Shivapurana 2.5.33: trayastriṃśo'dhyāyaḥ | śaṅkhacūḍavadhe mahādevayuddhayātrāvarṇanam
Śivapurāṇa (complete text) 2.5.33
- Language
- Sanskrit
Contents
trayastriṃśo'dhyāyaḥ | śaṅkhacūḍavadhe mahādevayuddhayātrāvarṇanam
2.5.33.1
sanatkumāra uvāca |
tasya dūtasya tadvākyamākarṇya surarāṭ tataḥ |
sakrodhaḥ prāha giriśo vīrabhadrādikāngaṇān ||
2.5.33.2
rudra uvāca |
he vīrabhadra he nandin kṣetrapālaṣṭabhairavāḥ |
sarve gaṇāśca sannaddhāḥ sāyudhā balaśālinaḥ ||
2.5.33.2.p1
kumārābhyāṃ sahaivādya nirgacchantu mamājñayā |
svasenayā bhadrakālī nirgacchatu raṇāya ca ||
2.5.33.3
śaṅkhacūḍavadhārthāya nirgacchāmyadya satvaram ||
2.5.33.4
sanatkumāra uvāca |
ityājñāpya maheśāno niryayau sainyasaṃyutaḥ |
sarve vīragaṇāstasyānuyayuḥ sampraharṣitāḥ ||
2.5.33.5
etasminnantare skandagaṇeśau sarvasainyapau |
yayaturmuditau naddhau sāyudhau ca śivāntike ||
2.5.33.6
vīrabhadraśca nandī ca mahākālaḥ subhadrakaḥ |
viśālākṣaśca bāṇaśca piṅgalākṣo vikampanaḥ ||
2.5.33.7
virūpo vikṛtiścaiva maṇibhadraśca bāṣkalaḥ |
kapilākhyo dīrghadaṃṣdro vikarastāmralocanaḥ ||
2.5.33.8
kālaṅkaro balībhadraḥ kālajihvaḥ kuṭīcaraḥ |
balonmatto raṇaślāghyo durjayo durgamastathā ||
2.5.33.9
ityādayo gaṇeśānāḥ sainyānāṃ patayo varāḥ |
teṣāṃ ca gaṇanāṃ vacmi sāvadhānatayā śṛṇu ||
2.5.33.10
śaṅkhakarṇaḥ koṭigaṇairyutaḥ paravimardakaḥ |
daśabhiḥ kekarākṣaśca vikṛto'ṣṭābhireva ca ||
2.5.33.11
catuḥṣaṣṭyā viśākhaśca navabhiḥ pāriyātrikaḥ |
ṣaḍbhiḥ sarvāntakaḥ śrīmāṃstathaiva vikṛtānanaḥ ||
2.5.33.12
jālako hi dvādaśabhiḥ koṭibhirgaṇapuṅgavaḥ |
saptabhiḥ samadaḥ śrīmāndundubho'ṣṭābhireva ca ||
2.5.33.13
pañcabhiśca karālākṣaḥ ṣaḍbhiḥ sandārako varaḥ |
koṭikoṭibhireveha kandukaḥ kuṇḍakastathā ||
2.5.33.14
viṣṭambho'ṣṭābhireveha gaṇapaḥ sarvasattamaḥ |
pippalaśca sahasreṇa sannādaśca tathāvidhaḥ ||
2.5.33.15
āveśanastathāṣṭābhistvaṣṭabhiścandratāpanaḥ |
mahākeśaḥ sahasreṇa koṭīnāṃ gaṇapo vṛtaḥ ||
2.5.33.16
kuṇḍī dvādaśabhirvīraistathā parvatakaḥ śubhaḥ |
kālaśca kālakaścaiva mahākālaśatena vai ||
2.5.33.17
agnikaḥ śatakoṭyā ca koṭyāgnimukha eva ca |
ādityo hyarddhakoṭyā ca tathā caiva ghanāvahaḥ ||
2.5.33.18
sannāhaśca śatenaiva kumudaḥ koṭibhistathā |
amoghaḥ kokilaścaiva śatakoṭyā sumantrakaḥ ||
2.5.33.19
kākapādaḥ koṭiṣaṣṭyā ṣaṣṭyā santānakastathā |
mahābalaśca navabhiḥ pañcabhirmadhupiṅgalaḥ ||
2.5.33.20
nīlo navatyā deveśaḥ pūrṇabhadrastathaiva ca |
koṭīnāṃ caiva saptānāṃ caturvaktro mahābalaḥ ||
2.5.33.21
koṭikoṭisahasrāṇāṃ śatairviṃśatibhistathā |
tatrājagmustathā vīrāste sarve saṅgarotsave ||
2.5.33.22
bhūtakoṭisahasreṇa pramathairkoṭibhistribhiḥ |
vīrabhadraścatuḥṣaṣṭyā lomajānāṃ trikoṭibhiḥ ||
2.5.33.23
kāṣṭhārūḍhaścatuḥṣaṣṭyā sukeśo vṛṣabhastathā |
virūpākṣaśca bhagavāṃścatuḥṣaṣṭyā sanātanaḥ ||
2.5.33.24
tālaketuḥ ṣaḍāsyaśca pañcāsyaśca pratāpavān |
saṃvartakastathā caitro laṅkulīśaḥ svayaṃ prabhuḥ ||
2.5.33.25
lokāntakaśca dīptātmā tathā daityāntakaḥ prabhuḥ |
