Pramāṇa · Search · About · API

Shivapurana 3.23: trayoviṃśo'dhyāyaḥ | vṛṣeśvarasaṃjñakaśivāvatāravarṇanam

Śivapurāṇa (complete text) 3.23

Language
Sanskrit

Contents

trayoviṃśo'dhyāyaḥ | vṛṣeśvarasaṃjñakaśivāvatāravarṇanam

3.23.1

nandīśvara uvāca |
tato vṛṣabharūpeṇa garjamānaḥ pinākadhṛk |
praviṣṭo vivaraṃ tatra ninadanbhairavān ravān ||

3.23.2

nipetustasya ninadaiḥ purāṇi nagarāṇi ca |
prakampo hi babhūvātha sarveṣāṃ puravāsinām ||

3.23.3

tato vṛṣo hareḥ putrānsaṅgrāmodyatakārmukān |
śivamāyāvimūḍhātmamahābalaparākramān ||

3.23.4

hariputrāstataste'tha prākupyanmunisattama |
pradudruvuḥ pragarjyoccairvīrāḥ śaṅkarasammukham ||

3.23.5

āyātāṃstānhareḥ putrān rudro vṛṣabharūpadhṛk |
prākupyadviṣṇuputrāṃśca khuraiḥ śṛṅgairvyadārayat ||

3.23.6

vidāritāṅgā rudreṇa sarve harisutāśca te |
naṣṭā drutaṃ sanbabhūvurgataprāṇā vicetasaḥ ||

3.23.7

hateṣu teṣu putreṣu viṣṇurbalavatāṃ varaḥ |
niṣkramyātha pragarjyoccairyayau śīghraṃ harāntikam ||

3.23.8

dṛṣṭvā rudraṃ pravrajantaṃ hataviṣṇusutaṃ vṛṣam |
śaraiḥ santāḍayāmāsa divyairastraiśca keśavaḥ ||

3.23.9

tataḥ kruddho mahādevo vṛṣarūpī madābalaḥ |
astrāṇi tāni viṣṇośca jagrāsa girigocaraḥ ||

3.23.10

atha kṛtvā mahākopaṃ vṛṣātmā sa maheśvaraḥ |
vinanāda mahāghoraṃ kampayaṃstrijaganmune ||

3.23.11

tata utplutya tarasā khuraiḥ śṛṅgairvyadārayat |
viṣṇuṃ krodhākulaṃ mūḍhamajānantaṃ nijaṃ harim ||

3.23.12

tataḥ sa śithilātmā hi vyathitāṅgo babhūva ha |
tatprahāramasahyāśu harirmāyāvimohitaḥ ||

3.23.13

gatagarvo hariścaiva vicetā gatacetanaḥ |
jñātavān parameśānaṃ viharantaṃ vṛṣātmanā ||

3.23.14

atha vijñāya gaurīśamāgataṃ vṛṣarūpataḥ |
prāha gambhīrayā vācā nataskandhaḥ kṛtāñjaliḥ ||

3.23.15

hariruvāca |
devadeva mahādeva karuṇāsāgara prabho |
māyayā te maheśāna mohito'haṃ vimūḍhadhīḥ ||

3.23.16

kṛtaṃ yuddhaṃ tvayeśena svanāthena mayā prabho |
kṛpāṃ kṛtvā mayi svāminso'parādho hi sahyatām ||

3.23.17

nandīśvara uvāca |
tasya tadvacanaṃ śrutvā harerdīnatayā mune |
bhagavān śaṅkaraḥ prāha rameśaṃ bhaktavatsalaḥ ||

3.23.18

he viṣṇo he mahābuddhe kathaṃ māṃ jñātavānna hi |
yuddhaṃ kṛtaṃ kṛtaste'dya jñānaṃ sarvaṃ ca vismṛtam ||

3.23.19

ātmānaṃ kinna jānāsi madadhīnaparākramam |
tvayā nātra ratiḥ kāryā nivartasva kucārataḥ ||

3.23.20

kāmādhīnaṃ kathaṃ jñānaṃ strīṣu sakto vihārakṛt |
nocitaṃ tava deveśa smaraṇaṃ viśvatāraṇam ||

3.23.21

tacchutvā śambhuvacanaṃ vijñānapradamādarāt |
vrīḍyansvamanasā viṣṇuḥ prāha vācaṃ maheśvaram ||

3.23.22

viṣṇuruvāca |
mamātra vidyate cakraṃ tad gṛhītvetadādarāt |
gamiṣyāmi svalokaṃ taṃ tvadājñāparipālakaḥ ||

3.23.23

nandīśvara uvāca |
tadākarṇya maheśāno vacanaṃ vaiṣṇavaṃ haraḥ |
pratyuvāca vṛṣātmā hi vṛṣarakṣaḥ punarharim ||

3.23.24

na vilambaḥ prakarttavyo gantavyamita āśu te |
macchāsanāddhare loke cakramatraiva tiṣṭhatām ||

3.23.25

santānādityasaṃsthānācchivatvavacanādapi |
ahaṃ ghorataraṃ tasmāccakramanyaddadāmi te ||

3.23.26

etaduktvā haro'lekhīddivyaṃ kālānalaprabham |
paraṃ cakraṃ pradīptaṃ hi sarvaduṣṭavināśanam ||

3.23.27

viṣṇave pradadau cakraṃ ghorārkāyutasuprabham |
sarvāmaramunīndrāṇāṃ rakṣakāya mahātmane ||

3.23.28

labdhvā sudarśanaṃ cānyañcakraṃ paramadīptimat |
uvāca vibudhāṃstatra viṣṇurbuddhimatāṃ varaḥ ||

3.23.29

sarvadevavarā yūyaṃ madvākyaṃ śṛṇutādarāt |
kartavyaṃ tattathā śīghraṃ tataḥ śaṃ vo bhaviṣyati ||

3.23.30

divyā varāṅganāssanti pātāle yauvanānvitāḥ |
tābhiḥ sārddhaṃ mahākrīḍāṃ yaḥ karotu karotu saḥ ||

3.23.31

tacchutvā keśavādvākyaṃ śūrāstridaśayonayaḥ |
praveṣṭukāmāḥ pātālaṃ babhūvurviṣṇunā saha ||

3.23.32

vicāramatha vijñāya taṃ tadā bhagavānharaḥ |
krodhācchāpaṃ dadau ghoraṃ devayonyaṣṭakasya ca ||

3.23.33

hara uvāca |
varjayitvā muniṃ śāntaṃ dānavānvā madaṃśajam |
idaṃ yaḥ praviśetsthānaṃ tasya syānnidhanaṃ kṣaṇāt ||

3.23.34

śrutvā vākyamidaṃ ghoraṃ manuṣyahitavardhanam |
pratyākhyātāstu rudreṇa devāḥ svagṛhamāyayuḥ ||

3.23.35

evaṃ strīlaḥ paro viṣṇuḥ śivena pratiśāsitaḥ |
svarlokamagamad vyāsa svāsthyaṃ prāpa jagacca tat ||

3.23.36

vṛṣeśvaro'pi bhagavān śaṅkaro bhaktavatsalaḥ |
itthaṃ kṛtvā devakāryaṃ jagāma svagirīśvaram ||

3.23.37

vṛṣeśvarāvatārastu varṇitaḥ śaṅkarasya ca |
viṣṇumohaharaḥ śarvaḥ trailokyasukhakārakaḥ ||

3.23.38

pavitramidamākhyānaṃ śatrubādhāharaṃ param |
svargyaṃ yaśasyamāyuṣyaṃ bhuktimuktipradaṃ satām ||

3.23.39

ya idaṃ śṛṇuyādbhaktyā śrāvayedvai samāhitaḥ |
tathā paṭhiti yo hīdaṃ pāṭhayet sudhiyo narān |
sa bhuktvā sakalān kāmān ante mokṣamavāpnuyāt ||

3.23.39.c1

iti śrīśivamahāpurāṇe tṛtīyāyāṃ śatarudrasahitāyāṃ vṛṣeśvarasaṃjñakaśivāvatāravarṇanaṃ nāma trayoviṃśo'dhyāyaḥ ||

3.23.39.p2

śrīgaṇeśāya namaḥ ||

3.23.39.p3

śrīgaurīśaṅkarābhyāṃ namaḥ ||

3.23.39.p4

śrīśivamahāpurāṇam ||

3.23.39.p5

tṛtīyāyāṃ śatarudrasaṃhitāyāṃ

Other recensions (1)

Linked texts (2)