Pramāṇa · Search · About · API

Shivapurana 3.36: ṣaṭtriṃśo'dhyāyaḥ | aśvatthāmaśivāvatāravarṇanam

Śivapurāṇa (complete text) 3.36

Language
Sanskrit

Contents

ṣaṭtriṃśo'dhyāyaḥ | aśvatthāmaśivāvatāravarṇanam

3.36.1

nandīśvara uvāca |
sanatkumāra sarvajña śivasya paramātmanaḥ |
avatāraṃ śṛṇu vibhoraśvatthāmāhvayaṃ param ||

3.36.2

bṛhaspatermahābuddherdevarṣeraṃśato mune |
bharadvājātsamutpanno droṇo'yonija ātmavān ||

3.36.3

dhanurbhṛtāṃ varaḥ śūro viprarṣiḥ sarvaśāstravit |
bṛhatkīrtirmahātejā yaḥ sarvāstraviduttamaḥ ||

3.36.4

dhanurvede ca vede ca niṣṇātaṃ yaṃ vidurbudhāḥ |
variṣṭhaṃ citrakarmāṇaṃ droṇaṃ svakulavardhanam ||

3.36.5

kauravāṇāṃ sa ācarya āsītsvabalato dvija |
mahārathiṣu vikhyātaḥ ṣaṭsu kauravamadhyataḥ ||

3.36.6

sāhāyyārthaṃ kauravāṇāṃ sa tepe vipulaṃ tapaḥ |
śivamuddiśya putrārthaṃ droṇācāryo dvijottamaḥ ||

3.36.7

tataḥ prasanno bhagavācchaṅkaro bhaktavatsalaḥ |
āvirbabhūva purato droṇasya munisattama ||

3.36.8

taṃ dṛṣṭvā sa dvijo droṇastuṣṭāvāśu praṇamya tam |
mahāprasannahṛdayo natakaḥ sukṛtāñjaliḥ ||

3.36.9

tasya stutyā ca tapasā santuṣṭaḥ śaṅkaraḥ prabhuḥ |
varaṃ brūhīti covāca droṇaṃ taṃ bhaktavatsalaḥ ||

3.36.10

tacchrutvā śambhuvacanaṃ droṇaḥ prāhātha sannataḥ |
svāṃśajaṃ tanayaṃ dehi sarvājeyaṃ mahābalam ||

3.36.11

tacchrutvā droṇavacanaṃ śambhuḥ proce tathāstviti |
abhūdantarhitastāta kautukī sukhakṛnmune ||

3.36.12

droṇo'pagacchatsvaṃ dhāma mahāhṛṣṭo gatabhramaḥ |
svapatnyai kathayāmāsa tadvṛtaṃ sakalaṃ mudā ||

3.36.13

athāvasaramāsādya rudraḥ sarvāntakaḥ prabhuḥ |
svāṃśena tanayo jajñe droṇasya sa mahābalaḥ ||

3.36.14

aśvatthāmeti vikhyātaḥ sa babhūva kṣitau mune |
pravīraḥ kañjapatrākṣaḥ śatrupakṣakṣayaṅkaraḥ ||

3.36.15

yo bhārate raṇe khyātaḥ piturājñāmavāpya ca |
sahāyakṛd babhūvāta kauravāṇāṃ mahābalaḥ ||

3.36.16

yamāśritya mahāvīraṃ kauravāḥ sumahābalāḥ |
bhīṣmādayo babhūvuste'jeyā api divaukasām ||

3.36.17

yadbhayātpāṇḍavāḥ sarve kauravāñjetumakṣamāḥ |
āsannaṣṭā mahāvīrā api sarve ca kovidāḥ ||

3.36.18

kṛṣṇopadeśataḥ śambhostapaḥ kṛtvātidāruṇam |
prāpya cāstraṃ śambhuvarājjigye tānarjunastataḥ ||

3.36.19

aśvatthāmā mahāvīro mahādevāṃśajo mune |
tathāpi tadbhaktivaśaḥ svapratāpamadarśayat ||

3.36.20

vināśya pāṇḍavasutān śikṣitānapi yatnataḥ |
kṛṣṇādibhirmahāvīrairanivāryabalaḥ paraiḥ ||

3.36.21

putraśokena vikalamāpatantaṃ tamarjunam |
rathenācyutavantaṃ hi dṛṣṭvā sa ca parādravat ||

3.36.22

astraṃ brahmaśiro nāma taduparyasṛjatsa hi |
tataḥ prādurabhūttejaḥ pracaṇḍaṃ sarvato diśam ||

3.36.23

prāṇāpadamabhiprekṣya so'rjunaḥ kleśasaṃyutaḥ |
uvāca kṛṣṇaṃ viklānto naṣṭatejā mahābhayaḥ ||

3.36.24

arjuna uvāca |
kimidaṃ svitkuto veti kṛṣṇa kṛṣṇa na vedmyaham |
sarvatomukhamāyāti tejaścedaṃ sudussaham ||

3.36.25

nandīśvara uvāca |
śrutvārjunavacaścedaṃ sa kṛṣṇaḥ śaivasattamaḥ |
dadhyau śivaṃ sadāraṃ ca pratyāhārjunamādarāt ||

3.36.26

śrīkṛṣṇa uvāca |
vetthedaṃ droṇaputrasya brāhmamastraṃ maholbaṇam |
na hyasyānyatamaṃ kiñcidastraṃ pratyavakarśanam ||

3.36.27

śivaṃ smara drutaṃ śambhuṃ svaprabhuṃ bhaktarakṣakam |
yena dattaṃ hi te svāstraṃ sarvakāryakaraṃ param ||

3.36.28

jahyastrateja unnaddhaṃ tvaṃ tacchaivāstratejasā |
ityuktvā ca svayaṃ kṛṣṇaḥ śivaṃ dadhyau tadarthakaḥ ||

3.36.29

tacchrutvā kṛṣṇavacanaṃ pārthaḥ smṛtvā śivaṃ hṛdi |
spṛṣṭvāpastaṃ praṇamyāśu cikṣepāstraṃ tato mune ||

3.36.30

yadyapyastraṃ brahmaśirastvamoghaṃ cāpratikriyam |
śaivāstratejasā sadyaḥ samaśāmyanmahāmune ||

3.36.31

mā maṃsthā hyetadāścaryaṃ sarvacitramaye śive |
yaḥ svaśaktyākhilaṃ viśvaṃ sṛjatyavati hantyajaḥ ||

3.36.32

aśvatthāmā tato jñātvā vṛttametacchivāṃśajaḥ |
śaivaṃ na vivyathe kiñcicchivecchātuṣṭadhīrmune ||

3.36.33

atha drauṇiridaṃ viśvaṃ kṛtsnaṃ kartumapāṇḍavam |
uttarāgarbhagaṃ bālaṃ nāśituṃ mana ādadhe ||

3.36.34

brahmāstramanivāryaṃ tadanyairastrairmahāprabham |
uttarāgarbhamuddiśya cikṣepa sa mahāprabhuḥ ||

3.36.35

tataśca sottarā jiṣṇuvadhūrvikalamānasā |
kṛṣṇaṃ tuṣṭāva lakṣmīśaṃ dahyamānā tadastrataḥ ||

3.36.36

tataḥ kṛṣṇaḥ śivaṃ dhyātvā hṛdā nutvā praṇamya ca |
apāṇḍavamidaṃ kartuṃ drauṇerastramabudhyata ||

3.36.37

svarakṣārthendradattena tadastreṇa suvarcasā |
sudarśanena tasyāśca vyadhādrakṣāṃ śivājñayā ||

3.36.38

svarūpaṃ śaṅkarādeśātkṛtaṃ śaivavareṇa ha |
kṛṣṇena caritaṃ jñātvā vimanaskaḥ śanairabhūt ||

3.36.39

tataḥ sa kṛṣṇaḥ prītātmā pāṇḍavānsakalānapi |
apātayattadaṅghryostu tuṣṭaye tasya śaivarāṭ ||

3.36.40

atha drauṇiḥ prasannātmā pāṇḍavānkṛṣṇameva ca |
nānāvarāndadau prītyā so'śvatthāmānugṛhya ca ||

3.36.41

itthaṃ maheśvarastāta cakre līlāṃ parāṃ prabhuḥ |
avatīrya kṣitau drauṇirūpeṇa munisattama ||

3.36.42

śivāvatāro'śvatthāmā mahābalaparākramaḥ |
trailokyasukhado'dyāpi vartate jāhnavītaṭe ||

3.36.43

aśvatthāmāvatāraste varṇitaḥ śaṅkaraprabhoḥ |
sarvasiddhikaraścāpi bhaktābhīṣṭaphalapradaḥ ||

3.36.44

ya idaṃ śṛṇuyādbhaktyā kīrtayedvā samāhitaḥ |
sa siddhiṃ prāpnuyādiṣṭāmante śivapuraṃ vrajet ||

3.36.44.c1

iti śrīśivamahāpurāṇe tṛtīyāyāṃ śatarudrasaṃhitāyāmaśvatthāmaśivāvatāravarṇanaṃ nāma ṣaṭtriṃśo'dhyāyaḥ ||

3.36.44.p2

śrīgaṇeśāya namaḥ ||

3.36.44.p3

śrīgaurīśaṅkarābhyāṃ namaḥ ||

3.36.44.p4

śrīśivamahāpurāṇam ||

3.36.44.p5

tṛtīyāyāṃ śatarudrasaṃhitāyāṃ