Pramāṇa · Search · About · API

Shivapurana 3.12: dvādaśo'dhyāyaḥ | śarabhāvatāravarṇanam 2

Śivapurāṇa (complete text) 3.12

Language
Sanskrit

Contents

dvādaśo'dhyāyaḥ | śarabhāvatāravarṇanam 2

3.12.1

sanatkumāra uvāca |
nandīśvara mahāprājña vijñātaṃ tadanantaram |
mamopari kṛpāṃ kṛtvā prītyā tvaṃ tadvadādhunā ||

3.12.2

nandīśvara uvāca |
ityukto vīrabhadreṇa nṛsiṃhaḥ krodhavihvalaḥ |
ninadannanuvegena taṃ grahītuṃ pracakrame ||

3.12.3

atrāntare mahāghoraṃ pratyakṣabhayakāraṇam |
gaganavyāpi durdharṣaṃ śaivatejaḥ samudbhavam ||

3.12.4

vīrabhadrasya tadrūmadṛśyaṃ tu tataḥ kṣaṇāt |
tadvai hiraṇmayaṃ saumyaṃ na sauraṃ nāgnisambhavam ||

3.12.5

na taḍiccandrasadṛśamanaupamyaṃ maheśvaram |
tadā tejāṃsi sarvāṇi tasmiṃllīnāni śaṅkare ||

3.12.6

na tadvyomaṃ mahattejo vyaktāntaścābhavattataḥ |
rudrasādhāraṇaṃ caiva cihnitaṃ vikṛtākṛti ||

3.12.7

tatassaṃhārarūpeṇa suvyaktaṃ parameśvaraḥ |
paśyatāṃ sarvadevānāṃ jayaśabdādimaṅgalaiḥ ||

3.12.8

sahasrabāhurjaṭilaścandrārddhakṛtaśekharaḥ |
samṛddhograśarīreṇa pakṣābhyāṃ cañcunā dvijaḥ ||

3.12.9

atitīkṣṇo mahādaṃṣṭro vajratulyanakhāyudhaḥ |
kaṇṭhe kālo mahābāhuścatuṣpādvahnisannibhaḥ ||

3.12.10

yugāntodyatajīmūtabhīmagambhīraniḥsvanaḥ |
mahākupitakṛtyāgnivyāvṛttanayanatrayaḥ ||

3.12.11

spaṣṭadaṃṣṭrādharoṣṭhaśca huṅkāraiḥ saṃyuto haraḥ |
īdṛgvidhasvarūpaśca hyugra āvirbabhūva ha ||

3.12.12

haristaddarśanādeva vinaṣṭabalavikramaḥ |
bibhraddhāmasahasrāṃśoradhaḥ khadyotavibhramam ||

3.12.13

atha vibhramya pakṣābhyāṃ nābhipādānvidārayan |
pādānbabandha pucchena bāhubhyāṃ bāhumaṇḍalam ||

3.12.14

bhindannurasi bāhubhyāṃ nijagrāha haro harim |
tato jagāma gaganaṃ devaissaha maharṣibhiḥ ||

3.12.15

sahasaivābhayādviṣṇuṃ sa hi śyena ivoragam |
utkṣipyotkṣipya saṅgṛhya nipātya ca nipātya ca ||

3.12.16

uḍḍīyoḍḍīya bhagavānpakṣaghātavimohitam |
harīṃ harastaṃ vṛṣabhaṃ viveśānanta īśvaraḥ ||

3.12.17

anuyāntaṃ surāḥ sarve namovākyena tuṣṭuvuḥ |
praṇemuḥ sādaraṃ prītyā brahmādyāśca munīśvarāḥ ||

3.12.18

nīyamānaḥ paravaśo dīnavaktraḥ kṛtāñjaliḥ |
tuṣṭāva parameśānaṃ haristaṃ lalitākṣaraiḥ ||

3.12.19

nāmnāmaṣṭaśatenaiva stutvā taṃ mṛḍameva ca |
punaśca prārthayāmāsa nṛsiṃhaḥ śarabheśvaram ||

3.12.20

yadā yadā mamājñeyaṃ matiḥ syādgarvadūṣitā |
tadā tadā'panetavyā tvayaiva parameśvara ||

3.12.21

nandīśvara uvāca |
evaṃ vijñāpayanprītyā śaṅkaraṃ narakesarī |
natvāśakto'bhavadviṣṇurjīvitāntaparājitaḥ ||

3.12.22

tadvaktraṃ śeṣagātrāntaṃ kṛtvā sarvasvavigraham |
śaktiyuktaṃ tadīyāṅgaṃ vīrabhadraḥ kṣaṇāttataḥ ||

3.12.23

nandīśvara uvāca |
atha brahmādayo devāḥ śārabhaṃ rūpamāsthitam |
tuṣṭuvuḥ śaṅkaraṃ devaṃ sarvalokaikaśaṅkaram ||

3.12.24

devā ūcuḥ |
brahmaviṣṇvindracandrādisurāḥ sarve maharṣayaḥ |
ditijādyāḥ samprasūtāḥ tvattaḥ sarve maheśvara ||

3.12.25

brahmaviṣṇumahendrāṃśca sūryādyānasurānsurān |
tvaṃ vai sṛjasi pāsyatsi tvameva sakaleśvaraḥ ||

3.12.26

yato harasi saṃsāraṃ hara ityucyate budhaiḥ |
nigṛhīto hariryasmāddhara ityucyate budhaiḥ ||

3.12.27

yato bibharṣi sakalaṃ vibhajya tanumaṣṭadhā |
ato'smānpāhi bhagavan surān dānairabhīpsitaiḥ ||

3.12.28

tvaṃ mahāpuruṣaḥ śambhuḥ sarveśaḥ suranāyakaḥ |
niḥsvātmā nirvikārātmā parabrahma satāṃ gatiḥ ||

3.12.29

dīnabandhurdayāsindhuradbhutotiḥ parātmadṛk |
prājño virāṭ vibhuḥ satyaḥ saccidānandalakṣaṇaḥ ||

3.12.30

nandīśvara uvāca |
ityākarṇya vacaḥ śambhurdevānāṃ parameśvaraḥ |
uvāca tān surāndevāmaharṣīṃśca purātanān ||

3.12.31

yathā jalaṃ jale kṣiptaṃ kṣīre kṣīraṃ ghṛte ghṛtam |
eka eva tadā viṣṇuḥ śive līno na cānyathā ||

3.12.32

eko viṣṇurnṛsiṃhātmā sadarpaśca mahābalaḥ |
jagatsaṃhārakaraṇe pravṛtto narakesarī ||

3.12.33

prārthanīyo namastasmai madbhaktaiḥ siddhikāribhiḥ |
madbhaktapravaraścaiva madbhaktavaradāyakaḥ ||

3.12.34

nandīśvara uvāca |
etāvaduktvā bhagavān pakṣirājo mahābalaḥ |
paśyatāṃ sarvadevānāṃ tatraivāntaradhīyata ||

3.12.35

vīrabhadro'pi bhagavāngaṇādhyakṣo mahābalaḥ |
nṛsiṃhakṛttiṃ niṣkṛṣya samādāya yayau girim ||

3.12.36

nṛsiṃhakṛttivasanastadāprabhṛti śaṅkaraḥ |
tadvaktraṃ muṇḍamālāyāṃ nāyakatvena kalpitam ||

3.12.37

tato devā nirātaṅkāḥ kīrtayantaḥ kathāmimām |
vismayotphullanayanā jagmuḥ sarve yathāgatam ||

3.12.38

ya idaṃ paramākhyānaṃ puṇyaṃ vedarasānvitam |
paṭhati śṛṇuyāccaiva sarvānkāmānavāpnuyāt ||

3.12.39

dhanyaṃ yaśasyamāyuṣyamārogyampuṣṭivarddhanam |
sarvavighnapraśamanaṃ sarvavyādhivināśanam ||

3.12.40

duḥkhapraśamanaṃ vāñchāsiddhidaṃ maṅgalālayam |
apamṛtyuharaṃ buddhipradaṃ śatruvināśanam ||

3.12.41

idaṃ tu śarabhākāraṃ paraṃ rūpaṃ pinākinaḥ |
prakāśanīyaṃ bhakteṣu śaṅkarasya careṣu vai ||

3.12.42

taireva paṭhitavyaṃ ca śrotavyaṃ ca śivātmabhiḥ |
navadhābhaktidaṃ divyamantaḥkaraṇabuddhidam ||

3.12.43

śivotsaveṣu sarveṣu caturdaśyaṣṭamīṣu ca |
paṭhetpratiṣṭhākāle tu śivasannidhikāraṇam ||

3.12.44

cauravyāghranṛsiṃhātmakṛtarājabhayeṣu ca |
anyeṣūtpātabhūkampadasyvādipāṃsuvṛṣṭiṣu ||

3.12.45

ulkāpāte mahāvāte vināvṛṣṭyativṛṣṭiṣu |
paṭhedyaḥ prayato vidvān śivabhakto dṛḍhavrataḥ ||

3.12.46

yaḥ paṭhecchṛṇuyādvāpi niṣkāmo vratamaiśvaram |
rudralokaṃ samāsādya rudrasyānucaro bhavet ||

3.12.47

rudralokamanuprāpya rudreṇa saha modate |
tataḥ sāyujyamāpnoti śivasya kṛpayā mune ||

3.12.47.c1

iti śrīśivamahāpurāṇe tṛtīyāyāṃ śatarudrasaṃhitāyāṃ śarabhāvatāravarṇanaṃ nāma dvādaśo'dhyāyaḥ ||

3.12.47.p2

śrīgaṇeśāya namaḥ ||

3.12.47.p3

śrīgaurīśaṅkarābhyāṃ namaḥ ||

3.12.47.p4

śrīśivamahāpurāṇam ||

3.12.47.p5

tṛtīyāyāṃ śatarudrasaṃhitāyāṃ

Other recensions (1)

Linked texts (3)