Pramāṇa · Search · About · API

Shivapurana 3.41: ekacatvāriṃśo'dhyāyaḥ | kirāteśvarāvatāravarṇanam

Śivapurāṇa (complete text) 3.41

Language
Sanskrit

Contents

ekacatvāriṃśo'dhyāyaḥ | kirāteśvarāvatāravarṇanam

3.41.1

tamāgataṃ tato dṛṣṭvā dhyānaṃ kṛtvā śivasya saḥ |
gatvā tatrārjunastena yuddhaṃ cakre sudāruṇam ||

3.41.2

gaṇaiśca vividhaistīkṣṇairāyudhaistaṃ nyapīḍayat |
taistadā pīḍitaḥ pārthaḥ sasmāra svāminaṃ śivam ||

3.41.3

arjunaśca tadā teṣāṃ bāṇāvalimathācchinat |
yadāyuddhaṃ ca taiḥ kṣiptaṃ tataḥ śarvaṃ parāmṛśat ||

3.41.4

pīḍitāste gaṇāstena yayuścaiva diśo daśa |
gaṇeśā vāritāste ca nājagmuḥ svāminaṃ prati ||

3.41.5

śivaścaivārjunaścaiva yuyudhāte parasparam |
nānāvidhaiścāyudhairhi mahābalaparākramau ||

3.41.6

śivo'pi manasā nūnaṃ dayāṃ kṛtvārjunaṃ hyagāt |
arjunaśca dṛḍhaṃ tatra prahāraṃ kṛtavāṃstadā ||

3.41.7

āyudhāni śivaḥ so vai hyarjunasyācchinattadā |
kavacāni ca sarvāṇi śarīraṃ kevalaṃ sthitam ||

3.41.8

tadārjunaḥ śivaṃ smṛtvā mallayuddhaṃ cakāra saḥ |
vāhinīpatinā tena bhayātkliṣṭo'pi dhairyavān ||

3.41.9

tadyuddhena mahī sarvā cakampe sasamudrakā |
devā duḥkhaṃ samāpannāḥ kiṃ bhaviṣyati vā punaḥ ||

3.41.10

etasmitrantare devaḥ śivo gaganamāsthitaḥ |
yuddhaṃ cakāra tatrasthaḥ so'rjunaśca tathākarot ||

3.41.11

uḍḍīyoḍḍīya tau yuddhaṃ cakraturdevapārthivau |
devāśca vismayaṃ prāpū raṇaṃ dṛṣṭvā tadādbhutam ||

3.41.12

athārjunottaraṃ jñātvā smṛtvā śivapadāmbujam |
dadhāra pādayostaṃ vai taddhyānādāptasadbalaḥ ||

3.41.13

dhṛtvā pādau tadā tasya bhrāmayāmāsa so'rjunaḥ |
vijahāsa mahādevo bhaktavatsala ūtikṛt ||

3.41.14

dātuṃ svadāsatāṃ tasmai bhaktavaśyatayā mune |
śivenaiva kṛtaṃ hyetaccaritaṃ nānyathā bhavet ||

3.41.15

paścādvihasya tatraiva śaṅkaro rūpamadbhutam |
darśayāmāsa sahasā bhaktavaśyatayā śubham ||

3.41.16

yathoktaṃ vedaśāstreṣu purāṇe puruṣottama |
vyāsopadiṣṭaṃ dhyānāya tasya yatsarvasiddhidam ||

3.41.17

taddṛṣṭvā sundaraṃ rūpaṃ dhyānaprāptaṃ śivasya tu |
babhūva vismito'tīva hyarjuno lajjitaḥ svayam ||

3.41.18

aho śivaśśivaḥ so'yaṃ yo me prabhutayā vṛtaḥ |
trilokeśaḥ svayaṃ sākṣād hā kṛtaṃ kiṃ mayādhunā ||

3.41.19

prabhorbalavatī māyā māyināmapi mohinī |
kiṃ kṛtaṃ rūpamācchādya prabhuṇā chalito hyaham ||

3.41.20

dhiyeti saṃvicāryaivaṃ sāñjalirnatamastakaḥ |
praṇanāma prabhuṃ prītyā tadovāca sa khinnadhīḥ ||

3.41.21

arjuna uvāca |
devadeva mahādeva karuṇākara śaṅkara |
mamāparādhaṃḥ sarveśa kṣantavyaśca tvayā punaḥ ||

3.41.22

kiṃ kṛtaṃ rūpamācchādya cchalito'smi tvayādhunā |
dhiṅ māṃ samarakartāraṃ svāminā bhavatā prabho ||

3.41.23

nandīśvara uvāca |
ityevaṃ pāṇḍavaḥ so'tha paścāttāpamavāpa saḥ |
pādayornipapātāśu śaṅkarasya mahāprabhoḥ ||

3.41.24

atheśvaraḥ prasannātmā pratyuvācārjunaṃ ca tam |
samāśvāsyeti bahuśo maheśo bhaktavatsalaḥ ||

3.41.25

śaṅkara uvāca |
na khidya pārtha bhakto'si mama tvaṃ hi viśeṣataḥ |
parīkṣārthaṃ mayā te'dya kṛtamevaṃ śucaṃ jahi ||

3.41.26

nandīśvara uvāca |
ityuktvā taṃ svahastābhyāmutthāpya prabhurarjunam |
vilajjaṃ kārayāmāsa gaṇaiśca svāmino guṇaiḥ ||

3.41.27

punaḥ śivo'rjunaṃ prāha pāṇḍavaṃ vīrasammatam |
harṣayan sarvathā prītyā śaṅkaro bhaktavatsalaḥ ||

3.41.28

śiva uvāca |
he pārtha pāṇḍavaśreṣṭha prasanno'smi varaṃ vṛṇu |
prahāraistāḍanaiste'dya pūjanammānitammayā ||

3.41.29

icchayā ca kṛtaṃ me'dya nāparādhastavādhunā |
nādeyaṃ vidyate tubhyaṃ yadicchasi vṛṇīṣva tat ||

3.41.30

te śatruṣu yaśorājyasthāpanāya śubhaṃ kṛtam |
etadduḥkhaṃ na kartavyaṃ vaiklavyaṃ ca tyajākhilam ||

3.41.31

nandīśvara uvāca |
ityuktastvarjunastena prabhuṇā śaṅkareṇa saḥ |
uvāca śaṅkaraṃ bhaktyā sāvadhānatayā sthitaḥ ||

3.41.32

arjuna uvāca |
bhaktapriyasya śambhoste suprabho kiṃ samīhitam |
varṇanīyaṃ mayā deva kṛpālustvaṃ sadāśiva ||

3.41.33

ityuktvā saṃstutiṃ tasya śaṅkarasya mahāprabhoḥ |
cakāra pāṇḍavaḥ so'tha sadbhaktiṃ vedasammatām ||

3.41.34

arjuna uvāca |
namaste devadevāya namaḥ kailāsavāsine |
sadāśiva namastubhyaṃ pañcavaktrāya te namaḥ ||

3.41.35

kapardine namastubhyantrinetrāya namo'stu te |
manaḥ prasannarūpāya sahasravadanāya ca ||

3.41.36

nīlakaṇṭha namaste'stu sadyojātāya vai namaḥ |
vṛṣadhvaja namaste'stu vāmāṅgagirijāya ca ||

3.41.37

daśadoṣa namastubhyaṃ namaste paramātmane |
ḍamarūkapālahastāya namaste muṇḍamāline ||

3.41.38

śuddhasphaṭikasaṅkāśaśuddhakarpūravarṣmaṇe |
pinākapāṇaye tubhyaṃ triśūlavaradhāriṇe ||

3.41.39

vyāghracarmottarīyāya gajāmbaravidhāriṇe |
nāgāṅgāya namastubhyaṃ gaṅgādhara namo'stu te ||

3.41.40

supādāya namaste'stu āraktacaraṇāya ca |
nandyādigaṇasevyāya gaṇeśāya ca te namaḥ ||

3.41.41

namo gaṇeśarūpāya kārtikeyānugāya ca |
bhaktidāya ca bhaktānāṃ muktidāya namo namaḥ ||

3.41.42

aguṇāya namaste'stu saguṇāya namo namaḥ |
arūpāya sarūpāya sakalāyākalāya ca ||

3.41.43

namaḥ kirātarūpāya madanugrahakāriṇe |
yuddhapriyāya vīrāṇāṃ nānālīlānukāriṇe ||

3.41.44

yatkiñcit dṛśyate rūpaṃ tattejastāvakaṃ smṛtam |
cidrūpastvaṃ trilokeṣu ramase'nvayabhedataḥ ||

3.41.45

guṇānāṃ te na saṅkhyāsti yathā bhūrajasāmiha |
ākāśe tārakāṇāṃ hi kaṇānāṃ vṛṣṭyapāmapi ||

3.41.46

na te guṇāṃstu saṅkhyātuṃ vedā vai sambhavanti hi |
mandabuddhirahaṃ nātha varṇayāmi kathampunaḥ ||

3.41.47

so'si yo'si namaste'stu kṛpāṃ kartumihārhasi |
dāso'haṃ te maheśāna svāmī tvaṃ me maheśvara ||

3.41.48

nandīśvara uvāca |
iti śrutvā vacastasya punaḥ provāca śaṅkaraḥ |
suprasannataro bhūtvā vihasanprabhurarjunam ||

3.41.49

śaṅkara uvāca |
vacasā kimbahūktena śṛṇuṣva vacanaṃ mama |
śīghraṃ vṛṇu varaṃ putra sarvaṃ tacca dadāmi te ||

3.41.50

nandīśvara uvāca |
ityuktaścārjunastena praṇipatya sadāśivam |
sāñjalirnatakaḥ premṇā provāca gadgadākṣaram ||

3.41.51

arjuna uvāca |
kiṃ brūyāṃ tvaṃ ca sarveṣāmantaryāmitayā sthitaḥ |
tathāpi varṇitaṃ me'dya śrūyatāṃ ca tvayā vibho ||

3.41.52

śatrūṇāṃ saṅkaṭaṃ yacca tadgatandarśanāttava |
aihikīṃ ca parāṃ siddhiṃ prāpnuyāṃ vai tathā kuru ||

3.41.53

nandīśvara uvāca |
ityuktvā taṃ namaskṛtya śaṅkaraṃ bhaktavatsalam |
nataskandho'rjunastatra baddhāñjalirupasthitaḥ ||

3.41.54

śivo'pi ca tathābhūtaṃ jñātvā pāṇḍavamarjunam |
nijabhaktavaraṃ svāmī mahātuṣṭo babhūva ha ||

3.41.55

astraṃ pāśupataṃ svīyandurjayaṃ sarvadākhilaiḥ |
dadau tasmai maheśāno vacanaṃ cedamabravīt ||

3.41.56

śiva uvāca |
svaṃ mahāstraṃ mayā datta durjayastvaṃ bhaviṣyati |
anena sarvaśatrūṇāṃ jayakṛtyamavāpnuhi ||

3.41.57

kṛṣṇaṃ ca kathayiṣyāmi sāhāyyante kariṣyati |
sa vai mamātmabhūtaśca madbhaktaḥ kāryakārakaḥ ||

3.41.58

matprabhāvānbhārata tvaṃ rājyannikaṇṭakaṃ kuru |
dhīrmmānnānāvidhānbhrātrā kāraya tvaṃ ca sarvadā ||

3.41.59

nandīśvara uvāca |
ityuktvā nijahastaṃ ca dhṛtvā śirasi tasya saḥ |
pūjito hyarjunenāśu śaṅkaro'ntaradhīyata ||

3.41.60

athārjunaḥ prasannātmā prāpyāstraṃ ca varaṃ prabhoḥ |
jagāma svāśramaṃ mukhyaṃ smaranbhaktyā guruṃ śivam ||

3.41.61

sarve te bhrātaraḥ prītāstanvaḥ prāṇamivāgatam |
militvā taṃ sukhaṃ prāpurdraupadī cātisuvratā ||

3.41.62

śivaṃ paraṃ ca santuṣṭaṃ pāṇḍavāḥ sarva eva hi |
nātṛpyansarvavṛttāntaṃ śrutvā harṣamupāgatāḥ ||

3.41.63

āśrame puṣpavṛṣṭiśca candanena samanvitā |
papāta sukarārthaṃ ca teṣāṃ caiva mahātmanām ||

3.41.64

dhanyaṃ ca śaṅkaraṃ caiva namaskṛtya śivammudā |
avadhiṃ cāgataṃ jñātvā jayaścaiva bhaviṣyati ||

3.41.65

etasminnantare kṛṣṇaḥ śrutvārjunamathāgatam |
melanāya samāyātaḥ śrutvā sukhamupāgataḥ ||

3.41.66

ataścaiva mayākhyātaḥ śaṅkaraḥ sarvaduḥkhahā |
sa sevyate mayā nityaṃ bhavadbhirapi sevyatām ||

3.41.67

ityuktaste kirātāhvo'vatāraḥ śaṅkarasya vai |
taṃ śrutvā śrāvayanvāpi sarvānkāmānavāpnuyāt ||

3.41.67.c1

iti śrīśivamahāpurāṇe tṛtīyāyāṃ śatarudrasaṃhitāyāṃ kirāteśvarāvatāravarṇanaṃ nāmaikacatvāriṃśo'dhyāyaḥ ||

3.41.67.p2

śrīgaṇeśāya namaḥ ||

3.41.67.p3

śrīgaurīśaṅkarābhyāṃ namaḥ ||

3.41.67.p4

śrīśivamahāpurāṇam ||

3.41.67.p5

tṛtīyāyāṃ śatarudrasaṃhitāyāṃ