[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.5.55 # Shivapurana 2.5.55: pañcapañcāśattamo'dhyāyaḥ | bāṇabhujakṛntanagarvāpahāravarṇanam Śivapurāṇa (complete text) 2.5.55 - **Language:** Sanskrit ## Contents - [2.5.55.48](https://indike.org/pramana/in.purana.siva*complete-2.2.5.55.48) — 5 parts ### pañcapañcāśattamo'dhyāyaḥ | bāṇabhujakṛntanagarvāpahāravarṇanam ### [2.5.55.1](https://indike.org/pramana/in.purana.siva*complete-2.2.5.55.1) vyāsa uvāca | sanatkumāra sarvajña brahmaputra namo'stu te | adbhuteyaṃ kathā tāta śrāvitā me tvayā mune || ### [2.5.55.2](https://indike.org/pramana/in.purana.siva*complete-2.2.5.55.2) jṛmbhite jṛmbhaṇāstreṇa hariṇā samare hare | hate bāṇabale bāṇaḥ kimakārṣīcca tadvada || ### [2.5.55.6](https://indike.org/pramana/in.purana.siva*complete-2.2.5.55.6) sūta uvāca | ityākarṇya vacastasya vyāsasyāmitatejasaḥ | pratyuvāca prasannātmā brahmaputro munīśvaraḥ || ### [2.5.55.4](https://indike.org/pramana/in.purana.siva*complete-2.2.5.55.4) sanatkumāra uvāca | śṛṇu vyāsa mahāprājña kathāṃ ca paramādbhutām | kṛṣṇaśaṅkarayostāta lokalīlānusāriṇoḥ || ### [2.5.55.5](https://indike.org/pramana/in.purana.siva*complete-2.2.5.55.5) śayite līlayā rudre saputre sagaṇe sati | bāṇo vinirgato yuddhaṃ kartuṃ kṛṣṇena daityarāṭ || ### [2.5.55.6\_2](https://indike.org/pramana/in.purana.siva*complete-2.2.5.55.6_2) kumbhāṇḍasaṅgṛhītāśvo nānāśastrāstradhṛk tataḥ | cakāra yuddhamatulaṃ baliputro mahābalaḥ || ### [2.5.55.7](https://indike.org/pramana/in.purana.siva*complete-2.2.5.55.7) dṛṣṭvā nijabalaṃ naṣṭaṃ sa daityendro'tyamarṣitaḥ | cakāra yuddhamatulaṃ baliputro mahābalaḥ || ### [2.5.55.8](https://indike.org/pramana/in.purana.siva*complete-2.2.5.55.8) śrīkṛṣṇo'pi mahāvīro giriśāptamahābalaḥ | uccairjagarja tatrājau bāṇaṃ matvā tṛṇopamam || ### [2.5.55.9](https://indike.org/pramana/in.purana.siva*complete-2.2.5.55.9) dhanuṣṭaṅkārayāmāsa śārṅgākhyaṃ nijamadbhutam | trāsayanbāṇasainyaṃ tadavaśiṣṭaṃ munīśvara || ### [2.5.55.10](https://indike.org/pramana/in.purana.siva*complete-2.2.5.55.10) tena nādena mahatā dhanuṣṭaṅkārajena hi | dyāvābhūmyorantaraṃ vai vyāptamāsīdanantaram || ### [2.5.55.11](https://indike.org/pramana/in.purana.siva*complete-2.2.5.55.11) cikṣepa vividhānbāṇānbāṇāya kupito hariḥ | karṇāntaṃ tadvikṛṣyātha tīkṣṇānāśīviṣopamān || ### [2.5.55.12](https://indike.org/pramana/in.purana.siva*complete-2.2.5.55.12) āyātastānnirīkṣyā'tha sa bāṇo balinandanaḥ | aprāptāneva ciccheda svaśaraiḥ svadhanuścyutaiḥ || ### [2.5.55.13](https://indike.org/pramana/in.purana.siva*complete-2.2.5.55.13) punarjagarja sa vibhurbāṇo vairigaṇārdanaḥ | tatrasurvṛṣṇayaḥ sarve kṛṣṇātmāno vicetasaḥ || ### [2.5.55.14](https://indike.org/pramana/in.purana.siva*complete-2.2.5.55.14) smṛtvā śivapadāmbhojaṃ cikṣepa nijasāyakān | sa kṛṣṇāyātiśūrāya mahāgarvo baleḥ sutaḥ || ### [2.5.55.15](https://indike.org/pramana/in.purana.siva*complete-2.2.5.55.15) kṛṣṇo'pi tānasamprāptānacchinatsvaśarairdrutam | smṛtvā śivapadāmbhojamamarārirmahābalaḥ || ### [2.5.55.16](https://indike.org/pramana/in.purana.siva*complete-2.2.5.55.16) rāmādayo vṛṣṇayaśca svaṃ svaṃ yoddhāramāhave | nijaghnurbalinaḥsarve kṛtvā krodhaṃ samākulāḥ || ### [2.5.55.17](https://indike.org/pramana/in.purana.siva*complete-2.2.5.55.17) itthaṃ cirataraṃ tatra balinośca dvayorapi | babhūva tumulaṃ yuddhaṃ śṛṇvatāṃ vismayāvaham || ### [2.5.55.18](https://indike.org/pramana/in.purana.siva*complete-2.2.5.55.18) tasminnavasare tatra krodhaṃ kṛtvā'ti pakṣirāṭ | bāṇāsurabalaṃ sarvaṃ pakṣāghātairamardayat || ### [2.5.55.19](https://indike.org/pramana/in.purana.siva*complete-2.2.5.55.19) marditaṃ svabalaṃ dṛṣṭvā mardayantaṃ ca taṃ balī | cukopāti baleḥ putraḥ śaivarāḍ ditijeśvaraḥ || ### [2.5.55.20](https://indike.org/pramana/in.purana.siva*complete-2.2.5.55.20) smṛtvā śivapadāmbhojaṃ sahasrabhujavāndrutam | mahatparākramaṃ cakre vairiṇāṃ duḥsahaṃ sa vai || ### [2.5.55.21](https://indike.org/pramana/in.purana.siva*complete-2.2.5.55.21) cikṣepa yugapadbāṇānamitāṃstatra vīrahā | kṛṣṇādisarvayaduṣu garuḍe ca pṛthak pṛthak || ### [2.5.55.22](https://indike.org/pramana/in.purana.siva*complete-2.2.5.55.22) jaghānaikena garuḍaṃ kṛṣṇamekena pattriṇā | balamekena ca mune parānapi tathā balī || ### [2.5.55.23](https://indike.org/pramana/in.purana.siva*complete-2.2.5.55.23) tataḥ kṛṣṇo mahāvīryo viṣṇurūpaḥ surārihā | cukopātiraṇe tasmiñjagarja ca maheśvaraḥ || ### [2.5.55.24](https://indike.org/pramana/in.purana.siva*complete-2.2.5.55.24) jaghāna bāṇaṃ tarasā śārṅganiḥsṛtasaccharaiḥ | ati tadbalamatyugraṃ yugapatsmṛtaśaṅkaraḥ || ### [2.5.55.25](https://indike.org/pramana/in.purana.siva*complete-2.2.5.55.25) ciccheda taddhanuḥ śīghraṃ chatrādikamanākulaḥ | hayāṃśca pātayāmāsa hatvā tānsvaśarairhariḥ || ### [2.5.55.26](https://indike.org/pramana/in.purana.siva*complete-2.2.5.55.26) bāṇo'pi ca mahāvīro jagarjāti prakupya ha | kṛṣṇaṃ jaghāna gadayā so'pataddharaṇītale || ### [2.5.55.27](https://indike.org/pramana/in.purana.siva*complete-2.2.5.55.27) utthāyāraṃ tataḥ kṛṣṇo yuyudhe tena śatruṇā | śivabhaktena devarṣe lokalīlā'nusārataḥ || ### [2.5.55.28](https://indike.org/pramana/in.purana.siva*complete-2.2.5.55.28) evaṃ dvayościraṃ kālaṃ babhūva sumahān raṇaḥ | śivarūpo hariḥ kṛṣṇaḥ sa ca śaivottamo balī || ### [2.5.55.29](https://indike.org/pramana/in.purana.siva*complete-2.2.5.55.29) kṛṣṇo'tha kṛtvā samaraṃ ciraṃ bāṇena vīryavān | śivā''jñayā prāptabalaścukopāti munīśvara || ### [2.5.55.30](https://indike.org/pramana/in.purana.siva*complete-2.2.5.55.30) tataḥsudarśanenāśu kṛṣṇo bāṇabhujānbahūn | ciccheda bhagavān śambhuḥ śāsanātparavīrahā || ### [2.5.55.31](https://indike.org/pramana/in.purana.siva*complete-2.2.5.55.31) avaśiṣṭā bhujāstasya catvāro'tīva sundarāḥ | gatavyatho babhūvāśu śaṅkarasya prasādataḥ || ### [2.5.55.32](https://indike.org/pramana/in.purana.siva*complete-2.2.5.55.32) gatasmṛtiryadā bāṇaḥ śiraśchettuṃ samudyataḥ | kṛṣṇo vīratvamāpannastadā rudraḥ samutthitaḥ || ### [2.5.55.33](https://indike.org/pramana/in.purana.siva*complete-2.2.5.55.33) rudra uvāca | bhagavandevakīputra yadājñaptaṃ mayā purā | tatkṛtaṃ ca tvayā viṣṇo madājñākāriṇā sadā || ### [2.5.55.34](https://indike.org/pramana/in.purana.siva*complete-2.2.5.55.34) mā bāṇasya śiraśchindhi saṃharasva sudarśanam | madājñayā cakramimamamoghaṃ majjane sadā || ### [2.5.55.35](https://indike.org/pramana/in.purana.siva*complete-2.2.5.55.35) dattaṃ mayā purā tubhyamanivāryaṃ raṇe tava | cakraṃ jayaṃ ca govinda nivartasva raṇāttataḥ || ### [2.5.55.36](https://indike.org/pramana/in.purana.siva*complete-2.2.5.55.36) dadhīce rāvaṇe vīre tārakādipureṣvapi | vinā madājñāṃ lakṣmīśa rathāṅgaṃ nāmucaḥ purā || ### [2.5.55.37](https://indike.org/pramana/in.purana.siva*complete-2.2.5.55.37) tvaṃ tu yogīśvaraḥ sākṣātparamātmā janārdana | vicāryatāṃ svamanasā sarvabhūtahite rataḥ || ### [2.5.55.38](https://indike.org/pramana/in.purana.siva*complete-2.2.5.55.38) varamasya mayā dattaṃ na mṛtyurbhayamasti vai | tanme vacaḥ sadā satyaṃ parituṣṭo'smyahaṃ tava || ### [2.5.55.39](https://indike.org/pramana/in.purana.siva*complete-2.2.5.55.39) purā'yaṃ garvito matto yuddhaṃ dehīti me'bravīt | bhujānkaṇḍūyamānastu vismṛtātmagatirhare || ### [2.5.55.40](https://indike.org/pramana/in.purana.siva*complete-2.2.5.55.40) tadāhamaśapaṃ taṃ vai bhujacchettā''gamiṣyati | acireṇātikālena gatagarvo bhaviṣyasi || ### [2.5.55.41](https://indike.org/pramana/in.purana.siva*complete-2.2.5.55.41) madājñayā hariḥ prāpto bhujacchettā tavā'tha vai | nivartasva raṇādgaccha svagṛhaṃ savadhūvaraḥ || ### [2.5.55.42](https://indike.org/pramana/in.purana.siva*complete-2.2.5.55.42) ityuktaḥ sa tayormaitrīṃ kārayitvā maheśvaraḥ | tamanujñāpya sagaṇaḥ saputraḥ svālayaṃ yayau || ### [2.5.55.43](https://indike.org/pramana/in.purana.siva*complete-2.2.5.55.43) sanatkumāra uvāca | ityākarṇya vacaḥ śambhoḥ saṃhṛtya ca sudarśanam | akṣatāṅgastu vijayī tatkṛṣṇo'ntaḥpuraṃ yayau || ### [2.5.55.44](https://indike.org/pramana/in.purana.siva*complete-2.2.5.55.44) aniruddhaṃ samāśvāsya sahitaṃ bhāryayā punaḥ | jagrāha ratnasaṅghātaṃ bāṇadattamanekaśaḥ || ### [2.5.55.45](https://indike.org/pramana/in.purana.siva*complete-2.2.5.55.45) tatsakhīṃ citralekhāṃ ca gṛhītvā parayoginīm | prasanno'bhūttataḥ kṛṣṇaḥ kṛtakāryaḥ śivājñayā || ### [2.5.55.46](https://indike.org/pramana/in.purana.siva*complete-2.2.5.55.46) hṛdā praṇamya giriśamāmantrya ca baleḥ sutam | parivārasametastu jagāma svapurīṃ hariḥ || ### [2.5.55.47](https://indike.org/pramana/in.purana.siva*complete-2.2.5.55.47) pathi jitvā ca varuṇaṃ viruddhaṃ tamanekadhā | dvārakāṃ ca purīṃ prāptaḥ samutsavasamanvitaḥ || ### [2.5.55.48](https://indike.org/pramana/in.purana.siva*complete-2.2.5.55.48) visarjayitvā garuḍaṃ sakhīnvīkṣyopahasya ca | dvārakāyāṃ tato gatvā kāmacārī cacāra ha || ### [2.5.55.48.c1](https://indike.org/pramana/in.purana.siva*complete-2.2.5.55.48.c1) iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe bāṇabhujakṛntanagarvāpahāravarṇanaṃ nāma pañcapañcāśattamo'dhyāyaḥ || ### [2.5.55.48.p2](https://indike.org/pramana/in.purana.siva*complete-2.2.5.55.48.p2) śrīgaṇeśāya namaḥ || ### [2.5.55.48.p3](https://indike.org/pramana/in.purana.siva*complete-2.2.5.55.48.p3) śrīgaurīśaṅkarābhyāṃ namaḥ || ### [2.5.55.48.p4](https://indike.org/pramana/in.purana.siva*complete-2.2.5.55.48.p4) śrīśivamahāpurāṇam || ### [2.5.55.48.p5](https://indike.org/pramana/in.purana.siva*complete-2.2.5.55.48.p5) dvitīyāyāṃ rudrasaṃhitāyāṃ pañcamo yuddhakhaṇḍe --- Source: [https://indike.org/pramana/in.purana.siva*complete-2.2.5.55](https://indike.org/pramana/in.purana.siva*complete-2.2.5.55) · Pramāṇa