Shivapurana 3.21: ekaviṃśo'dhyāyaḥ | maheśāvatāravarṇanam
Śivapurāṇa (complete text) 3.21
- Language
- Sanskrit
Contents
- 3.21.15 — 5 parts
ekaviṃśo'dhyāyaḥ | maheśāvatāravarṇanam
3.21.1
nandīśvara uvāca |
atha prītyā śṛṇu mune'vatāraṃ paramaṃ prabhoḥ |
śaṅkarasyātmabhūputra śṛṇvatāṃ sarvakāmadam ||
3.21.2
ekadā muniśārdūla girijāśaṅkarāvubhau |
vihartukāmau sañjātau svecchayā parameśvarau ||
3.21.3
bhairavaṃ dvārapālaṃ ca kṛtvābhyantaramāgatau |
nānāsakhigaṇaiḥ prītyā sevitau naraśīlitau ||
3.21.4
ciraṃ vihṛtya tatra dvau svatantrau parameśvarau |
babhūvatuḥ prasannau tau nānālīlākarau mune ||
3.21.5
athonmattākṛtirdevī svatantrā līlayā śivā |
āgatā dvāri tadrūpā prabhorājñāmavāpa sā ||
3.21.6
tāṃ devīṃ bhairavaḥ so'tha nārīdṛṣṭyā vilokya ca |
niṣiṣedha bahirgantuṃ tadrūpeṇa vimohitaḥ ||
3.21.7
nārīdṛṣṭyā sudṛṣṭā sā bhairaveṇa yadā mune |
kruddhābhavacchivā devī taṃ śaśāpa tadā'mbikā ||
3.21.8
śivovāca |
nārīdṛṣṭyā paśyasi tvaṃ yato māṃ puruṣādhama |
ato bhava dharāyāṃ hi mānuṣastvaṃ ca bhairava ||
3.21.9
nandīśvara uvāca |
itthaṃ yadābhavacchapto bhairavaḥ śivayā mune |
hāhākāro mahānāsīdduḥkhamāpa sa līlayā ||
3.21.10
tataśca śaṅkaraḥ śīghraṃ tamāgatya munīśvara |
āśvāsayadbhairavaṃ hi nānānunayakovidaḥ ||
3.21.11
tacchāpādbhairavaḥ so'tha kṣitāvavataranmune |
manuṣyayonyāṃ vaitālasaṃjñakaḥ śaṅkakarecchayā ||
3.21.12
tatsnehataḥ śivaḥ so'pi kṣitāvavataradvibhuḥ |
śivayā saha sallīlo laukikīṃ gatimāśritaḥ ||
3.21.13
maheśāhvaḥ śivaścāsīcchāradā girijā mune |
sulīlāṃ cakratuḥ prītyā nānālīlāviśāradau ||
3.21.14
iti te kathitaṃ tāta maheśacaritaṃ varam |
dhanyaṃ yaśasyamāyuṣyaṃ sarvakāmaphalapradam ||
3.21.15
ya idaṃ śṛṇuyādbhaktyā śrāvayedvā samāhitaḥ |
sa bhuktvehākhilānbhogānante mokṣamavāpnuyāt ||
3.21.15.c1
iti śrīśivamahāpurāṇe tṛtīyāyāṃ śatarudrasaṃhitāyāṃ maheśāvatāravarṇanaṃ nāmaikaviṃśo'dhyāyaḥ ||
3.21.15.p2
śrīgaṇeśāya namaḥ ||
3.21.15.p3
śrīgaurīśaṅkarābhyāṃ namaḥ ||
3.21.15.p4
śrīśivamahāpurāṇam ||
3.21.15.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit
Linked texts (1)
- Skanda Purāṇa (Kumāra Kavi) — Kumāra Kavi, Sanskrit