Shivapurana 3.30: triṃśo'dhyāyaḥ | avadhūteśvaraśivāvatāracaritravarṇanam
Śivapurāṇa (complete text) 3.30
- Language
- Sanskrit
Contents
- 3.30.44 — 5 parts
triṃśo'dhyāyaḥ | avadhūteśvaraśivāvatāracaritravarṇanam
3.30.1
nandīśvara uvāca |
śṛṇu tvaṃ brahmaputrādyāvatāraṃ parameśituḥ |
avadhūteśvarāhvaṃ vai śakragarvāpahārakam ||
3.30.2
śakraḥ purā hi saguruḥ sarvadevasamanvitaḥ |
darśanaṃ kartumīśasya kailāsamagamanmune ||
3.30.3
atha gurvindrayorjñātvāgamanaṃ śaṅkarastayoḥ |
parīkṣituṃ ca tadbhāvaṃ svadarśanaratātmanoḥ ||
3.30.4
avadhūtasvarūpo'bhūnnānālīlākaraḥ prabhuḥ |
digambaro mahābhīmo jvaladagnisamaprabhaḥ ||
3.30.5
so'vadhūtasvarūpo hi mārgamāruddhya sadgatiḥ |
lambamānapaṭaḥ śambhuratiṣṭhacchobhitākṛtiḥ ||
3.30.6
atha tau guruśakrau ca gacchantau śiva sannidhim |
adrāṣṭāṃ puruṣaṃ bhīmaṃ mārgamadhye'dbhutākṛtim ||
3.30.7
atha śakro mune'pṛcchatsvādhikāreṇa durmadaḥ |
puruṣaṃ taṃ svamārgāntaḥ sthitamajñāya śaṅkaram ||
3.30.8
śakra uvāca |
kastvaṃ digambarākārāvadhūtaḥ kuta āgataḥ |
kinnāma tava vikhyātaṃ tattvato vada me'ciram ||
3.30.9
svasthāne saṃsthitaḥ śambhuḥ kiṃ vānyatra gato'dhunā |
darśanārthaṃ hi tasyāhaṃ gacchāmi saguruḥ suraiḥ ||
3.30.10
nandīśvara uvāca |
śakreṇetthaṃ sa pṛṣṭaśca kiñcinnovāca pūruṣaḥ |
līlāgṛhītadehaḥ sa śaṅkaro madahā prabhuḥ ||
3.30.11
śakraḥ punarapṛcchattaṃ novāca sa digambaraḥ |
avijñātagatiḥ śambhurmahākautukakārakaḥ ||
3.30.12
punaḥ purandaro'pṛccht trailokyādhipatiḥ svarāṭ |
tūṣṇīmāsa mahāyogī mahālīlākaraḥ sa vai ||
3.30.13
itthaṃ punaḥ punaḥ pṛṣṭaḥ śakreṇa sa digambaraḥ |
novāca kiñcidbhagavān śakradarpajighāṃsayā ||
3.30.14
atha cukrodha deveśastrailokyaiśvaryagarvitaḥ |
uvāca vacanaṃ krodhāttaṃ nirbhartsya jaṭādharam ||
3.30.15
indra uvāca |
pṛcchamāno'pi re mūḍha nottaraṃ dattavānasi |
atastvāṃ hanmi vajreṇa kaste trātāsti durmate ||
3.30.16
ityudīrya tato vajrī sannirīkṣya krudhā hi tam |
hantuṃ digambaraṃ vajramudyataṃ sa cakāra ha ||
3.30.17
vajrahastaṃ ca taṃ dṛṣṭvā śakraṃ śīghraṃ sadāśivaḥ |
cakāra stambhanaṃ tasya vajrapātasya śaṅkaraḥ ||
3.30.18
tataḥ sa puruṣaḥ kruddhaḥ karālākṣo bhayaṅkaraḥ |
drutameva prajajvāla tejasā pradahanniva ||
3.30.19
bāhupratiṣṭambhabhuvā manyunāntaḥ śacīpatiḥ |
samadahyata bhogīva mantraruddhaparākramaḥ ||
3.30.20
dṛṣṭvā bṛhaspatistvenaṃ prajvalantaṃ svatejasā |
puruṣaṃ taṃ dhiyāmāsa praṇanāma haraṃ drutam ||
3.30.21
kṛtāñjalipuṭo bhūtvā tato gururudāradhīḥ |
daṇḍavatkau punarnatvā prabhuṃ tuṣṭāva bhaktitaḥ ||
3.30.22
gururuvāca |
devadeva mahādeva śaraṇāgatavatsala |
prasanno bhava gaurīśa sarveśvara namo'stu te ||
3.30.23
māyayā mohitāḥ sarve brahmaviṣṇvādayo'pi te |
tvāṃ na jānanti tattvena jānanti tvadanugrahāt ||
3.30.24
nandīśvara uvāca |
bṛhaspatiriti stutvā sa tadā śaṅkaraṃ prabhum |
pādayoḥ pātayāmāsa tasyeśasya purandaram ||
3.30.25
tatastāta surācāryaḥ kṛtāñjalirudāradhīḥ |
bṛhaspatiruvācedaṃ praśrayāvanataḥ sudhīḥ ||
3.30.26
bṛhaspatiruvāca |
dīnānātha mahādeva praṇataṃ tava pādayoḥ |
samuddhara ca māṃ tattvaṃ krodhaṃ na praṇayaṃ kuru ||
3.30.27
tuṣṭo bhava mahādeva pāhīndraṃ śaraṇāgatam |
vahnireṣa samāyāti bhālanetrasamudbhavaḥ ||
3.30.28
nandīśvara uvāca |
ityākarṇya gurorvākyamavadhūtākṛtiḥ prabhuḥ |
uvāca karuṇāsindhurvihasan sa sadūtikṛt ||
3.30.29
avadhūta uvāca |
krodhācca nissṛtaṃ tejo dhārayāmi svanetrataḥ |
kathaṃ hi kañcukīṃ sarpaḥ sandhatte cojjhitāṃ punaḥ ||
3.30.30
nandīśvara uvāca |
iti śrutvā vacastasya śaṅkarasya bṛhaspatiḥ |
uvāca sāñjalirbhūyo bhayavyākulamānasaḥ ||
3.30.31
bṛhaspatiruvāca |
he deva bhagavanbhaktā anukampyāḥ sadaiva hi |
bhaktavatsalanāmeti svaṃ satyaṃ kuru śaṅkara ||
3.30.32
kṣeptumanyatra deveśa svatejo'tyugramarhasi |
uddhartā sarvabhaktānāṃ samuddhara purandaram ||
3.30.33
nandīśvara uvāca |
ityukto guruṇā rudro bhaktavatsalanāmabhāk |
pratyuvāca prasannātmā surejyaṃ praṇatārtihā ||
3.30.34
rudra uvāca |
prītaste'haṃ surācārya dadāmi varamuttamam |
indrasya jīvadānena jīveti tvaṃ prathāṃ vraja ||
3.30.35
samudbhūto'nalo yo'yaṃ bhālanetrātsurāsahaḥ |
enaṃ tyakṣyāmyahaṃ dūre yathendraṃ naiva pīḍayet ||
3.30.36
nandīśvara uvāca |
ityuktvā sa kare dhṛtvā svatejo'nalamadbhutam |
bhālanetrasamudbhūtaṃ prākṣipallavaṇāmbhasi ||
3.30.37
atho śivasya tattejo bhālanetrasamudbhavam |
kṣiptaṃ ca lavaṇāmbhodhau sadyo bālo babhūva ha ||
3.30.38
sa jalandharanāmābhūtsindhuputro'sureśvaraḥ |
taṃ jaghāna maheśāno devaprārthanayā prabhuḥ ||
3.30.39
itthaṃ kṛtvā sucaritaṃ śaṅkaro lokaśaṅkaraḥ |
avadhūtasvarūpeṇa tataścāntarhito'bhavat ||
3.30.40
babhūvuḥ sakalā devāḥ sukhinaścātinirbhayāḥ |
guruśakrau bhayānmuktau jagmatuḥ sukhamuttamam ||
3.30.41
yadarthe gamanodyuktau darśanaṃ prāpya tasya tau |
kṛtārthau guruśakrau hi svasthānaṃ jagmaturmudā ||
3.30.42
avadhūteśvarāhvo'vatāraste kathito mayā |
parameśasya paramānandadaḥ khaladaṇḍadaḥ ||
3.30.43
idamākhyānamanaghaṃ yaśasyaṃ svargyameva ca |
bhuktimuktipradaṃ divyaṃ sarvakāmaphalapradam ||
3.30.44
ya idaṃ śṛṇuyānnityaṃ śrāvayedvā samāhitaḥ |
iha sarvasukhaṃ bhuktvā so'nte śivagatiṃ labhet ||
3.30.44.c1
iti śrīśivamahāpurāṇe tṛtīyāyāṃ śatarudrasaṃhitāyāṃ nandīśvarasanatkumārasaṃvāde avadhūteśvaraśivāvatāracaritravarṇanaṃ nāma triṃśo'dhyāyaḥ ||
3.30.44.p2
śrīgaṇeśāya namaḥ ||
3.30.44.p3
śrīgaurīśaṅkarābhyāṃ namaḥ ||
3.30.44.p4
śrīśivamahāpurāṇam ||
3.30.44.p5
tṛtīyāyāṃ śatarudrasaṃhitāyāṃ
Linked texts (1)
- Devībhāgavatapurāṇa — Sanskrit