Shivapurana 2.5.56: ṣaṭpañcāśattamo'dhyāyaḥ | bāṇāsuragaṇatvaprāptivarṇanam
Śivapurāṇa (complete text) 2.5.56
- Language
- Sanskrit
Contents
- 2.5.56.34 — 5 parts
ṣaṭpañcāśattamo'dhyāyaḥ | bāṇāsuragaṇatvaprāptivarṇanam
2.5.56.1
nārada uvāca |
kṛṣṇe gate dvārakāyāmaniruddhena bhāryayā |
akārṣītkiṃ tato bāṇastattvaṃ vada mahāmune ||
2.5.56.2
sanatkumāra uvāca |
kṛṣṇe gate dvārakāyāmaniruddhena bhāryayā |
duḥkhito'bhūttato bāṇaḥ svājñānaṃ saṃsmaranhṛdā ||
2.5.56.3
tato nandī śivagaṇo bāṇaṃ provāca duḥkhitam |
daityaṃ śoṇitadigdhāṅgamanutāpasamanvitam ||
2.5.56.4
nandīśvara uvāca |
bāṇa śaṅkarasadbhakta mānutāpaṃ kuruṣva bhoḥ |
bhaktānukampī śambhurvai bhaktavatsalanāmadhṛk ||
2.5.56.5
tadicchayā ca yajjātaṃ tajjātamiti cetasā |
manyasva bhaktaśārdūla śivaṃ smara punaḥpunaḥ ||
2.5.56.6
mana ādye samādhāya kuru nityaṃ mahotsavam |
bhaktānukampanaścā'sya śaṅkarasya punaḥpunaḥ ||
2.5.56.7
nandivākyāttato bāṇo dviṣā śīrṣakamātrakaḥ |
śivasthānaṃ jagāmāśu dhṛtvā dhairyaṃ mahāmanāḥ ||
2.5.56.8
gatvā tatra prabhuṃ natvā rurodātīva vihvalaḥ |
gatagarvavrajo bāṇaḥ premākulitamānasaḥ ||
2.5.56.9
saṃstuvanvividhaiḥ stotraiḥ sannamannutitastathā |
yathocitaṃ pādaghātaṃ kurvanvikṣepayankarān ||
2.5.56.10
nanarta tāṇḍavaṃ mukhyaṃ pratyālīḍhādiśobhitam |
sthānakairvividhākārairālīḍhapramukhairapi ||
2.5.56.11
mukhavādasahasrāṇi bhrūkṣepasahitānyapi |
śiraḥkampasahasrāṇi prāptānīkaḥ sahasraśaḥ ||
2.5.56.12
vārīśca vividhākārā darśayitvā śanaiḥ śanaiḥ |
tathā śoṇitadhārābhiḥ siñcayitvā mahītalam ||
2.5.56.13
rudraṃ prasādayāmāsa śūlinaṃ candraśekharam |
bāṇāsuro mahābhakto vismṛtātmagatirnataḥ ||
2.5.56.14
tato nṛtyaṃ mahatkṛtvā bhagavānbhaktavatsalaḥ |
uvāca bāṇaṃ saṃhṛṣṭo nṛtya gītapriyo haraḥ ||
2.5.56.15
rudra uvāca |
bāṇa tāta baleḥ putra santuṣṭo nartanena te |
varaṃ gṛhāṇa daityendra yatte manasi vartate ||
2.5.56.16
sanatkumāra uvāca |
ityākarṇya vacaḥ śambhordaityendreṇa tadā mune |
bāṇena saṃvṛṇīto'bhūdvarastu vraṇaropaṇe ||
2.5.56.17
bāhuyuddhasya coddhattirgāṇapatyamathākṣayam |
uṣāputrasya rājyaṃ tu tasmin śoṇitakāhvaye ||
2.5.56.18
nirvairatā ca vibudhairviṣṇunā ca viśeṣataḥ |
na punardaityatā duṣṭā rajasā tamasā yutā ||
2.5.56.19
śambhubhaktirviśeṣeṇa nirvikārā sadā mune |
śivabhakteṣu ca sneho dayā sarveṣu jantuṣu ||
2.5.56.20
iti kṛtvā varān śambhorbaliputro mahā'suraḥ |
premṇā'śrunayano rudraṃ tuṣṭāva sukṛtāñjaliḥ ||
2.5.56.21
bāṇa uvāca |
devadeva mahādeva śaraṇāgatavatsala |
tvāṃ namāmi maheśāna dīnabandho dayānidhe ||
2.5.56.22
kṛtā mayi kṛpātīva kṛpāsāgara śaṅkara |
garvopahāritaḥ sarvaḥ prasannena mama prabho ||
2.5.56.23
tvaṃ brahma paramātmā hi sarvavyāpyakhileśvaraḥ |
brahmāṇḍatanurugreśo virāṭ sarvānvitaḥ paraḥ ||
2.5.56.24
nābhirnabho'gnirvadanamambu reto diśaḥ śrutiḥ |
dyauḥ śīrṣamaṅghrirurvī te manaścandrastava prabho ||
2.5.56.25
dṛgarko jaṭharaṃ vārddhirbhujendro dhiṣaṇā vidhiḥ |
prajāpatirvisargaśca dharmo hi hṛdayaṃ tava ||
2.5.56.26
romāṇyauṣadhayo nātha keśā jalamucastava |
guṇāstrayastrinetrāṇi sarvātmā puruṣo bhavān ||
2.5.56.27
brāhmaṇaṃ te mukhaṃ prāhurbāhuṃ kṣatriyameva ca |
ūrujaṃ vaiśyamāhuste pādajaṃ śūdrameva ca ||
2.5.56.28
tvameva sarvadopāsyaḥsarvairjīvairmaheśvara |
tvāṃ bhajanparamāṃ muktiṃ labhate puruṣo dhruvam ||
2.5.56.29
yastvāṃ visṛjate martya ātmānaṃ priyamīśvaram |
viparyayendriyārthārthaṃ viṣamattyamṛtaṃ tyajan ||
2.5.56.30
viṣṇurbrahmā'tha vibudhā munayaścāmalāśayāḥ |
sarvātmanā prapannāstvāṃ śaṅkaraṃ priyamīśvaram ||
2.5.56.31
sanatkumāra uvāca |
ityuktvā baliputrastu virarāma śarāsuraḥ |
premapraphullitāṅgaśca praṇamya sa maheśvaram ||
2.5.56.32
iti śrutvā svabhaktasya bāṇasya bhagavānbhavaḥ |
sarvaṃ labhiṣyasītyuktvā tatraivāntaradhīyata ||
2.5.56.33
tataḥ śambhoḥ prasādena mahākālatvamāgataḥ |
rudrasyānucaro bāṇo mahāpramudito'bhavat ||
2.5.56.34
iti kila śaranāmnā śaṅkarasyāpi vṛttaṃ sakalagurujanānāṃ sadguroḥ śūlapāṇeḥ |
kathitamiha variṣṭhaṃ śrotraramyairvacobhiḥ sakalabhuvanamadhye krīḍamānasya nityam ||
2.5.56.34.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe bāṇāsuragaṇapatvapadaprāptivarṇanaṃ nāma ṣaṭpañcāśattamo'dhyāyaḥ ||
2.5.56.34.p2
śrīgaṇeśāya namaḥ ||
2.5.56.34.p3
śrīgaurīśaṅkarābhyāṃ namaḥ ||
2.5.56.34.p4
śrīśivamahāpurāṇam ||
2.5.56.34.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (1)
- Bhāgavatapurāṇa — Vyāsa, Sanskrit