Shivapurana 3.20: viṃśo'dhyāyaḥ | hanumadavatāracaritravarṇanam
Śivapurāṇa (complete text) 3.20
- Language
- Sanskrit
Contents
- 3.20.40 — 5 parts
viṃśo'dhyāyaḥ | hanumadavatāracaritravarṇanam
3.20.1
nandīśvara uvāca |
ataḥ paraṃ śṛṇu prītyā hanumaccaritaṃ mune |
yathā cakārāśu haro līlāstadrūpato varāḥ ||
3.20.2
cakāra suhitaṃ prītyā rāmasya parameśvaraḥ |
tatsarvaṃ caritaṃ vipra śṛṇu sarvasukhāvaham ||
3.20.3
ekasminsamaye śambhuradbhutotikaraḥ prabhuḥ |
dadarśa mohinīrūpaṃ viṣṇoḥ sa hi vasedguṇaḥ ||
3.20.4
cakre svaṃ kṣubhitaṃ śambhuḥ kāmabāṇahato yathā |
svaṃ vīryaṃ pātayāmāsa rāmakāryārthamīśvaraḥ ||
3.20.5
tadvīryaṃ sthāpayāmāsuḥ patre saptarṣayaśca te |
preritā manasā tena rāmakāryārthamādarāt ||
3.20.6
tairgautamasutāyāṃ tadvīryaṃ śambhormaharṣibhiḥ |
karṇadvārā tathāñjanyāṃ rāmakāryārthamāhitam ||
3.20.7
tataśca samaye tasmāddhanūmāniti nāmabhāk |
śambhurjajñe kapitanurmahābalaparākramaḥ ||
3.20.8
hanūmānsa kapīśānaḥ śiśureva mahābalaḥ |
ravibimbaṃ babhakṣāśu jñātvā laghuphalaṃ prage ||
3.20.9
devaprārthanayā taṃ so'tyajajjñātvā mahābalam |
śivāvatāraṃ ca prāpa varāndattān surarṣabhiḥ ||
3.20.10
svajananyantikaṃ prāgādatha so'tipraharṣitaḥ |
hanūmānsarvamācakhyau tasyai tad vṛttamādarāt ||
3.20.11
tadājñayā tato dhīraḥ sarvavidyāmayatnataḥ |
sūryātpapāṭha sa kapirgatvā nityaṃ tadantikam ||
3.20.12
sūryājñayā tadaṃśatya sugrīvasyāntikaṃ yayau |
māturājñāmanuprāpya rudrāṃśaḥ kapisattamaḥ ||
3.20.13
jyeṣṭhabhrātrā vālinā hi svastrībhoktrā tiraskṛtaḥ |
ṛṣyamūkagirau tena nyavasatsa hanūmatā ||
3.20.14
tato'bhūtsa sukaṇṭhasya mantrī kapivaraḥ sudhīḥ |
sarvathā suhitaṃ cakre sugrīvasya harāṃśajaḥ ||
3.20.15
tatrāgatena sabhrātrā hṛtabhāryeṇa duḥkhinā |
kārayāmāsa rāmeṇa tasya sakhyaṃ sukhāvaham ||
3.20.16
ghātayāmāsa rāmaśca vālinaṃ kapikuñjaram |
bhrātṛpatnyāśca bhoktāraṃ pāpinaṃ vīramāninam ||
3.20.17
tato rāmājñayā tāta hanūmānvānareśvaraḥ |
sa sītānveṣaṇaṃ cakre bahubhirvānaraiḥ sudhīḥ ||
3.20.18
jñātvā laṅkāgatāṃ sītāṃ gatastatra kapīśvaraḥ |
drutamullaṅghya sindhuṃ tamanistīryaṃ paraiḥ sa vai ||
3.20.19
cakre'dbhutacaritraṃ sa tatra vikramasaṃyutam |
abhijñānaṃ dadau prītyā sītāyai svaprabhorvaram ||
3.20.20
sītāśokaṃ jahārāśu sa vīraḥ kapināyakaḥ |
śrāvayitvā rāmavṛttaṃ tatprāṇāvanakārakam ||
3.20.21
