Shivapurana 2.5.39: ekonacatvāriṃśo'dhyāyaḥ | śaṅkhacūḍasainyavadhavarṇanam
Śivapurāṇa (complete text) 2.5.39
- Language
- Sanskrit
Contents
- 2.5.39.45 — 5 parts
ekonacatvāriṃśo'dhyāyaḥ | śaṅkhacūḍasainyavadhavarṇanam
2.5.39.1
vyāsa uvāca |
śrutvā kālyuktamīśāno kiṃ cakāra kimuktavān |
tattvaṃ vada mahāprājña paraṃ kautūhalaṃ mama ||
2.5.39.2
sanatkumāra uvāca |
kālyuktaṃ vacanaṃ śrutvā śaṅkaraḥ parameśvaraḥ |
mahālīlākaraḥ śambhurjahāsāśvāsayañca tām ||
2.5.39.3
vyomavāṇīṃ samākarṇya tattvajñānaviśāradaḥ |
yayau svayaṃ ca samare svagaṇaiḥ saha śaṅkaraḥ ||
2.5.39.4
mahāvṛṣabhamārūḍho vīrabhadrādisaṃyutaḥ |
bhairavaiḥ kṣetrapālaiśca svasamānaiḥ samanvitaḥ ||
2.5.39.5
raṇaṃ prāpto maheśaśca vīrarūpaṃ vidhāya ca |
virarājādhikaṃ tatra rudro mūrta ivāntakaḥ ||
2.5.39.6
śaṅkhacūḍaḥ śivaṃ dṛṣṭvā vimānādavaruhya saḥ |
nanāma parayā bhaktyā śirasā daṇḍavadbhuvi ||
2.5.39.7
taṃ praṇamya tu yogena vimānamāruroha saḥ |
tūrṇaṃ cakāra sannāhaṃ dhanurjagrāha seṣukam ||
2.5.39.8
śivadānavayoryuddhaṃ śatamabdaṃ babhūva ha |
bāṇavarṣamivograṃ tadvarṣatormoghayostadā ||
2.5.39.9
śaṅkhacūḍo mahāvīraḥ śarāṃścikṣepa dāruṇān |
ciccheda śaṅkarastānvai līlayā svaśarotkaraiḥ ||
2.5.39.10
tadaṅgeṣu ca śastraughaistāḍayāmāsa kopataḥ |
mahārudro virūpākṣo duṣṭadaṇḍaḥ satāṃ gatiḥ ||
2.5.39.11
dānavo niśitaṃ khaḍgaṃ carma cādāya vegavān |
vṛṣaṃ jaghāna śirasi śivasya varavāhanam ||
2.5.39.12
tāḍite vāhane rudrastaṃ kṣurapreṇa līlayā |
khaḍgaṃ ciccheda tasyāśu carma cāpi mahojjvalam ||
2.5.39.13
chinne'sau carmaṇi tadā śaktiṃ cikṣepa so'suraḥ |
dvidhā cakre svabāṇena harastāṃ sammukhāgatām ||
2.5.39.14
kopādhmātaḥ śaṅkhacūḍaḥ cakraṃ cikṣepa dānavaḥ |
muṣṭipātena taccāpyacūrṇayatsahasā haraḥ ||
2.5.39.15
gadāmāvidhya tarasā sañcikṣepa haraṃ prati |
śambhunā sāpi sahasā bhinnā bhasmatvamāgatā ||
2.5.39.16
tataḥ paraśumādāya hastena dānaveśvaraḥ |
dhāvati sma haraṃ vegācchaṅkhacūḍaḥ krudhākulaḥ ||
2.5.39.17
samāhṛtya svabāṇaughairapātayata śaṅkaraḥ |
drutaṃ paraśuhastaṃ taṃ bhūtale līlayāsuram ||
2.5.39.18
tataḥ kṣaṇena samprāpya saṃjñāmāruhya sadratham |
dhṛtadivyāyudhaśaro babhau vyāpyākhilaṃ nabhaḥ ||
2.5.39.19
āyāntaṃ taṃ nirīkṣyaiva ḍamarudhvanimādarāt |
cakāra jyāravaṃ cāpi dhanuṣo duḥsahaṃ haraḥ ||
2.5.39.20
pūrayāmāsa kakubhaḥ śṛṅganādena ca prabhuḥ |
svayaṃ jagarja giriśastrāsayannasurāṃstadā ||
2.5.39.21
tyājitebhamahāgarvairmahānādairvṛṣeśvaraḥ |
pūrayāmāsa sahasā khaṃ gāṃ vasudiśastathā ||
2.5.39.22
mahākālaḥ samutpatya tāḍayad gāṃ tathā nabhaḥ |
karābhyāṃ tanninādena kṣiptā āsanpurā ravāḥ ||
2.5.39.23
aṭṭāṭṭahāsamaśivaṃ kṣetrapālaścakāra ha |
bhairavo'pi mahānādaṃ sa cakāra mahāhave ||
