Shivapurana 2.5.6: ṣaṣṭho'dhyāyaḥ | śivastutivarṇanam
Śivapurāṇa (complete text) 2.5.6
- Language
- Sanskrit
Contents
- 2.5.6.55 — 5 parts
ṣaṣṭho'dhyāyaḥ | śivastutivarṇanam
2.5.6.1
vyāsa uvāca |
tasmin daityādhipe paure sabhrātari vimohite |
sanatkumāra kiṃ cāsīttadācakṣvākhilaṃ vibho ||
2.5.6.2
sanatkumāra uvāca |
tripure ca tathābhūte daitye tyaktaśivārcane |
strīdharme nikhile naṣṭe durācāre vyavasthite ||
2.5.6.3
kṛtārtha iva lakṣmīśo devaiḥ sārddhamumāpatim |
nivedituṃ taccaritraṃ kailāsamagamaddhariḥ ||
2.5.6.4
tasyopakaṇṭhaṃ sthitvā'sau devaiḥsaha ramāpatiḥ |
tato bhūri sa ca brahmā parameṇa samādhinā ||
2.5.6.5
manasā prāpya sarvajñaṃ brahmaṇā sa haristadā |
tuṣṭāva vāgbhiriṣṭābhiḥ śaṅkaraṃ puruṣottamaḥ ||
2.5.6.6
viṣṇuruvāca |
maheśvarāya devāya namaste paramātmane |
nārāyaṇāya rudrāya brahmaṇe brahmarūpiṇe ||
2.5.6.7
evaṃ kṛtvā mahādevaṃ daṇḍavatpraṇipatya ha |
jajāpa rudramantraṃ ca dakṣiṇāmūrtisambhavam ||
2.5.6.8
jale sthitvā sārddhakoṭipramitaṃ tanmanāḥ prabhuḥ |
saṃsmaran manasā śambhuṃ svaprabhuṃ parameśvaram ||
2.5.6.9
tāvaddevāstadā sarve tanmanaskā maheśvaram ||
2.5.6.10
devā ūcuḥ |
namaḥsarvātmane tubhyaṃ śaṅkarāyārtihāriṇe |
rudrāya nīlakaṇṭhāya cidrūpāya pracetase ||
2.5.6.11
gatirnaḥ sarvadā tvaṃ hi sarvāpadvinivārakaḥ |
tvameva sarvadātmābhirvandyo devārisūdana ||
2.5.6.12
tvamādistvamanādiśca svānandaścākṣayaḥ prabhuḥ |
prakṛteḥ puruṣasyāpi sākṣātsraṣṭā jagatprabhuḥ ||
2.5.6.13
tvameva jagatāṃ kartā bhartā hartā tvameva hi |
brahmā viṣṇurharo bhūtvā rajaḥsattvatamoguṇaiḥ ||
2.5.6.14
tārako'si jagatyasmin sarveṣāmadhipo'vyayaḥ |
varado vāṅmayo vācyo vācyavācakavarjitaḥ ||
2.5.6.15
yācyo muktyarthamīśāno yogibhiryogavittamaiḥ |
hṛtpuṇḍarīkavivare yogināṃ tvaṃ hi saṃsthitaḥ ||
2.5.6.16
vadanti vedāstvāṃ santaḥ parabrahmasvarūpiṇam |
bhavantaṃ tattvamityadya tejorāśiṃ parātparam ||
2.5.6.17
paramātmānamityāhurasmin jagati yadvibho |
tvameva śarva sarvātman trilokādhipate bhava ||
2.5.6.18
dṛṣṭaṃ śrutaṃ stutaṃ sarvaṃ jñāyamānaṃ jagadguro |
aṇoralpataraṃ prāhurmahato'pi mahattaram ||
2.5.6.19
sarvataḥ pāṇipādaṃ tat sarvato'kṣiśiromukham |
sarvataḥ śravaṇaghrāṇaṃ tvāṃ namāmi ca sarvataḥ ||
