Shivapurana 3.25: pañcaviṃśo'dhyāyaḥ | pippalādāvatāracaritavarṇanam
Śivapurāṇa (complete text) 3.25
- Language
- Sanskrit
Contents
- 3.25.24 — 5 parts
pañcaviṃśo'dhyāyaḥ | pippalādāvatāracaritavarṇanam
3.25.1
nandīśvara uvāca |
atha loke vyavasthāya dharmasya sthāpanecchayā |
mahālīlāṃ cakāreśastāmaho sanmune śṛṇu ||
3.25.2
ekadā puṣpabhadrāyāṃ snātuṃ gacchanmunīśvaraḥ |
dadarśa padmāṃ yuvatīṃ śivāṃśāṃ sumanoharām ||
3.25.3
tallipsustatpituḥ sthānamanaraṇyasya bhūpateḥ |
jagāma bhuvanācārī lokatattvavicakṣaṇaḥ ||
3.25.4
rājā narāṇāṃ taṃ dṛṣṭvā praṇamya ca bhayākulaḥ |
madhuparkādikaṃ dattvā pūjayāmāsa bhaktitaḥ ||
3.25.5
snehātsarvaṃ gṛhītvā sa yayāce kanyakāṃ muniḥ |
maunī babhūva nṛpatiḥ kiñcinnirvaktumakṣamaḥ ||
3.25.6
muniḥ provāca nṛpatiṃ kanyāṃ me dehi bhaktitaḥ |
anyathā bhasmasātsarvaṃ kariṣye'haṃ tvayā saha ||
3.25.7
atho babhūvurācchannāḥ sarve rājajanāstadā |
tejasā pippalādasya dādhīcasya mahāmune ||
3.25.8
atha rājā mahābhīto vilapya ca muhurmuhuḥ |
kanyāmalaṅkṛtāṃ padmāṃ vṛddhāya munaye dadau ||
3.25.9
padmāṃ vivāhya sa muniḥ śivāṃśāmbhūpateḥ sutām |
pippalādo gṛhītvā tāṃ muditaḥ svāśramaṃ yayau ||
3.25.10
tatra gatvā munivaro vayasā jarjaro'dhikaḥ |
uvāsa nāryā sa tayā tapasvī nātilampaṭaḥ ||
3.25.11
atho'naraṇyakanyā sā siṣeve bhaktito munim |
karmaṇā manasā vācā lakṣmīrnārāyaṇaṃ yathā ||
3.25.12
itthaṃ sa pippalādo hi śivāṃśo munisattamaḥ |
reme tayā yuvatyā ca yuvābhūya svalīlayā ||
3.25.13
daśa putrā mahātmāno babhūvuḥ sutapasvinaḥ |
muneḥ pituḥ samāḥ sarve padmāyāḥ sukhavarddhanāḥ ||
3.25.14
evaṃ līlāvatāro hi śaṅkarasya mahāprabhoḥ |
pippalādo munivaro nānālīlākaraḥ prabhuḥ ||
3.25.15
yena datto varaḥ prītyā lokebhyo hi dayālunā |
dṛṣṭvā loke śaneḥ pīḍāṃ sarveṣāmanivāriṇīm ||
3.25.16
ṣoḍaśābdāvadhi nṛṇāṃ janmato na bhavecca sā |
tathā ca śivabhaktānāṃ satyametaddhi me vacaḥ ||
3.25.17
athānādṛtya madvākyaṃ kuryātpīḍāṃ śaniḥ kvacit |
teṣāṃ nṛṇāṃ tadā sa syādbhasmasānna hi saṃśayaḥ ||
3.25.18
iti tadbhayatastāta vikṛto'pi śanaiścaraḥ |
teṣāṃ na kurute pīḍāṃ kadācid grahasattamaḥ ||
3.25.19
iti līlāmanuṣyasya pippalādasya sanmune |
kathitaṃ sucaritraṃ te sarvakāmaphalapradam ||
3.25.20
gādhiśca kauśikaścaiva pippalādo mahāmuniḥ |
śanaiścarakṛtāṃ pīḍāṃ nāśayanti smṛtāstrayaḥ ||
3.25.21
pippalādasya caritaṃ padmācaritasaṃyutam |
yaḥ paṭhecchṛṇuyādvāpi subhaktyā bhuvi mānavaḥ ||
3.25.22
śanipīḍāvināśārthametaccaritamuttamam |
yaḥ paṭhecchṛṇuyādvāpi sarvānkāmānavāpnuyāt ||
3.25.23
dhanyo munivaro jñānī mahāśaivaḥ satāṃ priyaḥ |
asya putro maheśānaḥ pippalādākhya ātmavān ||
3.25.24
idamākhyānamanaghaṃ svargyaṃ kugrahadoṣahṛt |
sarvakāmapradaṃ tāta śivabhaktivivarddhanam ||
3.25.24.c1
iti śrīśivamahāpurāṇe tṛtīyāyāṃ śatarudrasaṃhitāyāṃ pippalādāvatāracaritavarṇanaṃ nāma pañcaviṃśo'dhyāyaḥ ||
3.25.24.p2
śrīgaṇeśāya namaḥ ||
3.25.24.p3
śrīgaurīśaṅkarābhyāṃ namaḥ ||
3.25.24.p4
śrīśivamahāpurāṇam ||
3.25.24.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit