Shivapurana 3.5: pañcamo'dhyāyaḥ | ekonaviṃśatiśivāvatāravarṇanam
Śivapurāṇa (complete text) 3.5
- Language
- Sanskrit
Contents
- 3.5.59 — 5 parts
pañcamo'dhyāyaḥ | ekonaviṃśatiśivāvatāravarṇanam
3.5.1
śiva uvāca |
daśame dvāpare vyāsastridhāmā nāmato muniḥ |
himavacchikhare ramye bhṛgutuṅge nagottame ||
3.5.2
tatrāpi mama putrāśca bhṛgvādyāḥ śrutisammitāḥ |
balabandhurnarāmitraḥ ketuśṛṅgastapodhanaḥ ||
3.5.3
ekādaśe dvāpare tu vyāsaśca trivṛto yadā |
gaṅgādvāre kalau nāmnā tapo'haṃ bhavitā tadā ||
3.5.4
lambodaraśca lambākṣaḥ keśalambaḥ pralambakaḥ |
tatrāpi putrāścatvāro bhaviṣyanti dṛḍhavratāḥ ||
3.5.5
dvādaśe parivartte tu śatatejāśca vedakṛt |
tatrāpyahaṃ bhaviṣyāmi dvāparānte kalāviha ||
3.5.6
hemakañcukamāsādya nāmnā hyatriḥ pariplutaḥ |
vyāsasyaiva sahāyārthaṃ nivṛttipatharopaṇaḥ ||
3.5.7
sarvajñaḥ samabuddhiśca sādhyaḥ śarvaḥ suyoginaḥ |
tatreti putrāścatvāro bhaviṣyanti mahāmune ||
3.5.8
trayodaśe yuge tasmindharmo nārāyaṇaḥ sadā |
vyāsastadāhaṃ bhavitā balirnāma mahāmuniḥ ||
3.5.9
vālakhilyāśrame gandhamādane parvatottame |
sudhāmā kāśyapaścaiva vasiṣṭho virajāḥ śubhāḥ ||
3.5.10
yadā vyāsastu rakṣākhyaḥ paryāye tu caturdaśe |
vaṃśa āṅgirase tatra bhavitāhaṃ ca gautamaḥ ||
3.5.11
tatrāpi mama te putrā bhaviṣyanti kalau tadā |
atrirdavaśadaścaiva śravaṇo'tha śraviṣkaṭaḥ ||
3.5.12
vyāsaḥ pañcadaśe trayyāruṇirvai dvāpare yadā |
tadā'haṃ bhavitā vedaśirā vedaśirastathā ||
3.5.13
mahāvīryaṃ tadastraṃ ca vedaśīrṣaśca parvataḥ |
himavatpṛṣṭhamāsādya sarasvatyāstathottare ||
3.5.14
tatrāpi mama catvāro bhaviṣyanti sutā dṛḍhāḥ |
kuṇiśca kuṇibāhuśca kuśarīraḥ kunetrakaḥ ||
3.5.15
vyāso yuge ṣoḍaśe tu yadā devo bhaviṣyati |
tadā yogapradānāya gokarṇo bhavitā hyaham ||
3.5.16
tatraiva ca supuṇyaṃ ca gokarṇaṃ nāma tadvanam |
tatrāpi yoginaḥ putra bhaviṣyantyambusammitāḥ ||
3.5.17
kāśyapo'pyuśanāścaiva cyavano'tha bṛhaspatiḥ |
te'pi tenaiva mārgeṇa gamiṣyanti śivālayam ||
3.5.18
parivartte saptadaśe vyāso devakṛtañjayaḥ |
guhāvāsīti nāmnāhaṃ himavacchikhare śubhe ||
3.5.19
mahālaye mahottuṅge śivakṣetraṃ himālayam |
utathyo vāmadevaśca mahāyogo mahābalaḥ ||
3.5.20
parivartte'ṣṭādaśe tu yadā vyāsa ṛtañjayaḥ |
śikhaṇḍīnāmato'haṃ taddhimavacchikhare śubhe ||
3.5.21
siddhakṣetre mahāpuṇye śikhaṇḍī nāma parvataḥ |
śikhaṇḍino vanaṃ vāpi yatra siddhaniṣevitam ||
3.5.22
vācaḥśravā rucīkaśca śyāvāsyaśca yatīśvaraḥ |
ete putrā bhaviṣyanti tatrāpi ca tapodhanāḥ ||
3.5.23
ekonaviṃśe vyāsastu bharadvājo mahāmuniḥ |
tadāpyahaṃ bhaviṣyāmi jaṭī mālī ca nāmataḥ ||
3.5.24
himavacchikhare tatra putrā me'mbudhisaṃhitāḥ |
hiraṇyanāmā kauśalyo lokākṣī pradhimistathā ||
3.5.25
parivartte viṃśatime bhavitā vyāsa gautamaḥ |
tatrāṭṭahāsanāmāhamaṭṭahāsapriyā narāḥ ||
3.5.26
tatraiva himavatpṛṣṭhe aṭṭahāso mahāgiriḥ |
devamānuṣayakṣendrasiddhacāraṇasevitaḥ ||
3.5.27
tatrāpi mama te putrā bhaviṣyanti suyoginaḥ |
sumanturbarbarirvidvān kabandhaḥ kuśikandharaḥ ||
3.5.28
ekaviṃśe yuge tasmin vyāso vācaḥ śravā yadā |
tadāhaṃ dāruko nāma tasmāddāruvanaṃ śubham ||
3.5.29
tatrāpi mama te putrā bhaviṣyanti suyoginaḥ |
plakṣo dārbhāyaṇiścaiva ketumān gautamastathā ||
3.5.30
dvāviṃśe parivarte tu vyāsaḥ śuṣmāyaṇo yadā |
tadāpyahaṃ bhaviṣyāmi vārāṇasyāṃ mahāmuniḥ ||
3.5.31
nāmnā vai lāṅgalī bhīmo yatra devāḥ savāsavāḥ |
drakṣyanti māṃ kalau tasminbhavaṃ caiva halāyudham ||
3.5.32
tatrāpi mama te putrā bhaviṣyanti sudhārmikāḥ |
bhallavī madhupiṅgaśca śvetaketustathaiva ca ||
3.5.33
parivartte trayoviṃśe tṛṇabinduryadā muniḥ |
śveto nāma tadā'haṃ vai girau kālañjare śubhe ||
3.5.34
tatrāpi mama te putrā bhaviṣyanti tapasvinaḥ |
uśiko bṛhadaśvaśca devalaḥ kavireva ca ||
3.5.35
parivartte caturviṃśe vyāso yakṣo yadā vibhuḥ |
śūlī nāma mahāyogī tadyuge naimiṣe tadā ||
3.5.36
tatrāpi mama te śiṣyā bhaviṣyanti tapasvinaḥ |
śālihotro'gniveśaśca yuvanāśvaḥ śaradvasuḥ ||
3.5.37
pañcaviṃśe yadā vyāsaḥ śaktirnāmnā bhaviṣyati |
tadāpyahaṃ mahāyogī daṇḍī muṇḍīśvaraḥ prabhuḥ ||
3.5.38
tatrāpi mama te śiṣyā bhaviṣyanti tapasvinaḥ |
chagalaḥ kuṇḍakarṇaśca kumbhāṇḍaśca pravāhakaḥ ||
3.5.39
vyāsaḥ parāśaro yarhi ṣaḍviṃśe bhavitāpyaham |
puraṃ bhadravaṭaṃ prāpya sahiṣṇurnāma nāmataḥ ||
3.5.40
tatrāpi mama te śiṣyā bhaviṣyanti tapasvinaḥ |
ulūko vidyutaścaiva śambūko hyāśvalāyanaḥ ||
3.5.41
saptaviṃśe yadā vyāso jātūkarṇyo bhaviṣyati |
prabhāsatīrthamāśritya somaśarmā tadāpyaham ||
3.5.42
tatrāpi mama te śiṣyā bhaviṣyanti tapasvinaḥ |
akṣapādaḥ kumāraścolūko vatsastathaiva ca ||
3.5.43
aṣṭāviṃśe dvāpare tu parāśarasuto hariḥ |
yadā bhaviṣyāmi vyāso nāmnā dvaipāyanaḥ pramuḥ ||
3.5.44
tadā ṣaṣṭhena cāṃśena kṛṣṇaḥ puruṣasattamaḥ |
vasudevasutaḥ śreṣṭho vāsudevo bhaviṣyati ||
3.5.45
tadāpyahaṃ bhaviṣyāmi yogātmā yogamāyayā |
lokavismāpanārthāya brahmacāriśarīrakaḥ ||
3.5.46
śmaśāne mṛtamutsṛjya dṛṣṭvā kāyamanāmayam |
brāhmaṇānāṃ hitārthāya praviṣṭo yogamāyayā ||
3.5.47
divyāṃ meruguhāṃ puṇyāṃ tvayā sārdhaṃ ca viṣṇunā |
bhaviṣyāmi tadā brahman laṅkulī nāma nāmataḥ ||
3.5.48
kāyāvatāra ityevaṃ siddhakṣetraṃ paraṃ tadā |
bhaviṣyati suvikhyātaṃ yāvad bhūmirdhariṣyati ||
3.5.49
tatrāpi mama te śiṣyā bhaviṣyanti tapasvinaḥ |
kuśikaścaiva gargaśca mitraḥ kauruṣya eva ca ||
3.5.50
yogino brāhmaṇā vedapāragā ūrddhvaretasaḥ |
prāpya māheśvaraṃ yogaṃ gamiṣyanti śivaṃ puram ||
3.5.51
vaivasvate'ntare samyak proktā hi paramātmanā |
yogeśvarāvatārāśca sarvāvarteṣu suvratāḥ ||
3.5.52
vyāsāścaivāṣṭaviṃśatkā dvāpare dvāpare vibho |
yogeśvarāvatārāśca prārambhe ca kalau kalau ||
3.5.53
yogeśvarāvatārāṇāṃ yogamārgapravarddhakāḥ |
mahāśaivāśca catvāraḥ śiṣyāḥ pratyekamavyayāḥ ||
3.5.54
ete pāśupatāḥ śiṣyā bhasmoddhūlitavigrahāḥ |
rudrākṣamālābharaṇāstripuṇḍrāṅkitamastakāḥ ||
3.5.55
śiṣyā dharmaratāḥ sarve vedavedāṅgapāragāḥ |
liṅgārcanaratā nityaṃ bāhyābhyantarataḥ sthitāḥ ||
3.5.56
bhaktyā mayi ca yogena dhyānaniṣṭhā jitendriyāḥ |
saṅkhyayā dvādaśādhikyaśataṃ ca gaṇitā budhaiḥ ||
3.5.57
ityetadvai mayā proktamavatāreṣu lakṣaṇam |
manvādikṛṣṇaparyantamaṣṭāviṃśadyugakramāt ||
3.5.58
tatra śrutisamūhānāṃ vidhānaṃ brahmalakṣaṇam |
bhaviṣyati tadā kalpe kṛṣṇadvaipāyano yadā ||
3.5.59
ityevamuktvā brahmāṇamanugṛhya maheśvaraḥ |
punaḥ samprekṣya deveśastatraivāntaradhīyata ||
3.5.59.c1
iti śrīśivamahāpurāṇe tṛtīyāyāṃ śatarudrasaṃhitāyāṃ śivāvatāropākhyāne ekonaviṃśatiśivāvatāravarṇanaṃ nāma pañcamo'dhyāyaḥ ||
3.5.59.p2
śrīgaṇeśāya namaḥ ||
3.5.59.p3
śrīgaurīśaṅkarābhyāṃ namaḥ ||
3.5.59.p4
śrīśivamahāpurāṇam ||
3.5.59.p5
tṛtīyāyāṃ śatarudrasaṃhitāyāṃ
Other recensions (1)
- Śivapurāṇa (complete text) — Sanskrit