2.5.6.20
sarvajñaṃ sarvato vyāpin sarveśvaramanāvṛtam |
viśvarūpaṃ virūpākṣaṃ tvāṃ namāmi ca sarvataḥ ||
2.5.6.21
sarveśvaraṃ bhavādhyakṣaṃ satyaṃ śivamanuttamam |
koṭi bhāskarasaṅkāśaṃ tvāṃ namāmi ca sarvataḥ ||
2.5.6.22
viśvadevamanādyantaṃ ṣaṭtriṃśatkamanīśvaram |
pravartakaṃ ca sarveṣāṃ tvāṃ namāmi ca sarvataḥ ||
2.5.6.23
pravartakaṃ ca prakṛteḥ sarvasya prapitāmaham |
sarvavigrahamīśaṃ hi tvāṃ namāmi ca sarvataḥ ||
2.5.6.24
evaṃ vadanti varadaṃ sarvāvāsaṃ svayambhuvam |
śrutayaḥ śrutisārajñaṃ śrutisāravidaśca ye ||
2.5.6.25
adṛśyamasmābhiranekabhūtaṃ tvayā kṛtaṃ yadbhavatātha loke |
tvāmeva devāsurabhūsurāśca anye ca vai sthāvarajaṅgamāśca ||
2.5.6.26
pāhyananyagatīn śambho surānno devavallabha |
naṣṭaprāyāṃstripurato vinihatyāsurānkṣaṇāt ||
2.5.6.27
māyayā mohitāste'dya bhavataḥ parameśvara |
viṣṇunā proktayuktyā ta ujjhitā dharmataḥ prabho ||
2.5.6.28
santyaktasarvadharmāśca bauddhāgamasamāśritāḥ |
asmadbhāgyavaśājjātā daityāste bhaktavatsala ||
2.5.6.29
sadā tvaṃ kāryakarttā hi devānāṃ śaraṇaprada |
vayaṃ te śaraṇāpannā yathecchasi tathā kuru ||
2.5.6.30
sanatkumāra uvāca |
iti stutvā maheśānaṃ devāstu purataḥ sthitāḥ |
kṛtāñjalipuṭā dīnā āsan sannatamūrtayaḥ ||
2.5.6.31
stutaścaivaṃ surendrādyairviṣṇorjāpyena ceśvaraḥ |
agacchattatra sarveśo vṛṣamāruhya harṣitaḥ ||
2.5.6.32
viṣṇumāliṅgya nandiśādavaruhya prasannadhīḥ |
dadarśa sudṛśā tatra nandīdattakaro'khilān ||
2.5.6.33
atha devān samālokya kṛpādṛṣṭyā hariṃ haraḥ |
prāha gambhīrayā vācā prasannaḥ pārvatīpatiḥ ||
2.5.6.34
śiva uvāca |
jñātaṃ mayedamadhunā devakāryaṃ sureśvara |
viṣṇormāyābalaṃ caiva nāradasya ca dhīmataḥ ||
2.5.6.35
teṣāmadharmaniṣṭhānāṃ daityānāṃ devasattama |
puratrayavināśaṃ ca kariṣye'haṃ na saṃśayaḥ ||
2.5.6.36
parantu te mahādaityā madbhaktā dṛḍhamānasāḥ |
atha vadhyā mayaiva syurvyājatyaktavṛṣottamāḥ ||
2.5.6.37
viṣṇurhanyātparo vātha yattyājitavṛṣāḥ kṛtāḥ |
daityā madbhaktirahitāḥ sarve tripuravāsinaḥ ||
2.5.6.38
iti śambhostu vacanaṃ śrutvā sarve divaukasaḥ |
vimanaskā babhūvuste hariścāpi munīśvara ||
2.5.6.39
devān viṣṇumudāsīnān dṛṣṭvā ca bhavakṛdvidhiḥ |
kṛtāñjalipuraḥ śambhuṃ brahmā vacanamabravīt ||
2.5.6.40
brahmovāca |
na kiñcidvidyate pāpaṃ yasmāttvaṃ yogavittamaḥ |
parameśaḥ parabrahma sadā devarṣirakṣakaḥ ||
2.5.6.41
tavaiva śāsanātte vai mohitāḥ prerako bhavān |
tyaktasvadharmatvatpūjāḥ paravadhyāstathāpi na ||
2.5.6.42
atastvayā mahādeva surarṣiprāṇarakṣaka |
sādhūnāṃ rakṣaṇārthāya hantavyā mlecchajātayaḥ ||
2.5.6.43
rājñastasya na tatpāpaṃ vidyate dharmatastava |
tasmādrakṣeddvijān sādhūn kaṇṭakān vai viśodhayet ||
2.5.6.44
evamicchedihānyatra rājā cedrājyamātmanaḥ |
prabhutvaṃ sarvalokānāṃ tasmādrakṣasva māciram ||
2.5.6.45
munīndreśāstathā yajñā vedāḥ śāstrādayo'khilāḥ |
prajāste devadeveśa hyahaṃ viṣṇurapi dhruvam ||
2.5.6.46
devatāsārvabhaumastvaṃ samrāṭ sarveśvaraḥ prabho |
parivārastavaivaiṣa haryādi sakalaṃ jagat ||
2.5.6.47
yuvarājo hariste'ja brahmāhaṃ te purohitaḥ |
rājakāryakaraḥ śakrastvadājñāparipālakaḥ ||
2.5.6.48
devā anye'pi sarveśa tava śāsanayantritāḥ |
svasvakāryakarā nityaṃ satyaṃ satyaṃ na saṃśayaḥ ||
2.5.6.49
sanatkumāra uvāca |
etacchrutvā vacastasya brahmaṇaḥ parameśvaraḥ |
pratyuvāca prasannātmā śaṅkaraḥ surapo vidhim ||
2.5.6.50
śiva uvāca |
he brahman yadyahaṃ devarājaḥ samrāṭ prakīrttitaḥ |
tatprakāro na me kaścid gṛhṇīyāṃ yamiha prabhuḥ ||
2.5.6.51
ratho nāsti mahādivyastādṛk sārathinā saha |
dhanurbāṇādikaṃ cāpi saṅgrāme jayakārakam ||
2.5.6.52
yamāsthāya dhanurbāṇān gṛhītvā yojya vai manaḥ |
nihaniṣyāmyahaṃ daityān prabalānapi saṅgare ||
2.5.6.53
sanatkumāra uvāca |
adya sabrahmakā devāḥ sendropendrāḥ praharṣitāḥ |
śrutvā prabhostadā vākyaṃ natvā procurmaheśvaram ||
2.5.6.54
devā ūcuḥ |
vayaṃ bhavāma deveśa tatprakārā maheśvara |
rathādikāḥ tava svāminsannaddhāḥ saṅgarāya hi ||
2.5.6.55
ityuktvā saṃhatāḥ sarve śivecchāmadhigamya ha |
pṛthagūcuḥ prasannāste kṛtāñjalipuṭāssurāḥ ||
2.5.6.55.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śivastutivarṇanaṃ nāma ṣaṣṭho'dhyāyaḥ ||
2.5.6.55.p2
śrīgaṇeśāya namaḥ ||
2.5.6.55.p3
śrīgaurīśaṅkarābhyāṃ namaḥ ||
2.5.6.55.p4
śrīśivamahāpurāṇam ||
2.5.6.55.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (3)
- Liṅgapurāṇa — Vyāsa, Sanskrit
- Saurapurāṇa — Sanskrit
- Liṅgapurāṇa — Ativīrarāma Pāṇṭiyar 1500, Sanskrit