Shivapurana 2.5.38: aṣṭatriṃśo'dhyāyaḥ | śaṅkhacūḍavadhe kālīyuddhavarṇanam
Śivapurāṇa (complete text) 2.5.38
- Language
- Sanskrit
Contents
- 2.5.38.37 — 5 parts
aṣṭatriṃśo'dhyāyaḥ | śaṅkhacūḍavadhe kālīyuddhavarṇanam
2.5.38.1
sanatkumāra uvāca |
sā ca gatvā hi saṅgrāmaṃ siṃhanādaṃ cakāra ha |
devyāśca tena nādena mūrcchāmāpuśca dānavāḥ ||
2.5.38.2
aṭṭāṭṭahāsamaśivaṃ cakāra ca punaḥ punaḥ |
tadā papau ca mādhvīkaṃ nanarta raṇamūrddhani ||
2.5.38.3
ugradaṃṣṭrā cogradaṇḍā koṭavī ca papau madhu |
anyāśca devyastatrājau nanṛturmadhu sampapuḥ ||
2.5.38.4
mahān kolāhalo jāto gaṇadevadale tadā |
jahṛṣurbahugarjantaḥ sarve suragaṇādayaḥ ||
2.5.38.5
dṛṣṭvā kālīṃ śaṅkhacūḍaḥ śīghramājau samāyayau |
dānavāśca bhayaṃ prāptā rājā tebhyo'bhayaṃ dadau ||
2.5.38.6
kālī cikṣepa vahniṃ ca pralayāgniśikhopamam |
rājā jaghāna taṃ śīghraṃ vaiṣṇavāṅkitalīlayā ||
2.5.38.7
nārāyaṇāstraṃ sā devī cikṣepa taduparyaram |
vṛddhiṃ jagāma tacchastraṃ dṛṣṭvā vāmaṃ ca dānavam ||
2.5.38.8
taṃ dṛṣṭvā śaṅkhacūḍaśca pralayāgniśikhopamam |
papāta daṇḍavadbhūmau praṇanāma punaḥpunaḥ ||
2.5.38.9
nivṛttiṃ prāpa tacchstraṃ dṛṣṭvā namraṃ ca dānavam |
brahmāstramatha sā devī cikṣepa mantrapūrvakam ||
2.5.38.10
taṃ dṛṣṭvā prajjvalantaṃ ca praṇamya bhuvi saṃsthitaḥ |
brahmāstreṇa dānavendro vinirvāraṃ cakāra ha ||
2.5.38.11
atha kruddho dānavendro dhanurākṛṣya raṃhasā |
cikṣepa divyānyastrāṇi devyai vai mantrapūrvakam ||
2.5.38.12
āhāraṃ samare cakre prasārya mukhamāyatam |
jagarja sāṭṭahāsaṃ ca dānavā bhayamāyayuḥ ||
2.5.38.13
kālyai cikṣepa śaktiṃ sa śatayojanamāyatām |
devī divyāstrajālena śatakhaṇḍaṃ cakāra sā ||
2.5.38.14
sa ca vaiṣṇavamastraṃ ca cikṣepa caṇḍikopari |
māheśvareṇa kālī ca vinirvāraṃ cakāra sā ||
2.5.38.15
evaṃ cirataraṃ yuddhamanyo'nyaṃ sambabhūva ha |
prekṣakā abhavan sarve devāśca dānavā api ||
2.5.38.16
atha kuddhā mahādevī kālī kālasamā raṇe |
jagrāha mantrapūtaṃ ca śaraṃ pāśupataṃ ruṣā ||
2.5.38.17
kṣepātpūrvaṃ tanniṣeddhuṃ vāgbabhūvāśarīriṇī |
na kṣipāstramidaṃ devi śaṅkhacūḍāya vai ruṣā ||
2.5.38.18
mṛtyuḥ pāśupatānnāstyamoghādapi ca caṇḍike |
śaṅkhacūḍasya vīrasyopāyamanyaṃ vicāraya ||
2.5.38.19
ityākarṇya bhadrakālī na cikṣepa tadastrakam |
śatalakṣaṃ dānavānāṃ jaghāsa līlayā kṣudhā ||
2.5.38.20
attuṃ jagāma vegena śaṅkhacūḍaṃ bhayaṅkarī |
divyāstreṇa ca raudreṇa vārayāmāsa dānavaḥ ||
2.5.38.21
atha kruddho dānavendraḥ khaḍgaṃ cikṣepa satvaram |
grīṣmasūryopamaṃ tīkṣṇadhāramatyantabhīkaram ||
2.5.38.22
sā kālī taṃ samālokyāyāntaṃ prajvalitaṃ ruṣā |
prasārya mukhamāhāraṃ cakre tasya ca paśyataḥ ||
2.5.38.23
divyānyastrāṇi cānyāni ciccheda dānaveśvaraḥ |
prāptāni pūrvataścakre śatakhaṇḍāni tāni ca ||
2.5.38.24
punarattuṃ mahādevī vegatastaṃ jagāma ha |
sarvasiddheśvaraḥ śrīmānantardhānaṃ cakāra saḥ ||
2.5.38.25
vegena muṣṭinā kālī tamadṛṣṭvā ca dānavam |
babhañja ca rathaṃ tasya jaghāna kila sārathim ||
2.5.38.26
athāgatya drutaṃ māyī cakraṃ cikṣepa vegataḥ |
bhadrakālyai śaṅkhacūḍaḥ pralayāgniśikhopamam ||
2.5.38.27
sā devī taṃ tadā cakraṃ vāmahastena līlayā |
jagrāha svamukhenaivāhāraṃ cakre ruṣā drutam ||
2.5.38.28
muṣṭyā jaghāna taṃ devī mahākopena vegataḥ |
babhrāma dānavendro'pi kṣaṇaṃ mūrcchāmavāpa saḥ ||
2.5.38.29
kṣaṇena cetanāṃ prāpya sa cottasthau pratāpavān |
na cakre bāhu yuddhaṃ ca mātṛbuddhyā tayā saha ||
2.5.38.30
gṛhītvā dānavaṃ devī bhrāmayitvā punaḥ punaḥ |
ūrdhvaṃ ca prāpayāmāsa mahākopena vegataḥ ||
2.5.38.31
utpapāta ca vegena śaṅkhacūḍaḥ pratāpavān |
nipatya ca samuttastho praṇamya bhadrakālikām ||
2.5.38.32
ratnendrasāranirmāṇavimānaṃ sumanoharam |
āruroha sa hṛṣṭātmā na bhrānto'pi mahāraṇe ||
2.5.38.33
dānavānāṃ hi kṣatajaṃ sā papau kālikā kṣudhā |
etasminnantare tatra vāgbabhūvāśarīriṇī ||
2.5.38.34
lakṣaṃ ca dānavendrāṇāmavaśiṣṭaṃ raṇe'dhunā |
uddhataṃ guñjatāṃ sārddhaṃ tatastvaṃ bhuṅkṣva ceśvari ||
2.5.38.35
saṅgrāme dānavendraṃ ca hantuṃ na kuru mānasam |
avadhyo'yaṃ śaṅkhacūḍastava devīti niścayam ||
2.5.38.36
tacchutvā vacanaṃ devī niḥsṛtaṃ vyomamaṇḍalāt |
dānavānāṃ bahūnāṃ ca māṃsaṃ ca rudhiraṃ tathā ||
2.5.38.37
bhuktvā pītvā bhadrakālī śaṅkarāntikamāyayau |
uvāca raṇavṛttāntaṃ paurvāparyeṇa sakramam ||
2.5.38.37.c1
iti śrīśivamahāpurāṇe dvitīyāyāṃ rudrasahitāyāṃ pañcame yuddhakhaṇḍe śaṅkhacūḍavadhe kālīyuddhavarṇanaṃ nāmāṣṭatriṃśo'dhyāyaḥ ||
2.5.38.37.p2
śrīgaṇeśāya namaḥ ||
2.5.38.37.p3
śrīgaurīśaṅkarābhyāṃ namaḥ ||
2.5.38.37.p4
śrīśivamahāpurāṇam ||
2.5.38.37.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit