Shivapurana 2.5.36: ṣaṭstriṃśo'dhyāyaḥ | śaṅkhacūḍavadhe parasparayuddhavarṇanam
Śivapurāṇa (complete text) 2.5.36
- Language
- Sanskrit
Contents
- 2.5.36.36 — 5 parts
ṣaṭstriṃśo'dhyāyaḥ | śaṅkhacūḍavadhe parasparayuddhavarṇanam
2.5.36.1
sanatkumāra uvāca |
sa dūtastatra gatvā ca śivavākyaṃ jagāda ha |
savistaraṃ yathārthaṃ ca niścayaṃ tasya tattvataḥ ||
2.5.36.2
tacchutvā śaṅkhacūḍo'sau dānavendraḥ pratāpavān |
aṅgīcakāra suprītyā raṇameva sa dānavaḥ ||
2.5.36.3
samāruroha yānaṃ ca sahāmātyaiśca satvaraḥ |
ādideśa svasainyaṃ ca yuddhārthaṃ śaṅkareṇa ca ||
2.5.36.4
śivaḥ svasainyaṃ devāṃśca prerayāmāsa satvaraḥ |
svayamapyakhileśo'pi sannaddho'bhūcca līlayā ||
2.5.36.5
yuddhārambho babhūvāśu nedurvādyāni bhūriśaḥ |
kolāhalaśca sañjāto vīraśabdastathaiva ca ||
2.5.36.6
devadānavayoryuddhaṃ parasparamabhūnmune |
dharmato yuyudhe tatra devadānavayorgaṇaḥ ||
2.5.36.7
svayaṃ mahendro yuyudhe sārdhaṃ ca vṛṣaparvaṇā |
bhāskaro yuyudhe vipracittinā saha dharmataḥ ||
2.5.36.8
dambhena saha viṣṇuśca cakāra paramaṃ raṇam |
kālāsureṇa kālaśca gokarṇena hutāśanaḥ ||
2.5.36.9
kuberaḥ kālakeyena viśvakarmā mayena ca |
bhayaṅkareṇa mṛtyuśca saṃhāreṇa yamastathā ||
2.5.36.10
kālambikena varuṇaścañcalena samīraṇaḥ |
budhaśca ghaṭapṛṣṭhena raktākṣeṇa śanaiścaraḥ ||
2.5.36.11
jayanto ratnasāreṇa vasavo varcasāṃ gaṇaiḥ |
aśvinau dīptimadbhyāṃ ca dhūmreṇa nalakūbaraḥ ||
2.5.36.12
dhurandhareṇa dharmaśca gaṇakākṣeṇa maṅgalaḥ |
śobhākareṇa vaiśvānaḥ pipiṭena ca manmathaḥ ||
2.5.36.13
gokāmukhena cūrṇena khaḍganāmnāsureṇa ca |
dhūmreṇa saṃhalenāpi viśvena ca pratāpinā ||
2.5.36.14
dvādaśārkā palāśena yuyudhurdharmataḥ pare |
asurairamarāḥ sārddhaṃ śivasāhāyyaśālinaḥ ||
2.5.36.15
ekādaśa mahārudrāścaikādaśabhayaṅkaraiḥ |
asurairyuyudhurvīrairmahābalaparākramaiḥ ||
2.5.36.16
mahāmaṇiśca yuyudhe cogracaṇḍādibhiḥ saha |
rāhuṇā saha candraśca jīvaḥ śukreṇa dharmataḥ ||
2.5.36.17
nandīśvarādayaḥ sarve dānavapravaraiḥ saha |
yuyudhuśca mahāyuddhe noktā vistarataḥ pṛthak ||
2.5.36.18
vaṭamūle tadā śambhustasthau kālyāḥ sutena ca |
sarve ca yuyudhuḥ sainyasamūhāḥ satataṃ mune ||
2.5.36.19
ratnasiṃhāsane ramye koṭidānavasaṃyute |
uvāsa śaṅkhacūḍaśca ratnabhūṣaṇabhūṣitaḥ ||
2.5.36.20
mahāyuddho babhūvātha devāsuravimardanaḥ |
nānāyudhāni divyāni calanti sma mahāmṛdhe ||
2.5.36.21
gadarṣṭipaṭṭiśāścakrabhuśuṇḍiprāsamudgarāḥ |
nistriṃśabhallaparighāḥ śaktyunmukhaparaśvadhāḥ ||
2.5.36.22
śaratomarakhaḍgāśca śataghnyaśca sahasraśaḥ |
bhindipālādayaścānye vīrahasteṣu śobhitāḥ ||
2.5.36.23
śirāṃsi cicchiduścaibhirvīrāstatra mahotsavāḥ |
vīrāṇāmubhayoścaiva sainyayorgarjato raṇe ||
2.5.36.24
gajāsturaṅgā bahavaḥ syandanāśca padātayaḥ |
sārohavāhā vividhāstatrāsan suvikhaṇḍitāḥ ||
2.5.36.25
nikṛttabāhūrukarakaṭikarṇayugāṅghrayaḥ |
sañchinnadhvajabāṇāsitanutravarabhūṣaṇāḥ ||
2.5.36.26
samuddhatakirīṭaiśca śirobhiḥ saha kuṇḍalaiḥ |
saṃrambhanaṣṭairāstīrṇā babhau bhūḥ karabhorubhiḥ ||
2.5.36.27
mahābhujaiḥ sābharaṇaiḥ sañchinnaiḥ sāyudhaistathā |
aṅgairanyaiśca sahasā paṭalairvā sasāraghaiḥ ||
2.5.36.28
mṛdhe bhaṭāḥ pradhāvantaḥ kabandhān svaśirokṣibhiḥ |
paśyantastatra cotpeturudyatāyudhasadbhujaiḥ ||
2.5.36.29
valganto'titarāṃ vīrā yuyudhuśca parasparam |
śastrāstrairvividhaistatra mahābalaparākramāḥ ||
2.5.36.30
kecitsvarṇamukhairbāṇairvinihatya bhaṭānmṛdhe |
vyanadan vīrasannādaṃ satoyā iva toyadāḥ ||
2.5.36.31
sarvataḥ śarakūṭena vīraḥ sarathasārathim |
vīraṃ sañchādayāmāsa prāvṛṭsūryamivāmbudaḥ ||
2.5.36.32
anyo'nyamabhisaṃsṛtya yuyudhurdvandvayodhinaḥ |
āhvayanto viśanto'gre kṣipanto marmabhirmithaḥ ||
2.5.36.33
sarvato vīrasaṅghāśca nānābāhudhvajāyudhāḥ |
vyadṛśyanta mahāsaṅkhye kurvantaḥ siṃhasaṃravam ||
2.5.36.34
mahāravān svaśaṅkhāṃśca vidadhmurvai pṛthak pṛthak |
valganaṃ cakrire tatra mahāvīrāḥ praharṣitāḥ ||
2.5.36.35
evaṃ cirataraṃ kālaṃ devadānavayormahat |
babhūva yuddhaṃ vikaṭaṃ karālaṃ vīraharṣadam ||
2.5.36.36
mahāprabhośca līleyaṃ śaṅkarasya parātmanaḥ |
yayā samohitaṃ sarvaṃ sadevāsuramānuṣam ||
2.5.36.36.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe parasparayuddhavarṇanaṃ nāma ṣaṭtriṃśo'dhyāyaḥ ||
2.5.36.36.p2
śrīgaṇeśāya namaḥ ||
2.5.36.36.p3
śrīgaurīśaṅkarābhyāṃ namaḥ ||
2.5.36.36.p4
śrīśivamahāpurāṇam ||
2.5.36.36.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit