Pramāṇa · Search · About · API

Shivapurana 3.9: navamo'dhyāyaḥ | bhairavāvatāralīlāvarṇanam

Śivapurāṇa (complete text) 3.9

Language
Sanskrit

Contents

navamo'dhyāyaḥ | bhairavāvatāralīlāvarṇanam

3.9.1

nandīśvara uvāca |
sanatkumāra sarvajña bhairavīmaparāṃ kathām |
śṛṇu prītyā mahādoṣasaṃhartrīṃ bhaktivarddhinīm ||

3.9.2

tatsānnidhyaṃ bhairavo'pi kālo'bhūtkālakālanaḥ |
sa devadevavākyena bibhratkāpālikaṃ vratam ||

3.9.3

kapālapāṇirviśvātmā cacāra bhuvanatrayam |
nātyākṣīccāpi taṃ devaṃ brahmahatyāpi dāruṇā ||

3.9.4

pratitīrthaṃ bhraman nāpi vimukto brahmahatyayā |
ataḥ kāmārimahimā sarvo'pi hyavagamyatām ||

3.9.5

pramathaiḥ sevyamāno'pi hyekadā viharanharaḥ |
kāpāliko yayau svairī nārāyaṇaniketanam ||

3.9.6

athāyāntaṃ mahākālaṃ trinetraṃ sarpakuṇḍalam |
mahādevāṃśasambhūtaṃ pūrṇākāraṃ ca bhairavam ||

3.9.7

papāta daṇḍavadbhūmau taṃ dṛṣṭvā garuḍadhvajaḥ |
devāśca munayaścaiva devanāryyaḥ samantataḥ ||

3.9.8

atha viṣṇuḥ praṇamyainaṃ prayātaḥ kamalāpatiḥ |
śirasyañjalimādhāya tuṣṭāva vividhaiḥ stavaiḥ ||

3.9.9

sānando'tha hariḥ prāha prasannātmā mahāmune |
kṣīrodamathanodbhūtāṃ padmāṃ padmālayāṃ mudā ||

3.9.10

viṣṇuruvāca |
priye paśyābjanayane dhanyāsi subhage'naghe |
dhanyo'haṃ devi suśroṇi yatpaśyāvo jagatpatim ||

3.9.11

ayaṃ dhātā vidhātā ca lokānāṃ prabhurīśvaraḥ |
anādiḥ śaraṇaḥ śāntaḥ puraḥ ṣaḍviṃśasammitaḥ ||

3.9.12

sarvajñaḥ sarvayogīśaḥ sarvabhūtaikanāyakaḥ |
sarvabhūtāntarātmā'yaṃ sarveṣāṃ sarvadaḥ sadā ||

3.9.13

ye vinidrā viniḥśvāsāḥ śāntāḥ dhyānaparāyaṇāḥ |
dhiyā paśyanti hṛdaye so'yaṃ padme samīkṣatām ||

3.9.14

yaṃ vidurvedatattvajñā yogino yatamānasāḥ |
arūpo rūpavānbhūtvā so'yamāyāti sarvagaḥ ||

3.9.15

aho vicitraṃ devasya ceṣṭitaṃ parameṣṭhinaḥ |
yasyākhyāṃ bruvato nityaṃ na dehaḥ so'pi dehabhṛt ||

3.9.16

taṃ dṛṣṭvā na punarjanma labhyate mānavairbhuvi |
so'yamāyāti bhagavāṃstryambakaḥ śaśibhūṣaṇaḥ ||

3.9.17

puṇḍarīkadalāyāme dhanye me'dya vilocane |
yad dṛśyate mahādevo hyābhyāṃ lakṣmi maheśvaraḥ ||

3.9.18

dhigdhikpadaṃ tu devānāṃ paraṃ dṛṣṭvā na śaṅkaram |
labhyate yatra nirvāṇaṃ sarvaduḥkhāntakṛttu yat ||

3.9.19

devatvādaśubhaṃ kiñciddevaloke na vidyate |
dṛṣṭvāpi sarve deveśaṃ yanmuktiṃ na labhāmahe ||

3.9.20

nandīśvara uvāca |
evamuktvā hṛṣīkeśaḥ samprahṛṣṭatanūruhaḥ |
praṇipatya mahādevamidamāha vṛṣadhvajam ||

3.9.21

viṣṇuruvāca |
kimidaṃ devadevena sarvajñena tvayā vibho |
kriyate jagatāṃ dhātrā sarvapāpaharāvyaya ||

3.9.22

krīḍeyaṃ tava deveśa trilocana mahāmate |
kiṃ kāraṇaṃ virūpākṣa ceṣṭitaṃ te smarārdana ||

3.9.23

kimarthaṃ bhagavañchambho bhikṣāṃ carasi śaktipa |
saṃśayo me jagannātha eṣa trailokyarājyada ||

3.9.24

nandīśvara uvāca |
evamuktastataḥ śambhurviṣṇunā bhairavo haraḥ |
pratyuvācādbhutotiḥ sa viṣṇuṃ hi vihasanprabhuḥ ||

3.9.25

bhairava uvāca |
brahmaṇastu śiraśchinnamaṅgulyāgranakhena ha |
tadaghaṃ pratihantuṃ hi carāmyetad vrataṃ śubham ||

3.9.26

nandīśvara uvāca |
evamukto maheśena bhairaveṇa ramāpatiḥ |
smṛtvā kiñcinnataśirāḥ punarevamajijñapat ||

3.9.27

viṣṇuruvāca |
yathecchasi tathā krīḍa sarvavighnāpanodaka |
māyayā māṃ mahādeva nācchādayitumarhasi ||

3.9.28

nābhīkamalakośāttu koṭiśaḥ kamalāsanāḥ |
kalpe kalpe purā hyānsastvanniyogabalādvibho ||

3.9.29

tyaja māyāmimāṃ deva dustarāmakṛtātmabhiḥ |
brahmādayo mahādeva māyayā tava mohitāḥ ||

3.9.30

yathāvadanugacchāmi ceṣṭitaṃ te śivāpate |
tavaivānugrahācchambho sarveśvara satāṅgate ||

3.9.31

saṃhārakāle samprāpte sadevānnikhilānmunīn |
lokānvarṇāśramavato hariṣyasi yadā hara ||

3.9.32

tadā kṛte mahādeva pāpaṃ brahmavadhādikam |
pāratantryaṃ na te śambho svairaṃ krīḍatyato bhavān ||

3.9.33

atīta brahmaṇāṃ hyasthnāṃ srakkaṇṭhe tava bhāsate |
tathāpyanugatā śambho brahmahatyā tavānagha ||

3.9.34

kṛtvāpi sumahatpāpaṃ yastvāṃ smarati mānavaḥ |
ādhāraṃ jagatāmīśa tasya pāpaṃ vilīyate ||

3.9.35

yathā tamo na tiṣṭheta sannidhāvaṃśumālinaḥ |
tathaiva tava yo bhaktaḥ pāpaṃ tasya vrajetkṣayam ||

3.9.36

yaścintayati puṇyātmā tava pādāmbujadvayam |
brahmahatyākṛtamapi pāpaṃ tasya vrajetkṣayam ||

3.9.37

tava nāmānuraktā vāgyasya puṃso jagatpate |
apyadrikūṭatulitaṃ nainastamanubādhate ||

3.9.38

paramātmanparaṃ dhāma svecchābhidhṛtavigraha |
kutūhalaṃ taveśedaṃ kṛpaṇādhīnateśvara ||

3.9.39

adya dhanyo'smi deveśa yanna paśyanti yoginaḥ |
paśyāmi taṃ jaganmūrttiṃ parameśvaramavyayam ||

3.9.40

adya me paramo lābhastvadya me maṅgalaṃ param |
taṃ dṛṣṭvāmṛtatṛptasya tṛṇaṃ svargāpavargakam ||

3.9.41

itthaṃ vadati govinde vimalā padmayā tayā |
manorathavatī nāma bhikṣā pātre samarpitā ||

3.9.42

bhikṣāṭanāya devo'pi niragātparayā mudā |
anyatrāpi mahādevo bhairavaścāttavigrahaḥ ||

3.9.43

dṛṣṭvānuyāyinīṃ tāṃ tu samāhūya janārdanaḥ |
samprārthayad brahmahatyāṃ vimuñca tvaṃ triśūlinam ||

3.9.44

brahmahatyovāca |
anenāpi miṣeṇāhaṃ saṃsevyāmuṃ vṛṣadhvajam |
ātmānaṃ pāvayiṣyāmi tvapunarbhavadarśanam ||

3.9.45

nandīśvara uvāca |
sā tatyāja na tatpārśvaṃ vyāhṛtāpi murāriṇā |
tamūce'tha hariṃ śambhuḥ smerāsyo bhairavo vacaḥ ||

3.9.46

bhairava uvāca |
tvadvākpīyūṣapānena tṛpto'smi bahumānada |
svabhāvo'yaṃ hi sādhūnāṃ yattvaṃ vadasi māpate ||

3.9.47

varaṃ vṛṇīṣva govinda varado'smi tavānagha |
agraṇīrmama bhaktānāṃ tvaṃ hare nirvikāravān ||

3.9.48

no mādyanti tathā bhaikṣyairbhikṣavo'pyatisaṃskṛtaiḥ |
yathā mānasudhāpānairnanu bhikṣāṭanajvarāḥ ||

3.9.49

nandīśvara uvāca |
ityākarṇya vacaḥ śambhorbhairavasya parātmanaḥ |
suprasannataro bhūtvā samavocanmaheśvaram ||

3.9.50

viṣṇuruvāca |
eṣa eva varaḥ ślāghyo yadahaṃ devatādhipam |
paśyāmi tvāndevadeva manovāṇīpathātigam ||

3.9.51

adabhreyaṃ sudhādṛṣṭiranayā me mahotsavaḥ |
ayattnanidhilābho'yaṃ vīkṣaṇaṃ hara te satām ||

3.9.52

aviyogo'stu me deva tvadaṅghriyugalena vai |
eṣa eva varaḥ śambho nānyaṃ kaścid vṛṇe varam ||

3.9.53

śrībhairava uvāca |
evaṃ bhavatu te tāta yattvayoktaṃ mahāmate |
sarveṣāmapi devānāṃ varadastvaṃ bhaviṣyasi ||

3.9.54

nandīśvara uvāca |
anugṛhyeti daityāriṃ kendrādribhuvane caran |
bheje'vimuktanagarīṃ nāmnā vārāṇasīṃ purīm ||

3.9.55

kṣetre praviṣṭamātre'tha bhairave bhīṣaṇākṛtau |
hāhetyuktvā brahmahatyā pātālaṃ cāviśattadā ||

3.9.56

kapālaṃ brāhmaṇaḥ sadyo bhairavasya karāmbujāt |
papāta bhuvi tattīrthamabhūtkāpālamocanam ||

3.9.57

kapālaṃ brahmaṇo rudraḥ sarveṣāmeva paśyatām |
hastātpatantamālokya nanarta parayā mudā ||

3.9.58

vidheḥ kapālaṃ nāmuñcatkaramatyantadussaham |
parasya bhramataḥ kvāpi tatkāśyāṃ kṣaṇato'patat ||

3.9.59

śūlino brahmaṇo hatyā nāpaiti sma ca yā kvacit |
sā kāśyāṃ kṣaṇato naṣṭā tasmātsevyā hi kāśikā ||

3.9.60

kapālamocanaṃ kāśyāṃ yaḥ smarettīrthamuttamam |
ihānyatrāpi yatpāpaṃ kṣipraṃ tasya praṇaśyati ||

3.9.61

āgatya tīrthapravare snānaṃ kṛtvā vidhānataḥ |
tarpayitvā pitṝndevānmucyate brahmahatyayā ||

3.9.62

kapālamocanaṃ tīrthaṃ puraskṛtvā tu bhairavaḥ |
tatraiva tasthau bhaktānāṃ bhakṣayannaghasantatim ||

3.9.63

kṛṣṇāṣṭamyāṃ tu mārgasya māsasya parameśvaraḥ |
āvirbabhūva sallīlo bhairavātmā satāṃ priyaḥ ||

3.9.64

mārgaśīrṣāsitāṣṭamyāṃ kālabhairavasannidhau |
upoṣya jāgaraṃ kurvanmahāpāpaiḥ pramucyate ||

3.9.65

anyatrāpi naro bhaktyā tad vrataṃ yaḥ kariṣyati |
sajāgaraṃ mahāpāpairmukto yāsyati sadgatim ||

3.9.66

anekajanmaniyutairyatkṛtaṃ jantubhistvagham |
tatsarvaṃ vilayaṃ yāti kālabhairavadarśanāt ||

3.9.67

kālabhairavabhaktānāṃ pātakāni karoti yaḥ |
sa mūḍho duḥkhito bhūtvā punardurgatimāpnuyāt ||

3.9.68

viśveśvare'pi ye bhaktā no bhaktāḥ kālabhairave |
te labhante mahāduḥkhaṃ kāśyāṃ caiva viśeṣataḥ ||

3.9.69

vārāṇasyāmuṣitvā yo bhairavaṃ na bhajennaraḥ |
tasya pāpāni varddhante śuklapakṣe yathā śaśī ||

3.9.70

kālarājaṃ na yaḥ kāśyāṃ pratibhūtāṣṭamīkujam |
bhajettasya kṣayaṃ puṇyaṃ kṛṣṇapakṣe yathā śaśī ||

3.9.71

śrutvākhyānamidaṃ puṇyaṃ brahmahatyāpanodakam |
bhairavotpattisaṃjñaṃ ca sarvapāpaiḥ pramucyate ||

3.9.72

bandhanāgārasaṃstho'pi prāpto'pi vipadaṃ parām |
prādurbhāvaṃ bhairavasya śrutvā mucyeta saṅkaṭāt ||

3.9.72.c1

iti śrīśivamahāpurāṇe tṛtīyāyāṃ śatarudrasaṃhitāyāṃ bhairavāvatāralīlāvarṇanaṃ nāma navamo'dhyāyaḥ ||

3.9.72.p2

śrīgaṇeśāya namaḥ ||

3.9.72.p3

śrīgaurīśaṅkarābhyāṃ namaḥ ||

3.9.72.p4

śrīśivamahāpurāṇam ||

3.9.72.p5

tṛtīyāyāṃ śatarudrasaṃhitāyāṃ

Other recensions (1)

Linked texts (5)