Shivapurana 2.5.50: pañcāśattamo'dhyāyaḥ | mṛtasañjīvinīvidyāprāptivarṇanam
Śivapurāṇa (complete text) 2.5.50
- Language
- Sanskrit
Contents
- 2.5.50.53 — 5 parts
pañcāśattamo'dhyāyaḥ | mṛtasañjīvinīvidyāprāptivarṇanam
2.5.50.1
sanatkumāra uvāca |
śṛṇu vyāsa yathā prāptā mṛtyupraśamanī parā |
vidyā kāvyena muninā śivānmṛtyuñjayābhidhāt ||
2.5.50.2
purāsau bhṛgudāyādo gatvā vārāṇasīṃ purīm |
bahukālaṃ tapastepe dhyāyanviśveśvaraṃ prabhum ||
2.5.50.3
sthāpayāmāsa tatraiva liṅgaṃ śambhoḥ parātmanaḥ |
kūpaṃ cakāra sadramyaṃ vedavyāsa tadagrataḥ ||
2.5.50.4
pañcāmṛtairdroṇamitairlakṣakṛtvaḥ prayatnataḥ |
snāpayāmāsa deveśaṃ sugandhasnapanairbahu ||
2.5.50.5
sahasrakṛtvo deveśaṃ candanairyakṣakardamaiḥ |
samālilimpa suprītyā sugandhodvarttanānyanu ||
2.5.50.6
rājacampakadhattūraiḥ karavīrakuśeśayaiḥ |
mālatīkarṇikāraiśca kadambairbakulotpalaiḥ ||
2.5.50.7
mallikāśatapatrībhissindhuvāraiḥ sakiṃśukaiḥ |
bandhūkapuṣpaiḥ punnāgairnāgakeśarakeśaraiḥ ||
2.5.50.8
navamallīcibilikaiḥ kundaiḥ samucukundakaiḥ |
mandārairbilvapatraiśca droṇairmarubakairbṛkaiḥ |
granthiparṇairdamanakaiḥ suramyaiścūtapallavaiḥ ||
2.5.50.9
tulasīdevagandhārībṛhatpatrīkuśāṅkuraiḥ |
nandyāvartairagastyaiśca saśālairdevadārubhiḥ ||
2.5.50.10
kāñcanāraiḥ kurabakairdūrvāṅkurakuruṇṭakaiḥ |
pratyekamebhiḥ kusumaiḥ pallavairaparairapi ||
2.5.50.11
patraiḥ sahasrapatraiśca ramyairnānāvidhaiḥ śubhaiḥ |
sāvadhānena suprītyā sa samānarca śaṅkaram ||
2.5.50.12
gītanṛtyopahāraiśca saṃstutaḥ stutibhirbahu |
nāmnāṃ sahasrairanyaiśca stotraistuṣṭāva śaṅkaram ||
2.5.50.13
sahasraṃ pañcaśaradāmitthaṃ śukro maheśvaram |
nānāprakāravidhinā maheśaṃ sa samarcayat ||
2.5.50.14
yadā devaṃ nānuloke manāgapi varonmukham |
tadānyaṃ niyamaṃ ghoraṃ jagrāhātīva duḥsaham ||
2.5.50.15
prakṣālya cetaso'tyantaṃ cāñcalyākhyaṃ mahāmalam |
bhāvanāvārbhirasakṛdindriyaiḥ sahitasya ca ||
2.5.50.16
nirmalīkṛtya tacceto ratnaṃ dattvā pinākine |
prapapau kaṇadhūmaughaṃ sahasraṃ śaradāṃ kaviḥ ||
2.5.50.17
kāvyamitthaṃ tapo ghoraṃ kurvantaṃ dṛḍhamānasam |
prasasāda sa taṃ vīkṣya bhārgavāya maheśvaraḥ ||
2.5.50.18
tasmālliṅgādvinirgatya sahasrārkādhikadyutiḥ |
uvāca taṃ virūpākṣaḥ sākṣāddākṣāyaṇīpatiḥ ||
2.5.50.19
maheśvara uvāca |
taponidhe mahābhāga bhṛguputra mahāmune |
tapasānena te nityaṃ prasanno'haṃ viśeṣataḥ ||
2.5.50.20
mano'bhilaṣitaṃ sarvaṃ varaṃ varaya bhārgava |
prītyā dāsye'khilānkāmānnādeyaṃ vidyate tava ||
2.5.50.21
sanatkumāra uvāca |
niśamyeti vacaḥ śambhormahāsukhakaraṃ varam |
sa babhūva kavistuṣṭo nimagnaḥ sukhavāridhau ||
2.5.50.22
udyadānandasandoharomāñcācitavigrahaḥ |
praṇanāma mudā śambhumambhojanayano dvijaḥ ||
2.5.50.23
tuṣṭāvāṣṭatanuṃ tuṣṭaḥ praphullanayanāñcalaḥ |
maulāvañjalimādhāya vadan jaya jayeti ca ||
2.5.50.24
bhārgava uvāca |
tvaṃ bhābhirābhirabhibhūya tamaḥsamasta-mastaṃ nayasyabhimatāni niśācarāṇām |
dedīpyase divamaṇe gagane hitāya lokatrayasya jagadīśvara tannamaste ||
2.5.50.25
loke'tivelamativelamahāmahobhi-rnirbhāsi kau ca gagane'khilalokanetraḥ |
vidrāvitākhilatamāḥsutamo himāṃśo pīyūṣapūraparipūrita tannamaste ||
2.5.50.26
tvaṃ pāvane pathi sadā gatirapyupāsyaḥ kastvāṃ vinā bhuvanajīvana jīvatīha |
stabdhaprabhañjanavivarddhi tasarvajantoḥ santoṣitā hi kulasarvaga vai namaste ||
2.5.50.27
viśvekapāvaka natāvaka pāvakaika-śakte ṛte mṛtavatāmṛtadivyakāryam |
prāṇiṣyado jagadaho jagadantarātmaṃ-stvaṃ pāvakaḥ pratipadaṃ śamado namaste ||
2.5.50.28
pānīyarūpa parameśa jagatpavitra citraṃ vicitrasucaritrakaro'si nūnam |
viśvaṃ pavitramamalaṃ kila viśvanātha pānīyagāhanata etadato nato'smi ||
2.5.50.29
ākāśarūpabahirantarutāvakāśa-dānādvikasvaramiheśvara viśvametat |
tvattaḥ sadā sadaya saṃśvasiti svabhāvāt saṅkocameti bhavato'smi natastatastvām ||
2.5.50.30
viśvambharātmaka bibharṣi vibho'tra viśvaṃ ko viśvanātha bhavato'nyatamastamo'riḥ |
sa tvaṃ vināśaya tamo tama cāhibhūṣa-stavyātparaḥ paraparaṃ praṇatastatastvām ||
2.5.50.31
ātmasvarūpa tava rūpaparamparābhi-rābhistataṃ hara carācararūpametat |
sarvāntarātmanilaya pratirūparūpa nityaṃ nato'smi paramātmajano'ṣṭamūrte ||
2.5.50.32
ityaṣṭamūrtibhirimābhirabandhubandho yuktaḥ karoṣi khalu viśvajanīnamūrtte |
etattataṃ suvitataṃ praṇatapraṇīta sarvārthasārthaparamārtha tato nato'smi ||
2.5.50.33
sanatkumāra uvāca |
aṣṭamūrtyaṣṭakenetthaṃ pariṣṭutyeti bhārgavaḥ |
bhargaṃ bhūmimilanmauliḥ praṇanāma punaḥ punaḥ ||
2.5.50.34
iti stuto mahādevo bhārgaveṇātitejasā |
utthāya bhūmerbāhubhyāṃ dhṛtvā taṃ praṇataṃ dvijam ||
2.5.50.35
uvāca ślakṣṇayā vācā meghanādagabhīrayā |
suprītyā daśanajyotsnā pradyotitadiṅgataraḥ ||
