Shivapurana 3.24: caturviṃśo'dhyāyaḥ | pippalādāvatāravarṇanam
Śivapurāṇa (complete text) 3.24
- Language
- Sanskrit
Contents
- 3.24.64 — 5 parts
caturviṃśo'dhyāyaḥ | pippalādāvatāravarṇanam
3.24.1
nandīśvara uvāca |
pippalādākhyamaparamavatāraṃ maheśituḥ |
śṛṇu prājña mahāprītyā bhaktivardhanamuttamam ||
3.24.2
yaḥ purā gadito vipro dadhīcirmunisattamaḥ |
mahāśaivaḥ supratāpī cyāvanirbhṛguvaṃśajaḥ ||
3.24.3
kṣuveṇa saha saṅgrāme yena viṣṇuḥ parājitaḥ |
sanirjaro'tha saṃśapto maheśvarasahāyinā ||
3.24.4
tasya patnī mahābhāgā suvarcā nāma nāmataḥ |
mahāpativratā sādhvī yayā śaptā divaukasaḥ ||
3.24.5
tasmāttasyāṃ mahādevo nānālīlāviśāradaḥ |
prādurbabhūva tejasvī pippalādeti nāmataḥ ||
3.24.6
sūta uvāca |
ityākarṇya muniśreṣṭho nandīśvaravaco'dbhutam |
sanatkumāraḥ provāca nataskandhaḥ kṛtāñjaliḥ ||
3.24.7
sanatkumāra uvāca |
nandīśvara mahāprājña sākṣād rudrasvarūpadhṛk |
dhanyastvaṃ sadgurustāta śrāviteyaṃ kathādbhutā ||
3.24.8
kṣuveṇa saha saṅgrāme śruto viṣṇuparājayaḥ |
brahmaṇā me purā tāta tacchāpaśca śilādaja ||
3.24.9
adhunā śrotumicchāmi devaśāpaṃ suvarcayā |
dattaṃ paścāt pippalādacaritaṃ maṅgalāyanam ||
3.24.10
sūta uvāca |
iti śrutvātha śailādirvidhiputravacaḥ śubham |
pratyuvāca prasannātmā smṛtvā śivapadāmbujam ||
3.24.11
nandīśvara uvāca |
ekadā nirjarāḥ sarve vāsavādyā munīśvara |
vṛtrāsurasahāyaiśca daityairāsanparājitāḥ ||
3.24.12
svāni svāni varāstrāṇi dadhīcasyāśrame'khilāḥ |
niḥkṣipya sahasā sadyo'bhavan devāḥ parājitāḥ ||
3.24.13
tadā sarve surāḥ sendrā vadhyamānāstatharṣayaḥ |
brahmalokaṃ gatāḥ śīghraṃ procuḥ svaṃ vyasanaṃ ca tat ||
3.24.14
tacchrutvā devavacanaṃ brahmā lokapitāmahaḥ |
sarvaṃ śaśaṃsa tattvena tvaṣṭuścaiva cikīrṣitam ||
3.24.15
bhavadvadhārthaṃ janitastvaṣṭrāyaṃ tapasā surāḥ |
vṛtro nāma mahātejāḥ sarvadaityādhipo mahān ||
3.24.16
atha prayatnaḥ kriyatāṃ bhavedasya vadho yathā |
tatropāyaṃ śṛṇu prājña dharmahetorvadāmi te ||
3.24.17
mahāmunirdadhīciryaḥ sa tapasvī jitendriyaḥ |
lebhe śivaṃ samārādhya vajrāsthitvavaraṃ purā ||
3.24.18
tasyāsthīnyeva yācadhvaṃ sa dāsyati na saṃśayaḥ |
nirmāya tairdaṇḍavajraṃ vṛtraṃ jahi na saṃśayaḥ ||
3.24.19
nandīśvara uvāca |
tacchrutvā brahmavacanaṃ śakro gurusamanvitaḥ |
āgacchatsāmaraḥ sadyo dadhīcyāśramamuttamam ||
3.24.20
dṛṣṭvā tatra muniṃ śakraḥ suvarcānvitamādarāt |
nanāma sāñjalirnamraḥ saguruḥ sāmaraśca tam ||
3.24.21
tadabhiprāyamājñāya sa munirbudhasattamaḥ |
svapatnīṃ preṣayāmāsa suvarcāṃ svāśramāntaram ||
3.24.22
tatassa devarājaśca sāmaraḥ svārthasādhakaḥ |
arthaśāstraparo bhūtvā munīśaṃ vākyamabravīt ||
3.24.23
śakra uvāca |
tvaṣṭrā viprakṛtāḥ sarve vayaṃ devāstatharṣayaḥ |
śaraṇyaṃ tvāṃ mahāśaivaṃ dātāraṃ śaraṇaṃ gatāḥ ||
3.24.24
svāsthīni dehi no vipra mahāvajramayāni hi |
asthnā te svapaviṃ kṛtvā haniṣyāmi suradruham ||
3.24.25
ityuktastena sa muniḥ paropakaraṇe rataḥ |
dhyātvā śivaṃ svanāthaṃ hi visasarja kalevaram ||
3.24.26
brahmalokaṃ gataḥ sadyaḥ sa munirdhvastabandhanaḥ |
puṣpavṛṣṭirabhūttatra sarve vismayamāgatāḥ ||
3.24.27
atha gāṃ surabhiṃ śakra āhūyāśu hyalehayat |
astranirmitaye tvāṣṭraṃ nirdideśa tadasthibhiḥ ||
3.24.28
viśvakarmā tadājñaptaścaklṛpe'strāṇi kṛtsnaśaḥ |
tadasthibhirvajramayaiḥ sudṛḍhaiḥ śivavarcasā ||
3.24.29
tasya vaṃśodbhavairvajraṃ śaro brahmaśirastathā |
anyāsthibhirbahūni svaparāṇyastrāṇi nirmame ||
3.24.30
tamindro vajramudyamya varddhitaḥ śivavarcasā |
vṛtramabhyadravatkruddho mune rudra ivāntakam ||
3.24.31
tataḥ śakraḥ susannaddhastena vajreṇa sa drutam |
uccakarta śiro vārtraṃ giriśṛṅgamivaujasā ||
3.24.32
tadā samutsavastāta babhūva tridivaukasām |
tuṣṭuvurnirjarāḥ śakraṃ petuḥ kusumavṛṣṭayaḥ ||
3.24.33
iti te kathitaṃ tāta prasaṅgāccaritaṃ tvidam |
pippalādāvatāraṃ me śṛṇu śambhormahādarāt ||
3.24.34
suvarcā sā muneḥ patnī dadhīcasya mahātmanaḥ |
yayau svamāśramābhyantastadājñaptā pativratā ||
3.24.35
āgatya tatra sā dṛṣṭvā na patiṃ svaṃ tapasvinī |
gṛhakāryaṃ ca sā kṛtvākhilaṃ patinideśataḥ ||
3.24.36
ājagāma punastatra paśyantī bahvaśobhanam |
devāṃśca tānmuniśreṣṭha suvarcā vismitābhavat ||
3.24.37
jñātvā ca tatsarvamidaṃ surāṇāṃ kṛtyaṃ tadānīṃ ca cukopa sādhvī |
dadau tadā śāpamatīva ruṣṭā teṣāṃ suvarcā ṛṣivaryabhāryā ||
3.24.38
suvarcovāca |
aho surā druṣṭatarāśca sarve svakāryadakṣā hyabudhāśca lubdhāḥ |
tasmācca sarve paśavo bhavantu sendrāśca me'dyaprabhṛtītyuvāca ||
3.24.39
evaṃ śāpaṃ dadau teṣāṃ surāṇāṃ sā tapasvinī |
saśakrāṇāṃ ca sarveṣāṃ suvarcā munikāminī ||
3.24.40
anugantuṃ paterlokamathecchatsā pativratā |
citāṃ cakre samedhobhiḥ supavitrairmanasvinī ||
3.24.41
tato nabhogirā prāha suvarcāṃ tāṃ munipriyām |
āśvāsayantī giriśapreritā sukhadāyinī ||
3.24.42
ākāśavāṇyuvāca |
sāhasaṃ na kuru prājñe śṛṇu me paramaṃ vacaḥ |
munitejastvadudare tadutpādaya yatnataḥ ||
3.24.43
tataḥ svābhīṣṭacaraṇaṃ devi kartuṃ tvamarhasi |
sagarbhā na dahed gātramiti brahmanideśanam ||
3.24.44
nandīśvara uvāca |
ityuktvā sā nabhovāṇī virarāma munīśvara |
tāṃ śrutvā sā muneḥ patnī vismitābhūtkṣaṇaṃ ca sā ||
3.24.45
suvarcā sā mahāsādhvī patilokamabhīpsatī |
upaviśyāśmanā bhūyaḥ sodaraṃ vidadāra ha ||
3.24.46
nirgato jaṭharāttasyā garbho munivarasya saḥ |
mahādivyatanurdīpto bhāsayaṃśca diśo daśa ||
3.24.47
sākṣād rudrāvatāro'sau dadhīcivaratejasaḥ |
prādurbhūtaḥ svayaṃ tāta svalīlākaraṇe kṣamaḥ ||
3.24.48
taṃ dṛṣṭvā svasutaṃ divyaṃ svarūpaṃ munikāminī |
suvarcājñāya manasā sākṣād rudrāvatārakam ||
3.24.49
prahṛṣṭābhūnmahāsādhvī praṇamyāśu nunāva sā |
svahṛdi sthāpayāmāsa tatsvarūpaṃ munīśvara ||
3.24.50
suvarcā tanayaṃ taṃ ca prahasya vimalekṣaṇā |
jananī prāha suprītyā patilokamabhīpsatī ||
3.24.51
suvarcovāca |
he tāta parameśāna ciraṃ tiṣṭhāsya sannidhau |
aśvatthasya mahābhāga sarveṣāṃ sukhado bhaveḥ ||
3.24.52
māmājñāpaya suprītyā patilokāya cādhunā |
tatrasthāhaṃ ca patinā tvāṃ dhyāye rudrarūpiṇam ||
3.24.53
nandīśvara uvāca |
ityevaṃ sā babhāṣe'tha suvarcā tanayaṃ prati |
patimanvagamatsādhvī parameṇa samādhinā ||
3.24.54
evaṃ dadhīcapatnī sā patinā saṅgatā mune |
śivalokaṃ samāsādya siṣeve śaṅkaraṃ mudā ||
3.24.55
etasminnantare devāḥ sendrāśca munibhiḥ saha |
tatrājagmustvarā tāta āhūtā iva harṣitāḥ ||
3.24.56
harirbrahmā ca suprītyāvatīrṇaṃ śaṅkaraṃ bhuvi |
suvarcāyāṃ dadhīcādvā yayatuḥ svagaṇaiḥ saha ||
3.24.57
tatra dṛṣṭvāvatīrṇaṃ taṃ muniputratvamāgatam |
rudraṃ sarve praṇemuśca tuṣṭuvurbaddhapāṇayaḥ ||
3.24.58
tadotsavo mahānāsīddevānāṃ munisattama |
nedurdundubhayastatra nartakyo nanṛturmudā ||
3.24.59
jagurgandharvaputrāśca kinnarā vādyavādakāḥ |
vādayāmāsuramarāḥ puṣpavṛṣṭiṃ ca cakrire ||
3.24.60
dadhīceḥ pippalapiturvilasantaṃ sutaṃ ca tam |
saṃskṛtya vidhivatsarve viṣṇvādyāstuṣṭuvuḥ punaḥ ||
3.24.61
pippalādeti tannāma cakre brahmā prasannadhīḥ |
prasanno bhava deveśa ityūce hariṇā suraiḥ ||
3.24.62
ityuktvā tamanujñāya brahmā viṣṇuḥ surāstathā |
svaṃ svaṃ dhāma yayuḥ sarve vidhāya ca mahotsavam ||
3.24.63
atha rudraḥ pippalādo'śvatthamūle mahāprabhuḥ |
tatāpa suciraṃ kālaṃ lokānāṃ hitakāmyayā ||
3.24.64
itthaṃ sutapatastasya pippalādasya sammukhe |
mahākālo vyatīyāya lokacaryānusāriṇaḥ ||
3.24.64.c1
iti śrīśivamahāpurāṇe tṛtīyāyāṃ śatarudrasaṃhitāyāṃ pippalādāvatāravarṇanaṃ nāma caturviṃśo'dhyāyaḥ ||
3.24.64.p2
śrīgaṇeśāya namaḥ ||
3.24.64.p3
śrīgaurīśaṅkarābhyāṃ namaḥ ||
3.24.64.p4
śrīśivamahāpurāṇam ||
3.24.64.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit
Linked texts (1)
- Padmapurāṇa — Vyāsa, Sanskrit