Shivapurana 2.5.58: aṣṭapañcāśattamo'dhyāyaḥ | dundubhinirhrādadaityavadhavarṇanam
Śivapurāṇa (complete text) 2.5.58
- Language
- Sanskrit
Contents
- 2.5.58.50 — 5 parts
aṣṭapañcāśattamo'dhyāyaḥ | dundubhinirhrādadaityavadhavarṇanam
2.5.58.1
sanatkumāra uvāca |
śṛṇu vyāsa pravakṣyāmi caritaṃ śaśimaulinaḥ |
yathā dundubhinirhrādamavadhīdditijaṃ haraḥ ||
2.5.58.2
hiraṇyākṣe hate daitye ditiputre mahābale |
viṣṇudevena kālena prāpa dukhaṃ mahadditiḥ ||
2.5.58.3
daityo dundubhinirhrādo duṣṭaḥ prahlādamātulaḥ |
sāntvayāmāsa tāṃ vāgbhirduḥkhitāṃ devaduḥkhadaḥ ||
2.5.58.4
atha daityaḥ sa māyāvī ditimāśvāsya daityarāṭ |
devāḥ kathaṃ sujeyāḥ syurityupāyamacintayat ||
2.5.58.5
devaiśca ghātito vīro hiraṇyākṣo mahāsuraḥ |
viṣṇunā ca saha bhrātrā sacchalairdaityavairibhiḥ ||
2.5.58.6
kiṃ balāśca kimāhārā kimādhārā hi nirjarāḥ |
mayā kathaṃ sujeyāḥ syurityupāyamacintayat ||
2.5.58.7
vicārya bahuśo daityastattvaṃ vijñāya niścitam |
avaśyamagrajanmāno hetavo'tra vicārataḥ ||
2.5.58.8
brāhmaṇānhantumasakṛdanvadhāvata vai tataḥ |
daityo dundubhinirhrādo devavairī mahākhalaḥ ||
2.5.58.9
yataḥ kratubhujo devāḥ kratavo vedasambhavāḥ |
te vedā brāhmaṇādhārāstato devabalaṃ dvijāḥ ||
2.5.58.10
niścitaṃ brāhmaṇādhārāḥ sarve vedāḥ savāsavāḥ |
gīrvāṇā brāhmaṇabalā nātra kāryā vicāraṇā ||
2.5.58.11
brāhmaṇā yadi naṣṭāḥ syurvedā naṣṭāstataḥ svayam |
atasteṣu praṇaṣṭeṣu vinaṣṭāḥ satataṃ surāḥ ||
2.5.58.12
yajñeṣu nāśaṃ gacchatsu hatāhārāstataḥ surāḥ |
nirbalāḥsukhajayyāḥ syurnirjiteṣu sureṣvatha ||
2.5.58.13
ahameva bhaviṣyāmi mānyastrijagatīpatiḥ |
āhariṣyāmi devānāmakṣayāḥ sarvasampadaḥ ||
2.5.58.14
nirvekṣyāmi sukhānyeva rājye nihatakaṇṭake |
iti niścitya durbuddhiḥ punaścintitavānkhalaḥ ||
2.5.58.15
dvijāḥ kva santi bhūyāṃso brahmatejo'tibṛṃhitā |
śrutyadhyayanasampannāstapobalasamanvitāḥ ||
2.5.58.16
bhūyasāṃ brāhmaṇānāṃ tu sthānaṃ vārāṇasī khalu |
tāmādāvupasaṃhṛtya yāyāṃ tīrthāntaraṃ tataḥ ||
2.5.58.17
yatra yatra hi tīrtheṣu yatra yatrāśrameṣu ca |
santi sarve'grajanmānaste mayādyāḥ samantataḥ ||
2.5.58.18
iti dundubhinirhrādo matiṃ kṛtvā kulocitām |
prāpyāpi kāśīṃ durvṛtto māyāvī nyavadhīd dvijān ||
2.5.58.19
samitkuśānsamādātuṃ yatra yānti dvijottamāḥ |
araṇye tatra tānsarvānsa bhakṣayati durmatiḥ ||
2.5.58.20
yathā ko'pi na vettyevaṃ tathā''cchanno'bhavatpunaḥ |
vane vanecaro bhūtvā yādorūpo jalāśaye ||
2.5.58.21
adṛśyarūpī māyāvī devānāmapyagocaraḥ |
divā dhyānaparastiṣṭhenmunivanmunimadhyagaḥ ||
2.5.58.22
praveśamuṭajānāṃ ca nirgamaṃ hi vilokayan |
yāminyāṃ vyāghrarūpeṇābhakṣayad brāhmaṇān bahūn ||
2.5.58.23
niḥśaṅkaṃ bhakṣayatyevaṃ na tyajatyapi kīkaśam |
itthaṃ nipātitāstena viprā duṣṭena bhūriśaḥ ||
2.5.58.24
ekadā śivarātrau tu bhaktastveko nijoṭaje |
saparyāṃ devadevasya kṛtvā dhyānasthito'bhavat ||
2.5.58.25
sa ca dundubhinirhrādo daityendro baladarpitaḥ |
vyāghrarūpaṃ samāsthāya tamādātuṃ matiṃ dadhe ||
2.5.58.26
taṃ bhaktaṃ dhyānamāpannaṃ dṛḍhacittaṃ śivekṣaṇe |
kṛtāstramantravinyāsaṃ taṃ krāntumaśakanna saḥ ||
2.5.58.27
atha sarvagataḥ śambhurjñātvā tasyāśayaṃ haraḥ |
daityasya duṣṭarūpasya vadhāya vidadhe dhiyam ||
2.5.58.28
yāvadāditsati vyāghrastāvadāvirabhūddharaḥ |
jagadrakṣāmaṇistryakṣo bhaktarakṣaṇadakṣadhīḥ ||
2.5.58.29
rudramāyāntamālokya tadbhaktārcitaliṅgataḥ |
daityastenaiva rūpeṇa vavṛdhe bhūdharopamaḥ ||
2.5.58.30
sāvajñamatha sarvajñaṃ yāvatpaśyati dānavaḥ |
tāvadāyāntamādāya kakṣāyantre nyapīḍayat ||
2.5.58.31
pañcāsyastvatha pañcāsyaṃ muṣṭyā mūrddhanyatāḍayat |
bhaktavatsalanāmāsau vajrādapi kaṭhorayā ||
2.5.58.32
sa tena muṣṭighātena kakṣāniṣpeṣaṇena ca |
atyārtamāraṭadvyāghro rodasīṃ pūrayanmṛtaḥ ||
2.5.58.33
tena nādena mahatā sampravepitamānasāḥ |
tapodhanāḥ samājagmurniśi śabdānusārataḥ ||
2.5.58.34
tatreśvaraṃ samālokya kakṣīkṛtamṛgeśvaram |
tuṣṭuvuḥ praṇatāḥ sarve śarvaṃ jayajayākṣaraiḥ ||
2.5.58.35
brāhmaṇā ūcuḥ |
trāyatāṃ trāyatāṃ deva pratyūhāddāruṇāditaḥ |
anugrahaṃ kuruṣveśa tiṣṭhātraiva jagadguro ||
2.5.58.36
anenaiva svarūpeṇa vyāghreśa iti nāmataḥ |
kuru rakṣāṃ mahādeva jyeṣṭhasthānasya sarvadā ||
2.5.58.37
anyebhyo hyupasargebhyo rakṣa nastīrthavāsinaḥ |
duṣṭānapāsya gaurīśa bhaktebhyo dehi cābhayam ||
2.5.58.38
sanatkumāra uvāca |
ityākarṇya vacasteṣāṃ bhaktānāṃ candraśekharaḥ |
tathetyuktvā punaḥ prāha sa bhaktānbhaktavatsalaḥ ||
2.5.58.39
maheśvara uvāca |
yo māmanena rūpeṇa drakṣyati śraddhayātra vai |
tasyopasargasandhānaṃ pātayiṣyāmyasaṃśayam ||
2.5.58.40
maccaritramidaṃ śrutvā smṛtvā liṅgamidaṃ hṛdi |
saṅgrāme praviśanmartyo jayamāpnotyasaṃśayam ||
2.5.58.41
etasminnantare devāḥ samājagmuḥ savāsavāḥ |
jayeti śabdaṃ kurvanto mahotsavapuraḥsaram ||
2.5.58.42
praṇamya śaṅkaraṃ premṇā sarve sāñjalayaḥ surāḥ |
nataskandhāḥ suvāgbhiste tuṣṭuvurbhaktavatsalam ||
2.5.58.43
devā ūcuḥ |
jaya śaṅkara deveśa praṇatārtihara prabho |
etaddundubhinirhrādavadhāt trātā vayaṃ surāḥ ||
2.5.58.44
sadā rakṣā prakartavyā bhaktānāṃ bhaktavatsala |
vadhyāḥ khalāśca deveśa tvayā sarveśvara prabho ||
2.5.58.45
ityākarṇya vacasteṣāṃ surāṇāṃ parameśvaraḥ |
tathetyuktvā prasannātmā tasmiṃlliṅge layaṃ yayau ||
2.5.58.46
savismayāstato devāḥ svaṃ svaṃ dhāma yayurmudā |
te'pi viprā mahāharṣātpunaryātā yathāgatam ||
2.5.58.47
idaṃ caritraṃ paramaṃ vyāghreśvarasamudbhavam |
śṛṇuyācchrāvayedvāpi paṭhedvā pāṭhayettathā ||
2.5.58.48
sarvānkāmānavāpnoti naraḥsvamanasepsitān |
paratra labhate mokṣaṃ sarvaduḥkhavivarjitaḥ ||
2.5.58.49
idamākhyānamatulaṃ śivalīlāmṛtākṣaram |
svargyaṃ yaśasyamāyuṣyaṃ putrapautrapravarddhanam ||
2.5.58.50
paraṃ bhaktipradaṃ dhanyaṃ śivaprītikaraṃ śivam |
paramajñānadaṃ ramyaṃ vikāraharaṇaṃ param ||
2.5.58.50.c1
iti śrīśivamahāpurāṇe dvitīyāyāṃ rudrasaṃhitāyāṃ pañcama yuddhakhaṇḍe dundubhinirhrādadaityavadhavarṇanaṃ nāmāṣṭapañcāśattamo'dhyāyaḥ ||
2.5.58.50.p2
śrīgaṇeśāya namaḥ ||
2.5.58.50.p3
śrīgaurīśaṅkarābhyāṃ namaḥ ||
2.5.58.50.p4
śrīśivamahāpurāṇam ||
2.5.58.50.p5
dvitīyāyāṃ rudrasaṃhitāyāṃ pañcamo yuddhakhaṇḍe