Shivapurana 2.5.40: catvāriṃśo'dhyāyaḥ | śaṅkhacūḍavadhopākhyānam
Śivapurāṇa (complete text) 2.5.40
- Language
- Sanskrit
Contents
- 2.5.40.43 — 5 parts
catvāriṃśo'dhyāyaḥ | śaṅkhacūḍavadhopākhyānam
2.5.40.1
sanatkumāra uvāca |
svabalaṃ nihataṃ dṛṣṭvā mukhyaṃ bahutaraṃ tataḥ |
tathā vīrān prāṇasamān cukopātīva dānavaḥ ||
2.5.40.2
uvāca vacanaṃ śambhuṃ tiṣṭhāmyājau sthiro bhava |
kimetairnihatairme'dya sammukhe samaraṃ kuru ||
2.5.40.3
ityuktvā dānavendro'sau sannaddhaḥ samare mune |
agacchanniścayaṃ kṛtvā'bhimukhaṃ śaṅkarasya ca ||
2.5.40.4
divyānyastrāṇi cikṣepa mahārudrāya dānavaḥ |
cakāra śaravṛṣṭiṃ ca toyavṛṣṭiṃ yathā ghanaḥ ||
2.5.40.5
māyāścakāra vividhā adṛśyā bhayadarśitāḥ |
apratarkyāḥ suragaṇairnikhilairapiḥ sattamaiḥ ||
2.5.40.6
tāṃ dṛṣṭvā śaṅkarastatra cikṣepāstraṃ ca līlayā |
māheśvaraṃ mahādivyaṃ sarvamāyāvināśanam ||
2.5.40.7
tejasā tasya tanmāyā naṣṭāścāsan drutaṃ tadā |
divyānyastrāṇi tānyeva nistejāṃsyabhavannapi ||
2.5.40.8
atha yuddhe maheśānastadvadhāya mahābalaḥ |
śūlaṃ jagrāha sahasā durnivāryaṃ sutejasām ||
2.5.40.9
tadaiva tanniṣeddhuṃ ca vāgbabhūvāśarīriṇī |
kṣipa śūlaṃ na cedānīṃ prārthanāṃ śṛṇu śaṅkara ||
2.5.40.10
sarvathā tvaṃ samartho hi kṣaṇād brahmāṇḍanāśane |
kimekadānavasyeśa śaṅkhacūḍasya sāmpratam ||
2.5.40.11
tathāpi vedamaryādā na nāśyā svāminā tvayā |
tāṃ śṛṇuṣva mahādeva saphalaṃ kuru satyataḥ ||
2.5.40.12
yāvadasya kare'tyugraṃ kavacaṃ paramaṃ hareḥ |
yāvatsatītvamastyeva satyā asyasya yoṣitaḥ ||
2.5.40.13
tāvadasya jarāmṛtyuḥ śaṅkhacūḍasya śaṅkara |
nāstītyavitathaṃ nātha vidhehi brahmaṇo vacaḥ ||
2.5.40.14
ityākarṇya nabhovāṇīṃ tathetyukte hare tadā |
harecchayāgato viṣṇustaṃ dideśa satāṃ gatiḥ ||
2.5.40.15
vṛddhabrāhmaṇaveṣeṇa viṣṇurmāyāvināṃ varaḥ |
śaṅkhacūḍopakaṇṭhaṃ ca gatvovāca sa taṃ tadā ||
2.5.40.16
vṛddhabrāhmaṇa uvāca |
dehi bhikṣāṃ dānavendra mahyaṃ prāptāya sāmpratam ||
2.5.40.17
nedānīṃ kathayiṣyāmi prakaṭaṃ dīnavatsalam |
paścāttvāṃ kathayiṣyāmi punaḥ satyaṃ kariṣyasi ||
2.5.40.18
omityuvāca rājendraḥ prasannavadanekṣaṇaḥ |
kavacārthī janaścāhamityuvāceti sacchalāt ||
2.5.40.19
tacchrutvā dānavendro'sau brahmaṇyaḥ satyavāgvibhuḥ |
tad dadau kavacaṃ divyaṃ viprāya prāṇasammatam ||
2.5.40.20
māyayetthaṃ tu kavacaṃ tasmājjagrāha vai hariḥ |
śaṅkhacūḍasya rūpeṇa jagāma tulasīṃ prati ||
2.5.40.21
gatvā tatra haristasyā yonau māyāviśāradaḥ |
vīryādhānaṃ cakārāśu devakāryārthamīśvaraḥ ||
2.5.40.22
etasminnantare śambhumīrayan svavacaḥ prabhuḥ |
śaṅkhacūḍavadhārthāya śūlaṃ jagrāha prajvalat ||
2.5.40.23
tacchūlaṃ vijayaṃ nāma śaṅkarasya parātmanaḥ |
sañcakāśe diśaḥ sarvā rodasīṃ samprakāśayan ||
2.5.40.24
koṭimadhyāhnamārtaṇḍapralayāgniśikhopamam |
durnivāryaṃ ca durddharṣamavyarthaṃ vairighātakam ||
2.5.40.25
tejasāṃ cakramatyugraṃ sarvaśastrāstranāyakam |
surāsurāṇāṃ sarveṣāṃ duḥsahaṃ ca bhayaṅkaram ||
2.5.40.26
saṃhartuṃ sarvabrahmāḍamavalambya ca līlayā |
saṃsthitaṃ paramaṃ tatra ekatrībhūya vijvalat ||
2.5.40.27
dhanuḥ sahasraṃ dīrgheṇa prasthena śatahastakam |
jīvabrahmasvarūpaṃ ca nityarūpamanirmitam ||
2.5.40.28
vibhramad vyomni tacchūlaṃ śaṅkhacūḍopari kṣaṇāt |
cakāra bhasma tacchīghraṃ nipatya śivaśāsanāt ||
2.5.40.29
atha śūlaṃ maheśasya drutamāvṛtya śaṅkaram |
yayau vihāyasā vipra manoyāyi svakāryakṛt ||
2.5.40.30
nedurdundubhayaḥ svarge jagurgandharvakinnarāḥ |
tuṣṭuvurmunayo devā nanṛtuścāpsarogaṇāḥ ||
2.5.40.31
babhūva puṣpavṛṣṭiśca śivasyopari santatam |
praśaśaṃsa harirbrahmā śakrādyā munayastathā ||
2.5.40.32
śaṅkhacūḍo dānavendraḥ śivasya kṛpayā tadā |
śāpamukto babhūvātha pūrvarūpamavāpa ha ||
2.5.40.33
asthibhiḥ śaṅkhacūḍasya śaṅkhajātirbabhūva ha |
praśastaṃ śaṅkhatoyaṃ ca sarveṣāṃ śaṅkaraṃ vinā ||
2.5.40.34
viśeṣeṇa harerlakṣmyāḥ śaṅkhatoyaṃ mahāpriyam |
sambandhināṃ ca tasyāpi na harasya mahāmune ||
2.5.40.35
tamitthaṃ śaṅkaro hatvā śivalokaṃ jagāma saḥ |
suprahṛṣṭo vṛṣārūḍhaḥ somaskandagaṇairvṛtaḥ ||
2.5.40.36
harirjagāma vaikuṇṭhaṃ kṛṣṇaḥ svastho babhūva ha |
surāḥ svaviṣayaṃ prāpuḥ paramānandasaṃyutāḥ ||
2.5.40.37
jagatsvāsthyamatīvāpa sarvaṃ nirvighnamāpa kam |
nirmalaṃ cābhavadvyoma kṣitiḥ sarvā sumaṅgalā ||
2.5.40.38
iti proktaṃ maheśasya caritaṃ pramudāvaham |
sarvaduḥkhaharaṃ śrīdaṃ sarvakāmaprapūrakam ||
2.5.40.39
dhanyaṃ yaśasyamāyuṣyaṃ sarvavighnanivāraṇam |
bhuktidaṃ muktidaṃ caiva sarvakāmaphalapradam ||
2.5.40.40
ya idaṃ śṛṇuyānnityaṃ caritaṃ śaśimaulinaḥ |
śrāvayedvā paṭhedvāpi pāṭhayedvā sudhīrnaraḥ ||
2.5.40.41
dhanaṃ dhānyaṃ sutaṃ saukhyaṃ labhetātra na saṃśayaḥ |
sarvānkāmānavāpnoti śivabhaktiṃ viśeṣataḥ ||
2.5.40.42
idamākhyānamatulaṃ sarvopadravanāśanam |
paramajñānajananaṃ śivabhaktivivarddhanam ||
2.5.40.43
brāhmaṇo brahmavarcasvī kṣatriyo vijayī bhavet |
dhanāḍhyo vaiśyajaḥ śūdraḥ śṛṇvan sattamatāmiyāt ||
2.5.40.43.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaḍe śaṅkhacūḍavadhopākhyānaṃ nāma catvāriṃśo'dhyāyaḥ ||
2.5.40.43.p2
śrīgaṇeśāya namaḥ ||
2.5.40.43.p3
śrīgaurīśaṅkarābhyāṃ namaḥ ||
2.5.40.43.p4
śrīśivamahāpurāṇam ||
2.5.40.43.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Devībhāgavatapurāṇa — Sanskrit
- Brahmavaivartapurāṇa (another edition) — Sanskrit