tadabhijñānamādāya nivṛtto rāmasannidhim |
rāvaṇārāmamāhatya jaghāna bahurākṣasān ||
3.20.22
tadaiva rāvaṇasutaṃ hatvā sabahurākṣasam |
sa mahopadravaṃ cakre mahotistatra nirbhayaḥ ||
3.20.23
yadā dagdho rāvaṇenāvaguṇṭhya vasanāni ca |
tailābhyaktāni sudṛḍhaṃ mahābalavatā mune ||
3.20.24
utplutyotplutya ca tadā mahādevāṃśajaḥ kapiḥ |
dadāha laṅkāṃ nikhilāṃ kṛtvā vyājaṃ tameva hi ||
3.20.25
dagdhvā laṅkāṃ vañcayitvā vibhīṣaṇagṛhaṃ tataḥ |
apatadvāridhau vīrastataḥ sa kapikuñjaraḥ ||
3.20.26
svapucchaṃ tatra nirvāpya prāpa tasya parantaṭam |
akhinnaḥ sa yayau rāmasannidhiṃ giriśāṃśajaḥ ||
3.20.27
avilambena sujavo hanūmān kapisattamaḥ |
rāmopakaṇṭhamāgatya dadau sītāśiromaṇim ||
3.20.28
tatastadājñayā vīraḥ sindhau setumabandhayat |
vānaraiḥ sa samānīya bahūn girivarān balī ||
3.20.29
gatvā tatra tato rāmastartukāmo yathā tataḥ |
śivaliṅgaṃ samānarca pratiṣṭhāpya jayepsayā ||
3.20.30
tadvarātsa jayaṃ prāpya varaṃ tīrtvodadhiṃ tataḥ |
laṅkāmāvṛtya kapibhī raṇaṃ cakre sa rākṣasaiḥ ||
3.20.31
jaghānāthāsurānvīro rāmasainyaṃ rarakṣa saḥ |
śaktikṣataṃ lakṣmaṇaṃ ca sañjīvinyā hyajīvayat ||
3.20.32
sarvathā sukhinaṃ cakre sarāmaṃ lakṣmaṇaṃ hi saḥ |
sarvasainyaṃ rarakṣāsau mahādevātmajaḥ prabhuḥ ||
3.20.33
rāvaṇaṃ parivārāḍhyaṃ nāśayāmāsa viśramaḥ |
sukhīcakāra devānsa mahābalagrahaḥ kapiḥ ||
3.20.34
mahīrāvaṇasaṃjñaṃ sa hatvā rāmaṃ salakṣmaṇam |
tatsthānādānayāmāsa svasthānaṃ paripālya ca ||
3.20.35
rāmakāryaṃ cakārāśu sarvathā kapipuṅgavaḥ |
asurānnamayāmāsa nānālīlāṃ cakāra ca ||
3.20.36
sthāpayāmāsa bhūloke rāmabhaktiṃ kapīśvaraḥ |
svayaṃ bhaktavaro bhūtvā sītārāmasukhapradaḥ ||
3.20.37
lakṣmaṇaprāṇadātā ca sarvadevamadāpahaḥ |
rudrāvatāro bhagavānbhaktoddhārakaraḥ sa vai ||
3.20.38
hanumānsa mahāvīro rāmakāryakaraḥ sadā |
rāmadūtābhidho loke daityaghno bhaktavatsalaḥ ||
3.20.39
iti te kathitaṃ tāta hanumaccaritaṃ varam |
dhanyaṃ yaśasyamāyuṣyaṃ sarvakāmaphalapradam ||
3.20.40
ya idaṃ śṛṇuyādbhaktyā śrāvayedvā samāhitaḥ |
sa bhuktvehākhilānkāmān ante mokṣaṃ labhetparam ||
3.20.40.c1
iti śrīśivamahāpurāṇe tṛtīyāyāṃ śatarudrasaṃhitāyāṃ hanumadavatāracaritravarṇanaṃ nāma viṃśo'dhyāyaḥ ||
3.20.40.p2
śrīgaṇeśāya namaḥ ||
3.20.40.p3
śrīgaurīśaṅkarābhyāṃ namaḥ ||
3.20.40.p4
śrīśivamahāpurāṇam ||
3.20.40.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit