Shivapurana 3.28: aṣṭāviṃśo'dhyāyaḥ | yatināthabrahmahaṃsāhvayaśivāvatāracaritavarṇanam
Śivapurāṇa (complete text) 3.28
- Language
- Sanskrit
Contents
- 3.28.41 — 5 parts
aṣṭāviṃśo'dhyāyaḥ | yatināthabrahmahaṃsāhvayaśivāvatāracaritavarṇanam
3.28.1
nandīśvara uvāca |
śṛṇu prājña pravakṣyāmi śivasya paramātmanaḥ |
avatāraṃ parānandaṃ yatināthāhvayaṃ mune ||
3.28.2
arbudācalasaṃjñe tu parvate bhillavaṃśajaḥ |
āhukaśca tadabhyāśe vasati sma munīśvara ||
3.28.3
tatpatnī hyāhukā nāma babhūva kila suvratā |
ubhāvapi mahāśaivāvāstāṃ tau śivapūjakau ||
3.28.4
kasmiṃścitsamaye bhillaḥ śivabhaktirataḥ sadā |
āhārārthaṃ svapatnyāśca sudūraṃ sa gato mune ||
3.28.5
etasminnantare tatra gehe bhillasya śaṅkaraḥ |
bhūtvā yativapuḥ sāyaṃ parīkṣārthaṃ samāyayau ||
3.28.6
tasminnavasare tatrājagāma sa gṛhādhipaḥ |
pūjanaṃ ca yatīśasya cakāra premataḥ sudhīḥ ||
3.28.7
tadbhāvasya parīkṣārthaṃ yatirūpaḥ sa śaṅkaraḥ |
mahālīlātaraḥ prītyā bhītaḥ provāca dīnagīḥ ||
3.28.8
yatinātha uvāca |
adya sthalaṃ nivāsārthaṃ dehi me prātareva hi |
yāsyāmi sarvathā bhilla svasti syāttava sarvadā ||
3.28.9
bhilla uvāca |
satyaṃ proktaṃ tvayā svāmin śṛṇu madvacanaṃ ca te |
ati svalpaṃ sthalaṃ me hi syānnivāsaḥ kathaṃ tava ||
3.28.10
nandīśvara uvāca |
ityuktaḥ sa yatistena gamanāya matiṃ dadhe |
tāvadbhillyā vacaḥ proktaṃ svāminaṃ saṃvicārya vai ||
3.28.11
bhillyuvāca |
svāmindehi yateḥ sthānaṃ vimukhaṃ kuru mātithim |
gṛhadharmaṃ vicārya tvamanyathā dharmasaṅkṣayaḥ ||
3.28.12
sthīyatāṃ te gṛhābhyantaḥ sukhena yatinā saha |
ahaṃ bahiḥ sthitiṃ kuryāmāyudhāni bṛhantyapi ||
3.28.13
nandīśvara uvāca |
tasyāstadvacanaṃ śrutvā bhillyā dharmānvitaṃ śivam |
svapatnyā manasā tena bhillena ca vicāritam ||
3.28.14
striyaṃ bahiśca niṣkāsya kathaṃ stheyaṃ mayā gṛhe |
yateranyatra gamanamadharmakaramātmanaḥ ||
3.28.15
dvayamapyucitaṃ naiva sarvathā gṛhamedhinaḥ |
yadbhāvi tadbhavedeva mayā stheyaṃ gṛhād bahiḥ ||
3.28.16
ityāgrahaṃ tadā kṛtvā gṛhāntaḥ sthāpya tau mudā |
svāyudhāni ca saṃsthāpya bhillo'tiṣṭhad gṛhād bahiḥ ||
3.28.17
rātrau taṃ paśavaḥ krūrāḥ hiṃsakāḥ samapīḍayan |
tenāpi ca yathāśakti kṛto yatno mahāṃstadā ||
3.28.18
evaṃ yatnaṃ prakurvāṇaḥ sa bhillo balavānapi |
prārabdhātpreritairhiṃsrairbalādāsīcca bhakṣitaḥ ||
3.28.19
prātarutthāya sa yatirdṛṣṭvā hiṃsraiśca bhakṣitam |
bhillaṃ vanecaraṃ taṃ vai duḥkhito'bhūdatīva hi ||
3.28.20
dukhitaṃ taṃ yatiṃ dṛṣṭvā bhillī sā duḥkhitāpi hi |
dhairyātsvaduḥkhaṃ saṃhṛtya vacanaṃ cedamabravīt ||
3.28.21
bhillyuvāca |
kimarthaṃ kriyate duḥkhaṃ bhadraṃ jātaṃ yate'dhunā |
dhanyo'yaṃ kṛtakṛtyaśca yajjāto mṛtyurīdṛśaḥ ||
3.28.22
ahaṃ cainaṃ gamiṣyāmi bhasma bhūtvānale yate |
citāṃ kāraya suprītyā strīṇāṃ dharmaḥ sanātanaḥ ||
3.28.23
iti tadvacanaṃ śrutvā hitaṃ matvā svayaṃ yatiḥ |
citāṃ vyaracayatsā hi praviveśa svadharmataḥ ||
3.28.24
etasminnantare sākṣātpuraḥ prādurabhūcchivaḥ |
dhanye dhanye iti prītyā praśaṃsastāṃ haro'bravīt ||
3.28.25
hara uvāca |
varaṃ brūhi prasanno'smi tvadācaraṇato'naghe |
tavādeyaṃ na vai kiñcid vaśyo'haṃ te viśeṣataḥ ||
3.28.26
nandīśvara uvāca |
tacchutvā śambhuvacanaṃ paramānandadāyakam |
sukhaṃ prāptaṃ viśeṣeṇa na kiñcitsmaraṇaṃ yayau ||
3.28.27
tasyāstadgatimālakṣya suprasanno haro'bhavat |
uvāca ca punaḥ śambhurvaraṃ brūhīti tāṃ prabhuḥ ||
3.28.28
śiva uvāca |
ayaṃ yatiśca madrūpo haṃsarūpo bhaviṣyati |
parajanmani vāṃ prītyā saṃyogaṃ kārayiṣyati ||
3.28.29
bhillaśca vīrasenasya naiṣadhe nagare vare |
mahānputro nalo nāma bhaviṣyati na saṃśayaḥ ||
3.28.30
tvaṃ sutā bhīmarājasya vaidarbhe nagare'naghe |
damayantī ca vikhyātā bhaviṣyasi guṇānvitā ||
3.28.31
yuvāṃ cobhau militvā ca rājabhogaṃ suvistaram |
bhuktvā muktiṃ ca yogīndrairlapsyethe durlabhāṃ dhruvam ||
3.28.32
nandīśvara uvāca |
ityuktvā ca svayaṃ śambhurliṅgarūpo'bhavattadā |
tasmānna calito dharmādacaleśa iti smṛtaḥ ||
3.28.33
sa bhilla āhukaścāpi vīrasenasuto'bhavat |
naiṣadhe nagare tāta nalanāmā mahānṛpaḥ ||
3.28.34
āhukā sā mahābhillī bhīmasya tanayābhavat |
vaidarbhe nagare rājño damayantīti viśrutā ||
3.28.35
yatināthāhvayaḥ so'pi haṃsarūpo'bhavacchivaḥ |
vivāhaṃ kārayāmāsa damayantyā nalena vai ||
3.28.36
pūrvasatkārarūpeṇa mahāpuṇyena śaṅkaraḥ |
haṃsarūpaṃ vidhāyaiva tābhyāṃ sukhamadātprabhuḥ ||
3.28.37
śivo haṃsāvatāro hi nānāvārtāvicakṣaṇaḥ |
damayantyā nalasyāpi paramānandadāyakaḥ ||
3.28.38
idaṃ caritaṃ paramaṃ pavitraṃ śivāvatārasya pavitrakīrteḥ |
yatīśasaṃjñasya mahādbhutaṃ hi haṃsāhvayasyāpi vimuktidaṃ hi ||
3.28.39
yatīśabrahmahaṃsākhyāvatāracaritaṃ śubham |
śṛṇuyācchrāvayedyo hi sa labheta parāṃ gatim ||
3.28.40
idamākhyānamanaghaṃ sarvakāmaphalapradam |
svargyaṃ yaśasyamāyuṣyaṃ bhaktivardhanamuttamam ||
3.28.41
śrutvaitaccaritaṃ śambhoryatihaṃsasvarūpayoḥ |
iha sarvasukhaṃ bhuktvā so'nte śivapuraṃ vrajet ||
3.28.41.c1
iti śrīśivamahāpurāṇe tṛtīyāyāṃ śatarudrasaṃhitāyāṃ yatināthabrahmahaṃsāhvayaśivāvatāracaritavarṇanaṃ nāmāṣṭāviṃśo'dhyāyaḥ ||
3.28.41.p2
śrīgaṇeśāya namaḥ ||
3.28.41.p3
śrīgaurīśaṅkarābhyāṃ namaḥ ||
3.28.41.p4
śrīśivamahāpurāṇam ||
3.28.41.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit