Shivapurana 3.18: aṣṭādaśo'dhyāyaḥ | ekādaśāvatāravarṇanam
Śivapurāṇa (complete text) 3.18
- Language
- Sanskrit
Contents
- 3.18.35 — 5 parts
aṣṭādaśo'dhyāyaḥ | ekādaśāvatāravarṇanam
3.18.1
nandīśvara uvāca |
ekādaśavatārānvai śṛṇvatho śāṅkarānvarān |
yān śrutvā na hi bādhyeta bādhāsatyādisambhavā ||
3.18.2
purā sarve surāḥ śakramukhā daityaparājitāḥ |
tyaktvāmarāvatīṃ bhītyāpalāyanta nijāṃ purīm ||
3.18.3
daityaprapīḍitā devā jagmuste kaśyapāntikam |
badhvā karānnataskandhāḥ praṇemustaṃ suvihvalam ||
3.18.4
sunutvā taṃ surāḥ sarve kṛtvā vijñaptimādarāt |
sarvaṃ nivedayāmāsuḥ svaduḥkhaṃ tatparājayam ||
3.18.5
tataḥ sa kaśyapastāta tatpitā śivasaktadhīḥ |
tadākarṇyāmarākaṃ vai duḥkhito'bhūnna cādhikam ||
3.18.6
tānāśvāsya muniḥ so'tha dhairyamādhāya śāntadhīḥ |
kāśīṃ jagāma suprītyā viśveśvarapurīṃ mune ||
3.18.7
gaṅgāmbhasi tataḥ snātvā kṛtvā taṃ vidhimādarāt |
viśveśvaraṃ samānarca sāmbaṃ sarveśvaraṃ prabhum ||
3.18.8
śivaliṅgaṃ susaṃsthāpya cakāra vipulaṃ tapaḥ |
śambhumuddiśya suprītyā devānāṃ hitakāmyayā ||
3.18.9
mahānkālo vyatīyāya tapatastasya vai mune |
śivapādāmbujāsaktamanaso dhairyaśālinaḥ ||
3.18.10
atha prādurabhūcchambhurvaraṃ dātuṃ tadarṣaye |
svapadāsaktamanase dīnabandhuḥ satāṃ gatiḥ ||
3.18.11
varaṃ brūhīti covāca suprasanno maheśvaraḥ |
kaśyapaṃ muniśārdūlaṃ svabhaktaṃ bhaktavatsalaḥ ||
3.18.12
dṛṣṭvātha taṃ maheśānaṃ sa praṇamya kṛtāñjaliḥ |
tuṣṭāva kaśyapo hṛṣṭo devatātaḥ prasannadhīḥ ||
3.18.13
kaśyapa uvāca |
devadeva maheśāna śaraṇāgatavatsala |
sarveśvaḥ paramātmā tvaṃ dhyānagamyo'dvayo'vyayaḥ ||
3.18.14
balanigrahakartā tvaṃ maheśvara satāṃ gatiḥ |
dīnabandhurdayāsindhurbhaktarakṣaṇadakṣadhīḥ ||
3.18.15
ete surāstvadīyā hi tvadbhaktāśca viśeṣataḥ |
daityaiḥ parājitāścātha pāhi tānduḥkhitān prabho ||
3.18.16
asamartho rameśo'pi duḥkhadaste muhurmuhuḥ |
ataḥ surā maccharaṇā vedayanto'sukhaṃ ca tat ||
3.18.17
tadarthaṃ devadeveśa devaduḥkhavināśaka |
tatpūrituṃ taponiṣṭhāṃ prasannārthaṃ tavāsadam ||
3.18.18
śaraṇaṃ te prapanno'smi sarvathāhaṃ maheśvara |
kāmaṃ me pūraya svāmindevaduḥkhaṃ vināśaya ||
3.18.19
putraduḥkhaiśca deveśa duḥkhito'haṃ viśeṣataḥ |
sukhinaṃ kuru māmīśa sahāyastvaṃ divaukasām ||
3.18.20
bhūtvā mama suto nātha devā yakṣāḥ parājitāḥ |
daityairmahābalaiḥ śambho surānandaprado bhava ||
3.18.21
sadaivāstu maheśāna sarvalekhasahāyakaḥ |
yathā daityakṛtā bādhā na bādheta surānprabho ||
3.18.22
nandīśvara uvāca |
ityuktasya tu sarveśastatheti procya śaṅkaraḥ |
paśyatastasya bhagavāṃstatraivāntardadhe haraḥ ||
3.18.23
kaśyapo'pi mahāhṛṣṭaḥ svasthānamagamad drutam |
devebhyaḥ kathayāmāsa sarvavṛttāntamādarāt ||
3.18.24
tataḥ sa śaṅkaraḥ śarvaḥ satyaṃ kartuṃ svakaṃ vacaḥ |
surabhyāṃ kaśyapājjajñe ekādaśasvarūpavān ||
3.18.25
mahotsavastadāsīd vai sarvaṃ śivamayaṃ tvabhūt |
āsanhṛṣṭāḥ surāścātha muninā kaśyapena ca ||
3.18.26
kapālī piṅgalo bhīmo virūpākṣo vilohitaḥ |
śāstājapādahirbudhnyaśśambhuścaṇḍo bhavastathā ||
3.18.27
ekādaśaite rudrāstu surabhītanayāḥ smṛtāḥ |
devakāryārthamutpannāḥ śivarūpāḥ sukhāspadam ||
3.18.28
te rudrāḥ kāśyapā vīrā mahābalaparākramāḥ |
daityān jaghnuśca saṅgrāme devasāhāyyakāriṇaḥ ||
3.18.29
tadrudrakṛpayā devā daityān jitvā ca nirbhayāḥ |
cakruḥ svarājyaṃ sarve te śakrādyāḥ svasthamānasāḥ ||
3.18.30
adyāpi te mahārudrāḥ sarve śivasvarūpakāḥ |
devānāṃ rakṣaṇārthāya virājante sadā divi ||
3.18.31
aiśānyāṃ puri te vāsaṃ cakrire bhaktavatsalāḥ |
viramante sadā tatra nānālīlāviśāradāḥ ||
3.18.32
teṣāmanucarā rudrāḥ koṭiśaḥ parikīrtitāḥ |
sarvatra saṃsthitāstatra trilokeṣvabhibhāgaśaḥ ||
3.18.33
iti te varṇitāstātāvatārāḥ śaṅkarasya vai |
ekādaśamitā rudrāḥ sarvalokasukhāvahāḥ ||
3.18.34
idamākhyānamamalaṃ sarvapāpapraṇāśakam |
dhanyaṃ yaśasyamāyuṣyaṃ sarvakāmapradāyakam ||
3.18.35
ya idaṃ śṛṇuyāttāta śrāvayedvai samāhitaḥ |
iha sarvasukhaṃ bhuktvā tato muktiṃ labheta saḥ ||
3.18.35.c1
iti śrīśivamahāpurāṇe tṛtīyāyāṃ śatarudrasaṃhitāyāṃ ekādaśāvatāravarṇanaṃ nāmāṣṭādaśo'dhyāyaḥ ||
3.18.35.p2
śrīgaṇeśāya namaḥ ||
3.18.35.p3
śrīgaurīśaṅkarābhyāṃ namaḥ ||
3.18.35.p4
śrīśivamahāpurāṇam ||
3.18.35.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit