Shivapurana 2.5.55: pañcapañcāśattamo'dhyāyaḥ | bāṇabhujakṛntanagarvāpahāravarṇanam
Śivapurāṇa (complete text) 2.5.55
- Language
- Sanskrit
Contents
- 2.5.55.48 — 5 parts
pañcapañcāśattamo'dhyāyaḥ | bāṇabhujakṛntanagarvāpahāravarṇanam
2.5.55.1
vyāsa uvāca |
sanatkumāra sarvajña brahmaputra namo'stu te |
adbhuteyaṃ kathā tāta śrāvitā me tvayā mune ||
2.5.55.2
jṛmbhite jṛmbhaṇāstreṇa hariṇā samare hare |
hate bāṇabale bāṇaḥ kimakārṣīcca tadvada ||
2.5.55.6
sūta uvāca |
ityākarṇya vacastasya vyāsasyāmitatejasaḥ |
pratyuvāca prasannātmā brahmaputro munīśvaraḥ ||
2.5.55.4
sanatkumāra uvāca |
śṛṇu vyāsa mahāprājña kathāṃ ca paramādbhutām |
kṛṣṇaśaṅkarayostāta lokalīlānusāriṇoḥ ||
2.5.55.5
śayite līlayā rudre saputre sagaṇe sati |
bāṇo vinirgato yuddhaṃ kartuṃ kṛṣṇena daityarāṭ ||
2.5.55.6_2
kumbhāṇḍasaṅgṛhītāśvo nānāśastrāstradhṛk tataḥ |
cakāra yuddhamatulaṃ baliputro mahābalaḥ ||
2.5.55.7
dṛṣṭvā nijabalaṃ naṣṭaṃ sa daityendro'tyamarṣitaḥ |
cakāra yuddhamatulaṃ baliputro mahābalaḥ ||
2.5.55.8
śrīkṛṣṇo'pi mahāvīro giriśāptamahābalaḥ |
uccairjagarja tatrājau bāṇaṃ matvā tṛṇopamam ||
2.5.55.9
dhanuṣṭaṅkārayāmāsa śārṅgākhyaṃ nijamadbhutam |
trāsayanbāṇasainyaṃ tadavaśiṣṭaṃ munīśvara ||
2.5.55.10
tena nādena mahatā dhanuṣṭaṅkārajena hi |
dyāvābhūmyorantaraṃ vai vyāptamāsīdanantaram ||
2.5.55.11
cikṣepa vividhānbāṇānbāṇāya kupito hariḥ |
karṇāntaṃ tadvikṛṣyātha tīkṣṇānāśīviṣopamān ||
2.5.55.12
āyātastānnirīkṣyā'tha sa bāṇo balinandanaḥ |
aprāptāneva ciccheda svaśaraiḥ svadhanuścyutaiḥ ||
2.5.55.13
punarjagarja sa vibhurbāṇo vairigaṇārdanaḥ |
tatrasurvṛṣṇayaḥ sarve kṛṣṇātmāno vicetasaḥ ||
2.5.55.14
smṛtvā śivapadāmbhojaṃ cikṣepa nijasāyakān |
sa kṛṣṇāyātiśūrāya mahāgarvo baleḥ sutaḥ ||
2.5.55.15
kṛṣṇo'pi tānasamprāptānacchinatsvaśarairdrutam |
smṛtvā śivapadāmbhojamamarārirmahābalaḥ ||
2.5.55.16
rāmādayo vṛṣṇayaśca svaṃ svaṃ yoddhāramāhave |
nijaghnurbalinaḥsarve kṛtvā krodhaṃ samākulāḥ ||
2.5.55.17
itthaṃ cirataraṃ tatra balinośca dvayorapi |
babhūva tumulaṃ yuddhaṃ śṛṇvatāṃ vismayāvaham ||
2.5.55.18
tasminnavasare tatra krodhaṃ kṛtvā'ti pakṣirāṭ |
bāṇāsurabalaṃ sarvaṃ pakṣāghātairamardayat ||
2.5.55.19
marditaṃ svabalaṃ dṛṣṭvā mardayantaṃ ca taṃ balī |
cukopāti baleḥ putraḥ śaivarāḍ ditijeśvaraḥ ||
2.5.55.20
smṛtvā śivapadāmbhojaṃ sahasrabhujavāndrutam |
mahatparākramaṃ cakre vairiṇāṃ duḥsahaṃ sa vai ||
2.5.55.21
cikṣepa yugapadbāṇānamitāṃstatra vīrahā |
kṛṣṇādisarvayaduṣu garuḍe ca pṛthak pṛthak ||
2.5.55.22
jaghānaikena garuḍaṃ kṛṣṇamekena pattriṇā |
balamekena ca mune parānapi tathā balī ||
2.5.55.23
tataḥ kṛṣṇo mahāvīryo viṣṇurūpaḥ surārihā |
cukopātiraṇe tasmiñjagarja ca maheśvaraḥ ||
2.5.55.24
jaghāna bāṇaṃ tarasā śārṅganiḥsṛtasaccharaiḥ |
ati tadbalamatyugraṃ yugapatsmṛtaśaṅkaraḥ ||
2.5.55.25
ciccheda taddhanuḥ śīghraṃ chatrādikamanākulaḥ |
hayāṃśca pātayāmāsa hatvā tānsvaśarairhariḥ ||
2.5.55.26
bāṇo'pi ca mahāvīro jagarjāti prakupya ha |
kṛṣṇaṃ jaghāna gadayā so'pataddharaṇītale ||
2.5.55.27
utthāyāraṃ tataḥ kṛṣṇo yuyudhe tena śatruṇā |
śivabhaktena devarṣe lokalīlā'nusārataḥ ||
2.5.55.28
evaṃ dvayościraṃ kālaṃ babhūva sumahān raṇaḥ |
śivarūpo hariḥ kṛṣṇaḥ sa ca śaivottamo balī ||
2.5.55.29
kṛṣṇo'tha kṛtvā samaraṃ ciraṃ bāṇena vīryavān |
śivā''jñayā prāptabalaścukopāti munīśvara ||
2.5.55.30
tataḥsudarśanenāśu kṛṣṇo bāṇabhujānbahūn |
ciccheda bhagavān śambhuḥ śāsanātparavīrahā ||
2.5.55.31
avaśiṣṭā bhujāstasya catvāro'tīva sundarāḥ |
gatavyatho babhūvāśu śaṅkarasya prasādataḥ ||
2.5.55.32
gatasmṛtiryadā bāṇaḥ śiraśchettuṃ samudyataḥ |
kṛṣṇo vīratvamāpannastadā rudraḥ samutthitaḥ ||
2.5.55.33
rudra uvāca |
bhagavandevakīputra yadājñaptaṃ mayā purā |
tatkṛtaṃ ca tvayā viṣṇo madājñākāriṇā sadā ||
2.5.55.34
mā bāṇasya śiraśchindhi saṃharasva sudarśanam |
madājñayā cakramimamamoghaṃ majjane sadā ||
2.5.55.35
dattaṃ mayā purā tubhyamanivāryaṃ raṇe tava |
cakraṃ jayaṃ ca govinda nivartasva raṇāttataḥ ||
2.5.55.36
dadhīce rāvaṇe vīre tārakādipureṣvapi |
vinā madājñāṃ lakṣmīśa rathāṅgaṃ nāmucaḥ purā ||
2.5.55.37
tvaṃ tu yogīśvaraḥ sākṣātparamātmā janārdana |
vicāryatāṃ svamanasā sarvabhūtahite rataḥ ||
2.5.55.38
varamasya mayā dattaṃ na mṛtyurbhayamasti vai |
tanme vacaḥ sadā satyaṃ parituṣṭo'smyahaṃ tava ||
2.5.55.39
purā'yaṃ garvito matto yuddhaṃ dehīti me'bravīt |
bhujānkaṇḍūyamānastu vismṛtātmagatirhare ||
2.5.55.40
tadāhamaśapaṃ taṃ vai bhujacchettā''gamiṣyati |
acireṇātikālena gatagarvo bhaviṣyasi ||
2.5.55.41
madājñayā hariḥ prāpto bhujacchettā tavā'tha vai |
nivartasva raṇādgaccha svagṛhaṃ savadhūvaraḥ ||
2.5.55.42
ityuktaḥ sa tayormaitrīṃ kārayitvā maheśvaraḥ |
tamanujñāpya sagaṇaḥ saputraḥ svālayaṃ yayau ||
2.5.55.43
sanatkumāra uvāca |
ityākarṇya vacaḥ śambhoḥ saṃhṛtya ca sudarśanam |
akṣatāṅgastu vijayī tatkṛṣṇo'ntaḥpuraṃ yayau ||
2.5.55.44
aniruddhaṃ samāśvāsya sahitaṃ bhāryayā punaḥ |
jagrāha ratnasaṅghātaṃ bāṇadattamanekaśaḥ ||
2.5.55.45
tatsakhīṃ citralekhāṃ ca gṛhītvā parayoginīm |
prasanno'bhūttataḥ kṛṣṇaḥ kṛtakāryaḥ śivājñayā ||
2.5.55.46
hṛdā praṇamya giriśamāmantrya ca baleḥ sutam |
parivārasametastu jagāma svapurīṃ hariḥ ||
2.5.55.47
pathi jitvā ca varuṇaṃ viruddhaṃ tamanekadhā |
dvārakāṃ ca purīṃ prāptaḥ samutsavasamanvitaḥ ||
2.5.55.48
visarjayitvā garuḍaṃ sakhīnvīkṣyopahasya ca |
dvārakāyāṃ tato gatvā kāmacārī cacāra ha ||
2.5.55.48.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe bāṇabhujakṛntanagarvāpahāravarṇanaṃ nāma pañcapañcāśattamo'dhyāyaḥ ||
2.5.55.48.p2
śrīgaṇeśāya namaḥ ||
2.5.55.48.p3
śrīgaurīśaṅkarābhyāṃ namaḥ ||
2.5.55.48.p4
śrīśivamahāpurāṇam ||
2.5.55.48.p5
dvitīyāyāṃ rudrasaṃhitāyāṃ pañcamo yuddhakhaṇḍe