Shivapurana 2.5.59: ekonaṣaṣṭitamo'dhyāyaḥ | vidalotpaladaityavadhavarṇanam
Śivapurāṇa (complete text) 2.5.59
- Language
- Sanskrit
Contents
- 2.5.59.42 — 3 parts
ekonaṣaṣṭitamo'dhyāyaḥ | vidalotpaladaityavadhavarṇanam
2.5.59.1
sanatkumāra uvāca |
śṛṇu vyāsa susamprītyā caritaṃ parameśituḥ |
yathāvadhītsvapriyayā daityamuddiśya saṃjñayā ||
2.5.59.2
āstāṃ purā mahādaityau vidalotpalasaṃjñakau |
apuṃvadhyau mahāvīrau sudṛptau varato vidheḥ ||
2.5.59.3
tṛṇīkṛtatrijagatī puruṣābhyāṃ svadorbalāt |
tābhyāṃ sarve surā brahman daityābhyāṃ nirjitā raṇe ||
2.5.59.4
tābhyāṃ parājitā devā vidheste śaraṇaṃ gatāḥ |
natvā taṃ vidhivatsarve kathayāmāsurādarāt ||
2.5.59.5
iti brahmā hyavocattān devyā vadhyau ca tau dhruvam |
dhairyaṃ kuruta saṃsmṛtya saśivāṃ śivamādarāt ||
2.5.59.6
bhaktavatsalanāmāsau saśivāśaṅkaraḥ śivaḥ |
śaṃ kariṣyatyadīrgheṇa kālena parameśvaraḥ ||
2.5.59.7
sanatkumāra uvāca
ityuktvā tāṃstato brahmā tūṣṇīmāsīcchivaṃ smran |
te'pi devā mudaṃ prāpya svaṃ svaṃ dhāma yayustadā ||
2.5.59.8
atha nāradadevarṣiḥ śivapreraṇayā tadā |
gatvā tadīyabhavanaṃ śivāsaundaryamujjagau ||
2.5.59.9
śrutvā tadvacanaṃ daityāvāstāṃ māyāvimohitau |
devīṃ parijihīrṣū tau viṣameṣuprapīḍitau ||
2.5.59.10
vicārayāmāsatustau kadā kutra śivā ca sā |
bhaviṣyati vidheḥ prāptodayānnāviti ||
2.5.59.11
ekasminsamaye śambhurvijahāra sulīlayā |
kautukenaiva cikrīḍe śivā kandukalīlayā ||
2.5.59.12
sakhībhiḥ saha suprītyā kautukācchivasannidhau ||
2.5.59.13
udañcantyañcadaṅgānāṃ lāghavaṃ paritanvatī |
niśvāsāmodamuditabhramarākulitekṣaṇā ||
2.5.59.14
bhraśyaddhammillasanmālyasvapurākṛtabhūmikā |
svidyatkapolapatrālīsravadambukaṇojjvalā ||
2.5.59.15
sphuṭaccolāṃśukapathatiryadaṅgaprabhāvṛtā |
ullasatkandukāsphālātiśroṇitakarāmbujā ||
2.5.59.16
kandukānugasaddṛṣṭinartitabhrūlatāñcalā |
mṛḍānī kila khelantī dadṛśe jagadambikā ||
2.5.59.17
antarikṣacarābhyāṃ ca ditijābhyāṃ kaṭākṣitā |
kroḍīkṛtābhyāmiva vai samupasthitamṛtyunā ||
2.5.59.18
vidalotpalasaṃjñābhyāṃ dṛptābhyāṃ varato vidheḥ |
tṛṇīkṛtatrijagatīpuruṣābhyāṃ svadorbalāt ||
2.5.59.19
devīṃ tāṃ sañjihīrṣantau viṣameṣuprapīḍitau |
diva utteratuḥ kṣipraṃ māyāṃ svīkṛtya śāmbarīm ||
2.5.59.20
dhṛtvā pāriṣadīṃ māyāmāyātāmambikāntikam |
tāvatyantaṃ sudurvṛttāvaticañcalamānasau ||
2.5.59.21
atha duṣṭanihantrā vai sāvajñena hareṇa tau |
vijñātau ca kṣaṇādāstāṃ cāñcalyāllocanodbhavāt ||
2.5.59.22
kaṭākṣitātha devena durgā durgatighātinī |
daityāvimāviti gaṇau neti sarvasvarūpiṇā ||
2.5.59.23
atha sā netrasaṃjñāṃ svasvāminastāṃ bubodha ha |
mahākautukinastāta śaṅkarasya pareśituḥ ||
2.5.59.24
tato vijñāya saṃjñāṃ tāṃ sarvajñārddhaśarīriṇī |
tenaiva kandukenātha yugapannirjaghāna tau ||
2.5.59.25
mahābalau mahādevyā kandukena samāhatau |
paribhramya paribhramya tau duṣṭau vinipetatuḥ ||
2.5.59.26
vṛntādiva phale pakve tālenānilalolite |
dambholinā parihate śṛṅge iva mahāgireḥ ||
2.5.59.27
tau nipātya mahādaityāvakāryakaraṇodyatau |
tataḥ pariṇatiṃ yāto liṅgarūpeṇa kandukaḥ ||
2.5.59.28
kandukeśvarasaṃjñaṃ ca talliṅgamabhavattadā |
jyeṣṭheśvarasamīpe tu sarvaduṣṭanivāraṇam ||
2.5.59.29
etasminneva samaye haribrahmādayaḥ surāḥ |
śivāvirbhāvamājñāya ṛṣayaśca samāyayuḥ ||
2.5.59.30
atha sarve surāḥ śambhorvarānprāpya tadājñayā |
svadhāmāni yayuḥ prītāstathā kāśīnivāsinaḥ ||
2.5.59.31
sāmbikaṃ śaṅkaraṃ dṛṣṭvā kṛtāñjalipuṭāśca te |
praṇamya tuṣṭuvurbhaktyā vāgbhiriṣṭābhirādarāt ||
2.5.59.32
sāmbiko'pi śivo vyāsa krīḍitvā suvihāravit |
jagāma svālayaṃ prītaḥ sagaṇo bhaktavatsalaḥ ||
2.5.59.33
kandukeśvaraliṅgaṃ ca kāśyāṃ duṣṭanibarhaṇam |
bhuktimuktipradaṃ sarvakāmadaṃ sarvadā satām ||
2.5.59.34
idamākhyānamatulaṃ śṛṇuyādyo mudānvitaḥ |
śrāvayedvā paṭhedyaśca tasya duḥkhabhayaṃ kutaḥ ||
2.5.59.35
iha sarvasukhaṃ bhuktvā nānāvidhamanuttamam |
paratra labhate divyāṃ gatiṃ vai devadurlabhām ||
2.5.59.36
iti te varṇitaṃ tāta caritaṃ paramādbhutam |
śivayorbhaktavātsalyasucakaṃ śivadaṃ satām ||
2.5.59.37
brahmovāca ityuktvāmantrya taṃ vyāsaṃ tannuto madvarātmajaḥ |
yayau vihāyasā kāśīṃ caritaṃ śaśimaulinaḥ ||
2.5.59.38
yuddhakhaṇḍamidaṃ proktaṃ mayā te munisattama |
raudrīyasaṃhitāmadhye sarvakāmaphalapradam ||
2.5.59.39
iyaṃ hi saṃhitā raudrī sampūrṇā varṇitā mayā |
sadāśivapriyatarā bhuktimuktiphalapradā ||
2.5.59.40
imāṃ yaśca paṭhennityaṃ śatrubādhānivārikām |
sarvānkāmānavāpnoti tato muktiṃ labheta nā ||
2.5.59.41
sūta uvāca
iti brahmasutaḥ śrutvā pitrā śivayaśaḥ param |
śatanāmāpya śambhośca kṛtārtho'bhūcchivānugaḥ ||
2.5.59.42
brahmanāradasaṃvādaḥ sampūrṇaḥ kathito mayā |
śivaḥ sarvapradhāno hikiṃ bhūyaḥ śrotumicchisi ||
2.5.59.42.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe vidalotpaladaityavadhavarṇanaṃ nāmaikonaṣaṣṭitamo'dhyāyaḥ ||
2.5.59.42.c2
iti śrīśivamahāpurāṇe dvitīyarudrasaṃhitāyāṃ pañcamao yuddhakhaṇḍaḥ samāptaḥ ||
2.5.59.42.p3
samāpteyaṃ dvitīyā rudrasaṃhitā ||