Shivapurana 2.5.35: pañcatriṃśo'dhyāyaḥ | śaṅkhacūḍayātrāvarṇanam
Śivapurāṇa (complete text) 2.5.35
- Language
- Sanskrit
Contents
- 2.5.35.50 — 5 parts
pañcatriṃśo'dhyāyaḥ | śaṅkhacūḍayātrāvarṇanam
2.5.35.1
sanatkumāra uvāca |
tatra sthitvā dānavendro mahāntaṃ dānaveśvaram |
dūtaṃ kṛtvā mahāvijñaṃ preṣayāmāsa śaṅkaram ||
2.5.35.2
sa tatra gatvā dūtaśca candrabhālaṃ dadarśa ha |
vaṭamūle samāsīnaṃ sūryakoṭisamaprabham ||
2.5.35.3
kṛtvā yogāsanaṃ dṛṣṭyā mudrāyuktaṃ ca sasmitam |
śuddhasphaṭikasaṅkāśaṃ jvalantaṃ brahmatejasā ||
2.5.35.4
triśūlapaṭṭiśadharaṃ vyāghracarmāmbarāvṛtam |
bhaktamṛtyuharaṃ śāntaṃ gaurīkāntaṃ trilocanam ||
2.5.35.5
tapasāṃ phaladātāraṃ karttāraṃ sarvasampadām |
āśutoṣaṃ prasannāsyaṃ bhaktānugrahakārakam ||
2.5.35.6
viśvanāthaṃ viśvabījaṃ viśvarūpaṃ ca viśvajam |
viśvesvaraṃ viśvakaraṃ viśvasaṃhārakāraṇam ||
2.5.35.7
kāraṇaṃ kāraṇānāṃ ca narakārṇavatārakam |
jñānapradaṃ jñānabījaṃ jñānānandaṃ sanātanam ||
2.5.35.8
avaruhya rathād dūtastaṃ dṛṣṭvā dānaveśvaraḥ |
śaṅkaraṃ sakumāraṃ ca śirasā praṇanāma saḥ ||
2.5.35.9
vāmato bhadrakālīṃ ca skandaṃ tatpurataḥ sthitam |
lokāśiṣaṃ dadau tasmai kālī skandaśca śaṅkaraḥ ||
2.5.35.10
athāsau śaṅkhacūḍasya dūtaḥ paramaśāstravit |
uvāca śaṅkaraṃ natvā karau baddhvā śubhaṃ vacaḥ ||
2.5.35.11
dūta uvāca |
śaṅkhacūḍasya dūto'haṃ tvatsakāśamihāgataḥ |
vartate te kimicchādya tattvaṃ brūhi maheśvara ||
2.5.35.12
sanatkumāra uvāca |
iti śrutvā ca vacanaṃ śaṅkhacūḍasya śaṅkaraḥ |
prasannātmā mahādevo bhagavāṃstamuvāca ha ||
2.5.35.13
mahādeva uvāca |
śṛṇu dūta mahāprājña vaco mama sukhāvaham |
kathanīyamidaṃ tasmai nirvivādaṃ vicārya ca ||
2.5.35.14
vidhātā jagatāṃ brahmā pitā dharmasya dharmavit |
marīcistasya putraśca kaśyapastatsutaḥ smṛtaḥ ||
2.5.35.15
dakṣaḥ prītyā dadau tasmai nijakanyāstrayodaśa |
tāsvekā ca danuḥ sādhvī tatsaubhāgyavivarddhinī ||
2.5.35.16
catvāraste danoḥ putrā dānavāstejasolbaṇāḥ |
teṣveko vipracittistu mahābalaparākramaḥ ||
2.5.35.17
tatputro dhārmiko dambho dānavendro mahāmatiḥ |
tasya tvaṃ tanayaḥ śreṣṭho dharmātmā dānaveśvaraḥ ||
2.5.35.18
purā tvaṃ pārṣado gopo gopeṣveva ca dhārmikaḥ |
adhunā rādhikāśāpājjātastvaṃ dānaveśvaraḥ ||
2.5.35.19
dānavīṃ yonimāyātastattvato na hi dānavaḥ |
nijavṛttaṃ purā jñātvā daivavairaṃ tyajādhunā ||
2.5.35.20
drohaṃ na kuru taiḥ sārddhaṃ svapadaṃ bhuṅkṣva sādaram |
nādhikaṃ savikāraṃ ca kuru rājyaṃ vicārya ca ||
2.5.35.21
dehi rājyaṃ ca devānāṃ matprītiṃ rakṣa dānava |
nijarājye sukhaṃ tiṣṭha tiṣṭhantu svapade surāḥ ||
2.5.35.22
alaṃ bhūtavirodhena devadroheṇa kiṃ punaḥ |
kulīnāḥ śuddhakarmāṇaḥ sarve kaśyapavaṃśajāḥ ||
2.5.35.23
yāni kāni ca pāpāni brahmahatyādikāni ca |
jñātidrohajapāpasya kalāṃ nārhanti ṣoḍaśīm ||
2.5.35.24
sanatkumāra uvāca |
ityādibahuvārttāṃ ca śrutismṛtiparāṃ śubhām |
provāca śaṅkaraḥ tasmai bodhayan jñānamuttamam ||
2.5.35.25
śikṣitaḥ śaṅkhacūḍena sa dūtastarkavittamaḥ |
uvāca vacanaṃ namro bhavitavyavimohitaḥ ||
2.5.35.26
dūta uvāca |
tvayā yatkathitaṃ deva nānyathā tattathā vacaḥ |
tathyaṃ kiñcidyathārthaṃ ca śrūyatāṃ me nivedanam ||
2.5.35.27
jñātidrohe mahatpāpaṃ tvayoktamadhunā ca yat |
tatkimīśāsurāṇāṃ ca na surāṇāṃ vada prabho ||
2.5.35.28
sarveṣāmiti cettadvai tadā vacmi vicārya ca |
nirṇayaṃ brūhi tatrādya kuru sandehabhañjanam ||
2.5.35.29
madhukaiṭabhayordaityavarayoḥ pralayārṇave |
śiraśchedaṃ cakārāsau kasmāccakrī maheśvara ||
2.5.35.30
tripuraiḥsaha saṃyuddhaṃ bhasmatvakaraṇaṃ kutaḥ |
bhavāñcakāra giriśa surapakṣīti viśrutam ||
2.5.35.31
gṛhītvā tasya sarvasvaṃ kutaḥ prasthāpito baliḥ |
sutalādi samuddhartuṃ taddvāre ca gadādharaḥ ||
2.5.35.32
sabhrātṛko hiraṇyākṣaḥ kathaṃ devaiśca hiṃsitaḥ |
śumbhādayo'surāścaiva kathaṃ devairnipātitāḥ ||
2.5.35.33
purā samudramathane pīyūṣaṃ bhakṣitaṃ suraiḥ |
kleśabhājo vayaṃ tatra te sarve phalabhoginaḥ ||
2.5.35.34
krīḍābhāṇḍamidaṃ viśvaṃ kālasya paramātmanaḥ |
sa dadāti yadā yasmai tasyaiśvaryaṃ bhavettadā ||
2.5.35.35
devadānavayorvairaṃ śaśvannaimittikaṃ sadā |
parājayo jayasteṣāṃ kālādhīnaḥ krameṇa ca ||
2.5.35.36
tavānayorvirodhe ca gamanaṃ niṣphalaṃ bhavet |
samasambandhināṃ tadvai rocate neśvarasya te ||
2.5.35.37
surāsurāṇāṃ sarveṣāmīśvarasya mahātmanaḥ |
iyaṃ te rahitā lajjā spardhāsmābhiḥ sahādhunā ||
2.5.35.38
yato'dhikā caiva kīrtirhāniścaiva parājaye |
tavaitadviparītaṃ ca manasā saṃvicāryatām ||
2.5.35.39
sanatkumāra uvāca |
ityetadvacanaṃ śrutvā samprahasya trilocanaḥ |
yathocitaṃ ca madhuramuvāca dānaveśvaram ||
2.5.35.40
maheśa uvāca |
vayaṃ bhaktaparādhīnā na svatantrāḥ kadāpi hi |
tadicchayā tatkarmāṇo na kasyāpi ca pakṣiṇaḥ ||
2.5.35.41
purā vidhiprārthanayā yuddhamādau harerapi |
madhukaiṭabhayordaityavarayoḥ pralayārṇave ||
2.5.35.42
devaprārthanayā tena hiraṇyakaśipoḥ purā |
prahrādārthaṃ vadho'kāri bhaktānāṃ hitakāriṇā ||
2.5.35.43
tripuraiḥ saha saṃyuddhaṃ bhasmatvakaraṇaṃ tataḥ |
devaprārthanayākāri mayāpi ca purā śrutam ||
2.5.35.44
sarvaiśvaryāḥ sarvamāturdevaprārthanayā purā |
āsīcchumbhādibhiryuddhaṃ vadhasteṣāṃ tayā kṛtaḥ ||
2.5.35.45
adyāpi tridaśāḥ sarve brahmāṇaṃ śaraṇaṃ yayuḥ |
sa sadevo harirmāṃ ca devaḥ śaraṇamāgataḥ ||
2.5.35.46
haribrahmādikānāṃ ca prārthanāvaśato'pyaham |
surāṇāmīśvaro dūta yuddhārthamagamaṃ khalu ||
2.5.35.47
pārṣadapravarastvaṃ hi kṛṣṇasya ca mahātmanaḥ |
ye ye hatāśca daiteyā na hi ke'pi tvayā samāḥ ||
2.5.35.48
kā lajjā mahatī rājan mama yuddhe tvayā saha |
devakāryārthamīśo'haṃ vinayena ca preṣitaḥ ||
2.5.35.49
gaccha tvaṃ śaṅkhacūḍaṃ vai kathanīyaṃ ca me vacaḥ |
sa ca yuktaṃ karotvatra surakāryaṃ karomyaham ||
2.5.35.50
ityuktvā śaṅkarastatra virarāma maheśvaraḥ |
uttasthau śaṅkhacūḍasya dūto'gacchattadantikam ||
2.5.35.50.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe śivadūtasaṃvādo nāma pañcatriṃśo'dhyāyaḥ ||
2.5.35.50.p2
śrīgaṇeśāya namaḥ ||
2.5.35.50.p3
śrīgaurīśaṅkarābhyāṃ namaḥ ||
2.5.35.50.p4
śrīśivamahāpurāṇam ||
2.5.35.50.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit