Shivapurana 2.5.37: saptatriṃśo'dhyāyaḥ | śaṅkhacūḍavadhe sasainyaśaṅkhacūḍayuddhavarṇanam
Śivapurāṇa (complete text) 2.5.37
- Language
- Sanskrit
Contents
- 2.5.37.45 — 5 parts
saptatriṃśo'dhyāyaḥ | śaṅkhacūḍavadhe sasainyaśaṅkhacūḍayuddhavarṇanam
2.5.37.1
sanatkumāra uvāca |
tadā devagaṇāḥ sarve dānavaiśca parājitāḥ |
dudruvurbhayabhītāśca śastrāstrakṣatavigrahāḥ ||
2.5.37.2
te parāvṛtya viśveśaṃ śaṅkaraṃ śaraṇaṃ yayuḥ |
trāhi trāhīti sarveśetyūcurvihvalayā girā ||
2.5.37.3
dṛṣṭvā parājayaṃ teṣāṃ devādīnāṃ sa śaṅkaraḥ |
sabhayaṃ vacanaṃ śrutvā kopamuccaiścakāra ha ||
2.5.37.4
nirīkṣya sa kṛpādṛṣṭyā devebhyaścābhayaṃ dadau |
balaṃ ca svagaṇānāṃ vai varddhayāmāsa tejasā ||
2.5.37.5
śivājñaptastadā skando dānavānāṃ gaṇaiḥ saha |
yuyudhe nirbhayaḥ saṅkhye mahāvīro harātmajaḥ ||
2.5.37.6
kṛtvā krodhaṃ vīraśabdaṃ devo yastārakāntakaḥ |
akṣauhiṇīnāṃ śatakaṃ samare sa jaghāna ha ||
2.5.37.7
rudhiraṃ pātayāmāsa kālī kamalalocanā |
teṣāṃ śirāṃsi sañchidya babhakṣa sahasā ca sā ||
2.5.37.8
papau raktāni teṣāṃ ca dānavānāṃ samantataḥ |
yuddhaṃ cakāra vividhaṃ suradānavabhīṣaṇam ||
2.5.37.9
śatalakṣaṃ gajendrāṇāṃ dānavānāṃ tathā raṇe |
samādāyaikahastena mukhe cikṣepa līlayā ||
2.5.37.10
kabandhānāṃ sahasraṃ ca sannanarta raṇe bahu |
mahān kolāhalo jātaḥ klībānāṃ ca bhayaṅkaraḥ ||
2.5.37.11
punaḥ skandaḥ prakupyoccaiḥ śaravarṣāṃ cakāra ha |
pātayāmāsa kṣaṇataḥ koṭiśo'suranāyakān ||
2.5.37.12
dānavāḥ śarajālena skandasya kṣatavigrahāḥ |
bhītāḥ pradudruvuḥ sarve śeṣā maraṇatastadā ||
2.5.37.13
vṛṣaparvā vipracittirdaṇḍaścāpi vikampanaḥ |
skandena yuyudhuḥ sārddhaṃ tena sarve krameṇa ca ||
2.5.37.14
mahāmārī ca yuyudhe na babhūva parāṅmukhī |
babhūvuste kṣatāṅgāśca skandaśaktiprapīḍitāḥ ||
2.5.37.15
mahāmārīskandayośca vijayo'bhūttadā mune |
nedurdundubhayaḥ svarge puṣpavṛṣṭiḥ papāta ha ||
2.5.37.16
skandasya samaraṃ dṛṣṭvā mahāraudraṃ tamadbhutam |
dānavānāṃ kṣayakaraṃ yathā prakṛtikalpakam ||
2.5.37.17
mahāmārīkṛtaṃ taccopadravaṃ kṣayahetukam |
cukopātīva sahasā sanaddho'bhūtsvayaṃ tadā ||
2.5.37.18
varaṃ vimānamāruhya nānāśastrāstrasaṃyutam |
abhayaṃ sarvavīrāṇāṃ nānāratnaparicchadam ||
2.5.37.19
mahāvīraiḥ śaṅkhacūḍo jagāma rathamadhyataḥ |
dhanurvikṛṣya karṇāntaṃ cakāra śaravarṣaṇam ||
2.5.37.20
tasya sā śaravṛṣṭiśca durnivāryā bhayaṅkarī |
mahāghorāndhakāraśca vadhasthāne babhūva ha ||
2.5.37.21
devāḥ pradudruvuḥ sarve ye'nye nandīśvarādayaḥ |
eka eva kārttikeyastasthau samaramūrddhani ||
2.5.37.22
parvatānāṃ ca sarpāṇāṃ nāgānāṃ śākhināṃ tathā |
rājā cakāra vṛṣṭiṃ ca durnivāryāṃ bhayaṅkarīm ||
2.5.37.23
taddṛṣṭyā prahataḥ skando babhūva śivanandanaḥ |
nīhāreṇa ca sāndreṇa saṃvṛto bhāskaro yathā ||
2.5.37.24
nānāvidhāṃ svamāyāṃ ca cakāra mayadarśitām |
tāṃ nāvidan surāḥ ke'pi gaṇāśca munisattama ||
2.5.37.25
tadaiva śaṅkhacūḍaśca mahāmāyī mahābalaḥ |
śareṇaikena divyena dhanuściccheda tasya vai ||
2.5.37.26
babhañja tadrathaṃ divyaṃ ciccheda ratharakṣakān |
mayūraṃ jarjarībhūtaṃ divyāstreṇa cakāra saḥ ||
2.5.37.27
śaktiṃ cikṣepa sūryābhāṃ tasya vakṣasi ghātinīm |
mūrcchāmavāpa sahasā tatprahāreṇa sa kṣaṇam ||
2.5.37.28
punaśca cetanāṃ prāpya kārtikaḥ paravīrahā |
ratnendrasāranirmāṇamāruroha svavāhanam ||
2.5.37.29
smṛtvā pādau maheśasya sāmbikasya ca ṣaṇmukhaḥ |
śastrāstrāṇi gṛhītvaiva cakāra raṇamulbaṇam ||
2.5.37.30
sarpāṃśca parvatāṃścaiva vṛkṣāṃśca prastarāṃstathā |
sarvāṃściccheda kopena divyāstreṇa śivātmajaḥ ||
2.5.37.31
vahniṃ nivārayāmāsa pārjanyena śareṇa ha |
rathaṃ dhanuśca ciccheda śaṅkhacūḍasya līlayā ||
2.5.37.32
sannāhaṃ sarvavāhāṃśca kirīṭaṃ mukuṭojjvalam |
vīraśabdaṃ cakārāsau jagarja ca punaḥ punaḥ ||
2.5.37.33
cikṣepa śaktiṃ sūryābhāṃ dānavendrasya vakṣasi |
tatprahāreṇa samprāpa mūrcchāṃ dīrghatamena ca ||
2.5.37.34
muhūrtamātraṃ tatkleśaṃ vinīya sa mahābalaḥ |
cetanāṃ prāpya cottasthau jagarja harivarcasaḥ ||
2.5.37.35
śaktyā jaghāna taṃ cāpi kārtikeyaṃ mahābalam |
sa papāta mahīpṛṣṭhe'moghāṃ kurvan vidhipradām ||
2.5.37.36
kālī gṛhītvā taṃ kroḍe nināya śivasannidhau |
jñānena taṃ śivaścāpi jīvayāmāsa līlayā ||
2.5.37.37
dadau balamanantaṃ ca samuttasthau pratāpavān |
gamanāya matiṃ cakre punastatra śivātmajaḥ ||
2.5.37.38
etasminnantare vīro vīrabhadro mahābalaḥ |
śaṅkhacūḍena yuyudhe samare balaśālinā ||
2.5.37.39
vavarṣa samare'strāṇi yāni yāni ca dānavaḥ |
ciccheda līlayā vīrastāni tāni nijaiḥ śaraiḥ ||
2.5.37.40
divyānyastrāṇi śataśo mumuce dānaveśvaraḥ |
tāni ciccheda taṃ bāṇairvīrabhadraḥ pratāpavān ||
2.5.37.41
athātīva cukopoccaiḥ śaṅkhacūḍaḥ pratāpavān |
śaktyā jaghānorasi taṃ sa cakampe papāta kau ||
2.5.37.42
kṣaṇena cetanāṃ prāpya samuttasthau gaṇeśvaraḥ |
jagrāha ca dhanurbhūyo vīrabhadro gaṇāgraṇīḥ ||
2.5.37.43
etasminnantare kālī jagāma samaraṃ punaḥ |
bhakṣituṃ dānavān svāṃśca rakṣituṃ kārtikecchayā ||
2.5.37.44
vīrāstāmanujagmuśca te ca nandīśvarādayaḥ |
sarve devāśca gandharvā yakṣā rakṣāṃsi pannagāḥ ||
2.5.37.45
madyabhāṇḍāśca bahuśaḥ śataśo vādyavāhakāḥ |
punaḥ samudyatāścāsan vīrā ubhayato'khilāḥ ||
2.5.37.45.c1
iti śrīśivamahāpurāṇe dvitīyāyāṃ rudrasahitāyāṃ pañcame yuddhakhaṇḍe śaṅkhacūḍavadhe sasainyaśaṅkhacūḍayuddhavarṇanaṃ nāma saptatriṃśo'dhyāyaḥ ||
2.5.37.45.p2
śrīgaṇeśāya namaḥ ||
2.5.37.45.p3
śrīgaurīśaṅkarābhyāṃ namaḥ ||
2.5.37.45.p4
śrīśivamahāpurāṇam ||
2.5.37.45.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit