Pramāṇa · Search · About · API

Shivapurana 3.13: trayodaśo'dhyāyaḥ | gṛhapatyavatāravarṇanam 1

Śivapurāṇa (complete text) 3.13

Language
Sanskrit

Contents

trayodaśo'dhyāyaḥ | gṛhapatyavatāravarṇanam 1

3.13.1

nandīśvara uvāca |
śṛṇu brahmasuta prītyā caritaṃ śaśimaulinaḥ |
so'vatīrṇo yathā prītyā viśvānaragṛhe śivaḥ ||

3.13.2

nāmnā gṛhapatiḥ so'bhūdagnilokapatirmune |
agnirūpastaijasaśca sarvātmā paramaḥ prabhuḥ ||

3.13.3

narmadāyāstaṭe ramye pure narmapure purā |
purāribhaktaḥ puṇyātmābhavadviśvānaro muniḥ ||

3.13.4

brahmacaryāśrame niṣṭho brahmayajñarataḥ sadā |
śāṇḍilyagotraḥ śucimānbrahmatejonidhirvaśī ||

3.13.5

vijñātākhilaśāstrārthaḥ sadācārarataḥ sadā |
śaivācārapravīṇo'ti laukikācāravidvaraḥ ||

3.13.6

citte vicārya gṛhiṇīguṇānviśvānaraḥ śubhān |
uduvāha vidhānena svocitāṃ kulakanyakām ||

3.13.7

agniśuśrūṣaṇarataḥ pañcayajñaparāyaṇaḥ |
ṣaṭkarmanirato nityaṃ devapitratithipriyaḥ ||

3.13.8

evaṃ bahutithe kāle gate tasyāgrajanmanaḥ |
bhāryā śuciṣmatī nāma bhartāraṃ prāha suvratā ||

3.13.9

nātha bhogā mayā sarve bhuktā vai tvatprasādataḥ |
strīṇāṃ samucitā ye syuḥ tvāṃ sametya mudāvahāḥ ||

3.13.10

evaṃ me prārthitaṃ nātha cirāya hṛdi saṃsthitam |
gṛhasthānāṃ samucitaṃ tvametaddātumarhasi ||

3.13.11

viśvānara uvāca |
kimadeyaṃ hi suśroṇi tava priyahitaiṣiṇī |
tatprārthaya mahābhāge prayacchāmyavilambitam ||

3.13.12

maheśituḥ prasādena mama kiñcinna durlabham |
ihāmutra ca kalyāṇi sarvakalyāṇakāriṇaḥ ||

3.13.13

nandīśvara uvāca |
ityākarṇya vacaḥ patyustasya sā patidevatā |
uvāca hṛṣṭavadanā karau baddhvā vinītikā ||

3.13.14

śuciṣmatyuvāca |
varayogyāsmi cennātha yadi deyo varo mama |
maheśasadṛśaṃ putraṃ dehi nānyaṃ varaṃ vṛṇe ||

3.13.15

nandīśvara uvāca |
iti tasyā vacaḥ śrutvā brāhmaṇaḥ sa śucivrataḥ |
kṣaṇaṃ samādhimādhāya hṛdyetatsamacintayat ||

3.13.16

aho kiṃ me tayā tanvyā prārthitaṃ hyatidurlabham |
manorathapathāddūramastu vā sa hi sarvakṛt ||

3.13.17

tenaivāsyā mukhe sthitvā vāksvarūpeṇa śambhunā |
vyāhṛtaṃ ko'nyathā kartumutsaheta bhavedidam ||

3.13.18

iti sañcintya sa munirviśvānara udāradhīḥ |
tataḥ provāca tāṃ patnīmekapatnīvrate sthitaḥ ||

3.13.19

nandīśvara uvāca |
itthamāśvāsya tāṃ patnīṃ jagāma tapase muniḥ |
yatra viśveśvaraḥ sākṣātkāśīnātho'dhitiṣṭhati ||

3.13.20

prāpya vārāṇasīṃ tūrṇaṃ dṛṣṭvā tāṃ maṇikarṇikām |
tatyāja tāpatritayamapi janmaśatārjitam ||

3.13.21

dṛṣṭvā sarvāṇi liṅgāni viśveśapramukhāni ca |
snātvā sarveṣu kuṇḍeṣu vāpīkūpasarassu ca ||

3.13.22

natvā vināyakānsarvāngaurīṃ śarvāṃ praṇamya ca |
sampūjya kālarājaṃ ca bhairavaṃ pāpabhakṣaṇam ||

3.13.23

daṇḍanāyakamukhyāṃśca gaṇānstutvā prayatnataḥ |
ādikeśavamukhyāṃśca keśavaṃ paritoṣya ca ||

3.13.24

lolārkamukhasūryāṃśca praṇamya sa punaḥ punaḥ |
kṛtvā ca piṇḍadānāni sarvatīrtheṣvatandritaḥ ||

3.13.25

sahasrabhojanādyaiśca munīnviprānpratarpya ca |
mahāpūjopacāraiśca liṅgānyabhyarcya bhaktitaḥ ||

3.13.26

asakṛccintayāmāsa kiṃ liṅgaṃ kṣiprasiddhidam |
yatra niścalatāmeti tapastanayakāmyayā ||

3.13.27

kṣaṇaṃ vicārya sa muniriti viśvānaraḥ sudhīḥ |
kṣipraṃ putrapradaṃ liṅgaṃ vīreśaṃ praśaśaṃsa ha ||

3.13.28

asaṅkhyātāḥ sahasrāṇi siddhāḥ siddhiṃ gatāstataḥ |
siddhaliṅgamiti khyātaṃ tasmādvīreśvaraṃ param ||

3.13.29

vīreśvaraṃ mahāliṅgamabdamabhyarcya bhaktitaḥ |
āyurmanorathaṃ sarvaṃ putrādikamanekaśaḥ ||

3.13.30

ahamapyatra vīreśaṃ samārādhya trikālataḥ |
āśu putramavāpsyāmi yathābhilaṣitaṃ striyā ||

3.13.31

nandīśvara uvāca |
iti kṛtvā matiṃ dhiro vipro viśvānaraḥ kṛtī |
candrakūpajale snātvā jagrāha niyamaṃ vratī ||

3.13.32

ekāhāro'bhavanmāsaṃ māsaṃ naktāśano'bhavat |
ayācitāśano māsaṃ māsaṃ tyaktāśanaḥ punaḥ ||

3.13.33

payovrato'bhavanmāsaṃ māsaṃ śākaphalāśanaḥ |
māsaṃ muṣṭitilāhāro māsaṃ pānīyabhojanaḥ ||

3.13.34

pañcagavyāśano māsaṃ māsaṃ cāndrāyaṇavratī |
māsaṃ kuśāgrajalabhugmāsaṃ śvasanabhakṣaṇaḥ ||

3.13.35

evamabdamitaṃ kālaṃ tatāpa sa tapo'dbhutam |
trikālamarcayadbhaktyā vīreśaṃ liṅgamuttamam ||

3.13.36

atha trayodaśe māsi snātvā tripathagāmbhasi |
pratyūṣa eva vīreśaṃ yāvadāyāti sa dvijaḥ ||

3.13.37

tāvadvilokayāñcakre madhye liṅgaṃ tapodhanaḥ |
vibhūtibhūṣaṇaṃ bālamaṣṭavarṣākṛtiṃ śiśum ||

3.13.38

ākarṇāyatanetraṃ ca suraktadaśanacchadam |
cārupiṅgajaṭāmauliṃ nagna prahasitānanam ||

3.13.39

śaiśavocitanepathyadhāriṇaṃ citidhāriṇam |
paṭhantaṃ śrutisūktāni hasantaṃ ca svalīlayā ||

3.13.40

tamālokya mudaṃ prāpya romakañcukito muniḥ |
proccacāra hṛdālāpānnamo'stviti punaḥ punaḥ ||

3.13.41

abhilāṣapradaiḥ padyairaṣṭabhirbālarūpiṇam |
tuṣṭāva paramānandaṃ śambhuṃ viśvānaraḥ kṛtī ||

3.13.42

viśvānara uvāca |
ekaṃ brahmaivādvitīyaṃ samastaṃ satyaṃ satyaṃ neha nānāsti kiñcit |
eko rudro na dvitīyo'vatasthe tasmādekaṃ tvāṃ prapadye maheśam ||

3.13.43

kartā harttā tvaṃ hi sarvasya śambho nānārūpeṣvekarūpo'pyarūpaḥ |
yadvatpratyagdharma eko'pyaneka-stasmānnānyaṃ tvāṃ vineśaṃ prapadye ||

3.13.44

rajjau sarpaḥ śuktikāyāṃ ca raupyaṃ nairaḥ pūrastanmṛgākhye marīcau |
yadyatsadvadviṣvageva prapañco yasmin jñāte taṃ prapadye maheśam ||

3.13.45

toye śaityaṃ dāhakatvaṃ ca vahnau tāpo bhānau śītabhānau prasādaḥ |
puṣpe gandho dugdhamadhye'pi sarpi-ryattacchambho tvaṃ tatastvāṃ prapadye ||

3.13.46

śabdaṃ gṛhṇāsyaśravāstvaṃ hi jighra-syaghrāṇastvaṃ vyaṅghrirāyāsi dūrāt |
vyakṣaḥ paśyestvaṃ rasajño'pyajihvaḥ kastvāṃ samyagvettyatastvāṃ prapadye ||

3.13.47

no veda tvāmīśa sākṣāddhi vedo no vā viṣṇurno vidhātākhilasya |
no yogīndrā nendramukhyāśca devā bhakto veda tvāmatastvāṃ prapadye ||

3.13.48

no te gotraṃ neśa janmāpi nākhyā no vā rūpaṃ naiva śīlaṃ na deśaḥ |
itthambhūto'pīśvarastvaṃ trilokyāḥ sarvānkāmānpūrayestvaṃ bhaje tvām ||

3.13.49

tvattaḥ sarvaṃ tvaṃ hi sarvaṃ smarāre tvaṃ gaurīśastvaṃ ca nagno'tiśāntaḥ |
tvaṃ vai vṛddhastvaṃ yuvā tvaṃ ca bāla-stattvaṃ yatkiṃ nānyatastvāṃ nato'ham ||

3.13.50

nandīśvara uvāca |
stutveti vipro nipapāta bhūmau sambaddhapāṇirbhavatīha yāvat |
tāvatsa bālo'khilavṛddhavṛddhaḥ provāca bhūdevamatīva hṛṣṭaḥ ||

3.13.51

bāla uvāca |
viśvānara muniśreṣṭha bhūdevāhaṃ tvayādya vai |
toṣitaḥ suprasannātmā vṛṇīṣva varamuttamam ||

3.13.52

tata utthāya hṛṣṭātmā munirviśvānaraḥ kṛtī |
pratyabravīnmuniśreṣṭhaḥ śaṅkaraṃ bālarūpiṇam ||

3.13.53

viśvānara uvāca |
maheśvara kimajñātaṃ sarvajñasya tava prabho |
sarvāntarātmā bhagavān śarvaḥ sarvaprado bhavān ||

3.13.54

yācñāṃ prati niyuktaṃ māṃ kiṃ brūṣe dainyakāriṇīm |
iti jñātvā maheśāna yathecchasi tathā kuru ||

3.13.55

nandīśvara uvāca |
iti śrutvā vacastasya devo viśvānarasya hi |
śuciḥ śucivratasyātha śuciṃ smitvābravīcchiśuḥ ||

3.13.56

tvayā śuce śuciṣmatyāṃ yo'bhilāṣaḥ kṛto hṛdi |
acireṇaiva kālena sa bhaviṣyatyasaṃśayam ||

3.13.57

tava putratvameṣyāmi śuciṣmatyāṃ mahāmate |
khyāto gṛhapatirnāmnā śuciḥ sarvāmarapriyaḥ ||

3.13.58

abhilāṣāṣṭakaṃ puṇyaṃ stotrametattvayeritam |
abdatrikālapaṭhanātkāmadaṃ śivasannidhau ||

3.13.59

etatstotraprapaṭhanaṃ putrapautradhanapradam |
sarvaśāntikaraṃ cāpi sarvāpattivināśanam ||

3.13.60

svargāpavargasampattikārakaṃ nātra saṃśayaḥ |
sarvastotrasamaṃ hyetatsarvakāmapradaṃ sadā ||

3.13.61

prātarutthāya susnāto liṅgamabhyarcya śāmbhavam |
varṣaṃ japannidaṃ stotramaputraḥ putravānbhavet ||

3.13.62

abhilāṣāṣṭakamidaṃ na deyaṃ yasya kasyacit |
gopanīyaṃ prayatnena mahāvandhyāprasūtikṛt ||

3.13.63

striyā vā puruṣeṇāpi niyamālliṅgasannidhau |
abdaṃ japtamidaṃ stotraṃ putradaṃ nātra saṃśayaḥ ||

3.13.64

nandīśvara uvāca |
ityuktvāntardadhe śambhurbālarūpaḥ satāṃ gatiḥ |
so'pi viśvānaro vipro hṛṣṭātmā svagṛhaṃ yayau ||

3.13.64.c1

iti śrīśivamahāpurāṇe tṛtīyāyāṃ śatarudrasaṃhitāyāṃ gṛhapatyavatāravarṇanaṃ nāma trayodaśo'dhyāyaḥ ||

3.13.64.p2

śrīgaṇeśāya namaḥ ||

3.13.64.p3

śrīgaurīśaṅkarābhyāṃ namaḥ ||

3.13.64.p4

śrīśivamahāpurāṇam ||

3.13.64.p5

tṛtīyāyāṃ śatarudrasaṃhitāyāṃ

Other recensions (1)

Linked texts (1)