Shivapurana 3.3: tṛtīyo'dhyāyaḥ | śivasyārddhanārīśvarāvatāravarṇanam
Śivapurāṇa (complete text) 3.3
- Language
- Sanskrit
Contents
- 3.3.31 — 5 parts
tṛtīyo'dhyāyaḥ | śivasyārddhanārīśvarāvatāravarṇanam
3.3.1
nandīśvara uvāca |
śṛṇu tāta mahāprājña vidhikāmaprapūrakam |
arddhanārīnarākhyaṃ hi śivarūpamanuttamam ||
3.3.2
yadā sṛṣṭāḥ prajāḥ sarvāḥ na vyavarddhanta vedhasā |
tadā cintākulo'bhūtsa tena duḥkhena dukhitaḥ ||
3.3.3
nabhovāṇī tadābhūdvai sṛṣṭiṃ mithunajāṃ kuru |
tacchrutvā maithunīṃ sṛṣṭiṃ brahmā kartumamanyata ||
3.3.4
nārīṇāṃ kulamīśānānnirgataṃ na purā yataḥ |
tato maithunajāṃ sṛṣṭiṃ kartuṃ śeke na padmabhūḥ ||
3.3.5
prabhāveṇa vinā śambhorna jāyerannimāḥ prajāḥ |
evaṃ sañcintayanbrahmā tapaḥ karttuṃ pracakrame ||
3.3.6
śivayā parayā śaktyā saṃyuktaṃ parameśvaram |
sañcintya hṛdaye prītyā tepe sa paramaṃ tapaḥ ||
3.3.7
tīvreṇa tapasā tasya saṃyuktasya svayambhuvaḥ |
acireṇaiva kālena tutoṣa sa śivo drutam ||
3.3.8
tataḥ pūrṇacidīśasya mūrtimāviśya kāmadām |
arddhanārīnaro bhūtvā tato brahmāntikaṃ haraḥ ||
3.3.9
taṃ dṛṣṭvā śaṅkaraṃ devaṃ śaktyā paramayānvitam |
praṇamya daṇḍavadbrahmā sa tuṣṭāva kṛtāñjaliḥ ||
3.3.10
atha devo mahādevo vācā meghagabhīrayā |
sambhavāya susamprīto viśvakartā maheśvaraḥ ||
3.3.11
īśvara uvāca |
vatsa vatsa mahābhāga mama putra pitāmaha |
jñātavānasmi sarvaṃ tattattvataste manoratham ||
3.3.12
prajānāmeva vṛddhyarthaṃ tapastaptaṃ tvayādhunā |
tapasā tena tuṣṭo'smi dadāmi ca tavepsitam ||
3.3.13
ityuktvā paramodāraṃ svabhāvamadhuraṃ vacaḥ |
pṛthakcakāra vapuṣo bhāgāddevīṃ śivāṃ śivaḥ ||
3.3.14
tāṃ dṛṣṭvā paramāṃ śaktiṃ pṛthagbhūtāṃ śivāgatām |
praṇipatya vinītātmā prārthayāmāsa tāṃ vidhiḥ ||
3.3.15
brahmovāca |
devadevena sṛṣṭo'hamādau tvatpatinā śive |
prajāḥ sarvā niyuktāśca śambhunā paramātmanā ||
3.3.16
manasā nirmitāḥ sarve śive devādayo mayā |
na vṛddhimupagacchanti sṛjyamānāḥ punaḥpunaḥ ||
3.3.17
mithunaprabhavāmeva kṛtvā sṛṣṭimataḥ param |
saṃvarddhayitumicchāmi sarvā eva mama prajāḥ ||
3.3.18
na nirgataṃ purā tvatto nārīṇāṃ kulamavyayam |
tena nārīkulaṃ sraṣṭuṃ mama śaktirna vidyate ||
3.3.19
sarvāsāmeva śaktīnāṃ tvattaḥ khalu samudbhavaḥ |
tasmāttvāṃ paramāṃ śaktiṃ prārthayāmyakhileśvarīm ||
3.3.20
śive nārīkulaṃ sraṣṭuṃ śaktiṃ dehi namo'stu te |
carācarajagadvṛddhihetormātaḥ śivapriye ||
3.3.21
anyaṃ tvattaḥ prārthayāmi varaṃ ca varadeśvari |
dehi me taṃ kṛpāṃ kṛtvā jaganmātarnamo'stu te ||
3.3.22
carācaravivṛddhyarthamīśenaikena sarvage |
dakṣasya mama putrasya putrī bhava bhavāmbike ||
3.3.23
evaṃ saṃyācitā devī brahmaṇā parameśvarī |
tathāstviti vacaḥ procya tacchaktiṃ vidhaye dadau ||
3.3.24
tasmāddhi sā śivā devī śivaśaktirjaganmayī |
śaktimekāṃ bhruvormadhyātsasarjātmasamaprabhām ||
3.3.25
tāmāha prahasanprekṣya śaktiṃ devavaro haraḥ |
kṛpāsindhurmaheśāno līlākārī bhavāmbikām ||
3.3.26
śiva uvāca |
tapasārādhitā devi brahmaṇā parameṣṭhinā |
prasannā bhava suprītyā kuru tasyākhilepsitam ||
3.3.27
tāmājñāṃ parameśasya śirasā pratigṛhya sā |
brahmaṇo vacanāddevī dakṣasya duhitā'bhavat ||
3.3.28
dattvaivamatulāṃ śaktiṃ brahmaṇe sā śivā mune |` viveśa dehaṃ śambhorhi śambhuścāntardadhe prabhuḥ ||
3.3.29
tadāprabhṛti loke'sminstriyā bhāgaḥ prakalpitaḥ |
ānandaṃ prāpa sa vidhiḥ sṛṣṭirjātā ca maithunī ||
3.3.30
etatte kathitaṃ tāta śivarūpaṃ mahottamam |
arddhanārīnarārddhaṃ hi mahāmaṅgaladaṃ satām ||
3.3.31
etadākhyānamanaghaṃ yaḥ paṭhecchṛṇuyādapi |
sa bhuktvā sakalānbhogānprayāti paramāṃ gatim ||
3.3.31.c1
iti śrīśivamahāpurāṇe tṛtīyāyāṃ rudrasaṃhitāyāṃ śivasyārddhanārīśvarāvatāravarṇanaṃ nāma tṛtīyo'dhyāyaḥ ||
3.3.31.p2
śrīgaṇeśāya namaḥ ||
3.3.31.p3
śrīgaurīśaṅkarābhyāṃ namaḥ ||
3.3.31.p4
śrīśivamahāpurāṇam ||
3.3.31.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit
Linked texts (1)
- Mudgalapurāṇa — Sanskrit