Shivapurana 3.17: saptadaśo'dhyāyaḥ | śivadaśāvatāravarṇanam
Śivapurāṇa (complete text) 3.17
- Language
- Sanskrit
Contents
- 3.17.20 — 5 parts
saptadaśo'dhyāyaḥ | śivadaśāvatāravarṇanam
3.17.1
śṛṇvatho giriśasyādyāvatārān daśasaṅkhyakān |
mahākālamukhān bhaktyopāsanākāṇḍasevitān ||
3.17.2
tatrādyo hi mahākālo bhuktimuktipradaḥ satām |
śaktistatra mahākālī bhaktepsitaphalapradā ||
3.17.3
tāranāmā dvitīyaśca tārāśaktistathaiva sā |
bhuktimuktipradau cobhau svasevakasukhapradau ||
3.17.4
bhuvaneśo hi bālāhvastṛtīyaḥ parikīrtitaḥ |
bhuvaneśī śivā tatra bālāhvā sukhadā satām ||
3.17.5
śrīvidyeśaḥ ṣoḍaśāhvaḥ śrīrvidyā ṣoḍaśī śivā |
caturtho bhaktasukhado bhuktimuktiphalapradaḥ ||
3.17.6
pañcamo bhairavaḥ khyātaḥ sarvadā bhaktakāmadaḥ |
bhairavī girijā tatra sadupāsakakāmadā ||
3.17.7
chinnamastakanāmāsau śivaḥ ṣaṣṭhaḥ prakīrtitaḥ |
bhaktakāmapradā caiva girijā chinnamastakā ||
3.17.8
dhūmavān saptamaḥ śambhuḥ sarvakāmaphalapradaḥ |
dhūmavatī śivā tatra sadupāsakakāmadā ||
3.17.9
śivāvatāraḥ sukhado hyaṣṭamo bagalāmukhaḥ |
śaktistatra mahānandā vikhyātā bagalāmukhī ||
3.17.10
śivāvatāro mātaṅgo navamaḥ parikīrtitaḥ |
mātaṅgī tatra śarvāṇī sarvakāmaphalapradā ||
3.17.11
daśamaḥ kamalaḥ śambhurbhuktimuktiphalapradaḥ |
kamalā girijā tatra svabhaktaparipālinī ||
3.17.12
ete daśamitāḥ śaivā avatārāḥ sukhapradāḥ |
bhuktimuktipradāścaiva bhaktānāṃ sarvadā satām ||
3.17.13
ete daśāvatārā hi śaṅkarasya mahātmanaḥ |
nānāsukhapradā nityaṃ sevatāṃ nirvikārataḥ ||
3.17.14
etaddaśāvatārāṇāṃ māhātmyaṃ varṇitaṃ mune |
sarvakāmapradaṃ jñeyaṃ tantraśāstrādigarbhitam ||
3.17.15
etāsāmādiśaktīnāmadbhuto mahimā mune |
sarvakāmaprado jñeyastatraṃśāstrādigarbhitaḥ ||
3.17.16
śatrumāraṇakāryādau tattacchaktiḥ parā matā |
khaladaṇḍakarī nityaṃ brahmatejovivarddhinī ||
3.17.17
ityuktāste mayā brahmannavatārā maheśituḥ |
saśaktikā daśamitā mahākālamukhāḥ śubhāḥ ||
3.17.18
śaivaparvesu sarveṣu yo'dhīte bhaktitatparaḥ |
etadākhyānamamalaṃ so'tiśambhupriyo bhavet ||
3.17.19
brāhmaṇo brahmavarcasvī kṣatriyo vijayī bhavet |
dhanādhipo hi vaiśyaḥ syācchūdraḥ sukhamavāpnuyāt ||
3.17.20
śāṅkarā nijadharmasthāḥ śṛṇvantaścaritaṃ tvidam |
sukhinaḥ syurviśeṣeṇa śivabhaktā bhavantu ca ||
3.17.20.c1
iti śrīśivamahāpurāṇe tṛtīyāyāṃ śatarudrasaṃhitāyāṃ śivadaśāvatāravarṇanaṃ nāma saptadaśo'dhyāyaḥ ||
3.17.20.p2
śrīgaṇeśāya namaḥ ||
3.17.20.p3
śrīgaurīśaṅkarābhyāṃ namaḥ ||
3.17.20.p4
śrīśivamahāpurāṇam ||
3.17.20.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit