Pramāṇa · Search · About · API

Shivapurana 2.5.49: ekonapañcāśattamo'dhyāyaḥ | andhakagaṇa jīvitaprāptivarṇanam

Śivapurāṇa (complete text) 2.5.49

Language
Sanskrit

Contents

ekonapañcāśattamo'dhyāyaḥ | andhakagaṇa jīvitaprāptivarṇanam

2.5.49.p1

sanatkumāra uvāca |
oṃ namaste deveśāya surāsuranamaskṛtāya bhūtabhavyamahādevāya haritapiṅgalalocanāya balāya buddhirūpiṇe vaiyāghravasanacchadāyāraṇeyāya trailokyaprabhave īśvarāya harāya harinetrāya yugāntakaraṇāyānalāya gaṇeśāya lokapālāya mahābhujāya mahāhastāya śūline mahādaṃṣṭriṇe kālāya maheśvarāya avyayāya kālarūpiṇe nīlagrīvāya mahodarāya gaṇādhyakṣāya sarvātmane sarvabhāvanāya sarvagāya mṛtyuhantre pāriyātrasuvratāya brahmacāriṇe vedāntagāya tapontagāya paśupataye vyaṅgāya śūlapāṇaye vṛṣaketave haraye jaṭine śikhaṇḍine lakuṭine mahāyaśase bhūteśvarāya guhāvāsine vīṇāpaṇavatālavate amarāya darśanīyāya bālasūrya-nibhāya śmaśānavāsine bhagavate umāpataye arindamāya bhagasyākṣipātine pūṣṇordaśananāśanāya krurakartakāya pāśahastāya pralayakālāya ulkāmukhāyāgniketave munaye dīptāya viśāmpataye unnayate janakāya caturthakāya lokasattamāya vāmadevāya vāgdākṣiṇyāya vāmato bhikṣave bhikṣurūpiṇe jaṭine svayaṃ jaṭilāya śakrahastapratistambhakāya vasūnāṃ stambhakāya kratave kratukarāya kālāya medhāvine madhukarāya calāya vānaspatyāya vājasaneti samāśramapūjitāya jagaddhātre jagatkartre puruṣāya śāśvatāya dhruvāya dharmādhyakṣāya trivartmane bhūtabhāvanāya trinetrāya bahurūpāya sūryāyutasamaprabhāya devāya sarvatūryaninādine sarvabādhāvimocanāya bandhanāya sarvadhāriṇe dharmottamāya puṣpadantāyāvibhāgāya mukhāya sarvaharāya hiraṇyaśravase dvāriṇe bhīmāya bhīmaparākramāya oṃ namo namaḥ ||

2.5.49.1

imaṃ mantravaraṃ japtvā śukro jaṭharapañjarāt |
niṣkrānto liṅgamārgeṇa śambhoḥ śukramivotkaṭam ||

2.5.49.2

gauryā gṛhītaḥ putrārthaṃ viśveśena tataḥ kṛtaḥ |
ajaraścāmaraḥ śrīmāndvitīya iva śaṅkaraḥ ||

2.5.49.3

tribhirvarṣasahasraistu samatītairmahītale |
maheśvarātpunarjātaḥ śukro vedanidhirmuniḥ ||

2.5.49.4

dadarśa śūle saṃśuṣkaṃ dhyāyantaṃ parameśvaram |
andhakaṃ dhairyasampannaṃ dānaveśaṃ tapasvinam ||

2.5.49.5

mahādevaṃ virūpākṣaṃ candrārddhakṛtaśekharam |
amṛtaṃ śāśvataṃ sthāṇuṃ nīlakaṇṭhaṃ pinākinam ||

2.5.49.6

vṛṣabhākṣaṃ mahājñeyaṃ puruṣaṃ sarvakāmadam |
kāmāriṃ kāmadahanaṃ kāmarūpaṃ kapardinam ||

2.5.49.7

virūpaṃ giriśaṃ bhīmaṃ sragviṇaṃ raktavāsasam |
yoginaṃ kāladahanaṃ tripuraghnaṃ kapālinam ||

2.5.49.8

gūḍhavrataṃ guptamantraṃ gambhīraṃ bhāvagocaram |
aṇimādiguṇādhāraṃ trilokaiśvaryadāyakam ||

2.5.49.9

vīraṃ vīrahaṇaṃ ghoraṃ virūpaṃ māṃsalaṃ paṭum |
mahāmāṃsādamunmattaṃ bhairavaṃ vai maheśvaram ||

2.5.49.10

trailokyadrāvaṇaṃ lubdhaṃ lubdhakaṃ yajñasūdanam |
kṛttikānāṃ sutairyuktamunmattaṃ kṛttivāsasam ||

2.5.49.11

gajakṛttiparīdhānaṃ kṣubdhaṃ bhujagabhūṣaṇam |
dattālambaṃ ca vetālaṃ ghoraṃ śākinipūjitam ||

2.5.49.12

aghoraṃ ghoradaityaghnaṃ ghoraghoṣaṃ vanaspatim |
bhasmāṅgaṃ jaṭilaṃ śuddhaṃ bheruṇḍaśatasevitam ||

2.5.49.13

bhūteśvaraṃ bhūtanāthaṃ pañcabhūtāśritaṃ khagam |
krodhitaṃ niṣṭhuraṃ caṇḍaṃ caṇḍīśaṃ caṇḍikāpriyam ||

2.5.49.14

caṇḍaṃ tuṅgaṃ garutmantaṃ nityamāsavabhojanam |
lelihānaṃ mahāraudraṃ mṛtyuṃ mṛtyoragocaram ||

2.5.49.15

mṛtyormṛtyuṃ mahāsenaṃ śmaśānāraṇyavāsinam |
rāgaṃ virāgaṃ rāgāndhaṃ vītarāgaśatārcitam ||

2.5.49.16

sattvaṃ rajastamodharmamadharmaṃ vāsavānujam |
satyaṃ tvasatyaṃ sadrūpamasadrūpamahetukam ||

2.5.49.17

arddhanārīśvaraṃ bhānuṃ bhānukoṭiśataprabham |
yajñaṃ yajñapatiṃ rudramīśānaṃ varadaṃ śivam ||

2.5.49.18

aṣṭottaraśataṃ hyetanmūrtīnāṃ paramātmanaḥ |
śivasya dānavo dhyāyan muktastasmānmahābhayāt ||

2.5.49.19

divyenāmṛtavarṣeṇa so'bhiṣiktaḥ kaparddinā |
tuṣṭena mocitaṃ tasmācchūlāgrādavaropitaḥ ||

2.5.49.20

uktaścātha mahādaityo maheśānena so'ndhakaḥ |
asuraḥ sāntvapūrvaṃ yatkṛtaṃ sarvaṃ mahātmanā ||

2.5.49.21

īśvara uvāca |
bho bho daityendra tuṣṭo'smi yamena niyamena ca |
śauryeṇa tava dhairyeṇa varaṃ varaya suvrata ||

2.5.49.22

ārādhitastvayā nityaṃ sarvanirdhūtakalmaṣaḥ |
varado'haṃ varārhastvaṃ mahādaityendrasattama ||

2.5.49.23

prāṇasandhāraṇādasti yacca puṇyaphalaṃ tava |
tribhirvarṣasahasraistu tenāstu tava nirvṛtiḥ ||

2.5.49.24

sanatkumāra uvāca |
etacchrutvāndhakaḥ prāha vepamānaḥ kṛtāñjaliḥ |
bhūmau jānudvayaṃ kṛtvā bhagavantamumāpatim ||

2.5.49.25

andhaka uvāca |
bhagavanyanmayokto'si dīno hīnaḥ parātparaḥ |
harṣagadgadayā vācā mayā pūrvaṃ raṇājire ||

2.5.49.26

yadyatkṛtaṃ vimūḍhatvātkarma lokeṣu garhitam |
ajānatā tvāṃ tatsarvaṃ prabho manasi mā kṛthāḥ ||

2.5.49.27

pārvatyāmapi duṣṭaṃ yatkāmadoṣātkṛtaṃ mayā |
kṣamyatāṃ me mahādeva kṛpaṇo duḥkhito bhṛśam ||

2.5.49.28

duḥkhitasya dayā kāryā kṛpaṇasya viśeṣataḥ |
dīnasya bhaktiyuktasya bhavatā nityameva hi ||

2.5.49.29

so'haṃ dīno bhaktiyukta āgataḥ śaraṇaṃ tava |
rakṣā mayi vidhātavyā racito'yaṃ mayāñjaliḥ ||

2.5.49.30

iyaṃ devī jaganmātā parituṣṭā mamopari |
krodhaṃ vihāya sakalaṃ prasannā māṃ nirīkṣatām ||

2.5.49.31

kvāsyāḥ krodhaḥ kva kṛpaṇo daityo'haṃ candraśekhara |
tatsoḍhā nāhamarddhenducūḍa śambho maheśvara ||

2.5.49.32

kva bhavānparamodāraḥ kva cāhaṃ vivaśīkṛtaḥ |
kāmakrodhādibhirdoṣairjarasā mṛtyunā tathā ||

2.5.49.33

ayaṃ te vīrakaḥ putro yuddhaśauṇḍo mahābalaḥ |
kṛpaṇaṃ māṃ samālakṣya mā manyuvaśamanvagāḥ ||

2.5.49.34

tuṣārahāraśītāṃśuśaṅkhakundenduvarṇabhāk |
paśyeyaṃ pārvatīṃ nityaṃ mātaraṃ gurugauravāt ||

2.5.49.35

nityaṃ bhavadbhyāṃ bhaktastu nirvairo daivataiḥ saha |
nivaseyaṃ gaṇaiḥ sārddhaṃ śāntātmā yogacintakaḥ ||

2.5.49.36

mā smareyaṃ punarjātaṃ viruddhaṃ dānavodbhavam |
tvatkṛpāto maheśāna dehyetadvaramuttamam ||

2.5.49.37

sanatkumāra uvāca |
etāvaduktvā vacanaṃ daityendro maunamāsthitaḥ |
dhyāyaṃstrilocanaṃ devaṃ pārvatīṃ prekṣya mātaram ||

2.5.49.38

tato dṛṣṭastu rudreṇa prasannenaiva cakṣuṣā |
smṛtavānpūrvavṛttāntamātmano janma cādbhutam ||

2.5.49.39

tasminsmṛte ca vṛttānte tataḥ pūrṇamanorathaḥ |
praṇamya mātāpitarau kṛtakṛtyo'bhavattataḥ ||

2.5.49.40

pārvatyā mūrdhnyupāghrātaḥ śaṅkareṇa ca dhīmatā |
tathā'bhilaṣitaṃ lebhe tuṣṭād bālenduśekharāt ||

2.5.49.41

etadvaḥ sarvamākhyātamandhakasya purātanam |
gāṇapatyaṃ mahādevaprasādātparasaukhyadam ||

2.5.49.42

mṛtyuñjayaśca kathito mantro mṛtyuvināśanaḥ |
paṭhitavyaḥ prayatnena sarvakāmaphalapradaḥ ||

2.5.49.42.c1

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe andhakagaṇajīvitaprāptivarṇanaṃ nāmaikonapañcāśattamo'dhyāyaḥ ||

2.5.49.42.p2

śrīgaṇeśāya namaḥ ||

2.5.49.42.p3

śrīgaurīśaṅkarābhyāṃ namaḥ ||

2.5.49.42.p4

śrīśivamahāpurāṇam ||

2.5.49.42.p5

dvitīyāyāṃ rudrasaṃhitāyāṃ pañcamo yuddhakhaṇḍe