devo bhṛṅgīriṭiḥ śrīmāndevadevapriyastathā ||
2.5.33.26
aśanirbhānukaścaiva catuḥṣaṣṭyā sahasraśaḥ |
kaṅkālaḥ kālakaḥ kālo nandī sarvāntakastathā ||
2.5.33.27
ete cānye ca gaṇapā asaṅkhyātā mahābalāḥ |
yuddhārthaṃ niryayuḥ prītyā śaṅkhacūḍena nirbhayāḥ ||
2.5.33.28
sarve sahasrahastāśca jaṭāmukuṭadhāriṇaḥ |
candrarekhāvataṃsāśca nīlakaṇṭhāstrilocanāḥ ||
2.5.33.29
rudrākṣābharaṇāḥ sarve tathā sadbhasmadhāriṇaḥ |
hārakuṇḍalakeyūramukuṭādyairalaṅkṛtāḥ ||
2.5.33.30
brahmendraviṣṇusaṅkāśā aṇimādiguṇairvṛtāḥ |
sūryakoṭipratīkāśāḥ pravīṇā yuddhakarmaṇi ||
2.5.33.31
pṛthivīcāriṇaḥ kecitkecitpātālacāriṇaḥ |
kecid vyomacarāḥ kecitsaptasvargacarā mune ||
2.5.33.32
kiṃ bahūktena devarṣe sarvalokanivāsinaḥ |
yayuḥ śivagaṇāḥ sarve yuddhārthaṃ dānavaiḥ saha ||
2.5.33.33
aṣṭau ca bhairavā raudrā rudrāścaikādaśāśu ye |
vasavo'ṣṭau vāsavaścādityā dvādaśa te drutam ||
2.5.33.34
hutāśanaśca candraśca viśvakarmāśvinau ca tau |
kuberaśca yamaścaiva nirṛtirnalakūbaraḥ ||
2.5.33.35
vāyuśca varuṇaścaiva budhaśca maṅgalaśca vai |
grahāścānye maheśena kāmadevaśca vīryavān ||
2.5.33.36
ugradaṃṣṭraścogradaṇḍaḥ koraṭaḥ koṭabhastathā |
svayaṃ śatabhujā devī bhadrakālī maheśvarī ||
2.5.33.37
ratnendrasāranirmāṇavimānopari saṃsthitā |
raktavastraparīdhānā raktamālyānulepanā ||
2.5.33.38
nṛtyantī ca hasantī ca gāyantī susvaraṃ mudā |
abhayaṃ dadatī svebhyo bhayaṃ cāribhya eva sā ||
2.5.33.39
bibhratī vikaṭāṃ jihvāṃ sulīlāṃ yojanāyatām |
śaṅkhacakragadāpadmakhaḍgacarmadhanuḥ śarān ||
2.5.33.40
kharparaṃ vartulākāraṃ gambhīraṃ yojanāyatam |
triśūlaṃ gaganasparśi śaktiṃ ca yojanāyatām ||
2.5.33.41
mudgaraṃ musalaṃ vajraṃ khaḍgaṃ phalakamulbaṇam |
vaiṣṇavāstraṃ vāruṇāstraṃ vāyavyaṃ nāgapāśakam ||
2.5.33.42
nārāyaṇāstraṃ gāndharvaṃ brahmāstraṃ gāruḍaṃ tathā |
pārjanyaṃ ca pāśupataṃ jṛmbhaṇāstraṃ ca pārvatam ||
2.5.33.43
mahāvīraṃ ca sauraṃ ca kālakālaṃ mahānalam |
māheśvarāstraṃ yāmyaṃ ca daṇḍaṃ sammohanaṃ tathā ||
2.5.33.44
samarthamastrakaṃ divyaṃ divyāstraṃ śatakaṃ param |
bibhratī ca karaiḥ sarvairanyānyapi ca sā tadā ||
2.5.33.45
āgatya tasthau sā tatra yoginīnāṃ trikoṭibhiḥ |
sārdhaṃ ca ḍākinīnāṃ vai vikaṭānāṃ trikoṭibhiḥ ||
2.5.33.46
bhūtapretapiśācāśca kūṣmāṇḍā brahmarākṣasāḥ |
vetālā rākṣasāścaiva yakṣāścaiva sakinnarāḥ ||
2.5.33.47
taścaivābhivṛtaḥ skandaḥ praṇamya candraśekharam |
pituḥ pārśve sahāyo yaḥ samuvāsa tadājñayā ||
2.5.33.48
atha śambhuḥ samānīya svasainyaṃ sakalaṃ tadā |
yuddhārthamagamad rudraḥ śaṃṅkhacūḍena nirbhayaḥ ||
2.5.33.49
candrabhāgānadītīre vaṭamūle manohare |
tatra tasthau mahādevo devanistārahetave ||
2.5.33.49.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe mahādevayuddhayātrāvarṇanaṃ nāma trayastriṃśo'dhyāyaḥ ||
2.5.33.49.p2
śrīgaṇeśāya namaḥ ||
2.5.33.49.p3
śrīgaurīśaṅkarābhyāṃ namaḥ ||
2.5.33.49.p4
śrīśivamahāpurāṇam ||
2.5.33.49.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit