[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 3.26 # Shivapurana 3.26: ṣaḍviṃśo'dhyāyaḥ | vaiśyanāthāhvayaśivāvatāravarṇanam Śivapurāṇa (complete text) 3.26 - **Language:** Sanskrit ## Contents - [3.26.65](https://indike.org/pramana/in.purana.siva*complete-2.3.26.65) — 5 parts ### ṣaḍviṃśo'dhyāyaḥ | vaiśyanāthāhvayaśivāvatāravarṇanam ### [3.26.1](https://indike.org/pramana/in.purana.siva*complete-2.3.26.1) nandīśvara uvāca | śṛṇu tāta pravakṣyāmi śivasya paramātmanaḥ | avatāraṃ parānandaṃ vaiśyanāthāhvayaṃ mune || ### [3.26.2](https://indike.org/pramana/in.purana.siva*complete-2.3.26.2) nandigrāme purā kācinmahānandeti viśrutā | babhūva vāravanitā śivabhaktā susundarī || ### [3.26.3](https://indike.org/pramana/in.purana.siva*complete-2.3.26.3) mahāvibhavasampannā sudhanāḍhyā mahojjvalā | nānāratnaparicchinnaśṛṅgārarasanirbharā || ### [3.26.4](https://indike.org/pramana/in.purana.siva*complete-2.3.26.4) sarvasaṅgītavidyāsu nipuṇātimanoharā | tasyā geyena hṛṣyanti rājñyo rājāna eva ca || ### [3.26.5](https://indike.org/pramana/in.purana.siva*complete-2.3.26.5) samānarca sadā sāmbaṃ sā veśyā śaṅkaraṃ mudā | śivanāmajapāsaktā bhasmarudrākṣabhūṣaṇā || ### [3.26.6](https://indike.org/pramana/in.purana.siva*complete-2.3.26.6) śivaṃ sampūjya sā nityaṃ sevantī jagadīśvaram | nanarta parayā bhaktyā gāyantī śivasadyaśaḥ || ### [3.26.7](https://indike.org/pramana/in.purana.siva*complete-2.3.26.7) rudrākṣairbhūṣayitvaikaṃ markaṭaṃ caiva kukkuṭam | karatālaiśca gītaiśca sadā nartayati sma sā || ### [3.26.8](https://indike.org/pramana/in.purana.siva*complete-2.3.26.8) nṛtyamānau ca tau dṛṣṭvā śivabhaktiratā ca sā | veśyā sma vihasatyuccaiḥ premṇā sarvasakhīyutā || ### [3.26.9](https://indike.org/pramana/in.purana.siva*complete-2.3.26.9) rudrākṣaiḥ kṛtakeyūrakarṇābharaṇamaṇḍanā | markaṭaḥ śikṣayā tasyāḥ puro nṛtyati bālavat || ### [3.26.10](https://indike.org/pramana/in.purana.siva*complete-2.3.26.10) śikhāsambaddharudrākṣaḥ kukkuṭaḥ kapinā saha | nityaṃ nanarta nṛtyajñaḥ paśyatāṃ hitamāvahan || ### [3.26.11](https://indike.org/pramana/in.purana.siva*complete-2.3.26.11) evaṃ sā kurvatī veśyā kautukaṃ paramādarāt | śivabhaktiratā nityaṃ mahānandabharābhavat || ### [3.26.12](https://indike.org/pramana/in.purana.siva*complete-2.3.26.12) śivabhaktiṃ prakurvantyā veśyāyā munisattama | bahukālo vyatīyāya tasyāḥ paramasaukhyataḥ || ### [3.26.13](https://indike.org/pramana/in.purana.siva*complete-2.3.26.13) ekadā ca gṛhe tasyā vaiśyo bhūtvā śivaḥ svayam | parīkṣituṃ ca tadbhāvamājagāma śubho vratī || ### [3.26.14](https://indike.org/pramana/in.purana.siva*complete-2.3.26.14) tripuṇḍravilasadbhālo rudrākṣābharaṇaḥ kṛtī | śivanāmajapāsakto jaṭilaḥ śaivaveṣabhṛt || ### [3.26.15](https://indike.org/pramana/in.purana.siva*complete-2.3.26.15) sa bibhradbhasmanicayaṃ prakoṣṭhe varakaṅkaṇam | mahāratnaparistīrṇaṃ rājate parakautukī || ### [3.26.16](https://indike.org/pramana/in.purana.siva*complete-2.3.26.16) tamāgataṃ susampūjya sā veśyā parayā mudā | svasthāne sādaraṃ vaiśyaṃ sundarī hi nyaveśayat || ### [3.26.17](https://indike.org/pramana/in.purana.siva*complete-2.3.26.17) tatprakoṣṭhe varaṃ vīkṣya kaṅkaṇaṃ sumanoharam | tasmiñjātaspṛhā sā ca taṃ provāca suvismitā || ### [3.26.18](https://indike.org/pramana/in.purana.siva*complete-2.3.26.18) mahānandovāca | mahāratnamayaścāyaṃ kaṅkaṇastvatkare sthitaḥ | mano harati me sadyo divyastrībhūṣaṇocitaḥ || ### [3.26.19](https://indike.org/pramana/in.purana.siva*complete-2.3.26.19) nandīśvara uvāca | iti tāṃ navaratnāḍhye saspṛhāṃ karabhūṣaṇe | vīkṣyodāramatirvaiśyaḥ sasmitaṃ samabhāṣata || ### [3.26.20](https://indike.org/pramana/in.purana.siva*complete-2.3.26.20) vaiśyanātha uvāca | asmin ratnavare divye saspṛhaṃ yadi te manaḥ | tvamevādhatsva suprītyā maulyamasya dadāsi kim || ### [3.26.21](https://indike.org/pramana/in.purana.siva*complete-2.3.26.21) veśyovāca | vayaṃ hi svairacāriṇyo veśyāstu na pativratāḥ | asmatkulocito dharmo vyabhicāro na saṃśayaḥ || ### [3.26.22](https://indike.org/pramana/in.purana.siva*complete-2.3.26.22) yadyetadakhilaṃ cittaṃ gṛhṇāti karabhūṣaṇam | dinatrayamahorātraṃ patnī tava bhavāmyaham || ### [3.26.23](https://indike.org/pramana/in.purana.siva*complete-2.3.26.23) vaiśya uvāca | tathāstu yadi te satyaṃ vacanaṃ vīravallabhe | dadāmi ratnavalayaṃ trirātraṃ bhava me vadhūḥ || ### [3.26.24](https://indike.org/pramana/in.purana.siva*complete-2.3.26.24) etasminvyavahāre tu pramāṇaṃ śaśibhāskarau | trivāraṃ satyamityuktvā hṛdayaṃ me spṛśa priye || ### [3.26.25](https://indike.org/pramana/in.purana.siva*complete-2.3.26.25) veśyovāca | dinatrayamahorātraṃ patnī bhūtvā tava prabho | sahadharmaṃ carāmīti satyaṃ satyaṃ na saṃśayaḥ || ### [3.26.26](https://indike.org/pramana/in.purana.siva*complete-2.3.26.26) nandīśvara uvāca | ityuktvā hi mahānandā trivāraṃ śaśibhāskarau | pramāṇīkṛtya suprītyā sā tad hṛdayamaspṛśat || ### [3.26.27](https://indike.org/pramana/in.purana.siva*complete-2.3.26.27) atha tasyai sa vaiśyastu pradattvā ratnakaṅkaṇam | liṅgaṃ ratnamayaṃ tasya haste dattvedamabravīt || ### [3.26.28](https://indike.org/pramana/in.purana.siva*complete-2.3.26.28) vaiśyanātha uvāca | idaṃ ratnamayaṃ liṅgaṃ śaivaṃ matprāṇadavallabham | rakṣaṇīyaṃ tvayā kānte gopanīyaṃ prayatnataḥ || ### [3.26.29](https://indike.org/pramana/in.purana.siva*complete-2.3.26.29) nandīśvara uvāca | evamastviti sā procya liṅgamādāya ratnajam | nāṭyamaṇḍapikāmadhye nidhāya prāviśad gṛham || ### [3.26.30](https://indike.org/pramana/in.purana.siva*complete-2.3.26.30) sā tena saṅgatā rātrau vaiśyena viṭadharmiṇā | sukhaṃ suṣvāpa paryaṅke mṛdutalpopaśobhite || ### [3.26.31](https://indike.org/pramana/in.purana.siva*complete-2.3.26.31) tato niśīthasamaye mune vaiśyapatīcchayā | akasmādutthitā vāṇī nṛtyamaṇḍapikāntare || ### [3.26.32](https://indike.org/pramana/in.purana.siva*complete-2.3.26.32) mahāprajvalito vahniḥ susamīrasahāyavān | nāṭyamaṇḍapikāṃ tāta tāmeva sahasāvṛṇot || ### [3.26.33](https://indike.org/pramana/in.purana.siva*complete-2.3.26.33) maṇḍape dahyamāne tu sahasotthāya sambhramāt | markaṭaṃ mocayāmāsa sā veśyā tatra bandhanāt || ### [3.26.34](https://indike.org/pramana/in.purana.siva*complete-2.3.26.34) sa markaṭo muktabandhaḥ kukkuṭena sahāmunā | bhiyā dūraṃ hi dudrāva vidhūyāgnikaṇānbahūn || ### [3.26.35](https://indike.org/pramana/in.purana.siva*complete-2.3.26.35) stambhena saha nirdagdhaṃ talliṅgaṃ śakalīkṛtam | dṛṣṭvā veśyā sa vaiśyaśca durantaṃ duḥkhamāpatuḥ || ### [3.26.36](https://indike.org/pramana/in.purana.siva*complete-2.3.26.36) dṛṣṭvā hyātmasamaṃ liṅgaṃ dagdhaṃ vaiśyapatistadā | jñātuṃ tadbhāvamantaḥsthaṃ maraṇāya matiṃ dadhe || ### [3.26.37](https://indike.org/pramana/in.purana.siva*complete-2.3.26.37) niviśye'titarāṃ khedādvaiśyastāmāha duḥkhitām | nānālīlo maheśānaḥ kautukānnaradehavān || ### [3.26.38](https://indike.org/pramana/in.purana.siva*complete-2.3.26.38) vaiśyapatiruvāca | śivaliṅge tu nirbhinne dagdhe mahatprāṇavallabhe | satyaṃ vacmi na sandeho nāhaṃ jīvitumutsahe || ### [3.26.39](https://indike.org/pramana/in.purana.siva*complete-2.3.26.39) citāṃ kāraya me bhadre svabhṛtyaistvaṃ varairlaghu | śive manaḥ samāveśya pravekṣyāmi hutāśanam || ### [3.26.40](https://indike.org/pramana/in.purana.siva*complete-2.3.26.40) yadi brahmendraviṣṇvādyā vārayeyuḥ sametya mām | tathāpyasmin kṣaṇe bhadre praviśāmi tyajāmyasūn || ### [3.26.41](https://indike.org/pramana/in.purana.siva*complete-2.3.26.41) nandīśvara uvāca | tamevaṃ dṛḍhanirbandhaṃ sā vijñāya suduḥkhitā | svabhṛtyaiḥ kārayāmāsa citāṃ svabhavanād bahiḥ || ### [3.26.42](https://indike.org/pramana/in.purana.siva*complete-2.3.26.42) tataḥ sa vaiśyaḥ śiva eka eva pradakṣiṇīkṛtya samiddhamagnim | viveśa paśyatsu nareṣu dhīraḥ sukautukī saṅgatibhāvamicchuḥ || ### [3.26.43](https://indike.org/pramana/in.purana.siva*complete-2.3.26.43) dṛṣṭvā sā tadgatiṃ veśyā mahānandātivismitā | anutāpaṃ ca yuvatī prapede munisattama || ### [3.26.44](https://indike.org/pramana/in.purana.siva*complete-2.3.26.44) atha sā duḥkhitā veśyā smṛtvā dharma sunirmalam | sarvānbandhujanānvīkṣya babhāṣe karuṇaṃ vacaḥ || ### [3.26.45](https://indike.org/pramana/in.purana.siva*complete-2.3.26.45) mahānandovāca | ratnakaṅkaṇamādāya mayā satyamudāhṛtam | dinatrayamahaṃ patnī vaiśyasyāmuṣya sammatā || ### [3.26.46](https://indike.org/pramana/in.purana.siva*complete-2.3.26.46) karmaṇā matkṛtenāyaṃ mṛto vaiśyaḥ śivavratī | tasmādahaṃ pravekṣyāmi sahānena hutāśanam || ### [3.26.47](https://indike.org/pramana/in.purana.siva*complete-2.3.26.47) svadharmacāriṇītyuktamācāryaiḥ satyavādibhiḥ | evaṃ kṛte mama prītyā satyaṃ mayi na naśyatu || ### [3.26.48](https://indike.org/pramana/in.purana.siva*complete-2.3.26.48) satyāśrayaḥ paro dharmaḥ satyena paramā gatiḥ | satyena svargamokṣau ca satye sarvaṃ pratiṣṭhitam || ### [3.26.49](https://indike.org/pramana/in.purana.siva*complete-2.3.26.49) nandīśvara uvāca | iti sā dṛḍhanirbandhā vāryamāṇāpi bandhubhiḥ | satyalopabhiyā nārī prāṇāṃstyaktuṃ mano dadhe || ### [3.26.50](https://indike.org/pramana/in.purana.siva*complete-2.3.26.50) sarvasvaṃ dvijamukhyebhyo dattvā dhyātvā sadāśivam | tamagniṃ triḥparikramya praveśābhimukhī hyabhūt || ### [3.26.51](https://indike.org/pramana/in.purana.siva*complete-2.3.26.51) tāṃ patantīṃ samiddhe'gnau svapadārpitamānasām | vārayāmāsa viśvātmā prādurbhūtaḥ sa vai śivaḥ || ### [3.26.52](https://indike.org/pramana/in.purana.siva*complete-2.3.26.52) sā taṃ vilokyākhiladevadevaṃ trilocanaṃ candrakalāvataṃsam | śaśāṅkasūryānalakoṭibhāsaṃ stabdheva bhīteva tathaiva tasthau || ### [3.26.53](https://indike.org/pramana/in.purana.siva*complete-2.3.26.53) tāṃ vihvalāṃ suvitrastāṃ vepamānāṃ jaḍīkṛtām | samāśvāsya galadbāṣpāṃ karau dhṛtvābravīdvacaḥ || ### [3.26.54](https://indike.org/pramana/in.purana.siva*complete-2.3.26.54) śiva uvāca | satyaṃ dharmaṃ ca dhairyaṃ ca bhaktiṃ ca mayi niścalām | parīkṣituṃ tvatsakāśaṃ vaiśyo bhūtvāhamāgataḥ || ### [3.26.55](https://indike.org/pramana/in.purana.siva*complete-2.3.26.55) māyayāgniṃ samuddīpya dagdhaṃ te nāṭyamaṇḍapam | dagdhaṃ kṛtvā ratnaliṅgaṃ praviṣṭo'haṃ hutāśanam || ### [3.26.56](https://indike.org/pramana/in.purana.siva*complete-2.3.26.56) sā tvaṃ satyamanusmṛtya praviṣṭāgniṃ mayā sahā | ataste sampradāsyāmi bhogāṃstridaśadurlabhān || ### [3.26.57](https://indike.org/pramana/in.purana.siva*complete-2.3.26.57) yadyadicchasi suśroṇi tadeva hi dadāmi te | tvadbhaktyāhaṃ prasanno'smi tavādeyaṃ na vidyate || ### [3.26.58](https://indike.org/pramana/in.purana.siva*complete-2.3.26.58) nandīśvara uvāca | iti bruvati gaurīśe śaṅkare bhaktavatsale | mahānandā ca sā veśyā śaṅkaraṃ pratyabhāṣata || ### [3.26.59](https://indike.org/pramana/in.purana.siva*complete-2.3.26.59) veśyovāca | na me vāñchāsti bhogeṣu bhūmau svarge rasātale | tava pādāmbujasparśādanyatkiñcinna kāmaye || ### [3.26.60](https://indike.org/pramana/in.purana.siva*complete-2.3.26.60) ye me bhṛtyāśca dāsyaśca ye cānye mama bāndhavāḥ | sarve tvaddarśanaparāstvayi sannyastavṛttayaḥ || ### [3.26.61](https://indike.org/pramana/in.purana.siva*complete-2.3.26.61) sarvānetānmayā sārdhaṃ ninīyātmaparaṃ padam | punarjanmabhayaṃ ghoraṃ vimocaya namo'stu te || ### [3.26.62](https://indike.org/pramana/in.purana.siva*complete-2.3.26.62) nandīśvara uvāca | tataḥ sa tasyā vacanaṃ pratinandya maheśvaraḥ | tāḥ sarvāśca tayā sārdhaṃ nināya svaṃ paraṃ padam || ### [3.26.63](https://indike.org/pramana/in.purana.siva*complete-2.3.26.63) vaiśyanāthāvatāraste varṇitaḥ paramo mayā | mahānandāsukhakaro bhaktānandapradaḥ sadā || ### [3.26.64](https://indike.org/pramana/in.purana.siva*complete-2.3.26.64) idaṃ caritraṃ paramaṃ pavitraṃ satāṃ ca sarvapradamāśu divyam | śivāvatārasya viśāmpatermahā-nandāmahāsaukhyakaraṃ vicitram || ### [3.26.65](https://indike.org/pramana/in.purana.siva*complete-2.3.26.65) idaṃ yaḥ śṛṇuyādbhaktyā śrāvayedvā samāhitaḥ | cyavate na svadharmātsa paratra labhate gatim || ### [3.26.65.c1](https://indike.org/pramana/in.purana.siva*complete-2.3.26.65.c1) iti śrīśivamahāpurāṇe tṛtīyāyāṃ śatarudrasaṃhitāyāṃ vaiśyanāthāhvayaśivāvatāravarṇanaṃ nāma ṣaḍviṃśo'dhyāyaḥ || ### [3.26.65.p2](https://indike.org/pramana/in.purana.siva*complete-2.3.26.65.p2) śrīgaṇeśāya namaḥ || ### [3.26.65.p3](https://indike.org/pramana/in.purana.siva*complete-2.3.26.65.p3) śrīgaurīśaṅkarābhyāṃ namaḥ || ### [3.26.65.p4](https://indike.org/pramana/in.purana.siva*complete-2.3.26.65.p4) śrīśivamahāpurāṇam || ### [3.26.65.p5](https://indike.org/pramana/in.purana.siva*complete-2.3.26.65.p5) tṛtīyāyāṃ śatarudrasaṃhitāyāṃ ## Other recensions (1) - [Śivapurāṇa (complete text)](https://indike.org/pramana/in.purana.siva*complete.3.26.1) — Sanskrit ## Linked texts (5) - [Śaṅkarasaṃhitā](https://indike.org/pramana/in.purana.upa.saiva.sankarasamhita.54.22) — Vyāsa, Sanskrit - [Brāhmī Saṃhitā](https://indike.org/pramana/in.purana.brahmisamhita.21.26) — Sanskrit - [Brahmisamhita (gurumandalseries1962)](https://indike.org/pramana/in.sampradaya.vaisnava.pancaratra.brahmisamhita*gurumandalseries1962.21.26) — Sanskrit - [Kūrmapurāṇa (Ananta Gokhale)](https://indike.org/pramana/in.purana.kurmapurana.14.p5) — Ananta Gokhale, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.9.p12) — Ativīrarāma Pāṇṭiyar, Sanskrit --- Source: [https://indike.org/pramana/in.purana.siva*complete-2.3.26](https://indike.org/pramana/in.purana.siva*complete-2.3.26) · Pramāṇa