Shivapurana 3.42: dvicatvāriṃśo'dhyāyaḥ | dvādaśajyotirliṅgāvatāravarṇanam
Śivapurāṇa (complete text) 3.42
- Language
- Sanskrit
Contents
- 3.42.60 — 2 parts
dvicatvāriṃśo'dhyāyaḥ | dvādaśajyotirliṅgāvatāravarṇanam
3.42.1
nandīśvara uvāca |
avatārān śṛṇu vibhordvādaśapramitānparān |
jyotirliṅgasvarūpānvai nānotikārakānmune ||
3.42.2
saurāṣṭre somanāthaśca śrīśaile mallikārjunaḥ |
ujjayinyāṃ mahākāla oṅkāre cāmareśvaraḥ ||
3.42.3
kedāro himavatpṛṣṭe ḍākinyāmbhīmaśaṅkaraḥ |
vārāṇasyāṃ ca viśveśastryambako gautamītaṭe ||
3.42.4
vaidyanāthaścitābhūmau nāgeśo dārukāvane |
setubandhe ca rāmeśo ghuśmeśaśca śivālaye ||
3.42.5
avatāradvādaśakametacchambhoḥ parātmanaḥ |
sarvānandakaraṃ puṃsāṃ darśanātsparśanānmune ||
3.42.6
tatrādyaḥ somanātho hi candraduḥkhakṣayaṅkaraḥ |
kṣayakuṣṭhādirogāṇāṃ nāśakaḥ pūjanānmune ||
3.42.7
śivāvatāraḥ someśo liṅgarūpeṇa saṃsthitaḥ |
saurāṣṭre śubhadeśe ca śaśinā pūjitaḥ purā ||
3.42.8
candrakuṇḍaṃ ca tatraiva sarvapāpavināśakam |
tatra snātvā naro dhīmānsarvarogaiḥ pramucyate ||
3.42.9
someśvaraṃ mahāliṅgaṃ śivasya paramātmakam |
dṛṣṭvā pramucyate pāpādbhuktiṃ muktiṃ ca vindati ||
3.42.10
mallikārjunasaṃjñaścāvatāraḥ śakarasya vai |
dvitīyaḥ śrīgirau tāta bhaktābhīṣṭaphalapradaḥ ||
3.42.11
saṃstuto liṅgarūpeṇa sutadarśanahetutaḥ |
gatastatra mahāprītyā sa śivaḥ svagirermune ||
3.42.12
jyotirliṅgaṃ dvitīyaṃ taddarśanātpūjanānmune |
mahāsukhakaraṃ cānte muktidaṃ nātra saṃśayaḥ ||
3.42.13
mahākālābhidhastātāvatāraḥ śaṅkarasya vai |
ujjayinyāṃ nagaryāṃ ca babhūva svajanāvanaḥ ||
3.42.14
dūṣaṇākhyāsuraṃ yastu vedadharmapramardakam |
ujjayinyāṃ gataṃ vipradveṣiṇaṃ sarvanāśanam ||
3.42.15
vedaviprasutadhyāto huṅkāreṇaiva sa drutam |
bhasmasātkṛtavāṃstaṃ ca ratnamāla nivāsinam ||
3.42.16
taṃ hatvā sa mahākālo jyotirliṅgasvarūpataḥ |
devaiḥ sa prārthito'tiṣṭhatsvabhaktaparipālakaḥ ||
3.42.17
mahākālāhvayaṃ liṅgaṃ dṛṣṭvābhyarcya prayatnataḥ |
sarvānkāmānavāpnoti labhate parato gatim ||
3.42.18
oṅkāraḥ parameśāno dhṛtaḥ śambhoḥ parātmanaḥ |
avatāraścaturtho hi bhaktābhīṣṭaphalapradaḥ ||
3.42.19
vidhinā sthāpito bhaktyā svaliṅgātpārthivānmune |
prādurbhūto mahādevo vindhyakāmaprapūrakaḥ ||
3.42.20
devaiḥ samprārthitastatra dvidhārūpeṇa saṃsthitaḥ |
bhuktimuktiprado liṅgarūpo vai bhaktavatsalaḥ ||
3.42.21
praṇave caiva coṅkāranāmāsīlliṅgamuttamam |
parameśvaranāmāsītpārthivaśca munīśvara ||
3.42.22
bhaktābhīṣṭaprado jñeyo yo'pi dṛṣṭo'rcito mune |
jyotirliṅge mahādivye varṇite te mahāmune ||
3.42.23
kedāreśo'vatārastu pañcamaḥ paramaśśivaḥ |
jyotirliṅgasvarūpeṇa kedāre saṃsthitaḥ sa ca ||
3.42.24
naranārāyaṇākhyau yāvavatārau harermune |
tatprārthitaḥ śivastatsthaiḥ kedāre himabhūdhare ||
3.42.25
tābhyāṃ ca pūjito nityaṃ kedāreśvarasaṃjñakaḥ |
bhaktābhīṣṭapradaḥ śambhurdarśanādarcanādapi ||
3.42.26
asya khaṇḍasya sa svāmī sarveśo'pi viśeṣataḥ |
sarvakāmapradastāta so'vatāraḥ śivasya vai ||
3.42.27
bhīmaśaṅkarasaṃjñastu ṣaṣṭhaḥ śambhormahāprabhoḥ |
avatāro mahālīlo bhīmāsuravināśanaḥ ||
3.42.28
sudakṣiṇābhidhaṃ bhaktaṃ kāmarūpeśvaraṃ nṛpam |
yo rarakṣādbhutaṃ hatvāsuraṃ taṃ bhaktaduḥkhadam ||
3.42.29
bhīmaśaṅkaranāmā sa ḍākinyāṃ saṃsthitaḥ svayam |
jyotirliṅgasvarūpeṇa prārthitastena śaṅkaraḥ ||
3.42.30
viśveśvarāvatārastu kāśyāṃ jāto hi saptamaḥ |
sarvabrahmāṇḍarūpaśca bhuktimuktiprado mune ||
3.42.31
pūjitaḥ sarvadevaiśca bhaktyā viṣṇvādibhiḥ sadā |
kailāsapatinā cāpi bhairaveṇāpi nityaśaḥ ||
3.42.32
jyotirliṅgasvarūpeṇa saṃsthitastatra muktidaḥ |
svayaṃ siddhasvarūpo hi tathā svapuri sa prabhuḥ ||
3.42.33
kāśīviśveśayorbhaktyā tannāmajapakārakāḥ |
nirliptāḥ karmabhirnityaṃ kevalyapadabhāginaḥ ||
3.42.34
tryambakākhyo'vatāro yaḥ so'ṣṭamo gautamītaṭe |
prārthito gautamenāvirbabhūva śaśimaulinaḥ ||
3.42.35
gautamasya prārthanayā jyotirliṅgasvarūpataḥ |
sthitastatrācalaḥ prītyā tanmuneḥ prītikāmyayā ||
3.42.36
tasya sandarśanātsparśādarcanācca maheśituḥ |
sarve kāmāḥ prasidhyanti tato muktirbhavedaho ||
3.42.37
śivānugrahatastatra gaṅgā nāmnā tu gautamī |
saṃsthitā gautamaprītyā pāvanī śaṅkarapriyā ||
3.42.38
vaidyanāthāvatāro hi navamastatra kīrtitaḥ |
āvirbhūto rāvaṇārthaṃ bahulīlākaraḥ prabhuḥ ||
3.42.39
tadānayanarūpaṃ hi vyājaṃ kṛtvā maheśvaraḥ |
jyotirliṅgasvarūpeṇa citābhūmau pratiṣṭhitaḥ ||
3.42.40
vaidyanātheśvaro nāmnā prasiddho'bhūjjagattraye |
darśanātpūjanādbhaktyā bhuktimuktipradaḥ sa hi ||
3.42.41
vaidyanātheśvaraśivamāhātmyamanuśāsanam |
paṭhatāṃ śṛṇvatāṃ cāpi bhuktimuktipradaṃ mune ||
3.42.42
nāgeśvarāvatārastu daśamaḥ parikīrtitaḥ |
āvirbhūtaḥ svabhaktārthaṃ duṣṭānāṃ daṇḍadaḥ sadā ||
3.42.43
hatvā dārukanāmānaṃ rākṣasaṃ dharmaghātakam |
svabhaktaṃ vaiśyanāthaṃ ca prārakṣatsupriyābhidham ||
3.42.44
lokānāmupakārārthaṃ jyotirliṅgasvarūpadhṛk |
santasthau sāmbikaḥ śambhurbahulīlākaraḥ paraḥ ||
3.42.45
tad dṛṣṭvā śivaliṅgaṃ tu mune nāgeśvarābhidham |
vinaśyanti drutaṃ cārcya mahāpātakarāśayaḥ ||
3.42.46
rāmeśvarāvatārastu śivasyaikādaśaḥ smṛtaḥ |
rāmacandrapriyakaro rāmasaṃsthāpito mune ||
3.42.47
dadau jayavaraṃ prītyā yo rāmāya sutoṣitaḥ |
āvirbhūtaḥ ya liṅgastu śaṅkaro bhaktavatsalaḥ ||
3.42.48
rāmeṇa prārthito'tyarthaṃ jyotirliṅgasvarūpataḥ |
santasthau setubandhe ca rāmasaṃsevito mune ||
3.42.49
rāmeśvarasya mahimādbhuto'bhūdbhuvi cātulaḥ |
bhuktimuktipradaścaiva sarvadā bhaktakāmadaḥ ||
3.42.50
taṃ ca gaṅgājalenaiva snāpayiṣyati yo naraḥ |
rāmeśvaraṃ ca sadbhaktyā sa jīvanmukta eva hi ||
3.42.51
iha bhuktvākhilānbhogāndevatādurllabhānapi |
ataḥ prāpya paraṃ jñānaṃ kaivalyaṃ mokṣamāpnuyāt ||
3.42.52
ghuśmeśvarāvatārastu dvādaśaḥ śaṅkarasya hi |
nānālīlākaro ghuśmānandado bhaktavatsalaḥ ||
3.42.53
dakṣiṇasyāṃ diśi mune devaśailasamīpataḥ |
āvirbabhūva sarasi ghuśmāpriyakaraḥ prabhuḥ ||
3.42.54
sudehāmāritaṃ ghuśmāputraṃ sākalyato mune |
tuṣṭastadbhaktitaḥ śambhuryo'rakṣadbhaktavatsalaḥ ||
3.42.55
tatprārthitaḥ sa vai śambhustaḍāge tatra kāmadāḥ |
jyotirliṅgasvarūpeṇa tasthau ghuśmeśvarābhidhaḥ ||
3.42.56
taṃ dṛṣṭvā śivaliṅgaṃ tu samabhyarcya ca bhaktitaḥ |
iha sarvasukhaṃ bhuktvā tato muktiṃ ca vindati ||
3.42.57
iti te hi samākhyātā jyotirliṅgāvalī mayā |
dvādaśapramitā divyā bhuktimuktipradāyinī ||
3.42.58
etāṃ jyotirliṅgakathāṃ yaḥ paṭhecchṛṇuyādapi |
mucyate sarvapāpebhyo bhuktiṃ muktiṃ ca vindati ||
3.42.59
śatarudrābhidhā ceyaṃ varṇitā saṃhitā mayā |
śatāvatārasatkīrtiḥ sarvakāmaphalapradā ||
3.42.60
imāṃ yaḥ paṭhate nityaṃ śṛṇuyādvā samāhitaḥ |
sarvānkāmānavāpnoti tato muktiṃ labhed dhruvam ||
3.42.60.c1
iti śrīśivamahāpurāṇe tṛtīyāyāṃ śatarudrasaṃhitāyāṃ sanatkumāranandīśvarasaṃvāde dvādaśajyotirliṅgāvatāravarṇanaṃ nāma dvicatvāriṃśo'dhyāyaḥ ||
3.42.60.p2
samāpteyaṃ tṛtīyā śatarudrasaṃhitā ||