Shivapurana 2.5.9: navamo'dhyāyaḥ | śivayātrāvarṇanam
Śivapurāṇa (complete text) 2.5.9
- Language
- Sanskrit
Contents
- 2.5.9.44 — 5 parts
navamo'dhyāyaḥ | śivayātrāvarṇanam
2.5.9.1
sanatkumāra uvāca |
īdṛgvidhaṃ mahādivyaṃ nānāścaryamayaṃ ratham |
sannahya nigamānaśvāṃstaṃ brahmā prārpayacchivam ||
2.5.9.2
śambhave'sau nivedyādhiropayāmāsa śūlinam |
bahuśaḥ prārthya deveśaṃ viṣṇvādisurasammatam ||
2.5.9.3
tatastasmin rathe divye rathaprākārasaṃyute |
sarvadevamayaḥ śambhurāruroha mahāprabhuḥ ||
2.5.9.4
ṛṣibhiḥ stūyamānaśca devagandharvapannagaiḥ |
viṣṇunā brahmaṇā cāpi lokapālairbabhūva ha ||
2.5.9.5
upāvṛtaścāpsarasāṅgaṇairgītaviśāradaiḥ |
śuśubhe varadaḥ śambhuḥ sa taṃ prekṣya ca sārathim ||
2.5.9.6
tasminnārohati rathaṃ kalpitaṃ lokasambhṛtam |
śirobhiḥ patitā bhūmau turagā vedasambhavāḥ ||
2.5.9.7
cacāla vasudhā celuḥ sakalāśca mahīdharāḥ |
cakampe sahasā śeṣo'soḍhā tadbhāramāturaḥ ||
2.5.9.8
athādhaḥ sa rathasyāsya bhagavāndharaṇīdharaḥ |
vṛṣendrarūpī cotthāya sthāpayāmāsa vai kṣaṇam ||
2.5.9.9
kṣaṇāntare vṛṣendro'pi jānubhyāmagamaddharām |
rathārūḍhamaheśasya sutejassoḍhumakṣamaḥ ||
2.5.9.10
abhīṣuhasto bhagavānudyamya ca hayāṃstadā |
sthāpayāmāsa devasya vacanādvai rathaṃ varam ||
2.5.9.11
tato'sau nodayāmāsa manomārutaraṃhasaḥ |
brahmā hayānvedamayānnaddhān rathavare sthitaḥ ||
2.5.9.12
purāṇyuddiśya vai trīṇi teṣāṃ khasthāni tāni hi |
adhiṣṭhite maheśe tu dānavānāṃ tarasvinām ||
2.5.9.13
athāha bhagavān rudro devānālokya śaṅkaraḥ |
paśūnāmādhipatyaṃ me dadhvaṃ hanmi tato'surān ||
2.5.9.14
pṛthak paśutvaṃ devānāṃ tathānyeṣāṃ surottamāḥ |
kalpayitvaiva vadhyāste nānyathā daityasattamāḥ ||
2.5.9.15
sanatkumāra uvāca |
iti śrutvā vacastasya devadevasya dhīmataḥ |
viṣādamagamansarve paśutvaṃ pratiśaṅkitāḥ ||
2.5.9.16
teṣāṃ bhāvamatha jñātvā devadevo'mbikāpatiḥ |
vihasya kṛpayā devān śambhustānidamabravīt ||
2.5.9.17
śambhuruvāca |
mā vo'stu paśubhāve'pi pāto vibudhasattamāḥ |
śrūyatāṃ paśubhāvasya vimokṣaḥ kriyatāṃ ca saḥ ||
2.5.9.18
yau vai pāśupataṃ divyaṃ cariṣyati sa mokṣyati |
paśutvāditi satyaṃ vaḥ pratijñātaṃ samāhitāḥ ||
2.5.9.19
ye cāpyanye kariṣyanti vrataṃ pāśupataṃ mama |
mokṣyanti te na sandehaḥ paśutvātsurasattamāḥ ||
2.5.9.20
naiṣṭhikaṃ dvādaśābdaṃ vā tadarddhaṃ varṣakatrayam |
śuśrūṣāṃ kārayedyastu sa paśutvādvimucyate ||
2.5.9.21
tasmātparamidaṃ divyaṃ cariṣyatha surottamāḥ |
paśutvānmokṣyatha tadā yūyamatra na saṃśayaḥ ||
2.5.9.22
sanatkumāra uvāca |
ityākarṇya vacastasya maheśasya parātmanaḥ |
tatheti cābruvandevā haribrahmādayastathā ||
2.5.9.23
tasmādvai paśavaḥ sarve devāsuravarāḥ prabhoḥ |
rudraḥ paśupatiścaiva paśupāśavimocakaḥ ||
2.5.9.24
tadā paśupatītyetattasya nāma maheśituḥ |
prasiddhamabhavad hyaddhā sarvalokeṣu śarmadam ||
2.5.9.25
mudā jayeti bhāṣantaḥ sarve devarṣayastadā |
amudaṃścāti deveśo brahmā viṣṇuḥ pare'pi ca ||
2.5.9.26
tasmiṃśca samaye yacca rūpaṃ tasya mahātmanaḥ |
jātaṃ tadvarṇituṃ śakyaṃ na hi varṣaśatairapi ||
2.5.9.27
evaṃvidho maheśāno maheśānyakhileśvaraḥ |
jagāma tripuraṃ hantuṃ sarveṣāṃ sukhadāyakaḥ ||
2.5.9.28
taṃ devadevaṃ tripuraṃ nihantuṃ tadānu sarve tu raviprakāśāḥ |
gajairhayaissiṃhavarai rathaiśca vṛṣairyayuste'mararājamukhyāḥ ||
2.5.9.29
halaiśca śālairmuśalairbhuśuṇḍai-rgirīndrakalpairgirisannibhāśca |
nānāyudhaiḥ saṃyutabāhavaste tato nu hṛṣṭāḥ prayayuḥ sureśāḥ ||
2.5.9.30
nānāyudhāḍhyāḥ paramaprakāśā mahotsavāḥ śambhujayaṃ vadantaḥ |
yayuḥ purastasya maheśvarasya tadendrapadmodbhavaviṣṇumukhyāḥ ||
2.5.9.31
jahṛṣurmunayaḥ sarve daṇḍahastā jaṭādharāḥ |
vavṛṣuḥ puṣpavarṣāṇi khecarāssiddhacāraṇāḥ ||
2.5.9.32
puratrayaṃ ca viprendra vrajansarve gaṇeśvarāḥ |
teṣāṃ saṅkhyā ca kaḥ kartuṃ samartho vacmi kāṃścana ||
2.5.9.33
gaṇeśvarairdevagaṇaiśca bhṛṅgī samāvṛtaḥ sarvagaṇendravaryaḥ |
jagāma yogāṃstripuraṃ nihantuṃ vimānamāruhya yathā mahendraḥ ||
2.5.9.34
keśo vigatavāsaśca mahākeśo mahājvaraḥ |
somavallīsavarṇaśca somapaḥ sanakastathā ||
2.5.9.35
somadhṛk sūryavarcāśca sūryapreṣaṇakastathā |
sūryākṣaḥ sūrināmā ca suraḥ sundara eva ca ||
2.5.9.36
praskandaḥ kundaraścaṇḍaḥ kampanaścātikampanaḥ |
indraścendrajavaścaiva yantā himakarastathā ||
2.5.9.37
śatākṣaścaiva pañcākṣaḥ sahasrākṣo mahodaraḥ |
satījuhaḥ śatāsyaśca raṅkaḥ karpūrapūtanaḥ ||
2.5.9.38
dviśikhastriśikhaścaiva tathāhaṅkārakārakaḥ |
ajavaktro'ṣṭavaktraśca hayavaktro'rddhavaktrakaḥ ||
2.5.9.39
ityādyā gaṇapā vīrā bahavo'parimeyakāḥ |
prayayuḥ parivāryeśaṃ lakṣyalakṣaṇavarjitāḥ ||
2.5.9.40
samāvṛtya mahādevaṃ tadāpuste pinākinam |
dagdhuṃ samarthā manasā kṣaṇena sacarācaram ||
2.5.9.41
dagdhuṃ jagatsarvamidaṃ samarthāḥ kiṃ tvatra dagdhuṃ tripuraṃ pinākī |
rathena kiṃ cātra śareṇa tasya gaṇaiśca kiṃ devagaṇaiśca śambhoḥ ||
2.5.9.42
sa eva dagdhuṃ tripurāṇi tāni devadviṣāṃ vyāsa pinākapāṇiḥ |
svayaṃ gatastatra gaṇaiśca sārddhaṃ nijaissurāṇāmapi so'dbhutotiḥ ||
2.5.9.43
kiṃ tatra kāraṇaṃ cānyadvacmi te ṛṣisattama |
lokeṣu khyāpanārthaṃ vai yaśaḥ paramalāpaham ||
2.5.9.44
anyacca kāraṇaṃ hyetadduṣṭānāṃ pratyayāya vai |
sarveṣvapi ca deveṣu yasmānnānyo viśiṣyate ||
2.5.9.44.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śivayātrāvarṇanaṃ nāma navamo'dhyāyaḥ ||
2.5.9.44.p2
śrīgaṇeśāya namaḥ ||
2.5.9.44.p3
śrīgaurīśaṅkarābhyāṃ namaḥ ||
2.5.9.44.p4
śrīśivamahāpurāṇam ||
2.5.9.44.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Liṅgapurāṇa — Vyāsa, Sanskrit
- Liṅgapurāṇa — Ativīrarāma Pāṇṭiyar 1500, Sanskrit