2.5.39.24
mahākolāhalo jāto raṇamadhye bhayaṅkaraḥ |
vīraśabdo babhūvātha gaṇamadhye samantataḥ ||
2.5.39.25
santresurdānavāḥsarve taiḥ śabdairbhayadaiḥ kharaiḥ |
cukopātīva tacchrutvā dānavendro mahābalaḥ ||
2.5.39.26
tiṣṭha tiṣṭheti duṣṭātman vyājahāra yadā haraḥ |
devairgaṇaiśca taiḥ śīghramuktaṃ jaya jayeti ca ||
2.5.39.27
athāgatya sa dambhasya tanayaḥ supratāpavān |
śaktiṃ cikṣepa rudrāya jvālāmālātibhīṣaṇām ||
2.5.39.28
vahnikūṭaprabhāyāntī kṣetrapālena satvaram |
nirastāgatya sājau vai mukhotpannamaholkayā ||
2.5.39.29
punaḥ pravavṛte yuddhaṃ śivadānavayormahat |
cakampe dharaṇī dyauśca sanagābdhijalāśayā ||
2.5.39.30
dāmbhimuktān śarān śambhuḥ śarāṃstatprahitānsa ca |
sahasraśaḥ śarairugraiściccheda śataśastadā ||
2.5.39.31
tataḥ śambhustriśūlena saṅkruddhastaṃ jaghāna ha |
tatprahāramasahyāśu kau papāta sa mūrcchitaḥ ||
2.5.39.32
tataḥ kṣaṇena samprāpa saṃjñāṃ sa ca tadāsuraḥ |
ājaghāna śarai rudraṃ tānsarvānāttakārmukaḥ ||
2.5.39.33
bāhūnāmayutaṃ kṛtvā chādayāmāsa śaṅkaram |
cakrāyutena sahasā śaṅkhacūḍaḥ pratāpavān ||
2.5.39.34
tato durgāpatiḥ kruddho rudro durgārtināśanaḥ |
tāni cakrāṇi ciccheda svaśarairuttamairdrutam ||
2.5.39.35
tato vegena sahasā gadāmādāya dānavaḥ |
abhyadhāvata vai hantuṃ bahusenāvṛto haram ||
2.5.39.36
gadāṃ ciccheda tasyāśvāpatataḥ so'sinā haraḥ |
śitadhāreṇa saṅkruddho duṣṭagarvāpahārakaḥ ||
2.5.39.37
chinnāyāṃ svagadāyāṃ ca cukopātīva dānavaḥ |
śūlaṃ jagrāha tejasvī pareṣāṃ duḥsahaṃ jvalat ||
2.5.39.38
sudarśanaṃ śūlahastamāyāntaṃ dānaveśvaram |
svatriśūlena vivyādha hṛdi taṃ vegato haraḥ ||
2.5.39.39
triśūlabhinnahṛdayānniṣkrāntaḥ puruṣaḥ paraḥ |
tiṣṭha tiṣṭheti covāca śaṅkhacūḍasya vīryavān ||
2.5.39.40
niṣkrāmato hi tasyāśu prahasya svanavattataḥ |
ciccheda ca śiro bhīmamasinā so'patadbhuvi ||
2.5.39.41
tataḥ kālīṃ cakhādograṃ daṃṣṭrākṣuṇṇaśirodharān |
asurāṃstān bahūn krodhāt prasārya svamukhaṃ tadā ||
2.5.39.42
kṣetrapālaścakhādānyānbahūndaityānkrudhākulaḥ |
kecinneśurbhairavāstracchinnā bhinnāstathāpare ||
2.5.39.43
vīrabhadro'parān vīrān bahūn krodhādanāśayat |
nandīśvaro jaghānānyān bahūnamaramardakān ||
2.5.39.44
evaṃ bahugaṇā vīrāstadā sannahya kopataḥ |
vyanāśayanbahūndaityānasurān devamardakān ||
2.5.39.45
itthaṃ bahutaraṃ tatra tasya sainyaṃ nanāśa tat |
vidrutāścāpare vīrā bahavo bhayakātarāḥ ||
2.5.39.45.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍasainyavadhavarṇanaṃ nāmaikonatriṃśo'dhyāyaḥ ||
2.5.39.45.p2
śrīgaṇeśāya namaḥ ||
2.5.39.45.p3
śrīgaurīśaṅkarābhyāṃ namaḥ ||
2.5.39.45.p4
śrīśivamahāpurāṇam ||
2.5.39.45.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit