha ||
2.5.32.29
kiṃ bahūktena rājendra manasā saṃvicārya ca |
rudraṃ viddhi maheśānaṃ paraṃ brahma cidātmakam ||
2.5.32.30
dehi rājyaṃ hi devānāmadhikārāṃśca sarvaśaḥ |
evaṃ te kuśalaṃ tāta bhaviṣyatyanyathā bhayam ||
2.5.32.31
santkumāra uvāca |
iti śrutvā dānavendraḥ śaṅkhacūḍaḥ pratāpavān |
uvāca śivadūtaṃ taṃ bhavitavyavimohitaḥ ||
2.5.32.32
śaṅkhacūḍa uvāca |
svato rājyaṃ na dāsyāmi nādhikārān viniścayāt |
vinā yuddhaṃ maheśena satyametad bravīmyaham ||
2.5.32.33
kālādhīnaṃ jagatsarvaṃ vijñeyaṃ sacarācaram |
kālādbhavati sarvaṃ hi vinaśyati ca kālataḥ ||
2.5.32.34
tvaṃ gaccha śaṅkaraṃ rudraṃ mayoktaṃ vada tattvataḥ |
sa ca yuktaṃ karotvevaṃ bahuvārtāṃ kuruṣva no ||
2.5.32.35
sanatkumāra uvāca |
ityuktvā śivadūto'sau jagāma svāminaṃ nijam |
yathārthaṃ kathayāmāsa puṣpadantaśca sanmune ||
2.5.32.35.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe dūtagamanaṃ nāma dvātriṃśo'dhyāyaḥ ||
2.5.32.35.p2
śrīgaṇeśāya namaḥ ||
2.5.32.35.p3
śrīgaurīśaṅkarābhyāṃ namaḥ ||
2.5.32.35.p4
śrīśivamahāpurāṇam ||
2.5.32.35.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit