Shivapurana 3.14: caturdaśo'dhyāyaḥ | gṛhapatyavatāravarṇanam 2
Śivapurāṇa (complete text) 3.14
- Language
- Sanskrit
Contents
- 3.14.47 — 5 parts
caturdaśo'dhyāyaḥ | gṛhapatyavatāravarṇanam 2
3.14.1
nandīśvara uvāca |
sa vipro gṛhamāgatya mahāharṣasamanvitaḥ |
priyāyai kathayāmāsa tadvṛttāntamaśeṣataḥ ||
3.14.2
tacchrutvā viprapatnī sā mudaṃ prāpa śuciṣmatī |
atīva premasaṃyuktā praśaśaṃsa vidhiṃ nijam ||
3.14.3
atha kālena tadyoṣidantarvatnī babhūva ha |
vidhivad vihite tena garbhādhānākhyakarmaṇi ||
3.14.4
tataḥ puṃsavanaṃ tena spandanātprāgvipaścitā |
gṛhyoktavidhinā samyak kṛtaṃ puṃstvavivṛddhaye ||
3.14.5
sīmanto'thāṣṭame māse garbharūpasamṛddhikṛt |
sukhaprasavasiddhau ca tenākari kriyāvidā ||
3.14.6
athātaḥ śubhatārāsu tārādhipavarānanaḥ |
kendre gurau śubhe lagne sugraheṣu yugeṣu ca ||
3.14.7
ariṣṭadīpanirvāṇaḥ sarvāriṣṭavināśakṛt |
tanayo nāma tasyāṃ tu śuciṣmatyāṃ babhūva ha ||
3.14.8
śarvaḥ samastasukhado bhūrbhuvaḥsvarnnivāsinām |
gandhavāhanavāhāśca digvadhūrmukhavāsasaḥ ||
3.14.9
iṣṭagandhaprasūnaughairvavṛṣuste ghanāghanāḥ |
devadundubhayo neduḥ praseduḥ sarvato diśaḥ ||
3.14.10
paritaḥ saritaḥ svacchā bhūtānāṃ mānasaiḥ saha |
tamo'tāmyattu nitarāṃ rajo'pi virajo'bhavat ||
3.14.11
sattvāḥ sattvasamāyuktāḥ sudhāvṛṣṭirbabhūva vai |
kalyāṇī sarvathā vāṇī prāṇinaḥ priyavatyabhūt ||
3.14.12
rambhāmukhyā apsaraso maṅgaladravyapāṇayaḥ |
vidyādharyaśca kinnaryastathāmaryaḥ sahasraśaḥ ||
3.14.13
gandharvoragayakṣāṇāṃ sumāniyaḥ śubhasvarāḥ |
gāyantyo maṅgalaṃ gītaṃ tatrājagmuranekaśaḥ ||
3.14.14
marīciratriḥ pulahaḥ pulastyaḥ kraturaṅgirāḥ |
vasiṣṭhaḥ kaśyapo'gastyo vibhāṇḍo māṇḍavīsutaḥ ||
3.14.15
lomaśo romacaraṇo bharadvājo'tha gautamaḥ |
bhṛgustu gālavo gargo jātūkarṇyaḥ parāśaraḥ ||
3.14.16
āpastambo yājñavalkyo dakṣavālmīkimudgalāḥ |
śātātapaśca likhitaḥ śilādaḥ śaṅkha uñchabhuk ||
3.14.17
jamadagniśca saṃvarto mataṅgo bharatoṃ'śumān |
vyāsaḥ kātyāyanaḥ kutsaḥ śaunakaḥ suśrutaḥ śukaḥ ||
3.14.18
ṛṣyaśṛṅgo'tha durvāsāḥ śucirnāradatumburu |
uttaṅko vāmadevaśca pavano'sitadevalau ||
3.14.19
sālaṅkāyanahārītau viśvāmitro'tha bhārgavaḥ |
mṛkaṇḍaḥ saha putreṇa parvato dārukastathā ||
3.14.20
dhaumyopamanyuvatsādyā munayo munikanyakāḥ |
tacchāntyarthaṃ samājagmurdhanyaṃ viśvānarāśramam ||
3.14.21
brahmā bṛhaspatiyuto devo garuḍavāhanaḥ |
nandibhṛṅgisamāyukto gauryā saha vṛṣadhvajaḥ ||
3.14.22
mahendramukhyā gīrvāṇā nāgāḥ pātālavāsinaḥ |
ratnānyādāya bahuśaḥ sasaritkā mahābdhayaḥ ||
3.14.23
sthāvarā jaṅgamaṃ rūpaṃ dhṛtvāyātāḥ sahasraśaḥ |
mahāmahotsave tasmin babhūvākālakaumudī ||
3.14.24
jātakarma svayaṃ tasya kṛtavānvidhirānataḥ |
śrutiṃ vicārya tadrūpaṃ nāmnā gṛhapatistvayam ||
3.14.25
iti nāma dadau tasmai deyamekādaśe'hani |
nāmakarmavidhānena tadarthaṃ śrutimuccaran ||
3.14.26
caturnigamamantroktairāśīrbhirabhinandya ca |
samayāddhaṃ samāruhya sarveṣāṃ ca pitāmahaḥ ||
3.14.27
kṛtvā bālocitāṃ rakṣāṃ laukikīṃ gatimāśritaḥ |
āruhya yānaṃ svaṃ dhāma haro'pi hariṇā yayau ||
3.14.28
aho rūpamaho tejastvaho sarvāṅgalakṣaṇam |
aho śuciṣmatībhāgyamāvirāsītsvayaṃ haraḥ ||
3.14.29
athavā kimidaṃ citraṃ śarvabhaktajaneṣvaho |
svayamāvirabhūd rudro yato rudrastadarcitaḥ ||
3.14.30
iti stuvantaste'nyo'nyaṃ samprahṛṣṭatanūruhaḥ |
viśvānaraṃ samāpṛcchya jagmuḥ sarve yathāgatam ||
3.14.31
ataḥ putraṃ samīhante gṛhasthāśramavāsinaḥ |
putreṇa lokāñjayati śrutireṣā sanātanī ||
3.14.32
aputrasya gṛhaṃ śūnyamaputrasyārjanaṃ vṛthā |
aputrasya tapaśchinnaṃ no pavitratyaputrataḥ ||
3.14.33
na putrātparamo lābho na putrātparamaṃ sukham |
na putrātparamaṃ mitraṃ paratreha ca kutracit ||
3.14.34
niṣkramo'tha caturthe'sya māsi pitrā kṛto gṛhāt |
annaprāśanamabdārddhe cūḍābde cārthavatkṛtā ||
3.14.35
karṇavedhaṃ tataḥ kṛtvā śravaṇarkṣe sa karmavit |
brahmatejobhivṛddhyarthaṃ pañcame'bde vrataṃ dadau ||
3.14.36
upākarma tataḥ kṛtvā vedānadhyāpayatsudhīḥ |
tryabdaṃ vedānsa vidhinādhyaiṣṭa sāṅgapadakramān ||
3.14.37
vidyājātaṃ samastaṃ ca sākṣimātraṃ gurormukhāt |
vinayādiguṇānāviṣkurvañjagrāha śaktimān ||
3.14.38
tato'tha navame varṣe pitroḥ śuśrūṣaṇe ratam |
vaiśvānaraṃ gṛhapatiṃ draṣṭumāyācca nāradaḥ ||
3.14.39
viśvānaroṭajaṃ prāpya devarṣistaṃ tu kautukī |
apṛcchatkuśalaṃ tatra gṛhītārghāsanaḥ kramāt ||
3.14.40
tataḥ sarvaṃ ca tadbhāgyaṃ putradharmaṃ ca sammukhe |
viśvānaraṃ samavadatsmṛtvā śivapadāmbujam ||
3.14.41
nandīśvara uvāca |
ityukto muninā bālaḥ pitrorājñāmavāpya saḥ |
praṇamya nāradaṃ śrīmān bhaktyā prahva upāviśata ||
3.14.42
nārada uvāca |
vaiśvānara samabhyehi mamotsaṅge niṣīda bhoḥ |
lakṣaṇāni parīkṣe'haṃ pāṇiṃ darśaya dakṣiṇam ||
3.14.43
tato dṛṣṭvā tu sarvaṃ hi tālujihvādi nāradaḥ |
viśvānaraṃ samavadacchivapreraṇayā sudhīḥ ||
3.14.44
nārada uvāca |
viśvānara mune vacmi śṛṇu putrāṅkamādarāt |
sarvāṅgasvaṅkavānputro mahālakṣaṇavānayam ||
3.14.45
kintu sarvaguṇopetaṃ sarvalakṣaṇalakṣitam |
sampūrṇanirmalakalaṃ pālayedvidhuvadvidhiḥ ||
3.14.46
tasmātsarvaprayatnena rakṣaṇīyastvasau śiśuḥ |
guṇo'pi doṣatāṃ yāti vakrībhūte vidhātari ||
3.14.47
śaṅke'sya dvādaśe varṣe pratyūho vidyudagnitaḥ |
ityuktvā nārado'gacchaddevalokaṃ yathāgatam ||
3.14.47.c1
iti śrīśivamahāpurāṇe tṛtīyāyāṃ śatarudrasaṃhitāyāṃ gṛhapatyavatāropākhyāne gṛhapatyavatāravarṇanaṃ nāma caturdaśo'dhyāyaḥ ||
3.14.47.p2
śrīgaṇeśāya namaḥ ||
3.14.47.p3
śrīgaurīśaṅkarābhyāṃ namaḥ ||
3.14.47.p4
śrīśivamahāpurāṇam ||
3.14.47.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit
Linked texts (1)
- Āryacarita — Sanskrit