2.5.50.36
mahādeva uvāca |
vipravarya kave tāta mama bhakto'si pāvanaḥ |
anenātyugratapasā svajanyācaritena ca ||
2.5.50.37
liṅgasthāpanapuṇyena liṅgasyārādhanena ca |
dattacittopahāreṇa śucinā niścalena ca ||
2.5.50.38
avimuktamahākṣetrapavitrācaraṇena ca |
tvāṃ dayayā prapaśyāmi tavādeyaṃ na kiñcana ||
2.5.50.39
anenaiva śarīreṇa mamodaradarīgataḥ |
madvarendriyamārgeṇa putrajanmatvameṣyasi ||
2.5.50.40
yacchāmyahaṃ varaṃ te'dya duṣprāpyaṃ pārṣadairapi |
harerhiraṇyagarbhācca prāyaśo'haṃ jugopa yam ||
2.5.50.41
mṛtasañjīvanī nāma vidyā yā mama nirmalā |
tapobalena mahatā mayaiva parinirmitā ||
2.5.50.42
tvāṃ tāṃ tu prāpayāmyadya mantrarūpāṃ mahāśuce |
yogyatā te'sti vidyāyāstasyāḥ śucitaponidhe ||
2.5.50.43
yaṃ yamuddiśya niyatametāmāvartayiṣyasi |
vidyāṃ vidyeśvaraśreṣṭhāṃ satyaṃ prāṇiṣyati dhruvam ||
2.5.50.44
atyarkamatyagni ca te tejo vyomni ca tārakam |
dedīpyamānaṃ bhavitā grahāṇāṃ pravaro bhava ||
2.5.50.49
api ca tvāṃ kariṣyanti yātrāṃ nāryo naro'pi vā |
teṣāṃ tvad dṛṣṭipātena sarvakāryaṃ praṇaśyati ||
2.5.50.46
tavodaye bhaviṣyanti vivāhādīni suvrata |
sarvāṇi dharmakāryāṇi phalavanti nṛṇāmiha ||
2.5.50.47
sarvāśca tithayo nandāstava saṃyogataḥ śubhāḥ |
tava bhaktā bhaviṣyanti bahuśukrā bahu prajāḥ ||
2.5.50.48
tvayedaṃ sthāpitaṃ liṅgaṃ śukreśamiti saṃjñitam |
ye'rcayiṣyanti manujāsteṣāṃ siddhirbhaviṣyati ||
2.5.50.49_2
āvarṣaṃ pratighastraṃ ye naktavrataparāyaṇāḥ |
tvaddine śukrakūpe ye kṛtasarvodakakriyāḥ ||
2.5.50.50
śukreśamarcayiṣyanti śṛṇu teṣāṃ tu yatphalam |
avandhyaśukrāste martyāḥ putravanto'tiretasaḥ ||
2.5.50.51
puṃstvasaubhāgyasampannā bhaviṣyanti na saṃśayaḥ |
upetavidyāste sarve janāḥ syuḥ sukhabhāginaḥ ||
2.5.50.52
iti dattvā varāndevastatra liṅge layaṃ yayau |
bhārgavo'pi nijaṃ dhāma prāpa santuṣṭamānasaḥ ||
2.5.50.53
iti te kathitaṃ vyāsa yathā prāptā tapobalāt |
mṛtyuñjayābhidhā vidyā kimanyacchrotumicchasi ||
2.5.50.53.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe mṛtasañjīvinīvidyāprāptivarṇanaṃ nāma pañcāśattamo'dhyāyaḥ ||
2.5.50.53.p2
śrīgaṇeśāya namaḥ ||
2.5.50.53.p3
śrīgaurīśaṅkarābhyāṃ namaḥ ||
2.5.50.53.p4
śrīśivamahāpurāṇam ||
2.5.50.53.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Bṛhatstotraratnākaraḥ — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit