Shivapurana 3.34: catustriṃśo'dhyāyaḥ | sunartakanaṭāhvaśivāvatāravarṇanam
Śivapurāṇa (complete text) 3.34
- Language
- Sanskrit
Contents
- 3.34.39 — 5 parts
catustriṃśo'dhyāyaḥ | sunartakanaṭāhvaśivāvatāravarṇanam
3.34.1
nandīśvara uvāca |
sanatkumāra sarvajña śivasya paramātmanaḥ |
avatāraṃ śṛṇu vibhoḥ sunartakanaṭāhvayam ||
3.34.2
yadā hi kālikā devī pārvatī himavatsutā |
tepe tapaḥ suvimalaṃ vanaṃ gatvā śivāptaye ||
3.34.3
tadā śivaḥ prasanno'bhūttasyāḥ sutapaso mune |
tadvṛttasuparīkṣārthaṃ varaṃ dātuṃ mudā yayau ||
3.34.4
svarūpaṃ darśayāmāsa tasyai suprītamānasaḥ |
varaṃ brūhīti covāca tāṃ śivāṃ śaṅkaro mune ||
3.34.5
tacchrutvā śambhuvacanaṃ dṛṣṭvā tadrūpamuttamam |
sujaharṣa śivātīva prāha taṃ supraṇamya sā ||
3.34.6
pārvatyuvāca |
yadi prasanno deveśa mahyaṃ deyo varo yadi |
patirbhava mameśāna kṛpāṃ kuru mamopari ||
3.34.7
piturgṛhe mayā samyaggamyate tvadanujñayā |
gantavyaṃ bhavatā nātha matpituḥ pārśvataḥ prabho ||
3.34.8
yācasva māṃ tato bhikṣuḥ khyāpayaṃśca yaśaḥ śubham |
piturme saphalaṃ sarvaṃ kuru prītyā gṛhāśramam ||
3.34.9
tato yathoktavidhinā kartumarhasi bho prabho |
vivāhaṃ tvaṃ maheśāna devānāṃ kāryasiddhaye ||
3.34.10
kāmaṃ me pūraya vibho nirvikāro bhavānsadā |
bhaktavatsalanāmā hi tava bhaktāsmyahaṃ sadā ||
3.34.11
nandīśvara uvāca |
ityuktaḥ sa tayā śambhurmaheśo bhaktavatsalaḥ |
tathāstviti vacaḥ procyāntarhitaḥ svagiriṃ yayau ||
3.34.12
pārvatyapi tataḥ prītyā svasakhībhyāṃ samanvitā |
jagāma svapiturgehaṃ rūpaṃ kṛtvā tu sārthakam ||
3.34.13
pārvatyāgamanaṃ śrutvā menayā sa himācalaḥ |
parivārayuto draṣṭuṃ svasutāṃ tāṃ yayau mudā ||
3.34.14
dṛṣṭvā tāṃ suprasannāsyāmānayāmāsaturgṛham |
kārayāmāsatuḥ prītyā mahānandau mahotsavam ||
3.34.15
dhanaṃ dadau dvijādibhyo menā girivarastathā |
maṅgalaṃ kārayāmāsa savedadhvanimādarāt ||
3.34.16
tataḥ svakanyayā sārdhamuvāsa prāṅgaṇe mudā |
menā ca himavāñchailaḥ snātuṃ gaṅgāṃ jagāma saḥ ||
3.34.17
etasminnantare śambhuḥ sulīlo bhaktavatsalaḥ |
sunartakanaṭo bhūtvā menakāsannidhiṃ yayau ||
3.34.18
śṛṅgaṃ vāme kare dhṛtvā dakṣiṇe ḍamaruṃ tathā |
pṛṣṭhe kanthāṃ raktavāsā nṛtyagānaviśāradaḥ ||
3.34.19
tatastu naṭarūpo'sau menakāprāṅgaṇe mudā |
cakre sa nṛtyaṃ vividhaṃ gānaṃ cāti manoharam ||
3.34.20
śṛṅgañca ḍamaruṃ tatra vādayāmāsa sudhvanim |
mahotiṃ vividhāṃ prītyā sa cakāra manoharām ||
3.34.21
taṃ draṣṭuṃ nāgarāḥ sarve puruṣāśca striyastathā |
ājagmuḥ sahasā tatra bālā vṛddhā api dhruvam ||
3.34.22
śrutvā sugītaṃ taṃ dṛṣṭvā sunṛtyaṃ ca manoharam |
sahasā mumuhuḥ sarve menāpi ca tadā mune ||
3.34.23
tato menāśu ratnāni svarṇapātrasthitāni ca |
tasmai dātuṃ yayau prītyā tadūtiprītamānasā ||
3.34.24
tāni na svīcakārāsau bhikṣāṃ kāṅkṣe śivāṃ ca tām |
punaḥ sunṛtyaṃ gānaṃ ca kautukātkartumudyataḥ ||
3.34.25
menā tadvacanaṃ śrutvā cukopāti suvismitā |
bhikṣukaṃ bhartsayāmāsa bahiṣkartumiyeṣa sā ||
3.34.26
etasminnantare tatra gaṅgāto girirāḍ yayau |
dadarśa purato bhikṣuṃ prāṅgaṇasthaṃ narākṛtim ||
3.34.27
śrutvā menāmukhād vṛttaṃ tatsarvaṃ sucukopa saḥ |
ājñāṃ cakārānucarānbahiḥ kartuṃ ca bhikṣukam ||
3.34.28
mahāgnimiva duḥsparśaṃ prajvalantaṃ sutejasam |
na śaśāka bahiḥ kartuṃ ko'pi taṃ munisattama ||
3.34.29
tataḥ sa bhikṣukastāta nānālīlāviśāradaḥ |
darśayāmāsa śailāya svaprabhāvamanantakam ||
3.34.30
śailo dadarśa taṃ tatra viṣṇurūpadharaṃ drutam |
tato brahmasvarūpaṃ ca sūryarūpaṃ tataḥ kṣaṇāt ||
3.34.31
tato dadarśa taṃ tāta rudrarūpaṃ mahādbhutam |
pārvatīsahitaṃ ramyaṃ vihasantaṃ sutejasam ||
3.34.32
evaṃ subahurūpāṇi tasya tatra dadarśa saḥ |
suvismito babhūvāśu paramānandasamplutaḥ ||
3.34.33
athāsau bhikṣuvaryo hi tasmāttasyāśca sūtikṛt |
bhikṣāṃ yayāce durgāṃ tāṃ nānyajjagrāha kiñcana ||
3.34.34
tataścāntardadhe bhikṣusvarūpaḥ parameśvaraḥ |
svālayaṃ sa jagāmāśu durgāvākyapraṇoditaḥ ||
3.34.35
tadā babhūva sujñānaṃ menāśaileśayorapi |
āvāṃ śivo vañcayitvā gatavānsvālayaṃ vibhuḥ ||
3.34.36
asmai deyā svakanyeyaṃ pārvatī sutapasvinī |
evaṃ vicārya ca tayoḥ śive bhaktirabhūtparā ||
3.34.37
ato rudro mahotīśca kṛtvā bhaktamudāvaham |
vivāhaṃ kṛtavānprītyā pārvatyā sa vidhānataḥ ||
3.34.38
iti proktastu te tāta sunartakanaṭāhvayaḥ |
śivāvatāro hi mayā śivāvākyaprapūrakaḥ ||
3.34.39
idamākhyānamanaghaṃ paramaṃ vyāhṛtaṃ mayā |
ya etacchṛṇuyātprītyā sa sukhī gatimāpnuyāt ||
3.34.39.c1
iti śrīśivamahāpurāṇe tṛtīyāyāṃ śatarudrasaṃhitāyāṃ sunartakanaṭāhvaśivāvatāravarṇanaṃ nāma catustriṃśo'dhyāyaḥ ||
3.34.39.p2
śrīgaṇeśāya namaḥ ||
3.34.39.p3
śrīgaurīśaṅkarābhyāṃ namaḥ ||
3.34.39.p4
śrīśivamahāpurāṇam ||
3.34.39.p5
tṛtīyāyāṃ śatarudrasaṃhitāyāṃ
Linked texts (1)
- Āryacarita — Sanskrit