Shivapurana 2.5.48: aṣṭacatvāriṃśo'dhyāyaḥ | śukranigīrṇanam
Śivapurāṇa (complete text) 2.5.48
- Language
- Sanskrit
Contents
- 2.5.48.48 — 5 parts
aṣṭacatvāriṃśo'dhyāyaḥ | śukranigīrṇanam
2.5.48.1
vyāsa uvāca |
śukre nigīrṇe rudreṇa kimakārṣuśca dānavāḥ |
andhakeśā mahāvīrā vada tattvaṃ mahāmune ||
2.5.48.2
sanatkumāra uvāca |
kāvye nigīrṇe girijeśvareṇa daityā jayāśārahitā babhūvuḥ |
hastairvimuktā iva vāraṇendrāḥ śaṛṅgairvihīnā iva govṛṣāśca ||
2.5.48.3
śiro vihīnā iva dehasaṅghā dvijā yathā cādhyayanena hīnāḥ |
nirudyamāḥ sattvagaṇā yathā vai yathodyamā bhāgyavivarjitāśca ||
2.5.48.4
patyā vihīnāśca yathaiva yoṣā yathā vipakṣāḥ khalu pakṣiṇaughāḥ |
āyūṃṣi hīnāni yathaiva puṇyai-rvratairvihīnāni yathā śrutāni ||
2.5.48.9
vinā yathā vaibhavaśaktimekāṃ bhavanti hīnāḥsvaphalaiḥ kriyaughāḥ |
yathā viśūrāḥ khalu kṣatriyāśca satyaṃ vinā dharmagaṇo yathaiva ||
2.5.48.6
nandinā ca hṛte śukre gilite ca viṣādinā |
viṣādamagamandaityā yatamānaraṇotsavāḥ ||
2.5.48.7
tān vīkṣya vigatotsāhānandhakaḥ pratyabhāṣata |
daityāṃstu huṇḍahuṇḍādīnmahādhīraparākramaḥ ||
2.5.48.8
andhaka uvāca |
kaviṃ vikramya nayatā nandinā vañcitā vayam |
tanūrvinā kṛtāḥ prāṇāḥ sarveṣāmadya no nanu ||
2.5.48.9_2
dhairyaṃ vīryaṃ gatiḥ kīrtiḥ sattvaṃ tejaḥ parākramaḥ |
yugapanno hṛtaṃ sarvamekasmin bhārgave hṛte ||
2.5.48.10
dhigasmān kulapūjyo yaireko'pi kulasattamaḥ |
guruḥ sarvasamarthaśca trātā trāto na cāpadi ||
2.5.48.11
tadyūyamavilambyeha yudhyadhvamaribhiḥ saha |
vīraistaiḥ pramathairvīrāḥ smṛtvā gurupadāmbujam ||
2.5.48.12
guroḥ kāvyasya sukhadau smṛtvā caraṇapaṅkajau |
sūdayiṣyāmyahaṃ sarvān pramathān saha nandinā ||
2.5.48.13
adyaitān vivaśān hatvā sahadevaiḥ savāsavaiḥ |
bhārgavaṃ mocayiṣyāmi jīvaṃ yogīva karmataḥ ||
2.5.48.14
sa cāpi yogī yogena yadi nāma svayaṃ prabhuḥ |
śarīrāttasya nirgacchedasmākaṃ śeṣapālakaḥ ||
2.5.48.15
sanatkumāra uvāca |
ityandhakavacaḥ śrutvā dānavā meghanissvanāḥ |
pramathān nirdayāḥ prāhurmartavye kṛtaniścayāḥ ||
2.5.48.16
satyāyuṣi na no jātu śaktāḥ syuḥ pramathā balāt |
asatyāyuṣi kiṃ gatvā tyaktvā svāminamāhave ||
2.5.48.17
ye svāminaṃ vihāyāto bahumānadhanā janāḥ |
yānti te yānti niyatamandhatāmisramālayam ||
2.5.48.18
ayaśastamasā khyātiṃ malinīkṛtya bhūriśaḥ |
ihāmutrāpi sukhino na syurbhagnā raṇājire ||
2.5.48.19
kiṃ dānaiḥ kiṃ tapobhiśca kiṃ tīrthaparimajjanaiḥ |
dharātīrthe yadi snānaṃ punarbhavamalāpahe ||
2.5.48.20
sampradhāryeti tadvākyaṃ daityāste danujāstathā |
mamanthuḥ pramathānājau raṇabherīṃ ninādya ca ||
2.5.48.21
tatra bāṇāsivajraughaiḥ kaṭhinaiśca śilāmayaiḥ |
bhuśuṇḍibhindipālaiśca śakti bhallaparaśvadhaiḥ ||
2.5.48.22
khaṭvāṅgaiḥ paṭṭiśaiḥ śūlairlakuṭairmusalairalam |
parasparamabhighnantaḥ pracakruḥ kadanaṃ mahat ||
2.5.48.23
kārmukāṇāṃ vikṛṣṭānāṃ patatāṃ ca patattriṇām |
bhindipālabhuśuṇḍīnāṃ kṣveḍitānāṃ ravo'bhavat ||
2.5.48.24
raṇatūryyaninādaiśca gajānāṃ bahubṛṃhitaiḥ |
hreṣāravairhayānāṃśca mahānkolāhalo'bhavat ||
2.5.48.25
atisvanairavāpūri dyāvābhūmyoryadantaram |
abhīrūṇāṃ ca bhīrūṇāṃ mahāromodgamo'bhavat ||
2.5.48.26
gajavājimahārāvasphuṭaśabdagrahāṇi ca |
bhagnadhvajapatākāni kṣīṇapraharaṇāni ca ||
2.5.48.27
rudhirodgāracitrāṇi vyaśvahastirathāni ca |
pipāsitāni sainyāni mumūrcchurubhayatra vai ||
2.5.48.28
atha te pramathā vīrā nandiprabhṛtayastadā |
balena jaghnurasurānsarvānprāpurjayaṃ mune ||
2.5.48.29
dṛṣṭvā sainyaṃ ca pramathairbhajyamānamitastataḥ |
dudrāva rathamāsthāya svayamevāndhako gaṇān ||
2.5.48.30
śarāsāraprayuktaistairvajrapātairnagā iva |
pramathā neśire cāstrairnistoyā iva toyadāḥ ||
2.5.48.31
yāntamāyāntamālokya dūrasthaṃ nikaṭasthitam |
pratyekaṃ romasaṅkhyābhirvivyādheṣubhirandhakaḥ ||
2.5.48.32
dṛṣṭvā sainyaṃ bhajyamānamandhakena balīyasā |
skando vināyako nandī somanandyādayaḥ pare ||
2.5.48.33
pramathā prabalā vīrāḥ śaṅkarasya gaṇā nijāḥ |
cukrudhuḥ samaraṃ cakrurvicitraṃ ca mahābalāḥ ||
2.5.48.34
vināyakena skandena nandinā somanandinā |
vīreṇa naigameyena vaiśākhena balīyasā ||
2.5.48.35
ityādyaistu gaṇairugrairandhako'pyandhakīkṛtaḥ |
triśūlaśaktibāṇaughadhārāsampātapātibhiḥ ||
2.5.48.36
tataḥ kolāhalo jātaḥ pramathāsurasainyayoḥ |
tena śabdena mahatā śukraḥ śambhūdare sthitaḥ ||
2.5.48.37
chidrānveṣī bhramanso'tha viniketo yathānilaḥ |
saptalokānsapātālān rudradehe vyalokayat ||
2.5.48.38
brahmanārāyaṇendrāṇāṃ sādityāpsarasāṃ tathā |
bhuvanāni vicitrāṇi yuddhaṃ ca pramathāsuram ||
2.5.48.39
sa varṣāṇāṃ śataṃ kukṣau bhavasya parito bhraman |
na tasya dadṛśe randhraṃ śuce randhraṃ khalo yathā ||
2.5.48.40
śāmbhavenātha yogena śukrarūpeṇa bhārgavaḥ |
imaṃ mantravaraṃ japtvā śambhorjaṭharapañjarāt ||
2.5.48.41
niṣkrānto liṅgamārgeṇa praṇanāma tataḥ śivam |
gauryyā gṛhītaḥ putrārthaṃ tadavighneśvarīkṛtaḥ ||
2.5.48.42
atha kāvyaṃ viniṣkrāntaṃ śukramārgeṇa bhārgavam |
dṛṣṭvovāca maheśāno vihasya karuṇānidhiḥ ||
2.5.48.43
maheśvara uvāca |
śukravanniḥsṛto yasmālliṅgānme bhṛgunandana |
karmaṇā tena śukrastvaṃ mama putro'si gamyatām ||
2.5.48.44
sanatkumāra uvāca |
ityevamukto devena śukro'rkasadṛśadyutiḥ |
praṇanāma śivaṃ bhūyastuṣṭāva vihitāñjaliḥ ||
2.5.48.45
śukra uvāca |
anantapādastvamanantamūrti-ranantamūrddhāntakaraḥ śivaśca |
anantabāhuḥ kathamīdṛśaṃ tvāṃ stoṣye ha nutyaṃ praṇipatya mūrdhnā ||
2.5.48.46
tvamaṣṭamūrtistvamanantamūrti-stvamiṣṭadaḥ sarvasurāsurāṇām |
aniṣṭadṛṣṭeśca vimardakaśca stoṣye ha nutyaṃ kathamīdṛśaṃ tvām ||
2.5.48.47
sanatkumāra uvāca |
iti stutvā śivaṃ śukraḥ punarnatvā śivājñayā |
viveśa dānavānīkaṃ meghamālāṃ yathā śaśī ||
2.5.48.48
nigīrṇanamiti proktaṃ śaṅkareṇa kave raṇe |
śṛṇu mantraṃ ca taṃ japto yaḥ śambhoḥ kavinodare ||
2.5.48.48.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śukranigīrṇanaṃ nāmāṣṭacatvāriṃśo'dhyāyaḥ ||
2.5.48.48.p2
śrīgaṇeśāya namaḥ ||
2.5.48.48.p3
śrīgaurīśaṅkarābhyāṃ namaḥ ||
2.5.48.48.p4
śrīśivamahāpurāṇam ||
2.5.48.48.p5
dvitīyāyāṃ rudrasaṃhitāyāṃ pañcamo yuddhakhaṇḍe