Shivapurana 2.5.7: saptamo'dhyāyaḥ | devastutivarṇanam
Śivapurāṇa (complete text) 2.5.7
- Language
- Sanskrit
Contents
saptamo'dhyāyaḥ | devastutivarṇanam
2.5.7.1
sanatkumāra uvāca |
etacchutvā tu sarveṣāṃ devādīnāṃ vaco haraḥ |
aṅgīcakāra suprītyā śaraṇyo bhaktavatsalaḥ ||
2.5.7.2
etasminnantare devī putrābhyāṃ saṃyutā śivā |
ājagāma mune tatra yatra devānvito haraḥ ||
2.5.7.3
athāgatāṃ śivāṃ dṛṣṭvā sarve viṣṇvādayo drutam |
praṇemuratinamrāste vismitā gatasambhramāḥ ||
2.5.7.4
procurjayeti sadvākyaṃ mune sarve sulakṣaṇam |
tūṣṇīmāsannajānantastadāgamanakāraṇam ||
2.5.7.5
atha sarvaiḥ stutā devairdevyadbhutakutūhalā |
uvāca svāminaṃ prītyā nānālīlāviśāradam ||
2.5.7.6
devyuvāca |
krīḍamānaṃ vibho paśya ṣaṇmukhaṃ ravisannibham |
putraṃ putravatāṃ śreṣṭha bhūṣitaṃ bhūṣaṇairvaraiḥ ||
2.5.7.7
sanatkumāra uvāca
ityevaṃ lokamātrā ca vāgbhiḥsambodhitaśśivaḥ |
na yayau tṛptimīśānaḥ piban skandānanāmṛtam ||
2.5.7.8
na sasmārāgatān devān nijatejonipīḍitān |
skandamāliṅgya cāghrāya mumodāti maheśvaraḥ ||
2.5.7.9
jagadambātha tatraiva sammantrya prabhuṇā ca sā |
sthitvā kiñcitsamuttasthau nānālīlāviśāradā ||
2.5.7.10
tataḥ sa nandī saha ṣaṇmukhena tayā ca sārddhaṃ girirājaputryā |
viveśa śambhurbhavanaṃ sulīlaḥ suraiḥ samastairabhivandyamānaḥ ||
2.5.7.11
dvārasya pārśvataḥ tasthurdevadevasya dhīmataḥ |
te'tha devā mahāvyagrā vimanaskā mune'khilāḥ ||
2.5.7.12
kiṃ kartavyaṃ kva gantavyaṃ kaḥ syādasmatsukhapradaḥ |
kiṃ tu kintviti sañjātaṃ hā hatāḥ smeti vādinaḥ ||
2.5.7.13
anyonyaṃ prekṣya śakrādyā babhūvuścātivihvalāḥ |
procurvikalavākyaṃ te dhikkurvanto nijaṃ vidhim ||
2.5.7.14
pāpā vayamihetyanye hyabhāgyāśceti cāpare |
te bhāgyavanto daityendrā iti cānye'bruvan surāḥ ||
2.5.7.15
tasminnevāntare teṣāṃ śrutvā śabdānanekaśaḥ |
kumbhodaro mahātejā daṇḍenātāḍayatsurān ||
2.5.7.16
dudruvuste bhayāviṣṭā devā hāheti vādinaḥ |
apatanmunayaścānye vihvalatvaṃ babhūva ha ||
2.5.7.17
indrastu vikalo'tīva jānubhyāmavanīṃ gataḥ |
anye devarṣayo'tīva vikalāḥ patitā bhuvi ||
2.5.7.18
sarve militvā munayaḥ surāśca samamākulāḥ |
saṅgatā vidhiharyostu samīpaṃ mitracetasoḥ ||
2.5.7.19
aho vidhibalaṃ caitanmunayaḥ kaśyapādayaḥ |
vadanti sma tadā sarve hariṃ lokabhayāpaham ||
2.5.7.20
abhāgyānna samāptaṃ tu kāryamityapare dvijāḥ |
kasmādvighnamidaṃ jātamityanye hyativismitāḥ ||
2.5.7.21
ityevaṃ vacanaṃ śrutvā kaśyapādyuditaṃ mune |
āśvāsayanmunīndevān harirvākyamupādade ||
2.5.7.22
viṣṇuruvāca |
he devā munayaḥ sarve madvacaḥ śṛṇutādarāt |
kimarthaṃ duḥkhamāpannā dukhaṃ tu tyajatākhilam ||
2.5.7.22.p1
mahadārādhanaṃ devā na susādhyaṃ vicāryatām |
mahadārādhane pūrvaṃ bhavedduḥkhamiti śrutam ||
2.5.7.22.p2
vijñāya dṛḍhatāṃ devāḥ prasanno bhavati dhruvam | 23 ||
2.5.7.24
śivaḥ sarvagaṇādhyakṣaḥ sahasā parameśvaraḥ |
vicāryatāṃ hṛdā sarvaiḥ kathaṃ vaśyo bhavediti ||
2.5.7.25
praṇavaṃ pūrvamuccārya namaḥ paścādudāharet |
śivāyeti tataḥ paścācchubhadvayamataḥ param ||
2.5.7.26
kurudvayaṃ tataḥ proktaṃ śivāya ca tataḥ punaḥ |
namaśca praṇavaścaiva mantramevaṃ sadā budhāḥ ||
2.5.7.27
āvartadhvaṃ punaryūyaṃ yadi śambhukṛte tadā |
koṭimekaṃ tathā japtvā śivaḥ kāryaṃ kariṣyati ||
2.5.7.28
ityukte ca tadā tena hariṇā prabhaviṣṇunā |
tathā devāḥ punaścakrurharasyārādhanaṃ mune ||
2.5.7.29
sañjajāpa hariścāpi savidhiśśivamānasaḥ |
devānāṃ kāryasiddhyarthaṃ munīnāṃ ca viśeṣataḥ ||
2.5.7.30
muhuḥ śiveti bhāṣanto devā dhairyasamanvitāḥ |
koṭisaṅkhyaṃ tadā kṛtvā sthitāste munisattama ||
2.5.7.31
etasminnantare sākṣācchivaḥ prādurabhūtsvayam |
yathoktena svarūpeṇa vacanaṃ cedamabravīt ||
2.5.7.32
śrīśiva uvāca |
he hare he vidhe devā munayaśca śubhavratāḥ |
prasanno'smi varaṃ brūta japenānena cepsitam ||
2.5.7.33
devā ūcuḥ |
yadi prasanno deveśa jagadīśvara śaṅkara |
surān vijñāya vikalān hanyantāṃ tripurāṇi ca ||
2.5.7.34
rakṣāsmānparameśāna dīnabandho kṛpākara |
tvayaiva rakṣitā devāḥ sadāpadbhyo muhurmuhuḥ ||
2.5.7.35
sanatkumāra uvāca |
ityuktaṃ vacanaṃ teṣāṃ śrutvā saharivedhasām |
vihasyāntastadā brahmanmaheśaḥ punarabravīt ||
2.5.7.36
maheśa uvāca |
he hare he vidhe devā munayaścākhilā vacaḥ |
madīyaṃ śṛṇutādṛtya naṣṭaṃ matvā puratrayam ||
2.5.7.37
rathaṃ ca sārathiṃ divyaṃ kārmukaṃ śaramuttamam |
pūrvamaṅgīkṛtaṃ sarvamupapādayatāciram ||
2.5.7.38
he viṣṇo he vidhe tvaṃ hi trilokādhipatirdhruvam |
sarvasaṃrāṭprakāraṃ me kartumarhasi yatnataḥ ||
2.5.7.39
naṣṭaṃ puratrayaṃ matvā devasāhāyyamityuta |
kariṣyathaḥ prayatnenādhikṛtau sargapālane ||
2.5.7.40
ayaṃ mantro mahāpuṇyo matprītijanakaḥ śubhaḥ |
bhuktimuktipradaḥsarvakāmadaḥ śaivakāvahaḥ ||
2.5.7.41
dhanyo yaśasya āyuṣyaḥ svargakāmārthināṃ nṛṇām |
apavargo hyakāmānāṃ muktānāṃ bhuktimuktidaḥ ||
2.5.7.42
ya imaṃ kīrtayenmantraṃ śucirbhūtvā sadā naraḥ |
śṛṇuyācchrāvayedvāpi sarvānkāmānavāpnuyāt ||
2.5.7.43
sanatkumāra uvāca |
iti śrutvā vacastasya śivasya paramātmanaḥ |
sarve devā mudaṃ prāpurharirbrahmādhikaṃ tathā ||
2.5.7.44
sarvadevamayaṃ divyaṃ rathaṃ paramaśobhanam |
racayāmāsa viśvārthe viśvakarmā tadājñayā ||
2.5.7.44.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe devastutivarṇanaṃ nāma saptamo'dhyāyaḥ ||
2.5.7.44.p2
śrīgaṇeśāya namaḥ ||
2.5.7.44.p3
śrīgaurīśaṅkarābhyāṃ namaḥ ||
2.5.7.44.p4
śrīśivamahāpurāṇam ||
2.5.7.44.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Liṅgapurāṇa — Vyāsa, Sanskrit
- Liṅgapurāṇa — Ativīrarāma Pāṇṭiyar 1500, Sanskrit