Shivapurana 2.5.34: catustriṃśo'dhyāyaḥ | śaṅkhacūḍayātrāvarṇanam
Śivapurāṇa (complete text) 2.5.34
- Language
- Sanskrit
Contents
- 2.5.34.25 — 5 parts
catustriṃśo'dhyāyaḥ | śaṅkhacūḍayātrāvarṇanam
2.5.34.1
vyāsa uvāca |
vidhitāta mahābuddhe mune jīva ciraṃ samāḥ |
kathitaṃ sumahaccitraṃ caritaṃ candramaulinaḥ ||
2.5.34.2
śivadūte gate tatra śaṅkhacūḍaśca dānavaḥ |
kiṃ cakāra pratāpī sa tattvaṃ vada suvistaram ||
2.5.34.3
sanatkumāra uvāca |
atha dūte gate tatra śaṅkhacūḍaḥ pratāpavān |
uvāca tulasīṃ vārtāṃ gatvābhyantarameva tām ||
2.5.34.4
śaṅkhacūḍa uvāca |
śambhudūtamukhāddevi yuddhāyāhaṃ samudyataḥ |
tena gacchāmyahaṃ yoddhuṃ śāsanaṃ kuru me dhruvam ||
2.5.34.5
ityevamuktvā sa jñānī nānābodhanataḥ priyām |
krīḍāṃ cakāra harṣeṇa tamanādṛtya śaṅkaram ||
2.5.34.6
tau dampatī cikrīḍāte nimagnau sukhasāgare |
nānākāmakalābhiśca niśi cāṭuśatairapi ||
2.5.34.7
brāhme muhūrte cotthāya prātaḥkṛtyaṃ vidhāya ca |
nityakāryaṃ ca kṛtvādau dadau dānamanantakam ||
2.5.34.8
putraṃ kṛtvā ca rājendraṃ sarveṣu dānaveṣu ca |
putre samarpya bhāryāṃ ca sa rājyaṃ sarvasampadam ||
2.5.34.9
priyāmāśvāsayāmāsa sa rājā rudatīṃ punaḥ |
niṣedhantīṃ ca gamanaṃ nānā vārtāṃ prakathya ca ||
2.5.34.10
nijasenāpatiṃ vīraṃ samāhūya samādṛtaḥ |
ādideśa sa sanaddhaḥ saṅgrāmaṃ kartumudyataḥ ||
2.5.34.11
śaṅkhacūḍa uvāca |
adya senāpate vīrāḥ sarve samaraśālinaḥ |
sannaddhākhilakarmāṇo nirgacchantu raṇāya ca ||
2.5.34.12
daityāśca dānavāḥ śūrā ṣaḍaśītirudāyudhāḥ |
kaṅkānāṃ balināṃ śīghraṃ senā niryāntu nirbhayāḥ ||
2.5.34.13
pañcāśadasurāṇāṃ hi nirgacchantu kulāni vai |
koṭivīryāṇi yuddhārthaṃ śambhunā devapakṣiṇā ||
2.5.34.14
sannaddhāni ca dhaumrāṇāṃ kulāni ca śataṃ drutam |
nirgacchantu raṇārthaṃ hi śambhunā mama śāsanāt ||
2.5.34.15
kālakeyāśca mauryāśca daurhṛdāḥ kālakāstathā |
sajjā niryāntu yuddhāya rudreṇa mama śāsanāt ||
2.5.34.16
sanatkumāra uvāca |
ityājñāpyāsurapatirdānavendro mahābalaḥ |
nirjagāma mahāsainyaḥ sahasrairbahubhirvṛtaḥ ||
2.5.34.17
tasya senāpatiścaiva yuddhaśāstraviśāradaḥ |
mahāratho mahāvīro rathināṃ pravaro raṇe ||
2.5.34.18
trilakṣākṣauhiṇīyukto māṇḍalyaṃ ca cakāra ha |
bahirbabhūva śivirādraṇe vīrabhayaṅkaraḥ ||
2.5.34.19
ratnendrasāranirmāṇaṃ vimānamabhiruhya saḥ |
guruvargaṃ puraskṛtya raṇārthaṃ prayayau kila ||
2.5.34.20
puṣpabhadrānadītīre yatrākṣayavaṭaḥ śubhaḥ |
siddhāśrame ca siddhānāṃ siddhikṣetraṃ susiddhidam ||
2.5.34.21
kapilasya tataḥsthānaṃ puṇyakṣetre ca bhārate |
paścimodadhipūrve ca malayasya hi paścime ||
2.5.34.22
śrīśailottarabhāge ca gandhamādanadakṣiṇe |
pañcayojanavistīrṇe dairghye śataguṇastathā ||
2.5.34.23
śuddhasphaṭikasaṅkāśā bhārate ca supuṇyadā |
puṣpabhadrā nadī ramyā jalapūrṇā sarasvatī ||
2.5.34.24
lavaṇodadhipriyā bhāryā śaśvatsaubhāgyasaṃyutā |
sarasvatīsaṃśritā ca nirgatā sā himālayāt ||
2.5.34.25
gomantaṃ vāmataḥ kṛtvā praviṣṭā paścimodadhau |
tatra gatvā śaṅkhacūḍaḥ śivasenāṃ dadarśa ha ||
2.5.34.25.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍayātrāvarṇanaṃ nāma catustriṃśo'dhyāyaḥ ||
2.5.34.25.p2
śrīgaṇeśāya namaḥ ||
2.5.34.25.p3
śrīgaurīśaṅkarābhyāṃ namaḥ ||
2.5.34.25.p4
śrīśivamahāpurāṇam ||
2.5.34.25.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit