Shivapurana 3.35: pañcatriṃśo'dhyāyaḥ | sādhudvijaśivāvatāravarṇanam
Śivapurāṇa (complete text) 3.35
- Language
- Sanskrit
Contents
- 3.35.37 — 5 parts
pañcatriṃśo'dhyāyaḥ | sādhudvijaśivāvatāravarṇanam
3.35.1
nandīśvara uvāca |
sanatkumāra sarvajña śivasya paramātmanaḥ |
avatāraṃ śṛṇu vibhoḥ sādhuveṣadvijāhvayam ||
3.35.2
menāhimālayorbhaktiṃ śive jñātvā mahottamām |
cintāmāpuḥ surāḥ sarve mantrayāmāsurādarāt ||
3.35.3
ekāntabhaktyā śailaścetkanyāṃ dāsyati śambhave |
dhruvaṃ nirvāṇatāṃ sadyaḥ samprāpsyati śivasya vai ||
3.35.4
anantaratnādhāro'sau cetprayāsyati mokṣatām |
ratnagarbhābhidhā bhūmirmithyaiva bhavitā dhruvam ||
3.35.5
sthāvaratvaṃ parityajya divyarūpaṃ vidhāya saḥ |
kanyāṃ śūlabhṛte dattvā śivalokaṃ gamiṣyati ||
3.35.6
mahādevasya sārūpyaṃ prāpya śambhoranugrahāt |
tatra bhuktvā mahābhogāṃstato mokṣamavāpsyati ||
3.35.7
ityālocya surāḥ sarve jagmurgurugṛhaṃ mune |
cakrurnivedanaṃ gatvā gurave svārthasādhakāḥ ||
3.35.8
devā ūcuḥ |
guro himālayagṛhaṃ gacchāsmatkāryasiddhaye |
kṛtvā nindāṃ maheśasya giribhaktiṃ nivāraya ||
3.35.9
svaśraddhayā sutāṃ dattvā śivāya sa girirguro |
labheta muktimatraiva dharaṇyāṃ sa hi tiṣṭhatu ||
3.35.10
iti devavacaḥ śrutvā provāca ca vicārya tān ||
3.35.11
gururuvāca |
kaścinmadhye ca yuṣmākaṃ gacchecchailāntikaṃ surāḥ |
sampādayetsvābhimatamahaṃ tatkartumakṣamaḥ ||
3.35.12
athavā gacchata surā brahmalokaṃ savāsavāḥ |
tasmai vṛttaṃ kathaya svaṃ sa vaḥ kāryaṃ kariṣyati ||
3.35.13
nandīśvara uvāca |
tacchrutvā te samālocya jagmurvidhisabhāṃ surāḥ |
sarvaṃ nivedayāmāsustadvṛttaṃ purato vidheḥ ||
3.35.14
avocattānvidhiḥ śrutvā tadvacaḥ suvicintya vai |
nāhaṃ kariṣye tannindāṃ duḥkhadāṃ kaharāṃ sadā ||
3.35.15
surā gacchata kailāsaṃ santoṣayata śaṅkaram |
prasthāpayata taṃ devaṃ himālayagṛhaṃ prati ||
3.35.16
sa gacchedatha śaileśamātmanindāṃ karotu vai |
paranindā vināśāya svanindā yaśase matā ||
3.35.17
nandīśvara uvāca |
tataste prayayuḥ śīghraṃ kailāsaṃ nikhilāḥ surāḥ |
supraṇamya śivaṃ bhaktyā tadvṛttaṃ nikhilā jaguḥ ||
3.35.18
tacchrutvā devavacanaṃ svīcakāra maheśvaraḥ |
devānsuyāpayāmāsa tānāśvāsya vihasya saḥ ||
3.35.19
tataḥ sa bhagavāñchambhurmaheśo bhaktavatsalaḥ |
gantumaicchacchailamūlaṃ māyeśo na vikāravān ||
3.35.20
daṇḍī chatrī divyavāsā bibhrattilakamujjvalam |
kare sphaṭikamālāṃ ca śālagrāmaṃ gale dadhat ||
3.35.21
japannāma harerbhaktyā sādhuveṣadharo dvijaḥ |
himācalaṃ jagāmāśu bandhuvargaiḥ sarmanvitam ||
3.35.22
taṃ ca dṛṣṭvā samuttasthau sagaṇo'pi himālayaḥ |
nanāma daṇḍavadbhūmau sāṣṭāṅgaṃ vidhipūrvakam ||
3.35.23
tataḥ papraccha śaileśastaṃ dvijaṃ ko bhavāniti |
uvāca śīghraṃ viprendraḥ sa yogyadriṃ mahādarāt ||
3.35.24
sādhudvija uvāca |
sādhudvijāhvaḥ śailāhaṃ vaiṣṇavaḥ paramārthadṛk |
paropakārī sarvajñaḥ sarvagāmī gurorbalāt ||
3.35.25
mayā jñātaṃ svavijñānātsvasthāne śailasattama |
tacchṛṇu prītito vacmi hitvā dambhaṃ tavāntikam ||
3.35.26
śaṅkarāya sutāṃ dātuṃ tvamicchasi nijodbhavām |
imāṃ padmāsamāṃ ramyāmajñātakulaśīline ||
3.35.27
iyaṃ matiste śailendra na yuktā maṅgalapradā |
nibodha jñānināṃ śreṣṭha nārāyaṇakulodbhava ||
3.35.28
paśya śailādhipatvaṃ ca na tasyaiko'sti bāndhavaḥ |
bāndhavānsvānprayatnena pṛccha menāṃ ca svapriyām ||
3.35.29
sarvānsampṛccha yatnena menādīnpārvatīṃ vinā |
rogiṇe nauṣadhaṃ śaila kupathyaṃ rocate sadā ||
3.35.30
na te pātrānurūpaśca pārvatīdānakarmaṇi |
mahājanaḥ smeramukhaḥ śrutimātrādbhaviṣyati ||
3.35.31
nirāśrayaḥ sadāsaṅgo virūpo nirguṇo'vyayaḥ |
smaśānavāsī vikaṭo vyālagrāhī digambaraḥ ||
3.35.32
vibhūtibhūṣaṇo vyālavarāveṣṭitamastakaḥ |
sarvāśramaparibhraṣṭastvavijñātagatissadā ||
3.35.33
brahmovāca |
ityādyuktvā vacastathyaṃ śivanindāparaṃ sa hi |
jagāma svālayaṃ śīghraṃ nānālīlākaraḥ śivaḥ ||
3.35.34
tacchrutvā vipravacanamabhūtāṃ ca tanū tayoḥ |
viparītānarthapare kiṃ kariṣyāvahe dhruvam ||
3.35.35
tato rudro mahotiṃ ca kṛtvā bhaktamudāvahām |
vivāhayitvā girijāṃ devakāryaṃ cakāra saḥ ||
3.35.36
iti proktastu te tāta sādhuveṣo dvijāhvayaḥ |
śivāvatāro hi mayā devakāryakaraḥ prabho ||
3.35.37
idamākhyānamanaghaṃ svargyamāyuṣyamuttamam |
yaḥ paṭhecchṛṇuyādvāpi sa sukhī gatimāpnuyāt ||
3.35.37.c1
iti śrīśivamahāpurāṇe tṛtīyāyāṃ śatarudrasaṃhitāyāṃ sādhudvijaśivāvatāravarṇanaṃ nāma pañcaviṃśo'dhyāyaḥ ||
3.35.37.p2
śrīgaṇeśāya namaḥ ||
3.35.37.p3
śrīgaurīśaṅkarābhyāṃ namaḥ ||
3.35.37.p4
śrīśivamahāpurāṇam ||
3.35.37.p5
tṛtīyāyāṃ śatarudrasaṃhitāyāṃ