Pramāṇa · Search · About · API

Shivapurana 3.33: trayotriṃśo'dhyāyaḥ | brahmacāriśivāvatāravarṇanam

Śivapurāṇa (complete text) 3.33

Language
Sanskrit

Contents

trayotriṃśo'dhyāyaḥ | brahmacāriśivāvatāravarṇanam

3.33.1

nandīśvara uvāca |
sanatkumāra suprītyā śivasya paramātmanaḥ |
avatāraṃ śṛṇu vibhorjaṭilāhvaṃ supāvanam ||

3.33.2

purā satī dakṣakanyā tyaktvā dehaṃ piturmakhe |
svapitrānādṛtā jajñe menāyāṃ himabhūdharāt ||

3.33.3

sā gatvā gahane'raṇye tepe suvimalaṃ tapaḥ |
śaṅkaraṃ patimicchantī sakhībhyāṃ saṃyutā śivā ||

3.33.4

tattapaḥ suparīkṣārthaṃ saptarṣīnpraiṣayacchivaḥ |
tapaḥsthānaṃ tu pārvatyā nānālīlāviśāradaḥ ||

3.33.5

te gatvā tatra munayaḥ parīkṣāṃ cakrurādarāt |
tasyāḥ suyatnato naiva samarthā hyabhavaṃśca te ||

3.33.6

tatrāgatya śivaṃ natvā vṛttāntaṃ ca nivedya tat |
tadājñāṃ samanuprāpya svarlokaṃ jagmurādarāt ||

3.33.7

gateṣu teṣu muniṣu svasthānaṃ śaṅkaraḥ svayam |
parīkṣituṃ śivāvṛttamaicchatsūtikaraḥ prabhuḥ ||

3.33.8

suprasannastapasvīcchāśamanādayamīśvaraḥ |
brahmacaryasvarūpo'bhūttadādbhutataraḥ prabhuḥ ||

3.33.9

atīva sthaviro vipradehadhārī svatejasā |
prajvalanmanasā hṛṣṭo daṇḍī chatrī mahojjalaḥ ||

3.33.10

dhṛtvaivaṃ jāṭilaṃ rūpaṃ jagāma girijāvanam |
atiprītiyutaḥ śambhuḥ śaṅkaro bhaktavatsalaḥ ||

3.33.11

tatrāpaśyat sthitāṃ devīṃ sakhībhiḥ parivāritām |
vedikopari śuddhāntāṃ śivāmiva vidhoḥ kalām ||

3.33.12

śambhurnirīkṣya tāṃ devīṃ brahmacārisvarūpavān |
upakaṇṭhaṃ yayau prītyā cotsukī bhaktavatsalaḥ ||

3.33.13

āgataṃ sā tadā dṛṣṭvā brāhmaṇaṃ tejasādbhutam |
aṅgeṣu lomaśaṃ śāntaṃ daṇḍacarmasamanvitam ||

3.33.14

brahmacaryadharaṃ vṛddhaṃ jaṭilaṃ sakamaṇḍalum |
apūjayatparaprītyā sarvapūjopahārakaiḥ ||

3.33.15

tataḥ sā pārvatī devī pūjitaṃ parayā mudā |
kuśalaṃ paryapṛcchattaṃ brahmacāriṇamādarāt ||

3.33.16

brahmacārisvarūpeṇa kastvaṃ hi kuta āgataḥ |
idṃ vanaṃ bhāsayasi vada vedavidāṃ vara ||

3.33.17

nandīśvara uvāca |
iti pṛṣṭastu pārvatyā brahmacārī sa vai dvijaḥ |
pratyuvāca drutaṃ prītyā śivābhāvaparīkṣayā ||

3.33.18

brahmacāryuvāca |
ahamicchābhigāmī ca brahmacārī dvijo'smi vai |
tapasvī sukhado'nyeṣāmupakārī na saṃśayaḥ ||

3.33.19

nandīśvara uvāca |
ityuktvā brahmacārī sa śaṅkaro bhaktavatsalaḥ |
tasthivānupakaṇṭhaṃ sa gopāyan rūpamātmanaḥ ||

3.33.20

brahmacāryuvāca |
kiṃ bravīmi mahādevi kathanīyaṃ na vidyate |
mahānarthakaraṃ vṛttaṃ dṛśyate vikṛtaṃ mahat ||

3.33.21

nave vayasi sadbhogasādhane sukhakāraṇe |
mahopacārasadbhogairvṛthaiva tvaṃ tapasyasi ||

3.33.22

kā tvaṃ kasyāsi tanayā kimarthaṃ vijane vane |
tapaścarasi durdharṣaṃ munibhiḥ prayatātmabhiḥ ||

3.33.23

nandīśvara uvāca |
iti tadvacanaṃ śrutvā prahasya parameśvarī |
uvāca vacanaṃ prītyā brahmacāriṇamuttamam ||

3.33.24

pārvatyuvāca |
śṛṇu vipra brahmacārin madvṛttamakhilaṃ mune |
janma me bhārate varṣe sāmprataṃ himavadgṛhe ||

3.33.25

pūrvaṃ dakṣagṛhe janma satī śaṅkarakāminī |
yogena tyaktadehāhaṃ tātena patinindinā ||

3.33.26

atra janmani samprāptaḥ supuṇyena śivo dvija |
māṃ tyaktvā bhasmasātkṛtvā manmathaṃ sa jagāma ha ||

3.33.27

prayāte śaṅkare tāpād vrīḍitāhaṃ piturgṛhāt |
āgacchamatra tapase guruvākyena saṃyatā ||

3.33.28

manasā vacasā sākṣātkarmaṇā patibhāvataḥ |
satyaṃ bravīmi no'satyaṃ saṃvṛtaḥ śaṅkaro mayā ||

3.33.29

jānāmi durlabhaṃ vastu kathaṃ prāpyaṃ mayā bhavet |
tathāpi manasautsukyāttapyate me tapo'dhunā ||

3.33.30

hitvendrapramukhāndevānviṣṇuṃ brahmāṇamapyaham |
patiṃ pinākapāṇiṃ vai prāptumicchāmi satyataḥ ||

3.33.31

nandīśvara uvāca |
ityevaṃ vacanaṃ śrutvā pārvatyā hi suniścitam |
mune sa jaṭilo rudro vihasanvākyamabravīt ||

3.33.32

jaṭila uvāca |
himācalasute devi kā buddhiḥ svīkṛtā tvayā |
rudrārthaṃ vibudhānhitvā karoṣi vipulaṃ tapaḥ ||

3.33.33

jānāmyahaṃ ca taṃ rudraṃ śṛṇu tvaṃ pravadāmi te |
vṛṣadhvajaḥ sa rudro hi vikṛtātmā jaṭādharaḥ ||

3.33.34

ekākī ca sadā nityaṃ virāgī ca viśeṣataḥ |
tasmāttvaṃ tena rudreṇa mano yoktuṃ na cārhasi ||

3.33.35

sarvaṃ viruddhaṃ rūpādi tava devi harasya ca |
mahyaṃ na rocate hyetadyadīcchasi tathā kuru ||

3.33.36

nandīśvara uvāca |
ityuktvā ca punā rudro brahmacārisvarūpavān |
nininda bahudhātmānaṃ tadagre tāṃ parīkṣitum ||

3.33.37

tacchrutvā pārvatī devī vipravākyaṃ durāsadam |
pratyuvāca mahākruddhā śivanindāparaṃ ca tam ||

3.33.38

etāvaddhi mayā jñātaṃ kaścid dhanyo bhaviṣyati |
parantu sakalaṃ jñātamavadhyo dṛśyate'dhunā ||

3.33.39

brahmacārisvarūpeṇa kaścittvaṃ dhūrta āgataḥ |
śivanindā kṛtā mūḍha tvayā manyurabhūnmama ||

3.33.40

śivaṃ tvaṃ ca na jānāsi śivāttvaṃ hi bahirmukhaḥ |
tvatpūjā ca kṛtā yanme tasmāttāpayutābhavam ||

3.33.41

śivanindāṃ karotīha tattvamajñāya yaḥ pumān |
ājanmasañcitaṃ puṇyaṃ tasya bhasmībhavatyuta ||

3.33.42

śivavidveṣiṇaṃ spṛṣṭvā prāyaścittaṃ samācaret ||

3.33.43

re re duṣṭa tvayā proktamahaṃ jānāmi śaṅkaram |
niścayena na vijñātaḥ śiva eva paraḥ prabhuḥ ||

3.33.44

yathā tathā bhavedrudro māyayā bahurūpavān |
mamābhīṣṭaprado'tyantaṃ nirvikāraḥ satāṃ priyaḥ ||

3.33.45

nandīśvara uvāca |
ityuktvā taṃ śivā devī śivatattvaṃ jagāda sā |
yatra brahmatayā rudraḥ kathyate nirguṇo'vyayaḥ ||

3.33.46

tadākarṇya vaco devyā brahmacārī sa vai dvijaḥ |
punarvacanamādātuṃ yāvadeva pracakrame ||

3.33.47

provāca girijā tāvatsvasakhīṃ vijayāṃ drutam |
śivāsaktamanovṛttiḥ śivanindāparāṅmukhī ||

3.33.48

girijovāca |
vāraṇīyaḥ prayatnena sakhyayaṃ hi dvijādhamaḥ |
punarvaktumanāścāyaṃ śivanindāṃ kariṣyati ||

3.33.49

na kevalaṃ bhavetpāpaṃ nindākartuḥ śivasya hi |
yo vai śṛṇoti tannindāṃ pāpabhāksa bhavediha ||

3.33.50

śivanindākaro vadhyaḥ sarvathā śivakiṅkaraiḥ |
brāhmaṇaścetsa vai tyājyo gantavyaṃ tatsthalāddrutam ||

3.33.51

ayaṃ duṣṭaḥ punarnindāṃ kariṣyati śivasya hi |
brāhmaṇatvādavadhyaśca tyājyo'dṛśyaśca sarvathā ||

3.33.92

sthalametad drutaṃ hitvā yāsyāmo'nyatra mā ciram |
yathā sambhāṣaṇaṃ na syādanenāviduṣā punaḥ ||

3.33.53

nandīśvara uvāca |
ityuktvā comayā yāvatpadamutkṣipyate mune |
asau tāvacchivaḥ sākṣādālalambe paṭaṃ svayam ||

3.33.54

kṛtvā svarūpaṃ divyaṃ ca śivādhyānaṃ yathā tathā |
darśayitvā śivāyai tāmuvācāvāṅmukhīṃ śivaḥ ||

3.33.55

śiva uvāca |
kutra tvaṃ yāsi māṃ hitvā na tvaṃ tyājyā mayā śive |
mayā parīkṣitāsi tvaṃ dṛḍhabhaktāsi me'naghe ||

3.33.56

brahmacārisvarūpeṇa bhāvamicchustvadīyakam |
tavopakaṇṭhamāgatya prāvocaṃ vividhaṃ vacaḥ ||

3.33.57

prasanno'smi dṛḍhaṃ bhaktyā śive tava viśeṣataḥ |
cittepsitaṃ varaṃ brūhi nādeyaṃ vidyate tava ||

3.33.58

adyaprabhṛti te dāsastapobhiḥ premanirbhare |
kṛto'smi tava saundaryātkṣaṇa eko yugāyate ||

3.33.59

tyajyatāṃ ca tvayā lajjā mama patnī sanātanī |
ehi priye tvayā sākaṃ drutaṃ yāmi svakaṃ girim ||

3.33.60

ityuktavati deveśe śivātimudamāpa sā |
tapoduḥkhaṃ tu yatsarvaṃ tajjahau drutameva hi ||

3.33.61

tataḥ prahṛṣṭā sā dṛṣṭvā divyarūpaṃ śivasya tat |
pratyuvāca prabhuṃ prītyā lajjayādhomukhī śivā ||

3.33.62

śivovāca |
yadi prasanno deveśa karoṣi ca kṛpāṃ mayi |
patirme bhava deveśa ityuktaḥ śivayā śivaḥ ||

3.33.63

nandīśvara uvāca
gṛhītvā vidhivatpāṇiṃ kailāsaṃ sa tayā yayau |
patiṃ taṃ girijā prāpya devakāryaṃ cakāra sā ||

3.33.64

iti proktastu te tāta brahmacārisvarūpakaḥ |
śivāvatāro hi mayā śivābhāvaparīkṣakaḥ ||

3.33.65

idamākhyānamanaghaṃ paramaṃ vyāhṛtaṃ mayā |
ya etacchṛṇuyātprītyā sa sukhī gatimāpnuyāt ||

3.33.65.c1

iti śrī śivamahāpurāṇe tṛtīyāyāṃ śatarudrasaṃhitāyāṃ brahmacāriśivāvatāravarṇanaṃ nāma trayotriṃśo'dhyāyaḥ ||

3.33.65.p2

śrīgaṇeśāya namaḥ ||

3.33.65.p3

śrīgaurīśaṅkarābhyāṃ namaḥ ||

3.33.65.p4

śrīśivamahāpurāṇam ||

3.33.65.p5

tṛtīyāyāṃ śatarudrasaṃhitāyāṃ