Shivapurana 3.10: daśamo'dhyāyaḥ | nṛsiṃhacaritavarṇanam
Śivapurāṇa (complete text) 3.10
- Language
- Sanskrit
Contents
- 3.10.41 — 5 parts
daśamo'dhyāyaḥ | nṛsiṃhacaritavarṇanam
3.10.1
nandīśvara uvāca |
vidhvaṃsī dakṣayajñasya vīrabhadrāhvayaḥ prabhoḥ |
avatāraśca vijñeyaḥ śivasya paramātmanaḥ ||
3.10.2
satīcaritre kathitaṃ caritaṃ tasya kṛtsnaśaḥ |
śrutaṃ tvayāpi bahudhā nātaḥ proktaṃ suvistarāt ||
3.10.3
ataḥ paraṃ muniśreṣṭha bhavatsnehād bravīmi tat |
śārdūlākhyāvatāraṃ ca śaṅkarasya prabhoḥ śṛṇu ||
3.10.4
sadāśivena devānāṃ hitārthaṃ rūpamadbhutam |
śārabhaṃ ca dhṛtaṃ divyaṃ jvalajjvālāsamaprabham ||
3.10.5
śivāvatārā amitāḥ sadbhaktahitakārakāḥ |
saṅkhyā na śakyate kartuṃ teṣāṃ ca munisattamāḥ ||
3.10.6
ākāśasya ca tārāṇāṃ reṇukānāṃ kṣitestathā |
āsārāṇāṃ ca vṛddhena bahukalpaiḥ kadāpi hi ||
3.10.7
saṅkhyā viśakyate kartuṃ suprājñairbahujanmabhiḥ |
na vai śivāvatārāṇāṃ satyaṃ jānīhi madvacaḥ ||
3.10.8
tathāpi ca yathābuddhyā kathayāmi yathāśrutam |
caritraṃ śārabhaṃ divyaṃ paramaiśvaryasūcakam ||
3.10.9
jayaśca vijayaścaiva bhavadbhiḥ śāpitau yadā |
tadā ditisutau dvau tāvabhūtāṃ kaśyapānmune ||
3.10.10
hiraṇyakaśipuścādyo hiraṇyākṣo'nujo balī |
devarṣipārṣadau jātau tau dvāvapi diteḥ sutau ||
3.10.11
pṛthvyuddhāre vidhātrā va prārthito hi purā prabhuḥ |
hiraṇyākṣaṃ jaghānāsau viṣṇurvārāharūpadhṛk ||
3.10.12
taṃ śrutvā bhrātaraṃ vīraṃ nihataṃ prāṇasannibham |
cukopa haraye'tīva hiraṇyakaśipurmune ||
3.10.13
varṣāṇāmayutaṃ taptvā brahmaṇo varamāpa saḥ |
na kaścinmārayenmāṃ vai tvatsṛṣṭāviti tuṣṭataḥ ||
3.10.14
śoṇitākhyapuraṃ gatvā devānāhūya sarvataḥ |
trilokīṃ svavaśe kṛtvā cakre rājyamakaṇṭakam ||
3.10.15
devarṣikadanaṃ cakre sarvadharmavilopakaḥ |
dvijapīḍākaraḥ pāpī hiraṇyakaśipurmune ||
3.10.16
prahlādena svaputreṇa haribhaktena daityarāṭ |
yadā vidveṣamakaroddharirvairī viśeṣataḥ ||
3.10.17
sabhāstambhāttadā viṣṇurabhūdāvirdrutaṃ mane |
sandhyāyāṃ krodhamāpanno nṛsiṃhavapuṣā tataḥ ||
3.10.18
sarvathā muniśārdūla karālaṃ nṛharervapuḥ |
prajajvālātibhayadaṃ trāsayandaityasattamān ||
3.10.19
nṛsiṃhena tadā daityā nihatāścaiva tatkṣaṇam |
hiraṇyakaśipuścātha yuddhaṃ cakre sudāruṇam ||
3.10.20
mahāyuddhaṃ tayorāsīnmuhūrttaṃ munisattamāḥ |
vikarālaṃ ca bhayadaṃ sarveṣāṃ romaharṣaṇam ||
3.10.21
sāyaṃ cakarṣa deveśo dehalyāṃ daityapuṅgavam |
vyomni deveṣu paśyatsu nṛsiṃhaśca rameśvaraḥ ||
3.10.22
athotsaṅge ca taṃ kṛtvā nakhaistadudaraṃ drutam |
vidārya mārayāmāsa paśyatāṃ tridivaukasām ||
3.10.23
hate hiraṇyakaśipau nṛsiṃhenaiva viṣṇunā |
jagatsvāsthyaṃ tadā lebhe na vai devā viśeṣataḥ ||
3.10.24
devadundubhayo neduḥ prahlādo vismayaṃ gataḥ |
lakṣmīśca vismayaṃ prāptā rūpaṃ dṛṣṭvā'dbhutaṃ hareḥ ||
3.10.25
hato yadyapi daityendrastathāpi na paraṃ sukham |
yayurdevā nṛsiṃhasya jvālā sā na nivartitā ||
3.10.26
tayā ca vyākulaṃ jātaṃ sarvaṃ caiva jagatpunaḥ |
devāśca duḥkhamāpannāḥ kiṃ bhaviṣyati vā punaḥ ||
3.10.27
ityevaṃ ca vadantaste bhayādū dūramupasthitāḥ |
nṛsiṃhakrodhajajvālāvyākulāḥ padmabhūmukhāḥ ||
3.10.28
prahrādaṃ preṣayāmāsustacchāntyai nikaṭaṃ hareḥ |
sarvānmilitvā prahlādaḥ prārthito gatavāṃstadā ||
3.10.29
urasā''liṅgayāmāsa taṃ nṛsiṃhaḥ kṛpānidhiḥ |
hṛdayaṃ śītalaṃ jātaṃ ruḍjvālā na nivarttitā ||
3.10.30
tathāpi na nivṛtā ruḍjvālā narahareryadā |
duḥkhaṃ prāptāstato devāḥ śaṅkara śaraṇaṃ yayuḥ ||
3.10.31
tatra gatvā surāḥ sarve brahmādyā munayastathā |
śaṅkaraṃ stavayāmāsurlokānāṃ sukhahetave ||
3.10.32
devā ūcuḥ |
devadeva mahādeva śaraṇāgatavatsala |
pāhi naḥ śaraṇāpannānsarvāndevāñjaganti ca ||
3.10.33
namaste'stu namaste'stu namaste'stu sadāśiva |
pūrvaṃ duḥkhaṃ yadā jātaṃ tadā te rakṣitā vayam ||
3.10.34
samudro mathitaścaiva ratnānāṃ ca vibhāgaśaḥ |
kṛte devaistadā śambho gṛhītaṃ garalaṃ tvayā ||
3.10.35
rakṣitāḥ sma tadā nātha nīlakaṇṭha iti śrutaḥ |
viṣaṃ pāsyasi no cettvaṃ bhasmībhūtāstadākhilāḥ ||
3.10.36
prasiddhaṃ ca yadā yasya duḥkhaṃ ca jāyate prabho |
tadā tvannāmamātreṇa sarvaṃ duḥkhaṃ vilīyate ||
3.10.37
idānīṃ nṛharijvālāpīḍitānnaḥ sadāśiva |
tāṃ tvaṃ śamayituṃ deva śakto'sīti suniścitam ||
3.10.38
nandīśvara uvāca |
iti stutastadā devaiḥ śaṅkaro bhaktavatsalaḥ |
pratyuvāca prasannātmā'bhayaṃ dattvā paraṃ prabhuḥ ||
3.10.39
śaṅkara uvāca |
svasthānaṃ gacchata surāḥ sarve brahmādayo'bhayāḥ |
śamayiṣyāmi yadduḥkhaṃ sarvathā hi vrataṃ mama ||
3.10.40
gato maccharaṇaṃ yastu tasya duḥkhaṃ kṣayaṃ gatam |
matpriyaḥ śaraṇāpannaḥ prāṇebhyo'pi na saṃśayaḥ ||
3.10.41
nandīśvara uvāca |
iti śrutvā tadā devā hyānandamparamaṃ gatāḥ |
yathāgataṃ tathā jagmuḥ smarantaḥ śaṅkaraṃ mudā ||
3.10.41.c1
iti śrīśivamahāpurāṇe tṛtīyāyāṃ śatarudrasaṃhitāyāṃ śārdūlāvatāre nṛsiṃhacaritavarṇanaṃ nāma daśamo'dhyāyaḥ ||
3.10.41.p2
śrīgaṇeśāya namaḥ ||
3.10.41.p3
śrīgaurīśaṅkarābhyāṃ namaḥ ||
3.10.41.p4
śrīśivamahāpurāṇam ||
3.10.41.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit